Read Kapampangan Efeso 5 Bible Online

Efeso 5 - Kapampangan bible

Efeso 5

¹Anti na ning anak na kayung pakamalan ning Dios, tularan ye.

²Mibiebie kayung mitmung lugud antimo i Cristo; uli na ning kaluguran na katamu, inain na ing bie na bilang mabanglung ain at sakripisyung makaligaya king Dios.

³Pinili na kayu ning Dios, inya e kailangan mabanggit man kekayu ing nanumang bage tungkul king pamakipangalugud, karinatan o kasakiman.

⁴Antimu rin ing nanumang bage manong o salitang alang kabaldugan at pamamiru a ala king lugal. Nune, pasalamat kayu king Dios.

⁵Balu yu king ala lang dake king Kayarian nang Cristo at ning Dios ding taung makipangalugud, ding marinat a pamibiebie o sakim, uling ing kasakiman anti ya namang pamanyambang idolo.

⁶E kayu paipirait kenuman king kapamilatan na ning mangasanting dang amanu, uling king dapat a anti kaniti karin ya mimimua ing Dios karing taung e mamintu keya.

⁷Inya e kayu makiabe karela.

⁸King panaun a milabas atyu kayu king karalumduman, oneng ngeni atyu kayu king sala uling atyu kayu king Ginu. Mibiebie kayu antimo ing karapatdapat dang daptan ding taung atyu king sala.

⁹Uling ing mabibie king sala mamungang kayapan, katuliran, at katutuan.

¹⁰Pagaralan yu nung nanu ing bage makaligaya king Ginu.

¹¹E kayu makikiabe karing dapat da ring tau a e mamungang mayap, ding bage a bunga na ning dalumdum. Nune ibulalag yu la king masala. (

¹²Nung king bage makarine la mang banggitan ding dapat a daraptan dang makalihim.)

¹³Miririnan kamalinawan ing sablang milalantad king masala,

¹⁴at ing sablang mipamalino maging masala. Inya masasabi, Migising ka, ikang matudtud, talakad kang ibat karing mete! At aslagan na kang Cristo.

¹⁵Inya ingatan yung masalese ing kekayung pamibiebie. Mibiebie kayung anting biasa at e anting mangmang.

¹⁶Samantalanan yung makarapat mayap king balang oportunidad, uling marawak ing mag-ari king kasalukuyan.

¹⁷E kayu sa mangmang; pakibaluan yu nung nanu ing kaburian na ning Ginu.

¹⁸E kayu maglasing uling makasira mu iti kekayu, nune pakikuanan yung mikatmuan kayu king Banal a Espiritu.

¹⁹Ipasiag yu ing kekayung panamdaman king kapamilatan da ring salmo, himno at kantang banal. King mabilug yung pusu, magkanta kayu at munie kapurian king Ginu.

²⁰At parati ye sanang pasalamatan ing Dios Ibpa, uli da ring sablang bage, king lagyu na ning Ginu tamung Jesu-Cristo.

²¹Uli na ning kekayung pamangalang kang Cristo, pasakup yu ing sarili yu king metung at metung.

²²Ikayung babai, pasakup kayu karing sarili yung asawa antimo ing pamipasakup yu king Ginu.

²³Uling ing lalaki ya ing buntuk na ning asawa na, antimo i Cristo ya ing buntuk ning iglesia a katawan na. At ya naman ing Talapagligtas na.

²⁴Nung makananu neng sasakupan Cristo ing iglesia, makanyan munaman ing babai, kailangan yang pasakup lubus king sarili nang asawa.

²⁵Ikayung lalaki, luguran ye ing sarili yung asawa, antimo ing lugud nang Cristo king iglesia. Inain na ing bie na para king iglesia

²⁶ban mitalaga ya ing iglesia king Dios king upaya na ning amanu kaybat neng lininis at inos.

²⁷Depat na iti ban miyarap ya king sarili na ing iglesia a mitmung leguan, alang dungis o kulumpis nanuman, banal at alang kapintasan.

²⁸Kailangan neng luguran ning lalaki ing sarili nang asawa antimong sarili nang katawan. Ing lalaking malugud king asawa na, malugud ya king sarili na. (

²⁹Alang taung masama king sarili nang katawan, nune pakanan ne at sisesen, antimo ing daraptan nang Cristo king iglesia.

³⁰Dake na katamu ning katawan na.)

³¹Antimo ing sasabian na ning kasulatan, Uli na niti, lakuan ne ning lalaki ing tata na at ima at makiabe ya king asawa na, at ilang adua maging metung la.

³²Ating maragul a katutuan a pakilala na niti, ing kaugnayan nang Cristo king iglesia ing amanuan ku.

³³Oneng mangaintulid munaman iti kekayu: ikayung lalaki, luguran ye ing sarili yung asawa antimo ing lugud yu king kekayung sarili; babae, igalang ye ing sarili yung asawa.