Read Kapampangan 2 Timoteo 1 Bible Online

2 Timoteo 1 - Kapampangan bible

2 Timoteo 1

¹Ibat ya iting sulat kang Pablo a meging apostol nang Cristo Jesus uli na ning kaburian ning Dios ban manaral king mipangakung bie a atyu na kekatamu king pangayabe tamu kang Cristo Jesus.

²Timoteo, pakamalan kung anak: Mananu na sanang manatili keka ing grasya, lunus, at kapayapan a manibat king Dios Ibpa at kang Cristo Jesus a kekatamung Ginu.

³Pasalamat ku king Dios a susuyuan ku king malinis a konsiensia, antimo ing depat da ring kanakung makatua, ngening parati da kang agaganaka king kanakung pamanalangin aldo't bengi.

⁴Tune da kang buring akit ban miganap ing kanakung tula, lalung-lalu na neng agaganaka ku ing kekang lua.

⁵E ku malyaring kalinguan ing katapatan na ning kekang kasalpantayanan a kalupa na ning kasalpantayanan nang apu mung i Lois[1] at i Eunice a ima mu. Balu ku king angga ngeni atyu keka iting kasalpantayanan.

⁶Uli na niti, ipaganaka ku keka king pagkapilitan mu sanang tuparan ing katungkulan[2] a tinggap mu king Dios inyang timpak ku la ding gamat ku king buntuk mu.

⁷Uling ing Espiritung binie na ning Dios kekatamu e na katamu papainan a lub nune ing Espiritu na kakatmuan na katamung upaya, lugud at pamangawat king sarili.

⁸Inya e mu pikarine ing pamipatutu mu king kekatamung Ginu ni ing kakung pangasukul king uli na. Nune, magtiwala ka king upaya ning Dios, at kuanan mu ing kekang dake king kasakitan alang-alang king Mayap a Balita.

⁹Linigtas na katamu at inaus ban maging balen na, e uli na ning depat tamu; nune uli na ning sarili nang parasan at grasya. Binie na iti kekatamu king kapamilatan nang Cristo Jesus bayu pa melalang ing panaun.

¹⁰At ngeni mipakilala iti inyang dinatang ya i Cristo Jesus a kekatamung Talapagligtas. Leko na ing upaya na ning kamatayan at pepakilala na ing bie alang angga king kapamilatan na ning Mayap a Balita.

¹¹King uli na niti, mitulduan kung apostol at talaturu ban ipanaral ke ing Mayap a Balita,

¹²at iti ya ing sangkan nung inya magdusa ku. Makanyan man, e ku pikakarine iti uling lubus keng akikilala ing kanakung panaligan at balu ku king agyu nang ingatan ing penibala na kanaku angga king paniatang na ning Aldo.

¹³Gawan mu lang pialimbawanan ding mayap a amanung tiru ku keka. Manatili ka king kasalpantayanan at lugud a atyu kekatamu king uli na ning pangayabe tamu kang Cristo Jesus.

¹⁴Ingatan mu ing sablang katutuan a mipanibala keka king saup na ning Banal a Espiritu a manuknangan kekatamu.

¹⁵E makalingad keka king likuan da ku ding sabla king probinsia na ning Asia, at pati na i Figelo ampon i Hermogenes.

¹⁶Mananu na sanang bendisyunan ne ning Dios ing pamilya nang Onesiforo uling pematulan na ku king maralas nang pamagbisita kanaku. E na ku pikarine agyang makasukul ku.

¹⁷Pilit na kung penintun inyang dinatang ya Roma angga king atagpuan na ku.

¹⁸Mananu na sanang ibie na ning Dios kang Onesiforo ing lunus na king Aldo ita. Balu mung masalese nung makananu na kung siyuan karin Efeso.