Read Kapampangan 2 Timoteo 4 Bible Online

2 Timoteo 4 - Kapampangan bible

2 Timoteo 4

¹Maigpit kung yuyutus keka king lagyu[4] na ning Dios at Cristo Jesus a matul karing mabie at mete, at alang-alang king pamagbalik na keti at Pamag-ari:

²ipanaral mu ing amanu na ning Dios, makapanaun man o ali; managkat ka, mangamanu ka, at munie sikanan lub karing tau, at ituru mu lang mitmung kapibabatan.

³Uling datang ing panaun a e ra pakiramdaman ding tau ing mayap a turu; nune, tukian da ing e mayap dang kaburian at mangalap lang talaturu da a magsalita mu karing bage a buri dang daramdaman.

⁴Gulutan da ing pamakiramdam king katutuan at makiramdam la karing kwentung e tutu.

⁵Oneng ika kawatan mu ing kekang sarili king sablang bage. Pibatan mu ing kasakitan. Daptan mu ing katungkulan na ning talapanaral king Mayap a Balita. Tuparan mu ing katungkulan mu bilang talasuyu na ning Dios.

⁶E lumuat misakripisyu na ku uling dinatang na ing oras na ning paglako ku keti king yatu.

⁷Mekilaban kung mayap king pamakiligligan. Atuparan ku na ing kanakung parasan. Menatili kung tapat king kasalpantayanan.

⁸Ngeni tanggapan ku ne ing korona na ning tagumpe a misadia para kanaku. At ing Ginu, ing banal a Ukum, ya ing miputung king korona king Aldo ita. E mu kanaku, nune pati na karing sablang malugud manenaya king paniatang nang pasibayu.

⁹Pagkapilitan mu sanang makapagbalik agad keni kanaku.

¹⁰Likuan na kung Demas uling apalsintan ne iting yatu; atyu ngeni karin Tesalonica. Minta ya Galacia i Cresente, i Tito naman king Dalmacia.

¹¹I Lucas ya mung kayabe ku ngeni. Panintunan me i Marcos at ituki me keni uling maragul ing malyari nang asaup kanaku.

¹²Pepapuntan ke Efeso i Tiquico.

¹³Potang munta ka keni pakidala me ing balabal a likuan ku kang Carpo karin Troas. Pakidala mu la naman ding libru ku, lalung-lalu na detang megawa king balat.

¹⁴Maragul ing kasiran a depat na kanakung Alejandro, ing platerong tangsu. Ing Dios ya nang balang singil ketang depat na.

¹⁵Mingat ka kang Alejandro uling titulan nang ustu ing kekatamung pamanaral.

¹⁶Alang sinaup kanaku king minuna kung pamakiarap king husgadu. Likuan da ku ding sabla. Patawaran na la sana ning Dios!

¹⁷Oneng inantabayanan na ku at dininan sikanan ning Ginu ban apanaral kung ganap ing amanu na ning Dios karing paganu; miligtas ku king asbuk na ning leon.

¹⁸Iligtas na ku ning Ginu king sablang e mayap at ya mu rin ing miyatad kanaku king Kayarian na. King Ginu ing ligaya king kapilan pa man! Amen.

¹⁹Ikomusta mu ku karing miyasawang Priscila at Aquila at king mabilug nang pamilyang Onesiforo.

²⁰Melakuan ya i Erasto karin Corinto, i Trofimo naman likuan ke karin Mileto uling masakit ya.

²¹Pagkapilitan mung miratang agad keni bayu datang ing panaun na ning dimla. Ipayabut da munaman di Eubulo, Pudente, Lino, Claudia, at ding sablang kapatad ing karelang komusta.

²²Ing Ginu mantabe ya king kekang espiritu. Ing grasya na ning Dios mantabe kekayung sabla.