Read Capanahua Matiye 10 Bible Online

Matiye 10 - Capanahua bible

Matiye 10

¹Zezú ɗí gunbɛʼɛri bôo a sére, a hí̧ kuriri kpɔ́ŋa ní têm ɓékéri, kpɔ́ŋa ŋgɛ́rɛ záŋmári̧ too rá̧ záŋmá kpɛrɛri too.

²Apotereri bôo a sére nɔ́, rɛŋ a kuriri ɓá: Titíláké ɓá Simɔŋ a kú ɗí nɛ́ ɓá Píyɛ́r rá̧ nyîn nɛ́ Anderé, Ják gun a Zebedé kuu nyîn nɛ́ Zâŋ,

³Filíp rá̧ Bartelemí; Toma rá̧ Matiye njuku mára̧ lari lambô; Ják gun a Alfé rá̧ Tadé,

⁴Simɔŋ, gun pû rá̧ Judas Ɛskariyót, mɛ̌ ka e zé Zezú.

⁵Zezú pé apotereri bôo a sére nɔ́ sé nzáʼapéna, a tɔ́ʼɔ hí̧ kuriri hɛ̧ ka kú e niŋáké ɓá: Í zi ná sé gel a njukuri ka zi tí ɓá Juyíf yáy, a í zi ná ri ɓil pû a Samaríri.

⁶Í sé ɓá gel a njuku Izirayɛ́lri ka kaw ɓá báŋa mbólé a ɓɔ́lakéri.

⁷Í sé, a i tɔ́ʼɔɓay, a sa ɓá: «Pû Mbây a Gáŋvbôn gí ɗɛ́ŋ dá!»

⁸Í ŋgɛ́rɛ záŋmári̧, a i toma hûlri, a i ŋgɛ́rɛ njuku ndɛ́ɓɛri, a i ní têm ɓékéri. Í ziŋ ɓǎŋ, i hí̧ ɓǎŋ kɔ́.

⁹Í zi ná mbí vbí̧rí̧lari a há̧na, malé lari a há̧na, malé gun mínya a há̧na, ka̧n ɓil ŋgú laa a wǎyri.

¹⁰Í zi ná mbí ŋgú gári, malé gári sére, malé sabɔʼɔ, malé kâ̧w. Ɓayhí̧lé njukupéna erú ka ŋgboro, ɓay a ziŋ lâʼa sɔ̧́na a mɛ̌.

¹¹«Gelka, wǎyri mí ri ɓil gun pû, malé gáŋ pû a há̧na lé, i ɛ́ njuku ka kaw ɗɛ́ŋ ɓay a nyá wǎyri, dalé, i kaw ɔ gé lé ka̧ sêe ka i e kálay.

¹²Wǎyri, mí ri ɓil vûn a há̧na lé, i sa: “A vónáké, ké kaw kuu wǎyri.”

¹³Rá̧ njuku vûnkéri, mí nyá wǎyri lé, a vónáké a wǎyriké, ké kaw kuu kuriri. A kú mí zi nyá wǎyri yá lé, a vónáké a wǎyri, ké ré kuu a wǎyri.

¹⁴Dáy kú mí zi nyá wǎyri yá, a mí zi láɓay a wǎyri yá lé, i tɛ̧́ a vûnké malé a ɓil pûké, a i haŋ sôm siri a bɔʼɔ a wǎyri.

¹⁵Katína, mi sa hí̧ wǎyri gbátɓay, sêe walɓay a Gáŋvbôn lé, e ŋgbɔ́rɔ mambá hí̧ njuku pû nɔ́rí̧, tá ɓala a njuku pû a Sɔdɔ̂mri̧ rá̧ a Gɔmɔ̂rri.»

¹⁶«Í lá, mi pé wǎyri ɓá báŋa mbóléri sé bazeŋ a gáʼanri̧. Dáy, nûn a wǎyri ké ú ɓá báŋa a sôyri, a i kaw táŋ niŋ hɛ̧ a ŋgɛ́rɛ́ké, ɓá báŋa bûm.

¹⁷Í kó rá, ɓayhí̧lé njukuri e ɓá wǎyri sé ɓaraɓay kú e vbá̧ wǎyri ka ndêe a ɓil vûn gɔ́ŋ Gáŋvbôn a kuriri.

¹⁸Kú e ɓá wǎyri sé mbɛl a mbây tûlkaw rá̧ mbɛl a mbây pûri, ɓay a mǐ, ɓay a ké ná ɓá ŋgána hí̧ kuriri rá̧ njukuri ka zi tí ɓá Juyífri yáy.

¹⁹Dáy, kú mí ɓá wǎyri sé ɓaraɓay lé, law a wǎyri, ké zi ná ɛ́ ɓay, sé tûl ŋgboro ɓay, malé ɓayri ka i e sanáké. Gáŋvbôn e tɔ́ʼɔ wǎyri, ɓay ka i e sanáké núnmbɛ̧́nɛ́ nɔ́.

²⁰Ɓayhí̧lé, ɓaykéri tí gí a gel a wǎyri yá, ɓá Têm a Bâa wǎyri pé e saɓay hí̧ wǎyri.

²¹Nyîn e zé nyîn nɛ́, ɓay a kú í nɛ́, nǎŋnɔ́, bâa e niŋ nǎŋ ziŋ gun a mɛ̌ri̧. Gunri̧ e uru bére kuu bâa a kuriri, a í kuriri.

²²Njukuri too e fɔny wǎyri ɓay a mǐ, dáy njuku ka ŋgbá ɓá béláké ka̧ kɔ́rɔ́ké, e ziŋ pɛ̧́na.

²³Njukuri mí ɓá wǎyri tɔ́ʼɔsêe a ɓil pû a há̧na lé, i ŋgú sé pû a féké. Katína, mi sa hí̧ wǎyri gbátɓay, i tí ɔ́rɔ́ ŋgú ɗɔ́ŋ pû ka tísiri a Izirayɛ́lri yá, ka Gun a njuku e gínay.

²⁴Gun mbɛl hɛ̧ a há̧na zi ndé njuku tɔ́ʼɔ nɛ́ hɛ̧ ka hɔ̧́na bɔʼɔ mbêw yá, malé njukupéna a há̧na zi ndé bákáwa a mɛ̌ ka hɔ̧́ná bɔʼɔ mbêw yá.

²⁵Belɓá kú niŋ gun mbɛl hɛ̧ ɓá báŋa njuku tɔ́ʼɔ nɛ́ hɛ̧, rá̧ njukupéna ɓá báŋa bákáwa a mɛ̌. Rá̧ kú mí ɗí njuku vûn ɓá Sata̧n, a njuku a ɓil vûn a mɛ̌ri̧, kú e ɗí kuriri ɓá hí̧ lé!»

²⁶«Dáy, í zi ná ŋgú wɔ́w a njuku a há̧na. Hɛ̧ ka mú too e tɛ̧́ kɔ̧ kála rá̧ hɛ̧ a múnáké too, njukuri e túnáké.

²⁷Ɓay ka mi sa hí̧ wǎyri a ɓil tirí̧ma, i sa a ɓil a sêe, ka ɓay ka kú ɗɛʼɛlɛ hí̧ wǎyri, i sa ɓá gbénáké ka tûl vûn ka sâa.

²⁸Í zi ná ŋgú wɔ́w a njukuri ka í ɓá hay mûn baa, ka a zi ma ɓay a í têm mûn nyá. Dáy i ŋgú wɔ́w a Gáŋvbôn, ka ma ɓay a í hay mûn rá̧ têm mûn too a ɓil gáŋ hɔrɛ.

²⁹Kú zi zé yɛlri sére, ka mínya mbêw yá lé? Dáy, yɛl mbêw zi ma to vbú siri táŋ Gáŋvbôn Bâa wǎyri, ké zibɔʼɔké yá.

³⁰A wǎyri, tâny tûl a wǎyri kú kɛ̧́ too.

³¹Dáy, i ŋgú wɔ́w yá! Í ndé yɛlri ɓá ŋgɛ̧́náké too a nɛ́rɛ̧!»

³²«Njuku mí sa a mbɛl a njukuri ɓá, ké ɓá njuku a mǐy, mǐ kɔ́, mi e sa a mbɛl a Bâa a mǐ ka e a nûnalê, ɓá ké ɓá njuku a mǐ.

³³Dáy njuku mí sa a mbɛl a njukuri ɓá ké zi tu mí nyáy, mǐ kɔ́, mi e sa a mbɛl a Bâa a mǐ ka e a nûnalê, ɓá mi zi tu nɛ́ nyá.»

³⁴«Í zi ná kɛrɛ ɓá, mi gí ɓá a vónáké gí tísiri, mi zi gí ɓá a vónáké yá, mi gí ɓá bére.

³⁵Katína, mi gí ɗém bâa kuu gun, gun lɔŋɔ́ kuu mâa a mɛ̌, gunfáy kuu máfáy a mɛ̌.

³⁶Nǎŋnɔ́, njuku a ɓil vûn a manárí̧, pé e kaw ɓá njuku ŋgá̧na a manárí̧.

³⁷Njuku ka zi bâa a mɛ̌ rá̧ mâa a mɛ̌ ndé mí, ma kaw ɓá njuku a mǐ nyá. Nǎŋnɔ́ kɔ́, njuku ka zi gun mɛ̌ a wɔ̧rɔ̧́njuku malé a wûnynjuku ndé mí, ma kaw ɓá njuku a mǐ nyá.

³⁸Njuku ka zi mbí dii vbatay a mɛ̌, a hol tɔ́ŋ mí nyáy, ma kaw ɓá njuku a mǐ nyá.

³⁹Njuku ka zi ɓay koro ndísɛ̌ʼɛ a mɛ̌, e ɓɔ́l ndísɛ̌ʼɛ a mɛ̌, a njuku ka ɓɔ́l ndísɛ̌ʼɛ a mɛ̌ ɓay a mǐ, e rezíŋ ndísɛ̌ʼɛ a mɛ̌.»

⁴⁰«Njuku a sí̧ lé too, ka nyá wǎyri, nyá mí. Nǎŋnɔ́, njuku a sí̧ lé too, ka nyá mí, ké nyá njuku ka pé mi gíy.

⁴¹Njuku ka nyá porofɛ́t, ɓay ka ké ɓá porofɛ́t, e ziŋ kpáʼandɔ̂ʼɔ péna a porofɛ́t, ka njuku ka nyá njuku a ndáráké, ɓay ka káwa a mɛ̌ ná ɓá ndáráké a mbɛl a Gáŋvbôn e ziŋ kpáʼandɔ̂ʼɔ péna a njuku a ndáráké.

⁴²Katína, mi sa hí̧ wǎyri gbátɓay, njuku ka hí̧ mbii ɓǎŋ, hí̧ gun a lélé mbêw a bazeŋ a gunbɔʼɔ níri̧, ɓay ka ké kaw ɓá gunbɔʼɔ ní, e ziŋ kpáʼandɔ̂ʼɔ péna a mɛ̌.»