Read Capanahua Matiye 11 Bible Online

Matiye 11 - Capanahua bible

Matiye 11

¹Gelka Zezú ɔrɔ saɓay hí̧ gunbɛʼɛri bôo a sére, ké kála a goló sé tɔ́ʼɔhɛ̧ hí̧ njukuri, a tɔ́ʼɔɓay lá pûri a ɓil kawké.

²Zâŋ Batís e ka vûn sɛl a láɓay a Kiris rá̧ hɛ̧ri̧ a ké niŋ. Ké pé gunbɛʼɛ a fékéri

³sé vbí Zezú Kiris ɓá: «Mɔ̌, pé kaw ɓá njuku pɛ̧́ njukuri ka e gína lé? Malé rú kaw zoko njuku a féké ɓáy lé?»

⁴Zezú sa hí̧ kuriri ɓá: «Kú sé sa hí̧ Zâŋ hɛ̧ a kú kó, ka a lá.

⁵Râ̧wri̧ kó gel, njuku bɔʼɔ belyári séséna ɓá béláké, njuku ndɛ́ɓɛri ziŋ ŋgɛ́rɛ, njuku súkú tí yári láɓay, hûlri toma, kú tɔ́ʼɔ Bélaɓay hí̧ njuku fóyári.

⁶Béla káwa hí̧ njuku ka zi ta̧ a ɓil láɓulaw a mɛ̌, ɓay tûl ní yáy!»

⁷Gelka, gunbɔʼɔ a Zâŋ Batísri rekála dáy, Zezú mbí ɓay a sa sé tûl a Zâŋ hí̧ njukuri ka e a gelké. Ké vbí kuriri ɓá: A̧hí̧ rá̧ i sé kónáké ka lawkɔ́r lé? Kâ̧wŋgbá ka kúna laŋ lé? Háy!

⁸Dáy a̧hí̧ i sé kónáké lé? Njuku ri gári a béláké lé? Háy! Njukuri ka ri gári a béláké e a ɓil béla káwa, a kaw a ɓil pû a mbâyri!

⁹Dáy a̧hí̧ i sé kónáké lé? Porofɛ́t a há̧na lé? Katína, dáy mi sa hí̧ wǎyri, ké ɓá njuku ka ndé porofɛ́t ɓáy.

¹⁰Zâŋ ɓá njuku ka Gáŋvbôn tí saɓay a mɛ̌ a ɓil Mbété ɓá: «Mɔ́ lá, mi e pé njuku nzáʼapéna a mǐ tí ɗambɛl hí̧ mɔ́, ɓay ké mɔny ŋgboro hí̧ mɔ́.»

¹¹Zezú sa ɓáy ɓá: Katína, njuku a há̧na ka ndé Zâŋ Batís zi tí yá, a tu ɓá, njuku ka hɔ̧́ nyá tapát a ɓil Pû a Gáŋvbôn, ndé nɛ́ ka hɔ̧́na.

¹²Tí a ɓil nâm ka Zâŋ Batís tɔ́ʼɔɓay ka̧ sénɛ́, njukuri ɗɔ́ŋ Pû a Gáŋvbôn a ŋgɛ́rɛ, dáy njuku ŋgɛ́rɛri kaw ɛ́ ŋgboro ɓay nyá pûké.

¹³Porofɛ́tri too rá̧ sáŋna a Mɔyíze saɓay a Pû a Gáŋvbôn, sé ka̧ nâm a Zâŋ Batís.

¹⁴Dáy, wǎy mí zi ɓay a lánáké lé, Zâŋ ɓá Eli, a kú saɓay a gína a mɛ̌.

¹⁵I lá ɓá táŋáké, ka wǎyri mí erú ka súkú lánákéy!

¹⁶«A̧hí̧, mi e ɓá lé njuku a ŋgɛŋnɛ́ nɛ́rí̧ lé? Kú kaw ɓá báŋa gun a léléri ka mára̧ kaw laɓára, dáy a nzé ŋgbɔ́ŋɔ a ŋgɔ̧rɔ̧ ɓay ziŋ há̧narí̧ a vbá̧nzáʼa:

¹⁷“Rú ul madokâ̧w ɓay nday, i zi ndá nday yá! Rú ɗí si̧ŋ réhûl, i zi réhûl yá!”

¹⁸Ɓayhí̧lé Zâŋ Batís gí, ké zi lâʼa hɛ̧ nyá, a nzó hɛ̧ nyá, dáy njukuri sa: “Í kó njuku nɛ́, e ka têm ɓéké.”

¹⁹Gun a njuku gí, ké lâʼa, a nzó, dáy njukuri sa i kó: “Njuku a ǎ̧y kɛrɛ ɓá, ɓay a lâʼa rá̧ nzó vôn! Ké kaw ɓá mbáŋa a njuku mára̧ lari lambôri rá̧ njuku niŋ ɓékéhɛ̧ri̧.” Dáy rɔ̧́na a Gáŋvbôn tɔ́ʼɔ mûn nɛ́ ɓá ndáráké ka ŋgboro a hɛ̧ niŋa a mɛ̌.»

²⁰Dáy, Zezú tí nzáʼa ziŋ njuku pûri, a ké niŋ hɛ̧sáʼamari̧ ɓá ŋgɛ̧́náké ka rúy, ɓayhí̧lé njukukéri zi fere káwa a kuriri yá. Dáy a sa:

²¹«Lelêe hí̧ mɔ́, mɔ̌ njuku Korazɛŋ, lelêe hí̧ mɔ́, mɔ̌ njuku Bɛtsayida! Ɓayhí̧lé hɛ̧sáʼamari̧ a kú niŋ a pû a wǎyri, kú mí niŋ ka Tîr rá̧ Sidɔ̂ŋ, ɗiɓaŋ dá ka njuku pûkéri e niŋ gel hûl, ka ri gári sêe, ka ɓá súgú nɔ́ tûl a kuriri, ka fere káwa a kuriri.

²²Katína, mi sa hí̧ wǎyri gbátɓay, sêe walɓay a Gáŋvbôn lé, e ŋgbɔ́rɔ mambá hí̧ wǎyri, tá ɓala a njuku a Sidɔ̂ŋ rá̧ Tîr.

²³A wǎyri njuku a Kapɛrnahûmri̧, i kɛrɛ ɓá Gáŋvbôn e ɓá wǎyri he sé nûnalê lé? Bɔʼɔ mbêw yá, ké e ɗere wǎyri sé pû hûlri! Ɓayhí̧lé hɛ̧sáʼamari̧ ka Gáŋvbôn niŋ a gel a wǎyri, mí niŋ ka Sɔdɔ̂m, pû Sɔdɔ̂m tí ɓewa yá.

²⁴Dáy, mi sa hí̧ wǎyri gbátɓay, sêe walɓay a Gáŋvbôn, e ŋgbɔ́rɔ mambá hí̧ wǎyri, tá ɓala a njuku a Sɔdɔ̂mri̧.»

²⁵A falké, Zezú sa: «Bâa, Gáŋmbây a nûnalê rá̧ a tísiri, mi zi awá hí̧ mɔ́, ɓay ka mɔ ten táŋa hɛ̧ ka mɔ́ ɓá mú njuku a rɔ̧́nakéri, rá̧ njuku hɛ̧túnari̧ hí̧ njuku a tɛ̧́wkéri.

²⁶Katína Bâa, ɓá nǎŋ pé mɔ zi ɓá hɛ̧ké ké niŋ.

²⁷Bâa a mǐ, ɓá hɛ̧ too kɔ̧ ɓil ndɔ̂ʼɔní, njuku a há̧na zi tu Gun nyá, mí zi tí ɓá Bâa yáy. Nǎŋnɔ́ njuku a há̧na zi tu Bâa yá, mí zi tí ɓá Gun nyáy, rá̧ njukuri ka Gun zi tɔ́ʼɔ Bâa hí̧ kuriri.

²⁸I gí gel ní, wǎyri ka ta̧ ka hóla a zínáké, a mi hí̧ wǎyri ɔʼɔ.

²⁹Í mbí jûk a mǐ ka̧n sôl a wǎyri, a i pɔŋ mí tɔ́ʼɔhɛ̧ hí̧ wǎyri, ɓayhí̧lé mi kaw ɓá njuku law a vónáké, táŋ hɔ̧́ mûn, i e ziŋ ɔʼɔ ɓay a wǎyri.

³⁰Katína jûk ka mí ɗí wǎyri ɓá í hol, zi tí ɓá hóla a zínáké yá, ɓá hóla ka zi yáy.»