Read Capanahua Matiye 14 Bible Online

Matiye 14 - Capanahua bible

Matiye 14

¹A ɓil nâmké nɔ́, Herod ka kaw ɓá mbây a tísiri a Galílê, láɓay a Zezú, sa hí̧ njukupéna a mɛ̌ri̧: «Ɓá Zâŋ Batís lé!

²Ké retoma ka hûl lé! Há̧na ɓaykénɔ́ pé ké ziŋ kpɔ́ŋa niŋ hɛ̧sáʼamari̧ le!»

³Dáy hɛ̧ ka tí niŋ ɓá, mbây Herod hí̧nzáʼa ɓá kú ŋgbá Zâŋ, a ŋgá̧ vbú vûn sɛl, ɓay a Heródiyad wûny a Filíp, nyîn nɛ́.

⁴Ɓayhí̧lé Zâŋ sa hí̧ nɛ́ ɓá: «Ŋgboro zi tí hí̧ mɔ́, ɓay mɔ́ nyá Heródiyad ɓá wûny a mɔ̌ nyá.»

⁵Mbây Herod zi ɓay í nɛ́ dáy, a ŋgú wɔ́w a Juyífri, ɓayhí̧lé kú mbí Zâŋ ɓá báŋa porofɛ́t a há̧na.

⁶Dáy a sêe a kú kaw záymûn kɛrɛ mbuŋa a mbây Herod, gun lɔŋɔ́ a Heródiyad ndá nday a bazeŋ a njukuri a kú ɗí kuriri gíy, dáy mbây Herod kó ndayké ri lawɛ́.

⁷Nǎŋnɔ́, ké há mûn nɛ́ ɓá ké e hí̧ nɛ́ hɛ̧ too a ké e vbínáké.

⁸Ka ŋgboro a nzáʼa nzɛ́rɛ a mâa a mɛ̌, gun a lɔŋɔ́ sa hí̧ nɛ́ ɓá: «Mɔ́ kúŋ tûl a Zâŋ Batís vbú ɓil kpáŋgbáráŋ hí̧ mí a ŋgɛŋnɛ́.»

⁹Nǎŋnɔ́ law a mbây Herod yírí sé tûlké, dáy ɓay tûl hɛ̧hána a mɛ̌ a mbɛl njukuri a ké ɗí kuriri dáy, ké hí̧nzáʼa ɓá kú kúŋ tûl a Zâŋ hí̧ nɛ́.

¹⁰A goló, ké pé njuku sé kúŋ tûl a Zâŋ Batís a ɓil vûn sɛl.

¹¹Kú kúŋ tûl a Zâŋ ka̧n ɓil kpáŋgbáráŋ, gí hí̧ gun a lɔŋɔ́, dáy, ké sé hí̧ mâa a mɛ̌.

¹²Gunbɔʼɔ a Zâŋri̧ sé mbí hûlké, a sé goro, a kála sé saɓayké hí̧ Zezú.

¹³Gelka Zezú láɓayké, ké kála sé ri ɓil kumbôn, ɓay a tɛ̧́ sé kaw hɛʼɛ a falgel ɓá ɗínáké. Dáy njukuri ɓá ŋgɛ̧́náké lá ɓilké, a uru a ɓil pûri ɓórí ɓórí, a tɔ́ŋ nɛ́ ka bɔʼɔ.

¹⁴Gelka Zezú tɛ̧́ a ɓil kumbôn, ké kó njukuri ɓá ŋgɛ̧́náké, a kó kuriri sehaŋ dáy, a tí ŋgɛ́rɛ njuku záŋmá a kuriri.

¹⁵A bɔʼɔlêw, gunbɔʼɔ a Zezúri gí gbɛ́ŋɛ́ a sa: «Gélé e a falgel mambá, sêe kaw ríŋa dá kɔ́, mɔ́ sa hí̧ njukuri, kú resé ɓil pû, a kú sé zé lâʼa sɔ̧́na.»

¹⁶Dáy Zezú resa hí̧ kuriri ɓá: «Nɛ́rɛ̧ rekála zi tí yá, í hí̧ kuriri lâʼa sɔ̧́na, wǎyri ka mûn a wǎyri.»

¹⁷Dáy, kú resa hí̧ nɛ́ ɓá: « Rú erú a gelé biré ndíɓí rá̧ nzwîy sére.»

¹⁸Dáy Zezú sa: «Í ɓá hí̧ mí gí.»

¹⁹Falké, ké sa hí̧ njukuri ɓá kú kaw tísiri a tûl kpâa, dáy a mbí biré ndíɓí rá̧ nzwîy sére ráy, a gbaŋ nûn nɛ́ sé nûnalê, a zi awá hí̧ Gáŋvbôn. Ké haw ɓilké, a ɓá hí̧ gunbɛʼɛri ɓá kú wal hí̧ njukuri.

²⁰Njukuri too lâʼa a mbá, gunbɛʼɛri fá̧ gázínáké mbá tol bôo a sére.

²¹Njukuri ka sɔ̧́lâʼaké bon a kuriri kumrá̧ké ndíɓí, táŋ kɛ̧́ wûnynjukuri rá̧ gun a léléri.

²²Núnmbɛ̧́nɛ́ a falké, ké ɓá gunbɛʼɛri he kumbôn tí ɗambɛl, ɓay kú sé helkála mbii a ŋgboro sá̧. Mɛ̌ ké ɔ fal ɓay a vbara njukuri kú rekála.

²³A fal vbara njukuri, ké he sé tûl kon hɛʼɛ, sé gɔ́ŋ Gáŋvbôn. Gelka bɔʼɔlêw ká̧y, ké kaw hɛʼɛ a sá̧,

²⁴kumbôn e ka lawgel a mbii dá, gbélém mbii laŋ kumbôn, ɓayhí̧lé kúna kú gí a ŋgɛ́rɛ a mbɛl a kuriri.

²⁵A tûl gel a pélé, Zezú séséna ka tûl mbii ɓay sé gel a gunbɛʼɛri.

²⁶Gelka gunbɛʼɛri kó nɛ́ gí ka tûl mbii, wɔ́w ŋgbá kuriri, kú kɛrɛ ɓá: «Vbôn!» A vbá̧nzáʼa.

²⁷Dáy Zezú saɓay ɓá gbénáké hí̧ kuriri: «Í ŋgú wɔ́w yá, ɓá mǐ!»

²⁸Lé Píyɛ́r sa hí̧ nɛ́ ɓá: «Gáŋmbây, mí ɓá mɔ̌ lé, mɔ́ sa, a mi sé tûl mbii gé goló kɔ́.»

²⁹Dáy Zezú sa: «Mɔ́ gí.» Píyɛ́r tɛ̧́ a ɓil kumbôn a tí séséna a tûl mbii ɓay a sé gel a Zezú.

³⁰Dáy Píyɛ́r kó, ɓá kúna kú ŋgɛ́rɛ mambá, a niŋ wɔ́w. A goló, ké tí riŋ mbii, dáy a vbá̧nzáʼa a sa: «Gáŋmbây a mǐ, mɔ́ pɛ̧́ mí!»

³¹Núnmbɛ̧́nɛ́, Zezú ndara ndɔ̂ʼɛ a ŋgbá nɛ́, a sa: «Mɔ̌ njuku mbílaw tɛ̧́w yáŋ, ɓayhí̧rá̧ mɔ́ manyɓay a ɓil lawɔ́ lé?»

³²Dáy Zezú rá̧ Píyɛ́r réhe kumbôn, nǎŋnɔ́ kúná regí ew.

³³Gárá gunbɛʼɛri ka e a ɓil kumbôn gí huku mbɛlɛ́ a sa: «Katína mɔ́ ɓá gbát Gun a Gáŋvbôn!»

³⁴Kú ɔrɔ he mbii, a ka̧ nzáʼa héna ka tísiri a Zenɛ̧zarɛ́t.

³⁵Njuku pûkéri gé tu Zezú, dáy a saɓay géna a mɛ̌ ma ɓil pû a gbaŋkéri too, nǎŋnɔ́ njukuri fa̧ njuku záŋmári̧ ɓórí ɓórí gí gel a Zezú.

³⁶Njukuri vú hí̧ Zezú ɓá, ké pɔŋ njuku záŋmári̧ kú ɗa ɓá nzáʼa gári a mɛ̌ mbêw yáŋ, nǎŋnɔ́ njukuri too ka ɗa gári a mɛ̌ ziŋ ŋgɛ́rɛ.