Read Capanahua Matiye 17 Bible Online

Matiye 17 - Capanahua bible

Matiye 17

¹Nâm zêe a falké, Zezú ɗa Píyɛ́r, Ják rá̧ Zâŋ nyîn a Ják. Ké ɓá kuriri sé tûl kon ɓá gáŋáké, a gé kawrú hɛʼɛ kuu kuriri.

²Ka nûn a kuriri, Zezú fere mûn nɛ́; nûn nɛ́ táʼa ɓá báŋa sêe rá̧ laa a mɛ̌ puku ɓá báŋa geltáŋa.

³Núnmbɛ̧́nɛ́, gunbɛʼɛri nɔ́ ka sáy, kó Mɔyíze rá̧ Eli, kaw fɔ́ŋ sa̧a kuu Zezú.

⁴Dáy Píyɛ́r sa hí̧ Zezú: «Gáŋmbây, belɓá ná kaw gelé. Mɔ̌, mí zibɔʼɔké, mi e zá gbáʼari sáy a gelé, mbêw ɓá a mɔ̌, mbêw ɓá a Mɔyíze rá̧ mbêw ɓá a Eli.»

⁵Píyɛ́r kaw saɓay ɓáy, gelka mbúsany ɗere gí guku kuriri, dáy a ɓil mbúsânyké, ŋgboro kɔ́ŋ a há̧na gbé gí, a sa: «Njuku nɛ́ ɓá Gun zína a mǐ. Mɛ̌ pé niŋ lawrína a mǐ. Í lá nɛ́!»

⁶Gelka gunbɛʼɛri láɓayké, wɔ́w ŋgbá kuriri, kú lé guku siri.

⁷Zezú ta̧m gí gbaŋa a kuriri dáy a ɗa kuriri a sa: «Í uru, í ŋgú wɔ́w yá!»

⁸Kú gbaŋ nûn a kuriri dáy, a kó ɓá Zezú hɛʼɛ.

⁹Gelka kú kaw ɗere a tûl kon a gáŋáké, Zezú vbara kuriri a sa: «Í zi ná saɓay hɛ̧ ka i koy hí̧ njuku a há̧na mbêw, ka̧ sêe ka Gun a njuku e toma a hûl.»

¹⁰Dáy gunbɛʼɛri vbí Zezú ɓá: «Ɓayhí̧ gáŋnjuku tɔ́ʼɔ sáŋnari̧ sa ɓá Eli e gí ɗambɛl hí̧ Kiris lé?»

¹¹Zezú fere a sa: «Katína, belɓá Eli ké regí, a gí mɔny hɛ̧ri̧ too kɔ̧ ka ŋgboroké rá ɓáy.

¹²Dáy mǐ, mi sa hí̧ wǎyri ɓá: Eli gí dá, dáy njukuri zi tu nɛ́ nyá, ka yáw nɛ́, ɓá báŋké a kú ziy. Nǎŋnɔ́, pé Gun a njuku ka mûn nɛ́ kɔ́, kú e ɓá nɛ́ tɔ́ʼɔsêe.»

¹³Dáy gunbɛʼɛri tu ɓá ɓay Zâŋ Batís pé Zezú kaw sa hí̧ kuriri.

¹⁴Gelka Zezú rá̧ gunbɛʼɛri gí ka̧ gel ka njukuri erúy, njuku a há̧na ta̧m gí huku siri a mbɛlɛ́,

¹⁵a sa: «Gáŋmbây, mɔ́ kósêe a gun a mǐ. Têm ɓéké kaw dɔʼɔlɔ nɛ́, niŋ nɛ́ lé, sêe há̧na lé, ké lé hɔrɛ, sêe a há̧na lé, ké lé mbii.

¹⁶Mi ɓá nɛ́ gí gel a gunbɔʼɔri dáy kú zi ma ɓay a ŋgɛ́rɛ nɛ́ nyá.»

¹⁷Zezú sa ɓá gbénáké: «Í kaw ɓá ɓéké njukuri, táŋ láɓulaw! Nâm daw a̧ní, mi e kaw kuu wǎyri ɓáy lé? Bɔʼɔ daw a̧ní mi ikilaw ní ɓay tûl a wǎyri lé? Í ɓá gunké hí̧ mí gí.»

¹⁸Zezú pom têm ɓéké, dáy ké tɛ̧́ ka mûn nɛ́, núnmbɛ̧́nɛ́, gun ziŋ ŋgɛ́rɛ.

¹⁹Falké gunbɛʼɛri, ta̧m gí gbɛ́ŋɛ́ a ké kaw hɛʼɛ a vbí nɛ́: «Ɓayhí̧ rú zi ma ní têm ɓéké nɔ́ nyá lé?»

²⁰Zezú fere a sa: «Ɓayhí̧lé, láɓulaw a wǎyri hɔ̧́ nyá. Mí sa hí̧ wǎyri, katína: Wǎyri, mí erú ka láɓulaw ɓá báŋa tɛ̧́rɛ̧́ mutárde[6], i ma ɓay a i sa hí̧ kon nɛ́ ɓá: Mɔ́ lú a gelé gé sá̧, lé ké e lúna. Hɛ̧ ka e mbá wǎyri mbêw zi tí ná nyá. [

²¹Dáy ka ŋgboro a gɔ́ŋ Gáŋvbôn rá̧ ka ŋgboro a sáŋhɛ̧ mbêw yáŋ, pé njuku ma ní mára̧ têm ɓéké nɔ́.]»

²²Nâm a há̧na, gunbɔʼɔ a Zezúri mára̧ há̧narí̧ sé Galilê, dáy Zezú sa hí̧ kuriri ɓá: «Kú e ɓá Gun a njuku, ka̧n ɓil ndɔ̂ʼɔ a njukuri,

²³kú e í nɛ́, dáy, nâm a sáyké a fal hûl, ké e toma.» Dáy ɓayké nɔ́ sé law a gunbɛʼɛri.

²⁴Gelka Zezú rá̧ gunbɛʼɛri ka̧ Kapɛrnahûm, njukuri a kaw mára̧ lari lambô ɓay a niŋ péna a vûn a Gáŋvbôn, ta̧m gí gbaŋa Píyɛ́r, a vbí nɛ́ ɓá: «Gáŋnjuku a wǎyri wá, zi pú lambô ɓay a niŋ péna a vûn a Gáŋvbôn nyá lé?»

²⁵Dáy, Píyɛ́r zibɔʼɔké a sa ɓá: «Ɛ̧, ké kaw púnáké.» Gelka Píyɛ́r kaw rí ɓil vûn, Zezú mbí ɓay tí ɗambɛl a sa: «Simɔŋ, a kɛrɛ a mɔ̌ wá, a gé e pú lari lambô malé hɛ̧púna hí̧ mbây a tísiri nɛ́ lé? Ɓá gun pûri malé gɔ́rɔ́ri lé?»

²⁶Píyɛ́r sa ɓá: «Gɔ́rɔ́ri.» [7] Dáy Zezú sa hí̧ nɛ́: «Sa a goló ɓá gun pûri zi pû yá.

²⁷Dáy, belɓá ná ɓá hɛ́rɛ ka̧n law a njukuri yá. Ɓaykénɔ́, mɔ́ sé ɓil fâ̧w, a mɔ́ sé vbú ɓɔy, titíla nzwîy ka mɔ́ e ŋgbánáké, mɔ́ ara nzɛ́ʼɛ: Mɔ e ziŋ mínya, ka e ma pú lambô a mǐ kuu mɔ̌, mɔ́ mbí, a ɓá hí̧ kuriri.»