Read Capanahua Matiye 18 Bible Online

Matiye 18 - Capanahua bible

Matiye 18

¹A ɓil sɛl a sêeké nɔ́, gunbɔʼɔ a Zezúri gí gbɛ́ŋɛ́ dáy a gí vbí nɛ́ ɓá: «A gé ɓá gáŋnjuku a ɓil Pû a Gáŋvbôn lé?»

²Zezú ɗí gun a lélé a há̧na a ɓá nɛ́ gí ew mbɛl a kuriri

³a sa: «Mi sa hí̧ wǎyri, ɓá gbátɓay: Wǎyri, mí zi fere káwa a wǎyri ɓá báŋa gun a léléri yáy, i zi ma, ɓay a ri ɓil Pû a Gáŋvbôn nyá.

⁴Ɓaykénɔ́ pé njuku mí pɔ tûlé ɓá báŋa gun a lélé, ké e kaw ɓá gáŋnjuku a ɓil Pû a Gáŋvbôn.

⁵A njuku, ka nyá gun a lélé ɓá báŋa gun nɛ́, ɓay a mǐ, nyá mí ka mûn ní.»

⁶«Njuku mí niŋ rá̧ mbêw a bazeŋ a gun láɓulaw a mǐri̧, mí lé ɓil ɓékéhɛ̧y, bel ndé ɓá kú ŋgá̧ gáŋ saw ka̧n solé, a kú sɔʼɔrɔ nɛ́ vbú mbii lúkí.

⁷Lelêe hí̧ njuku a tísiriri, ɓay tûl ɓá njukuri lé ɓil ɓékéhɛ̧! Ɓékéhɛ̧ri̧ erú katína, dáy lelêe hí̧ njuku ka ɓékéhɛ̧kéri e gí ka ŋgboro a mɛ̌!

⁸Dáy, ka ŋgboro a ndɔ̂ʼɔ malé bɔʼɔ, pé niŋ rá̧ pé mɔ lé ɓil ɓékéhɛ̧ lé, mɔ́ kúŋ kuriri kɔ̧ kpâa ɓá a ɗínáké. Ɓayhí̧lé bel ndé hí̧ mɔ̌, ɓá mɔ́ ri ɓil káwa a ndísɛ̌ʼɛ ka ndɔ̂ʼɔ mbêw malé bɔʼɔ mbêw, ndé kaw ka ndɔ̂ʼɔ sére too malé bɔʼɔ sére too, a kú ɓá mɔ́ vbú ɓil hɔrɛ ka zi hú bɔʼɔ mbêw yáy.

⁹Nǎŋnɔ́, nûn nɔ́ mí ɓá mɔ́ lé ɓil ɓékéhɛ̧ lé, mɔ́ lú nɛ́ vbú kpâa ɓá ɗínáké, bel ndé hí̧ mɔ̌ ɓá, mɔ́ ri ɓil káwa a ndísɛ̌ʼɛ ka nûn mbêw, ndé koro nûn sére too, a kú ɓá mɔ́ vbú ɓil hɔrɛ ka zi hú bɔʼɔ mbêw yáy.»

¹⁰«Í ŋgbátûl a wǎyri ɓá béláké ɓay í zi ná yáw gun mbêw a bazeŋ a gun a lélé nɛ́rí̧! Mi sa hí̧ wǎyri gbátɓay, aŋnze a kuriri ew dát a mbɛl a Bâa a mǐ a nûnalê. [

¹¹Ɓayhí̧lé Gun a njuku gí ɓay a pɛ̧́ njukuri ka ɓɔ́l.[8]]

¹²A kɛrɛ a wǎyri wá, i sa ɓá hí̧ lé? Ɓá báŋa nɛ́, njuku a há̧na erú ka mbólé ísɔ́t, rá̧ mbêw a ɓilké mí ɓɔ́l, ké tí pɔŋ gárá mbólé bon zíndɔ̂ʼɔmbêw a zíndɔ̂ʼɔmbêw ka̧n tûl kon, ɓay a sé ɛ́ ɓala mbêwké nɔ́ ka ɓɔ́l yá lé?

¹³Mi sa hí̧ wǎyri, ké gé ziŋ mbólé nɔ́ lé, ké e erú ka mûnrína mambá ɓay tûl mbóléké, ndé ɓala bon zíndɔ̂ʼɔmbêw a zíndɔ̂ʼɔmbêw ka zi ɓɔ́l yáy.

¹⁴Ɓá mbêwké kɔ́, Bâa a wǎyri ka e a nûnalê, zi ɓá mbêw a bazeŋ gun a mɛ̌ri̧ ké ɓɔ́l yá.»

¹⁵Nyîn nɔ́, mí niŋ ɓékéhɛ̧ ziŋ mɔ́ lé, mɔ́ uru sé ziŋ nɛ́ tûl a wǎyri sére, a mɔ́ tɔ́ʼɔ hí̧ nɛ́ ɓékéhɛ̧ a mɛ̌. Ké mi lá mɔ́y, mɔ nyá nɛ́ dá.

¹⁶Dáy, ké mí zi lá mɔ́ nyá lé, mɔ́ ɗá njuku mbêw malé sére sé kuu mɔ̌, rá̧ ké ná ɓá báŋké ka ɓay a Gáŋvbôn sáy: «Hɛ̧ too ké mɔny, ka nûn a njukuri sére malé sáy.»

¹⁷Dáy, ké mí zi lá kuriri nyá lé, mɔ́ sa hí̧ Egilize. Ké mí zi lá Egilize yá lé, mɔ́ kó nɛ́ ɓá báŋa njuku ka zi láɓulaw yáy malé njuku mára̧ lari lambôri.

¹⁸Mi sa hí̧ wǎyri gbátɓay, hɛ̧ too ka i ŋgá̧ a tísiri, e ŋgá̧ a nûnalê kɔ́; Ka hɛ̧ too ka i zibɔʼɔké a tísiri, kú e zibɔʼɔké a nûnalê kɔ́.

¹⁹«Mi sa hí̧ wǎyri ɓáy ɓá, njuku sére a bazeŋ a wǎyri a tísiri, láhá̧narí̧ ɓay a vbí hɛ̧ a há̧na a ɓil gɔ́ŋ Gáŋvbôn, Bâa a mǐ ka e a nûnalê e hí̧ kuriri hɛ̧ a kú vbíy.

²⁰Ɓayhí̧lé, gelka njukuri sére malé sáy mára̧ ka rɛŋ ní, mi e a bazeŋ a kuriri.»

²¹Nǎŋnɔ́ Píyɛ́r ta̧m gí gbaŋa Zezú a vbí nɛ́: «Bɔʼɔké daw a̧ní, mi e vbá̧buma hí̧ nyîn ní a ké mí niŋ ɓékéhɛ̧ ziŋ mí lé? Ka̧ bɔʼɔké zíndɔ̂ʼɔsáy lé?»

²²Zezú sa, mi zi sa bɔʼɔké zíndɔ̂ʼɔsáy yá, ɓá bɔʼɔké bon zíndɔ̂ʼɔsáy, bɔʼɔ zíndɔ̂ʼɔsáy.

²³Ɓaykénɔ́, pé káwa Mbây a Pû a Gáŋvbôn ná ɓá báŋa a nɛ́: Mbây a há̧na ŋgá̧nzáʼa ɓá njukupéna a mɛ̌ri̧ kú gí rerú a fal péna sé tûl hɛ̧zíŋa a mɛ̌ri̧.

²⁴Gelka kú tí taʼa rerú a fal pénákéy, kú ɗa njuku a há̧na a ké tɔ́ŋ nɛ́ lari ɓá ŋgɛ̧́náké gí.

²⁵Njukupénáké zi ma rerú ka lariké yá. Dáy mbây hí̧nzáʼa ɓá kú ŋgbá nɛ́, mɛ̌ kuu wûny a mɛ̌, gun a mɛ̌ri̧ rá̧ hɛ̧zíŋa a mɛ̌ri̧ too, a kú zé ɓay a pú tûlé!

²⁶Dáy njukupéna huku siri a mbɛl a bákáwa a mɛ̌, a sa: «Mɔ́ ikilawɔ́ hí̧ mí, mí e vbí̧rí̧lariké too hí̧ mɔ́!»

²⁷Bákáwa a mɛ̌ kó nɛ́ sehaŋ, dáy a lú túna lariké a tûlé too, a pɔŋ nɛ́ kála.

²⁸Njukupéna rá̧y tɛ̧́, a gé ziŋ mbáŋa péna a mɛ̌ a ké tɔ́ŋ nɛ́ lari tɛ̧́w yáŋ[9]. Ké gé ŋgbá gári a mára̧ zúrú solé a sa: «Mɔ́ pú lari a mǐ ka e a tûlóy too!»

²⁹Mbáŋa péna a mɛ̌ huku siri, a gɔ́ŋ nɛ́ ɓá: «Mɔ́ ikilawɔ́ hí̧ mí, mi e pú mɔ́.»

³⁰Dáy njukupéna ráy zi zibɔʼɔké yá, a ŋgbá nɛ́ sé ka̧n vûn sɛl, zoko sêe a ké e pú lariké tooy.

³¹Gelka njukupéna a fékéri kó nǎŋnɔ́y, law a kuriri sé ɓayké dáy, kú sé saɓayké too hí̧ bákáwa a kuriri.

³²Nǎŋnɔ́ bákáwa pé ɗí njukupéna rá̧y gí, dáy a sa hí̧ nɛ́ ɓá: «Ɓéké njukupéna! Mi lú túna too a tûló, ɓay ka mɔ́ lé mbɛl ní, ka a gɔ́ŋ mí.

³³Dáy mɔ̌ kɔ́, ɓayhí̧ mɔ́ zi kósêe a mbáŋa a mɔ̌ ɓá báŋké ka mǐ, mi kósêe hí̧ mɔ́ nyá lé!

³⁴Bákáwa mɛ̌ ɗí hɛ́rɛ, a ɓá nɛ́ niŋ péna a ŋgɛ́rɛ́ké, ka̧ sêe ka pénáké e ma pú lari a tûlé too ka tɔ́ŋ nɛ́y.»

³⁵Dáy Zezú resa ɓáy: «Ɓá nǎŋnɔ́ pé Bâa a mǐ ka e a nûnalê, e niŋ ziŋ njuku ka zi vbá̧buma hí̧ nyîn nɛ́, ka law mbêw yáy.»