Read Capanahua Matiye 20 Bible Online

Matiye 20 - Capanahua bible

Matiye 20

¹Pû a Gáŋvbôn ɛ́ŋ há̧na kuu njuku wâʼa ví̧nyɛ a há̧na ka tɛ̧́ ka gel a pélé rím, ka a sé ɛ́ njukuri ɓay a kú sé niŋ péna a ɓil wâʼa ví̧nyɛ a mɛ̌.

²Kú láhá̧narí̧ ɓá péna sêe mbêw ɓá mínya mbêw[10], dáy a ké pé kuriri sé ɓil wâʼa ví̧nyɛ a mɛ̌.

³Ké tɛ̧́ ɓáy a sɛl a sêe zíndɔ̂ʼɔmbêw, a sé ziŋ njuku a fékéri ka kaw baa a ɓil ɓara táŋ pénay.

⁴Ké sa hí̧ kuriri: I sé wǎyri kɔ́, sé niŋ péna a ɓil wâʼa a mǐ, a mí pú wǎyri hɛ̧ ka e ma gelké.

⁵Dáy kú sé. Sêe gí law gel a tûl lé, ké retɛ̧ ɓáy, a gé ziŋ njukuri, a pé kuriri sé ɓil wâʼa a mɛ̌ ɓay a sé niŋ péna.

⁶Sɛl a sêe sáy a bɔʼɔlêw lé, ké retɛ̧ ɓá féké ɓáy, a gé ziŋ njukuri ka ew ka gbaŋ ŋgboro, dáy a sa hí̧ kuriri: Ɓayhí̧ i kaw a gelé sêe sêe táŋ niŋ péna há̧na lé?

⁷Dáy kú sa hí̧ nɛ́ ɓá: Ɓayhí̧lé njuku a há̧na zi ŋgá̧má ɓurú ɓay a niŋ péna nyá. Dáy, ké sa hí̧ kuriri, í sé niŋ péna a ɓil wâʼa ví̧nyɛ a mǐ.

⁸Gelka bɔʼɔlêw gí ká̧y, njuku wâʼa sa hí̧ njuku kɔ́rɔ́ wâʼa a mɛ̌, ɓá: Mɔ́ ɗí njukupénari̧ gí, a mɔ́ pú kuriri lari a kuriri. Mɔ́ tí ka tûl a njukuri, ka gí a fal, a mɔ́ ɔrɔ a tûl a njukuri ka tí gíy.

⁹Njukuri ka gí a fal gí, a gí nyá kuriri too mínya mbêw mbêw.

¹⁰Njukuri ka sé a tí pélé gí, a kɛrɛ ɓá kú e nyá ndé lé. Dáy a gí nyá kuriri kɔ́ mínya mbêw mbêw too ɓá báŋké ka njuku a ǎ̧wrí̧ nyáy.

¹¹Gelka kú nyá lariy, kú tí ŋgɔ̧rɔ̧ ɓay ziŋ njuku wâʼa,

¹²a sa: Njuku a fal nɛ́rí̧ niŋ péna ɓá sɛl a sêe mbêw yáŋ, lé mɔ hí̧ kuriri mínya mambɛ̧́nɛ́ kuu ɓurú, ka niŋ péna sêe sêe a ɓil hɔrɛ sêe.

¹³Dáy ké rerú hí̧ njuku mbêw a bazeŋ a kuriri: Mbáŋa a mǐ, mi zi niŋ ɓéké ziŋ mɔ́ nyá, tá ná láhá̧na ɓá mi e pú mɔ́ mínya mbêw yá lé?

¹⁴Mɔ́ nyá lari a mɔ̌, a mɔ́ kála. Mi e hí̧ njuku gína a fal nɔ́rí̧ mambɛ̧́nɛ́ kuu mɔ̌.

¹⁵Mi tí niŋ hɛ̧ ka mi ziy, ka hɛ̧zíŋa a mǐ nyá lé? Malé, mɔ niŋ sɛ́rɛ ɓay ka mi niŋ béla lé?

¹⁶Nǎŋnɔ́ Zezú sa ɓá, njukuri ka e a fal, e reɗambɛl, a njukuri ka e a mbɛl, e regí fal.

¹⁷Zezú kaw sé Zerúzalɛ̂m. Ké ɗí gunbɛʼɛri bôo a sére, kɔ̧ ɓórí, a tûl séna a sa hí̧ kuriri ɓá:

¹⁸I kó, ná e gé ɓá Zerúzalɛ̂m, a sá̧, kú e ŋgbá Gun a njuku hí̧ gáŋnjuku nzáʼaká̧nari̧ rá̧ njuku tɔ́ʼɔ sáŋnari̧. Kú e ɓá ɓay ŋgbá nɛ́ ɓay í nɛ́.

¹⁹Dáy, kú e ɓá nɛ́ hí̧ njukuri ka zi tu ɓay a Gáŋvbôn nyáy, ɓay kú sáʼa nɛ́, a kú vbá̧ nɛ́, a kú ɓara nɛ́ ka̧n tûl dii vbatay. Dáy nâm sáy a falké lé, ké e toma ka hûl.

²⁰Dáy mâa a gun a Zebedéri gí gbaŋa a Zezú kuu gun a mɛ̌ri̧, a gí huku mbɛlɛ́, ɓay a vbí nɛ́ hɛ̧.

²¹Dáy Zezú sa: A̧hí̧ mɔ zi lé? Ké rerú hí̧ nɛ́ ɓá: Mi zi ɓá, mɔ́ hí̧nzáʼa ɓá gun a mǐri̧ a sére nɛ́, kú ziŋ gelkáwa a ɓil pû a mɔ̌. Gun mbêw a ŋgboro lâʼa rá̧ gun a mbêw a ŋgboro a kpɔ́rɔ́ a mɔ̌.

²²Zezú resa: «Í zi tu hɛ̧ ka i vbíy yá. Í ma nzó a ɓil yoŋ tɔ́ʼɔsêe, ka mi e nzónáké lé?» «Kú sa: Rú ma ru̧.»

²³Ké ré sa hí̧ kuriri: «Katína i e nzó a ɓil yoŋ a mǐ. Dáy, ɓay a kaw ndɔ̂ʼɔ lâʼa rá̧ ndɔ̂ʼɔ kpɔ́rɔ́ a mǐ, zi gí ka gel ní nyá, gelkáwaké, ná zoko njukuri ka Bâa a mǐ, mɔny ɓay a kuriri.»

²⁴Gelka gunbɔʼɔ a bôo ǎ̧wrí̧ láɓayké, kú ɗí hɛ́rɛ ziŋ Ják rá̧ Zâŋ.

²⁵Dáy, Zezú ɗí gunbɛʼɛri too, a sa hí̧ kuriri: «Í tu ɓá táŋáké, njukuri a kú kó kuriri ɓá mbây a njukuri, kú kaw tûl a njukuri ɓá báŋa bákáwa, rá̧ gáŋnjukuri tɔ́ʼɔ kpɔ́ŋa a kuriri hí̧ njukuri.

²⁶Dáy, ké zi ná niŋ nǎŋnɔ́ a bazeŋ a wǎyri. Njuku mbêw a bazeŋ a wǎyri, mí zi ɓay a kaw ɓá gáŋnjuku lé, belɓá ké kaw ɓá njukupéna a wǎyri,

²⁷ka njuku mbêw a bazeŋ a wǎyri, mí zi ɓay a kaw ɓá njuku a tûlké lé, ké kaw ɓá koy a gázínákéri too.

²⁸Ɓayhí̧lé Gun a njuku mɛ̌ ka mûn nɛ́, zi gí ɓay a kú niŋ péna hí̧ nɛ́ nyá, ké gí ɓay a niŋ péna, a hí̧ ndísɛ̌ʼɛ a mɛ̌, ɓay a zé njukuri ɓá ŋgɛ̧́náké.»

²⁹Gelka Zezú rá̧ gunbɛʼɛri kaw tɛ̧́ a ɓil pû a Jeriko, njukuri ɓá ŋgɛ̧́náké tɔ́ŋ Zezú.

³⁰Râ̧wri̧ sére kaw a gbaŋ ŋgboro, a lá ɓá Zezú kaw tána; Dáy a vbá̧nzáʼa: «Gáŋmbây, Gun a Davít, mɔ́ kósêe hí̧ rú!»

³¹Njukuri pom kuriri ɓá kú pɔŋ nzáʼa kuriri, dáy kú vbá̧nzáʼa gé ɓá mbɛl: «Gáŋmbây, Gun a Davít, mɔ́ kósêe hí̧ rú!»

³²Zezú ew, a ɗí kuriri, a vbí ɓá: «A̧hí̧ i zi ɓá mí niŋ hí̧ wǎyri lé?»

³³Kú zi a sa: «Gáŋmbây, mɔ́ niŋ a rú kó gel.»

³⁴Zezú kó kuriri sehaŋ, dáy a ɗa nûn a kuriri; núnmbɛ̧́nɛ́ nɔ́, kuriri sére too, nûn a kuriri kó gel, dáy kú retɔ́ŋ Zezú.