Read Capanahua Matiye 21 Bible Online

Matiye 21 - Capanahua bible

Matiye 21

¹Gelka Zezú kuu Gunbɛʼɛri zi ɗɛ́ŋ a Zerúzalɛ̂m, a gbaŋ pû Bɛtfazé, a gé ɓá kon Oliviyé, Zezú tí pé gunbɛʼɛri sére ɗambɛl a sa hí̧ kuriri ɓá:

²«Í sé pû ka ná a mbɛl a wǎyri, i gé ziŋ ka rí ɓil pûké, máhóla a kú ŋgá̧ rá̧ gun a mɛ̌ ka̧n. Í sɛl kuriri, a í ɗa kuriri gí hí̧ mí.

³Njuku a há̧na mí vbí wǎyri ɓay lé, i sa ɓá: “Gáŋmbây pé zi ɓaykéy.” Dalé a goló kú e pɔŋ wǎyri kála rú.»

⁴Nǎŋnɔ́ pé niŋ ɓá báŋké ka ɓay a porofɛ́t sáy:

⁵«Í sa hí̧ njuku a pû Siyɔŋri̧: Mɔ́ kó! Mbây a mɔ̌ kaw gí goló, mbá ka law a pá̧na, Ké he tûl máhóla Tûl gun máhóla, Gun ɓil a máhóla.[11]»

⁶Gunbɛʼɛri sé dáy, a gé niŋ ɓá báŋké ka Zezú sa hí̧ kuriri.

⁷Kú gé ɗá máhóla gí kuu gun máhólaké, a kú laɓa gáŋ gári a kuriri kɔ̧ tûl ka̧ny a máhólaké dáy, Zezú he kawrú.

⁸Njukuri ɓá ŋgɛ̧́náké fi gáŋ gári a kuriri kɔ̧ tûl ŋgboro; Njuku a fékéri kúŋ pâmndɔ̂ʼɔ dii, a laɓa kɔ̧ tûl ŋgboro, ɓay a hí̧ hɔ̧́na hí̧ Zezú.

⁹Dawá njukuri ka séséna ɗambɛl a Zezú rá̧ njukuri ka tɔ́ŋ nɛ́, vbá̧nzáʼa a sa: «Hɔ̧́ná hí̧ Gun a Davít! Gáŋvbôn ké ɗí béla kɔ̧ tûl a njuku ka gí ka rɛŋ a Gáŋmbây! Hɔ̧́na ké hí̧ Gáŋvbôn a nûnalê!»

¹⁰Gelka Zezú ri ɓil pû a Zerúzalɛ̂m, ɓil pû too laŋ, njukuri vbí ɓá: «Njuku nɔ́ ɓá gé lé?»

¹¹Njukuri zi a sa: «ɓá porofɛ́t Zezú a pû Nazarɛ́t ka tísiri a Galilê.»

¹²Zezú gí ri ɓil vûn a Gáŋvbôn dáy, a gé ní njukuri a kaw zé hɛ̧ri̧. Ké fere tay a njuku ku̧ma lariri rá̧ hɛ̧káwa a njuku zé bûmri̧.

¹³Dáy a sa hí̧ kuriri ɓá: «Ɓay ka ɗé ka̧n ɓil Mbété a Gáŋvbôn sa ɓá: “Kú e ɗí vûn a mǐ ɓá vûn gɔ́ŋ Gáŋvbôn.” Ké resa ɓáy, dáy wǎyri, i ɓá vûnké retɛ̧ pɔ̂ny mûn a ríwari.»

¹⁴Râ̧wri̧ rá̧ njuku kpɛrɛri gí gel a Zezú a ɓil vûn a Gáŋvbôn dáy ké ŋgɛ́rɛ kuriri.

¹⁵Gáŋnjuku a njuku nzáʼaká̧nari̧ rá̧ gáŋnjuku tɔ́ʼɔ sáŋnari̧ kaw ka hɛ́rɛ. Ɓayhí̧lé kú kó hɛ̧ yérké ka Zezú niŋ rá̧ gun a léléri ka vbá̧nzáʼa a ɓil vûn a Gáŋvbôn ɓá: «Hɔ̧́na hí̧ Gun a Davít!»

¹⁶Dáy kú sa hí̧ Zezú ɓá: «Mɔ́ láɓay ka gun nɔ́rí̧ sáy lé?» Zezú sa hí̧ kuriri ɓá: «Ɛ̧, dáy i zi kɛ̧́ ɓay a ɓil Mbété nɔ́ bɔʼɔké mbêw yá ɓáy lé? Ɓayké sa ɓá: “Mɔ́ niŋ dáy gun a léléri rá̧ gun a pɛ̂ŋri̧, hí̧ hɔ̧́na hí̧ mɔ́!”»[12]

¹⁷Falké Zezú pɔŋ kuriri a tɛ̧́ a ɓil pû a kála sé Betaní ɓay a sé ná sá̧.

¹⁸Típélé a féké rím, a ké kaw regí ɓil pû a Zerúzalɛ̂m, ké lá nzala.

¹⁹Dáy a kó dii njɔ̧̂ny ka gbaŋ ŋgboro, a ta̧m sé gbaŋké, a gé kó ɓá goykéri baa. Dáy ké sa hí̧ dii njɔ̧̂nyké ɓá: «Mɔ tí léna bɔʼɔ mbêw mbaa!» Núnmbɛ̧́nɛ́ a goló, dii njɔ̧̂ny hɔ́ʼɔ too.

²⁰Gunbɛʼɛri kó hɛ̧ké, a kaw yér a sa hí̧ Zezú: «A̧ní rá̧ dii njɔ̧̂ny nɛ́ hɔ́ʼɔ a núnmbɛ̧́nɛ́ nɔ́ lé?»

²¹Zezú sa hí̧ kuriri: «Mi sa hí̧ wǎyri gbátɓay: Wǎyri mí erú ka láɓulaw rá̧ a mí zi many ɓáy ka law a wǎyri yáy, i marú̧ ɓay a niŋ hɛ̧ ka mí niŋ hí̧ dii njɔ̧̂ny nɛ́. I ma ɓay a i sa hí̧ kon nɛ́ ɓá: “Mɔ́ uru a ta̧m a goló sé lé ɓil mbii lúkí”, lé hɛ̧ké e niŋa.

²²Wǎyri, mí erú ka láɓulaw, i e ziŋ hɛ̧ too ka i vbí a ɓil gɔ́ŋ Gáŋvbôn a wǎyri.»

²³Zezú ri ɓil vûn a Gáŋvbôn, a tí tɔ́ʼɔhɛ̧, dáy gáŋnjuku nzáʼaká̧nari̧ rá̧ gáŋnjuku pû a Juyífri gí gbɛ́ŋɛ́, a gí vbí nɛ́: «Ka ŋgboro a sí̧ mɔ niŋ hɛ̧ nɔ́rí̧ lé? A gé hí̧ mɔ́ kpɔ́ŋa niŋáké lé?»

²⁴Zezú zi a sa hí̧ kuriri ɓá: «Mǐ kɔ́, mi e vbí wǎyri ɓay mbêw, wǎyri mí zi nzáʼa ní, a goló mí e sa hí̧ wǎyri ka ŋgboro a sí̧ mí niŋ hɛ̧kéri.

²⁵A gé pé Zâŋ gí ɓá njukuri nya batêm lé? Ɓá Gáŋvbôn malé njukuri lé?» Dáy, kú kaw táhá̧narí̧ a bazeŋ a kuriri a sa ɓá: «Ná zibɔʼɔké ɓá: “Gáŋvbôn lé”, ké e vbí ɓá: “Ɓayhí̧ i zi láɓulaw hí̧ Zâŋ yá lé?”

²⁶Dáy ná sa ɓá: “Njukuri lé”, ná ŋgú wɔ́w a njukuri, ɓayhí̧lé, kuriri too, kú mbí Zâŋ Batís ɓá porofɛ́t.»

²⁷Dáy kú sa hí̧ Zezú ɓá: «Rú zi tu yá.» Nǎŋnɔ́ Zezú sa hí̧ kuriri: «Mǐ kɔ́, mí tí sa hí̧ wǎyri a gé hí̧ mí ŋgboro niŋ hɛ̧kéri yá.»

²⁸Zezú sa ɓáy ɓá: «A kɛrɛ a wǎyri wá, ɓá hí̧ lé? Njuku a há̧na erú ka gunri̧ sére. Ké sa hí̧ titíla gun ɓá: “Gun ní, mɔ́ sé niŋ péna hí̧ mí a sénɛ́ a wâʼa ví̧nyɛ a mǐ.”

²⁹Gun zi a sa: “Mi tí séna nyá.” A falké, ké kɛrɛ ɓá zi belyá, dáy a uru a sé wâʼaké.

³⁰Bâa a mɛ̌ sé saɓay a mbêwké nɔ́ hí̧ gun a séreké. Gunké zi a sa: “Awá bâa, mi e séna.” Dáy a zi sé yá.

³¹Gé a bazeŋ a gunri̧ sére nɔ́ niŋ hɛ̧ ka bâa a mɛ̌ zi lé?» Kú sa: «Ɓá titíla gun.» Dáy Zezú sa hí̧ kuriri: Mí sa hí̧ wǎyri gbátɓay: «Njuku mára̧ lari lambôri rá̧ wûny niŋ dalari e ri ɓil Pû a Gáŋvbôn ɗambɛl hí̧ wǎyri.

³²Ɓayhí̧lé, Zâŋ Batís gí gel a wǎyri a gí tɔ́ʼɔ ŋgboro a ndáráké, dáy i zi láɓulaw hí̧ nɛ́ nyá. Ɓá njuku mára̧ lari lambôri rá̧ wûny niŋ dalari pé láɓulaw hí̧ nɛ́. A fal kó hɛ̧ nɔ́ too, i zi fere law a wǎyri ɓay a láɓulaw hí̧ nɛ́ nyá.»

³³Zezú sa galaɓay a féké: Njuku wâʼa há̧na, pá wâʼa ví̧nyɛ. Ké mbó hɛlɛ kí ɗɔ́ŋ rú, a ɗáŋ lɔ̂ʼɔ a ɓil saw ɓay a ha̧ mbii léna ví̧nyɛké rú̧. Ké zá vûn ka̧n tûl mbɛ̧́nɛ́ ɓá gáŋáké a ɓil wâʼaké, ɓay a koro hɛ̧ wâʼaké. Falké, ké ɓá njukuri ka̧n ɓil wâʼaké ɓay a kú koro, a uru a kála sé gɔ́rɔ́.[13]

³⁴Gelka fêw lú hɛ̧pay ká̧y, ké pé njukupéna a mɛ̌ri̧ sé gel a njuku koro wâʼari, ɓay a kú gé nyá hɛ̧pay ɓála a mɛ̌ gírú.

³⁵Dáy njuku koro wâʼari gé ŋgbá njukupéna a mɛ̌ri̧, a vbá̧ a há̧na, ka í a fékéri, a vbúkú njuku a sáyké ka saw a í nɛ́.

³⁶Dáy njuku wâʼa, repé njukupéna a fékéri ɓá ŋgɛ̧́náké ndé a titílákéri. Dáy njuku koro wâʼakéri, gé niŋ ɓá hɛ̧ a mbêwké nɔ́, ziŋ kuriri.

³⁷A kɔ́rɔ́ké, njuku wâʼa, pé gun a mɛ̌ a kɛrɛ ɓá: «Kú e gé hɛʼɛ gun a mɛ̌.»

³⁸Dáy gelka njuku koro wâʼari gé kó gun a mɛ̌y, kú sa a bazeŋ a kuriri ɓá: «Í kó, mɛ̌ nyandal pɛ̧́nɛ́!» Ná sé, a gé í nɛ́ dalé wâʼa e retɛ̧ ɓá ɓála a manárí̧!

³⁹Kú gé ŋgbá nɛ́, a ɓá nɛ́ vbú ka̧ny wâʼa, a í nɛ́.

⁴⁰Zezú vbí ɓá: «Belbéla, ka njuku wâʼa e gína wá, a̧hí̧ ké e gé niŋ ziŋ njuku koro wâʼa nɔ́rí̧ lé?»

⁴¹Kú zi a sa: «Ké gé í ɓéké njukuri táŋ kósêe a kuriri. A gé mbí wâʼaké, a hí̧ njuku a fékéri, ɓay a kú koro, ɓay a fêw lú hɛ̧pay lé, kú ma ɓá hɛ̧pay ɓála a mɛ̌ gírú nɛ́.»

⁴²Falké Zezú sa hí̧ kuriri: «Í kɛ̧́ hɛ̧ ka ɗé ka̧n ɓil Mbété a Gáŋvbôn, bɔʼɔ mbêw yá ɓáy lé? Ɓayké sa ɓá: “Saw ka njuku mbó vûnri̧ ɓá vbú kpâay, retɛ̧ gáŋ saw a ndal vûn. Ɓá Gáŋmbây pé niŋ nǎŋnɔ́, A manárí̧ ɓá gáŋ hɛ̧ ka bel mambá[14]!” »

⁴³Ɓaykénɔ́, pé Zezú sa ɓáy ɓá: Pû a Gáŋvbôn e lú a ɓil ndɔ̂ʼɔ a wǎyri, ɓay a hí̧ njuku a fékéri, ɓay kú hí̧ lénáké. [

⁴⁴Njuku ka e lé vbú tûl sawké e háwa, rá̧ njuku ka sawké e lé vbú tûléy, ké e tɛ̧́ sôma siri.]

⁴⁵Gáŋnjuku nzáʼaká̧nari̧ rá̧ Fariziyɛ̧́ri̧ lá galaɓay ka Zezú sáy, a tu ɓá Zezú saɓayké sé tûl a kuriri.

⁴⁶Kú ɛ́ ŋgboro ŋgbá nɛ́, dáy a ŋgú wɔ́w a njukuri. Ɓayhí̧lé njukuri mbí Zezú ɓá porofɛ́t.