Read Capanahua Matiye 23 Bible Online

Matiye 23 - Capanahua bible

Matiye 23

¹Dáy Zezú sa hí̧ njukuri rá̧ Gunbɛʼɛri ɓá:

²«Gáŋnjuku tɔ́ʼɔ sáŋnari̧ rá̧ Fariziyɛ̧́ri̧, ɓá njukuri a kú hí̧ kuriri ŋgboro tɔ́ʼɔ táŋa sáŋna a Mɔyíze.

³Nǎŋnɔ́, í niŋ, a í tɔ́ŋ hɛ̧ too a kú sa hí̧ wǎyri, dáy í zi ná tɔ́ŋ bɔʼɔ séna a kuriri. Ɓayhí̧lé kú tɔ́ʼɔɓay, a zi niŋ pénáké yá.

⁴Kú ŋgá̧ hóla a zínáké, a ɓá ka̧n tûl kpáʼandɔ̂ʼɔ a njukuri, dáy a zi ɗánáké a gun ndɔ̂ʼɔ a kuriri tɛ̧́w nyá.

⁵Kú niŋ péna a kuriri too, ɓay a njukuri kú kó kuriri. Nǎŋnɔ́, hɛ̧ ka kó ɓay a Gáŋvbôn, kú ŋgá̧ hakpak ka̧n nzáʼa ŋgbɔŋ a kuriri malé ndɔ̂ʼɔ kuriri, a sá̧ nzáʼa gári a kuriri ɓá pénáké ndé ɓála a njuku a fékéri.[16]

⁶A gel lâʼa dawá lé, kú ɛ́ ɓá gelkáwa a mbɛl rá̧ gelkáwa a béláké a ɓil vûn gɔ́ŋ Gáŋvbôn.

⁷Kú zi ɓá njukuri kú nam kuriri ka hɔ̧́ kuriri a gel a dawá, a zi ɓá njukuri kú ɗí kuriri ɓá: “Gáŋnjuku, Gáŋnjuku!”

⁸Dáy a wǎyri, i kaw too ɓá nyînrí̧, í zi ná zi ɓá njukuri kú ɗí wǎyri ɓá: “Gáŋnjuku.” Ɓayhí̧lé njuku mbêw yáŋ pé ɓá Gáŋnjuku a wǎyri.

⁹Í zi ná ɗí njuku a há̧na ka tísiri ɓá: “Bâa.” Ɓayhí̧lé, i erú ka Bâa mbêw yáŋ, mɛ̌ pé e a nûnalê.

¹⁰Í zi ná ɛ́ ɓá njukuri kú ɗí wǎyri ɓá: “Mbây.” Ɓayhí̧lé, i erú ka “Mbây” mbêw yáŋ, ka ɓá Kiris.

¹¹Njuku ka ndé ka hɔ̧́na a bazeŋ a wǎyri, ké kaw ɓá koy a wǎyri.

¹²Njuku ka he tûlé sé sáy, kú e ɓá nɛ́ ɗere, ka njuku ka pɔ tûléy, kú e gbaŋ nɛ́ sé sâa.»

¹³Lelêe e lé wǎyri gáŋnjuku tɔ́ʼɔ sáŋnari̧ rá̧ wǎyri Fariziyɛ̧́ njuku foori, ɓayhí̧lé i ŋgá̧ ŋgboro ri pû a Gáŋvbôn hí̧ njukuri. I zi rí yá wǎyri kɔ́, a ndé njukuri ka zi ɓay a rínaké kɔ́. [

¹⁴Lelêe hí̧ wǎyri, njuku tɔ́ʼɔ sáŋnari̧ rá̧ Fariziyɛ̧́ njuku foori! Ɓayhí̧lé, i naʼa hɛ̧ ka ndɔ̂ʼɔ wûnysêeri, a gɔ́ŋ Gáŋvbôn pé mambá ɓay a nûn a njukuri, Ɓaykénɔ́, hɛ́rɛ a Gáŋvbôn e ɗére kɔ̧ tûl a wǎyri ŋgbɔ́rɔ mambá.]

¹⁵«Lelêe hí̧ wǎyri njuku tɔ́ʼɔ sáŋnari̧ rá̧ Fariziyɛ̧́ njuku foori! Ɓayhí̧lé, i há̧ra̧ ma gelri too ka tísiri rá̧ tûl gáŋ mbiiri, ɓay a i nyá njuku mbêw. Gelka i nyá nɛ́ dáy, i ɓá nɛ́ tɛ̧́ gun sé hɔrɛ bɔʼɔké sére ndé wǎyri ɓáy.»

¹⁶«Lelêe hí̧ wǎyri, wǎyri râ̧wri̧ njuku kɔʼɔ njukuri! Wǎyri ka sa ɓá: Njuku mí háhɛ̧ ka vûn a Gáŋvbôn lé, zi niŋ hɛ̧ nyá, dáy njuku mí háhɛ̧ ka vbí̧rí̧lari ka e a ɓil vûn a Gáŋvbôn lé, háhɛ̧ a mɛ̌ erú ka nɛ́rɛ̧.

¹⁷Dɔ̂ʼɔ rá̧ râ̧wri̧! Ɓála a sí̧ erú ka nɛ́rɛ̧ lé, vbí̧rí̧lari malé vûn a Gáŋvbôn ka hí̧ vbí̧rí̧lari nɛ́rɛ̧ lé?

¹⁸I sa ɓá njuku mí háhɛ̧ ka nzáʼaká̧na lé, tí ka nɛ́rɛ̧ nyá, ka njuku mí háhɛ̧ ka hɛ̧hí̧na a nzáʼaká̧na lé, hɛ̧hánáké, ké niŋ hɛ̧ké.

¹⁹Râ̧wri̧! A̧hí̧ ndé ka nɛ́rɛ̧y, hɛ̧hí̧na malé nzáʼaká̧na ka hí̧ hɛ̧hí̧na nɛ́rɛ̧ lé?

²⁰Njuku ka háhɛ̧ ka nzáʼaká̧na, háhɛ̧ ka hɛ̧ri̧ too ka e ka tûlké;

²¹Njuku ka háhɛ̧ ka vûn a Gáŋvbôn, háhɛ̧ ka vûn a Gáŋvbôn, rá̧ njuku ka e a ɓilké;

²²Dáy njuku ka háhɛ̧ ka nûnalêy, háhɛ̧ ka gelkáwa Mbây a Gáŋvbôn, rá̧ Gáŋvbôn ka kaw tûlké.

²³Lelêe hí̧ wǎyri njuku tɔ́ʼɔ sáŋnari̧ rá̧ Fariziyɛ̧́ njuku foori! Ɓayhí̧lé, i hí̧ Gáŋvbôn tûl hɛ̧pay a wǎyri ɛ́ŋ báŋa gun goyhay a kú ɗí ɓá máŋte, anɛt rá̧ ndóŋ, dáy, i yáw hɛ̧tɔ́ʼɔ a sáŋna ka erú ka nɛ́rɛ̧, ɓá báŋa hɛ̧ a ndáráké, bélalaw rá̧ law mbêw: ɓá hɛ̧ nɔ́rí̧ pé ma ɓay njuku ké niŋ, táŋ yɛʼɛrɛ hɛ̧ a fékéri.

²⁴Wǎyri, njuku kɔʼɔ râ̧wri̧! Í lú vbóro a ɓil mbii nzóna a wǎyri, a reta̧ bandikoré!

²⁵Lelêe hí̧ wǎyri njuku tɔ́ʼɔ sáŋnari̧ rá̧ Fariziyɛ̧́ njuku foori! Ɓayhí̧lé, i turu fal yoŋ rá̧ kpáŋgbáráŋ dáy a ɓilké mbá ɓá hɛ̧ ríwa rá̧ ɓékéhɛ̧ kɛrɛ a wǎyri.

²⁶Fariziyɛ̧́ râ̧wri̧! Mɔ́ turu ɓil yoŋ rá̧ ɓil kpáŋgbáráŋ ɗambɛl rá̧ falké ké ná ɓá táŋáké kɔ́.

²⁷Lelêe hí̧ wǎyri njuku tɔ́ʼɔ sáŋnari̧ rá̧ Fariziyɛ̧́ njuku foori! Ɓayhí̧lé, i ɛ́ŋ ɓá tûl pâl a kú mɔny ka belkóna a kála, dáy ɓilké mbá ɓá húrú a hûlri rá̧ mára̧ puŋá hɛ̧ri̧ ɓórí ɓórí.

²⁸Wǎyri kɔ́, ka kála i ɛ́ŋ njuku a ndárákéri, dáy a ɓil law a wǎyri, mbá ɓá foo rá̧ ɓékéhɛ̧ri̧.

²⁹Lelêe hí̧ wǎyri njuku tɔ́ʼɔ sáŋnari̧ rá̧ Fariziyɛ̧́ njuku foori! Ɓayhí̧lé, i mbó tûl pâl a porofɛ́t, a mɔny tûl pâl a njuku a ndárákéri.

³⁰A i sa ɓá: “Ɓurú mí erú a ɓil nâm a zîi a ɓurúri, rú tí niŋ law mbêw kuu kuriri ɓay a í porofɛ́tri yá.”

³¹Nǎŋnɔ́, i tɔ́ʼɔ ka mûn a wǎyri ɓá, i kaw ɓá gun zîi a njukuri ka í porofɛ́tri.

³²Dáy, belɓá i ɔrɔ gázín péna a zîi a wǎyri!

³³Wǎy sôyri, mɛ̧rɛ̧ mbéruri! I kɛrɛ ɓá i e pɛ̧́ a ɓil hɔrɛ a Gáŋvbôn lé? I tí tɛ̧́ ɓilké nyá!

³⁴Ɓaykénɔ́ pé i kó, mí e pé hí̧ wǎyri porofɛ́tri, njuku a rɔ̧́nakéri rá̧ gbát njuku tɔ́ʼɔ sáŋnari̧. I e í a há̧narí̧, a ɓara a fékéri ka̧n tûl dii vbatay. I e vbá̧ njuku a fékéri ka ndêe a ɓil vûn gɔ́ŋ Gáŋvbôn a wǎyri, a tɔ́ŋ kuriri a ɓá kuriri tɔ́ʼɔsêe pû ka pû.

³⁵Nǎŋnɔ́, a tûl a wǎyri, pé sêm mûn a njuku nɔ́rí̧ e refére kɔ̧rú̧y, tí ka tûl hûl a Abɛl njuku a ndáráké, ka̧ hûl a Zakari gun a Baraki, ka i í nɛ́ a bazeŋ a nzáʼaká̧na rá̧ gel hɛ̧púnáy.

³⁶Mí sa hí̧ wǎyri, ɓá gbátɓay, hɛ́rɛ a Gáŋvbôn e rekɔ̧ tûl a wǎyri njuku a ŋgɛŋnɛ́ nɛ́rí̧.

³⁷Zerúzalɛ̂mri̧, Zerúzalɛ̂mri̧, mɔ̌ ka í porofɛ́tri, ka vbúkú njukuri ka Gáŋvbôn pé kuriri gí goló, ka saw! Bɔʼɔ daw a̧ní, mí ɛ́ ŋgboro ɓay a mára̧ njuku a mɔ̌ri̧ gí gbaŋ ní ɓá báŋa mákáʼa ka mára̧ gun a mɛ̌ri̧ kɔ̧ bɔʼɔ mbɛlɛ́y, dáy i zi yá.

³⁸Nǎŋnɔ́ ŋgɛŋnɛ́, kú e sáŋ wǎyri, hɛʼɛ wǎyri kuu vûn a wǎyri.

³⁹Katína, mí sa hí̧ wǎyri gbátɓay, tí a ŋgɛŋnɛ́, i tí kó mí mbaa, ka̧ sêe ka i e sa ɓá: “Gáŋvbôn ké ɗí béla kɔ̧ tûl a njuku ka gí ka rɛŋ a Gáŋmbây!” »