Read Capanahua Matiye 26 Bible Online

Matiye 26 - Capanahua bible

Matiye 26

¹Falké ka Zezú ɔrɔ saɓayké, ké sa hí̧ Gunbɛʼɛri:

²«I tu ɓá mára̧ záymûn ɓay a Pâk, zi nâm sére yáŋ: Kú e ŋgbá Gun a njuku ɓay ɓara nɛ́ ka̧n tûl dii vbatay.»

³Dáy Gáŋnjuku nzáʼaká̧nari̧ rá̧ gáŋnjuku pûri mára̧ há̧narí̧ sé ɓil vûn a Kayíf, ka ɓá gáŋnjuku nzáʼaká̧na.

⁴Kú kaw ɛ́ ŋgboro ɓay a ŋgbá Zezú ɓá múnáké rá̧lǒo kú í nɛ́.

⁵Nǎŋnɔ́ dáy kú sa: «Ná ŋgbá nɛ́ ka sêe dawá yá, tí yá lé njukuri e uru bére kuu manárí̧.»

⁶Gelka Zezú ka̧ Betaní, a ɓil vûn a Simɔŋ, mɛ̌ ka tí erú ka ndɛ́ɓɛ.

⁷Wûny a há̧na gí gbɛ́ŋɛ́ a ŋgbá kû yámbó mbárú, ka lariké ŋgɛ̧́ mambá. Ké fere yámbó kɔ̧ tûl a Zezú, ka kaw nzáʼa lâʼay.

⁸Gelka gunbɛʼɛri kó nǎŋnɔ́, kú ɗí hɛ́rɛ, dáy a sa: «Ɓayhí̧ ké ɓew yámbó nɔ́ ɓǎŋ lé?

⁹Tá kú ma mbí a zé lariké ɓá ŋgɛ̧́náké, ka hí̧ lariké hí̧ njuku fóyári yá lé!»

¹⁰Zezú tu ɓayké dáy a sa: «Ɓayhí̧rá̧ i zi ɓay ɓá wûny nɛ́ tɔ́ʼɔsêe lé? Hɛ̧ a ké niŋ hí̧ mí, ɓá béla hɛ̧;

¹¹Ɓayhí̧lé, i e ka njuku fóyári a bazeŋ a wǎyri dát, dáy a mǐ, mi tí kaw dát kuu wǎyri yá.

¹²Yámbó nɔ́ a ké fere kɔ̧ mûn ní, ké niŋ ɓay a mɔny mí ɓay a lɔ̂ʼɔ pâl.

¹³Mí sa hí̧ wǎyri gbátɓay, gel too ka tísiri nɛ́ a kú e tɔ́ʼɔ Bélaɓay a Gáŋvbôn, kú e saɓay hɛ̧ ka wûny nɛ́ niŋ, a kɛrɛ nɛ́.»

¹⁴Dáy njuku mbêw a bazeŋ a gunbɛʼɛri bôo a sére, ka rɛŋɛ́ ɓá Judas Ɛskariyót, sé gel a Gáŋnjuku nzáʼaká̧nari̧,

¹⁵a sa: A̧hí̧ i e hí̧ mí ɓay a mí zé Zezú hí̧ wǎyri lé? Dáy kú hí̧ nɛ́ lari mínya bonsáy.

¹⁶Tí ka sêeké nɔ́, ké kaw ɛ́ ŋgboro ɓay a ɓá Zezú ka̧n ɓil ndɔ̂ʼɔ a kuriri.

¹⁷Titíla nâm záymûn sɔ̧́ biré a kú niŋ táŋ haw, gunbɔʼɔ a Zezúri gí vbí nɛ́ ɓá: «Gel a sí̧, mɔ zi ɓá rú sé kara lâʼa záymûn Pâk karú hí̧ mɔ́ lé?»

¹⁸Zezú zi a sa: «Í sé ɓil pû a gel a njuku ǎŋ, a i sa hí̧ nɛ́ ɓá: Gáŋnjuku sa, sɛl a sêe a mǐ gí ɗɛ́ŋ dá, mi e niŋ mára̧ záymûn Pâk kuu gunbɔʼɔ níri̧ a goló.»

¹⁹Gunbɛʼɛri sé niŋ ɓá báŋké a ké sáy, dáy a kú kara lâʼa Pâk.

²⁰Gelka bɔʼɔlêw ká̧y, Zezú gí kaw nzáʼa lâʼa kuu Gunbɛʼɛri bôo a sére.

²¹A kú kaw sɔ̧́lâʼay, Zezú sa: «Mi sa hí̧ wǎyri gbátɓay, njuku mbêw a bazeŋ a wǎyri e zé mí.»

²²Law a kuriri yírí sé tûl ɓaykénɔ́ dáy njuku mbêw mbêw vbí nɛ́ ɓay a sa: «Ɓá mǐ lé Gáŋmbây?»

²³Ké sa: «Njuku ka ɓá ndɔ̂ʼɛ kuu mǐ sé ɓil yoŋ lâʼay, ɓá mɛ̌ pé e zé mí.

²⁴Gun a njuku e ziŋ hûl ɓá báŋké ka ɗé ka̧n ɓil Mbété sé tûléy. Dáy lelêe hí̧ e ná hí̧ njuku ka e zé Gun a njuku lé, belɓá kú mbuŋ nɛ́ nyá.»

²⁵Judas ka zé Zezú, mbí ɓay a sa: Ɓá mǐ lé Gáŋnjuku? Zezú sa hí̧ nɛ́: «Ɓá mɔ̌, pé say.»

²⁶Gelka kú kaw sɔ̧́lâʼa, Zezú mbí biré, a zi awá hí̧ Gáŋvbôn, a haw ɓilké, a hí̧ Gunbɛʼɛri, a sa: «Í nyá, a í sɔ̧́, a nɛ́ ɓá hay mûn ní.

²⁷Falké, ké mbí yoŋ ví̧nyɛ, a zi awá hí̧ Gáŋvbôn, a hí̧ kuriri, a sa: Í nzó wǎyri too;

²⁸Ɓayhí̧lé, a nɛ́ ɓá sêm mûn ní, sêm ŋgá̧nzáʼa kuu Gáŋvbôn, ka fere ɓay turu ɓéké hɛ̧ri̧.

²⁹Mí sa hí̧ wǎyri, mí tí nzó mbii léna dii ví̧nyɛ nɛ́ mbaa, ka̧ sêe ka mi e nzó ɓá féké kuu wǎyri a ɓil Pû a Bâa a mǐ.»

³⁰Falké a kú mbí mbété si̧ŋ ɗéla ka ɗíy, kú kála, a sé tûl kon Oliviyé.

³¹Dáy Zezú sa hí̧ gunbɛʼɛri ɓá: «Sû̧ŋ nɛ́, i e sáŋ mí too, ɓayhí̧lé, kú ɗé ka̧n ɓil Mbété a Gáŋvbôn ɓá: “Mi e í njuku koro hɛ̧hɔ́la dalé mbóléri e ɓɛrɛ too.[17]”

³²Dáy Zezú sa ɓáy ɓá, gelka mi e toma a hûl, mi e sé zoko wǎyri a Galilê.»

³³Píyɛ́r mbí ɓay a sa hí̧ nɛ́: «Mí ɓá njuku a ǎ̧wrí̧ too pé sáŋ mɔ́, mǐ, mi tí sáŋ mɔ́ nyá.»

³⁴Zezú sa hí̧ nɛ́: «Mi sa gbátɓay hí̧ mɔ́, ka sû̧ŋ nɛ́, sû̧ŋ nɛ́, ɗambɛl rá tôo ké gbô lé, mɔ e sa bɔʼɔké sáy ɓá mɔ zi tu mí nyá.»

³⁵Píyɛ́r resa: «Mí ɓá ɓay a ziŋ hûl kuu mɔ̌ pí, mi tí sáŋ mɔ́ nyá.» Gárá gunbɛʼɛri too sa ɓá mbêwké.

³⁶Dáy Zezú sé kuu gunbɛʼɛri sé gel a kú ɗí ɓá Gesemanɛ́, a ké sa hí̧ kuriri ɓá: Í kaw gelé, a mí sé sá̧ ɓay a gɔ́ŋ Gáŋvbôn.

³⁷Nǎŋnɔ́ ké ɗa Píyɛ́r rá̧ gun a Zebedéri sére, dáy a tí lá mûn tɔ́na rá̧ law lúna.

³⁸Dáy ké sa hí̧ kuriri: «Law ní lú mí mambá ka̧ hûl, í kaw gelé, a í gɛ́ŋ nâm kuu mǐ.»

³⁹Dáy, a mbí bɛʼɛ tɛ̧́w sé mbɛl, a gé huku siri a gɔ́ŋ Gáŋvbôn a sa: Bâa a mǐ, ŋgboro mí erú lé, mɔ́ ɓá yoŋ tɔ́ʼɔsêe nɛ́, ké ɗí kuu mǐ! Dáy ké zi ná ɓá hɛ̧ ka mi ziy, ké ɓá hɛ̧ ka mɔ́ ziy.

⁴⁰Ké regí gel a gunbɛʼɛri, a gí ziŋ kuriri ka nâm, dáy a sa hí̧ Píyɛ́r: Lé í tí gɛ́ŋ nâm kuu mǐ sɛl a sêe mbêw yá lé?

⁴¹Í gɛ́ŋ nâm, a í gɔ́ŋ Gáŋvbôn ɓay a Sata̧n ké zi ná lélaw a wǎyri. Njuku e ka law béla niŋ hɛ̧ dáy, mûn tí ka ŋgɛ́rɛ yá.

⁴²Ké resé ɓáy, a bɔʼɔ séreké, dáy a gɔ́ŋ Gáŋvbôn a sa: «Bâa, ŋgboro mí erú ɓá yoŋké, ké sé ɓá ɗínáké táŋ mí nzó lé, ké niŋ ɓá báŋké ka mɔ ziy.»

⁴³Ké regí ɓáy, a gí ziŋ gunbɛʼɛri kɔ̧ nâm too, ɓayhí̧lé nûn a kuriri ná ɓá nâm.

⁴⁴Ké répɔŋ kuriri a rekála sé gɔ́ŋ Gáŋvbôn a bɔʼɔ sáyké, a gé sa ɓá ɓay a mbêwké nɔ́.

⁴⁵Ké regí gel a gunbɛʼɛri, a gí sa hí̧ kuriri: Í ná nâm ɓáy, a kaw ɔʼɔ mûn a wǎyri lé? Í kó, sɛl a sêe gí ɗɛ́ŋ dá, a kú e zé Gun a njuku hí̧ ɓéké njukuri.

⁴⁶I uru, a ná kála, í kó, njuku ka zé mí, mí gíw.

⁴⁷Ké pa̧n saɓay ɓáy lé, Judas ka̧, mɛ̌ njuku mbêw a bazeŋ a gunbɔʼɔ a Zezúri bôo a sére. Ké gí kuu njukuri ɓá ŋgɛ̧́náké ka gá̧mári̧ rá̧ kâ̧wdiiri. Ɓá gáŋnjuku nzáʼaká̧nari̧ rá̧ gáŋnjuku pû a Juyífri pé, pé kuriri gíy.

⁴⁸Judas ka e zé nɛ́y, tɔ́ʼɔ hí̧ kuriri ŋgána a há̧na ɓá: Njuku ka mí e fɔ̧ nzɛ́ʼɛ, ɓá mɛ̌ pɔ̧́nɔ́, í ŋgbá nɛ́.

⁴⁹Judas gí ka̧, núnmbɛ̧́nɛ́ nɔ́ a gbaŋa Zezú a sa: Mi nam mɔ́ Gáŋmbây, dáy a fɔ̧ nzɛ́ʼɛ.

⁵⁰Zezú sa hí̧ nɛ́: «Mbáŋa a mǐ, hɛ̧ ka mɔ́ gí niŋáké, mɔ́ niŋ ɓá gánáké. Dáy njukukéri gí, a gí ŋgbá Zezú.

⁵¹Nǎŋnɔ́, njuku mbêw a bazeŋ a njukuri ka e kuu Zezú, lú gá̧má a mɛ̌ a vbá̧ goy súkú a njukupéna a gáŋnjuku nzáʼaká̧na mbêw kúŋ to vbú siri.

⁵²Dáy Zezú sa hí̧ nɛ́ ɓá: Mɔ́ rerú a gá̧má a mɔ̌ ka̧n ɓil ŋgoroké, ɓayhí̧lé njukuri too ka lú gá̧máy, e ziŋ hûl ka gá̧má.

⁵³Mɔ́ kɛrɛ ɓá, mí zi ma ɗí Bâa a mǐ, ɓay a ké pé a ŋgɛŋnɛ́ aŋnze kúmráké bôo a sére, kú gí hí̧ndɔ̂ʼɔ hí̧ mí nyá lé?

⁵⁴Dáy mí tí nǎŋ nyáy, ɓay ka ɗé ka̧n ɓil Mbété a Gáŋvbôn, e niŋ a̧ní ɓá báŋké nɔ́ lé?»

⁵⁵A goló Zezú sa hí̧ njukuri ɓá: «Í gí ka gá̧má rá̧ kâ̧wdiiri gí ŋgbá mí, ɓá báŋa mí kaw ɓá njuku í hûl? Sêe too, mi kaw tɔ́ʼɔhɛ̧ a ɓil vûn a Gáŋvbôn, i zi ŋgbá mí nyá.

⁵⁶Dáy hɛ̧ nɔ́rí̧ too niŋ, ɓá báŋké ka ɓay a porofɛ́tri sa, ka a ɗé ka̧n ɓil Mbété a Gáŋvbôn.» A goló, gunbɛʼɛri pɔŋ nɛ́ a kú ŋgú.

⁵⁷Njukuri ka ŋgbá Zezú, ɓá nɛ́ sé gel a Kayíf gáŋnjuku nzáʼaká̧na ka njuku tɔ́ʼɔ sáŋnari̧ rá̧ gáŋnjuku pûri, mára̧ e ka gelké.

⁵⁸Píyɛ́r tɔ́ŋ Zezú ɓá ɗínáké, sé ka̧ nzáʼa hɛlɛ a gáŋnjuku nzáʼaká̧na. Ké sé ri ɓil pûké a sé kaw kuu njuku koro ɓil hɛlɛ a mbây, ɓay a ké kó a̧ní rá̧ hɛ̧ké e niŋa lé?

⁵⁹Gáŋnjuku nzáʼaká̧nari̧ rá̧ njuku walɓayri ɛ́ ŋgboro ɓá ɓay ŋgbá Zezú ka ŋgboro a ɓay a manyákéri rá̧ kú ma í nɛ́.

⁶⁰Dáy a ɓil ɓay a njukuri ɓá ŋgɛ̧́náké, ka gí ka ɓay a manyákéri gí tûl a Zezú too, kú zi ziŋ ŋgboro ɓayké yá. A falké njukuri sére gí

⁶¹a sa: «Njuku nɛ́ sa ɓá: “Mi ma gbɛʼɛrɛ vûn a Gáŋvbôn, ka rembó vûnké ka̧n gelké a ɓil nâm sáy.”»

⁶²Dáy gáŋnjuku nzáʼaká̧na uru a sa hí̧ Zezú: «Mɔ́ zi tí ka ɓay rerú sé tûl ɓay ka njuku nɛ́rí̧ sa sé tûló yá lé?»

⁶³Dáy Zezú kaw ták. Gáŋnjuku nzáʼaká̧na mbí ɓay a sa hí̧ nɛ́: «Mɔ́ sa hí̧ rú, ka rɛŋ a Gáŋvbôn a ndísɛ̌ʼɛ, mɔ́ ɓá Mɛsí, Gun a Gáŋvbôn lé?»

⁶⁴Zezú resa hí̧ nɛ́: «Ɓá báŋké nɔ́ ka mɔ sáy. Katína mi sa hí̧ wǎyri, tí a ŋgɛŋnɛ́, i e kó Gun a njuku kaw ka ndɔ̂ʼɔ lâʼa a kpɔ́ŋa a Gáŋvbôn, a rekó nɛ́ kɔ́ gí a ɓil ɗaʼam a mbɔ̂m a nûnalê.»

⁶⁵Dáy gáŋnjuku nzáʼaká̧na ɗí hɛ́rɛ a gɔ́rɔ́ gári a mɛ̌ a sa: «Ké fára Gáŋvbôn! Ɓay a sí̧ ná e zoko lánáké ɓay lé! I lá a ké fára Gáŋvbôn.

⁶⁶I sa ɓá hí̧ lé?» Kú sa hí̧ nɛ́ ɓá: «Ké ma hûl.»

⁶⁷Nǎŋnɔ́, kú sa̧sâ̧m kɔ̧ nûn a Zezú, a si nɛ́, njuku a fékéri vbá̧ ɓil nûn nɛ́

⁶⁸a sa: «Mɔ́ sa hí̧ rú, mɔ̌ Kiris, a gé vbá̧ mɔ́ lé!»

⁶⁹Píyɛ́r kaw a kála a ɓil hɛlɛ, lé wûnypéna a há̧na gí gbɛ́ŋɛ́, a sa hí̧ nɛ́ ɓá: «Mɔ̌ pí, tá mɔ e kuu Zezú njuku Galilê nɔ́ nyá lé?»

⁷⁰Dáy Píyɛ́r many a mbɛl a njukuri too a sa: «Háy, mi zi tu ɓay ka mɔ zi ɓay a sanáké yá.»

⁷¹Falké, ké ta̧m sé nzáʼa hɛlɛ, dáy wûnypéna a féké, gé kó nɛ́ a sa hí̧ njukuri ka e ka goló ɓá: «Njuku nɛ́ e kuu Zezú a Nazarɛ́t kɔ́!»

⁷²Píyɛ́r many ɓáy a sa: «Mi há mûn ní, mi zi tu njuku nɔ́ nyá.»

⁷³Falké kpay lé, njukuri ka e a gelké gí gbaŋ a Píyɛ́r, a gí sa hí̧ nɛ́: «Gbátké lé, mɔ kaw ɓá mbêw a bazeŋ a gunbɔʼɔ a Zezúri: Báŋ saɓay a mɔ̌, tɔ́ʼɔ hí̧ njukuri gel gína a mɔ̌.»

⁷⁴Dáy Píyɛ́r há mûn nɛ́ a sa: «Gáŋvbôn ké í mí, mi zi tu njuku nɔ́ nyá!» Núnmbɛ̧́nɛ́ nɔ́, tôo gbô,

⁷⁵dáy Píyɛ́r rekɛ́rɛ ɓáy ka Zezú sa hí̧ nɛ́: «Rá̧ tôo ké gbô lé, mɔ́ e sa bɔʼɔké sáy, ɓá mɔ zi tu mí nyá.» Píyɛ́r tɛ̧́, a vú a vú ɓáy.