Read Capanahua Matiye 28 Bible Online

Matiye 28 - Capanahua bible

Matiye 28

¹Ka fal nâm ɔʼɔ a típélé rím, ka ɓá ɗambɛl nâm pénay, Marí Makdala rá̧ Marí a ǎ̧w, uru a sé kó tûlpâl.

²Dalé tísiri laŋ a ŋgɛ́rɛ, ɓayhí̧lé, aŋnze a Gáŋmbây a há̧na ɗere a nûnalê gí gíkra gáŋ saw ka nzáʼa lɔ̂ʼɔ gefal, a kaw tûlké.

³Mûn nɛ́ fé ŋgbalák ɓá báŋa mbɔ̂m ka vbú hâ, rá̧ gári a mɛ̌ puku ɓá báŋa mbúsâny.

⁴Ŋgawbéreri ka koro tûlpâl, wɔ́w ŋgbá kuriri, kú ná kɔ̧ ɓá báŋa hûlri

⁵Dáy aŋnze mbí ɓay a sa hí̧ wûnynjukuri nɔ́ ɓá: «Í niŋ wɔ́w yá, mí tu ɓá i kaw ɛ́ Zezú a kú ɓara nɛ́ ka̧n tûl dii vbatay;

⁶Ké tí a gelé mbaa, ké toma ka hûl dá, ɓá báŋké a ké sáy. Í gí kó gel a ké nárú̧.

⁷Í reɓá gánáké sé sa hí̧ Gunbɛʼɛri, ɓá ké toma a ɓil a hûlri dá, dáy ŋgɛŋnɛ́ ké e sé zoko wǎyri ka Galilê, a goló pé, i e gé kó nɛ́y. Ɓá ɓayké nɔ́, pé mi zi ɓay a sa hí̧ wǎyri.»

⁸Wûny rá̧yrí̧ uru a ŋgúna ka tûlpâl, mbá ka wɔ́w, ka mûnrína, ka ŋgú sé saɓayké hí̧ gunbɔʼɔ a Zezúri.

⁹A núnmbɛ̧́nɛ́, lé kú kó Zezú gí tɛ̧́ ziŋ kuriri a sa: «Mi nam wǎyri!» Kú ta̧m gí gbɛ́ŋɛ́, a gí ŋgbá bɛʼɛ, a huku mbɛlɛ́ a hí̧ hɔ́ná hí̧ nɛ́.

¹⁰Dáy Zezú sa hí̧ kuriri: «Í niŋ wɔ́w yá, í sé sa hí̧ nyîn nírí̧ kú sé Galilê: Ɓá a goló, pé kú e gé ziŋ mí.»

¹¹Gelka wûny nɔ́rí̧ e ka ŋgboro ɓáy, ŋgawbére a fékéri regí ɓil pû, a gí sa hí̧ gáŋnjuku nzáʼaká̧nari̧ hɛ̧ too ka táy.

¹²Dáy gáŋnjuku nzáʼaká̧nari̧ kuu gáŋnjuku pûri mára̧ há̧narí̧, a láhá̧narí̧, a hí̧ ŋgɛ́rɛ lari hí̧ ŋgawbére nɔ́rí̧,

¹³a sa hí̧ kuriri ɓá: «Í sa ɓá Gunbɛʼɛri pé gí a haŋa sû̧ŋ, ka i e a nâm, pé a gí ríw hûl a mɛ̌ kála rúy.

¹⁴Rá̧ mbây tûlkaw mí láɓaykéy, rú tu ɓay ka rú e sa hí̧ nɛ́, ɓay a mú tûl a wǎyri.»

¹⁵Ŋgawbéreri nyá lari, a niŋ ɓá báŋké a kú sa hí̧ kuriri. Nǎŋnɔ́ pé ɓayké wal ma bazeŋ a Juyífri too ka̧ sénɛ́.

¹⁶Gunbɛʼɛri bôo ka mbêw sé Galilê, sé tûl kon ka Zezú tɔ́ʼɔ hí̧ kuriri.

¹⁷Gelka kú gé kó nɛ́y, kú sé huku mbɛlɛ́ a hí̧ hɔ́ná hí̧ nɛ́, dáy njuku a fékéri e ka manyɓay dát a ɓil law a kuriri.

¹⁸Nǎŋnɔ́ Zezú ta̧m gí, a sa hí̧ kuriri: «Gáŋvbôn hí̧ mí kpɔ́ŋa too a nûnalê rá̧ tísiri.

¹⁹Í sé gel a njuku a tísiri too, a í niŋ kú tɛ̧́ gunbɔʼɔ níri̧; í ɓá kuriri nyá batêm ka rɛŋ a Bâa rá̧ ka rɛŋ Gun rá̧ ka rɛŋ a Têm Pukí,

²⁰a i tɔ́ʼɔ hí̧ kuriri a kú tɔ́ŋ hɛ̧ too ka mi sa hí̧ wǎyri. Dáy i tu ɓá, mi e kuu wǎyri sêe too, ka̧ sêe kɔ́rɔ́ké.»