Read Capanahua Matiye 5 Bible Online

Matiye 5 - Capanahua bible

Matiye 5

¹Gelka Zezú kó dawá a njukuri, ké he sé kaw tûl kɔ̂l. Dáy gunbɛʼɛri ta̧m sé gbɛ́ŋɛ́.

²A goló, ké tí tɔ́ʼɔhɛ̧ hí̧ kuriri, a sa:

³«Béla hí̧ njukuri ka tu ka mûn a kuriri ɓá kú kaw ɓá fóya, ɓayhí̧lé Pû Mbây a Gáŋvbôn, ɓá ɓála kuriri!

⁴Béla hí̧ njukuri ka e a ɓil vúna, ɓayhí̧lé Gáŋvbôn e volaw a kuriri!

⁵Béla hí̧ njukuri ka erú a law a vónáké, ɓayhí̧lé Gáŋvbôn e hí̧ kuriri tísiri a ké hí̧nzáʼa hí̧ kuriri ɓayké!

⁶Béla hí̧ njukuri ka erú a nzala niŋ péna a ndáráké, ɓayhí̧lé Gáŋvbôn e hí̧ kuriri ŋgɛ́rɛ niŋáké!

⁷Béla hí̧ njukuri a kósêe a mbáŋa kuriri, ɓayhí̧lé Gáŋvbôn kɔ́, e kósêe a kuriri!

⁸Béla hí̧ njukuri ka erú a law a táŋáké, ɓayhí̧lé kú e kó Gáŋvbôn!

⁹Béla hí̧ njukuri ka ɛ́ a vónáké a bazeŋ a njukuri, ɓayhí̧lé Gáŋvbôn e ɗí kuriri ɓá gun a mɛ̌!

¹⁰Béla hí̧ njukuri, a kú ɓá kuriri tɔ́ʼɔsêe, ɓay ka kú niŋ hɛ̧ ka Gáŋvbôn ziy, ɓayhí̧lé Pû Mbây a Gáŋvbôn ɓá ɓala a kuriri!

¹¹Béla hí̧ wǎyri, ka njukuri fára wǎyri, ka a ɓá wǎyri tɔ́ʼɔsêe, ka a sa ɓéké ɓayri ɓórí ɓórí kɔ̧ tûl a wǎyri, ɓay ka i láɓulaw hí̧ míy.

¹²I záy, a i kaw a lawrína, ɓayhí̧lé kpáʼandɔ̂ʼɔ péna a wǎyri ɓá hɔ̧́náké mí zoko wǎyri a nûnalê. Katína, nǎŋnɔ́ pé, kú ɓá porofɛ́tri ka tí kaw ɗambɛl hí̧ wǎyri tɔ́ʼɔsêe kɔ́.»

¹³«Ɓá wǎyri, pé kaw ɓá tom a tísiri. Dáy, tom mí zi núŋ mbaay, kú e niŋ a̧ní rá̧, a ké renúŋ ɓá féké ɓáy lé? Ké zi bel mbaa, ɓá kú fere kɔ̧ kpâa, a njukuri kú sé tûlké.

¹⁴Ɓá wǎyri, pé kaw ɓá geltáŋa a tísiri, pû ka e a tûl kɔ̂l, zi ma múna nyá.

¹⁵Kú zi ɓá hɔrɛ ka̧n lámbe, ɓay a kú ɓá yoŋ guku rú yá, kú e ɓá nɛ́ si tûl tay, ɓay a ké táŋgel hí̧ njukuri too, ka e a ɓil vûn.

¹⁶Nǎŋnɔ́ kɔ́, geltáŋa a wǎyri, ké táŋ a mbɛl a njukuri, rá̧lǒo kú ma kó béla péna a wǎyri, a kú ma hɔ̧́ Bâa a wǎyri ka e a nûnalê.»

¹⁷«Í zi ná kɛrɛ ɓá mi gí lú sáŋna a Mɔyíze rá̧ tɔ́ʼɔhɛ̧ a porofɛ́tri! Katína, mi zi gí lúnáké yá, mi gí, ɓay a ten táŋáké too hí̧ wǎyri.

¹⁸Mi sa gbátɓay hí̧ wǎyri, nûnalê rá̧ tísiri mí zi ɔ yáy, gun hɛ̧ ɗéna a há̧na kpay, malé gun hɛ̧ a há̧na tɛ̧́w tí lú ka tûl sáŋna nyá, ka̧ sêe kɔ́rɔ́ hɛ̧ri̧ too.

¹⁹Ɓaykénɔ́, pé njuku ka e lú gun hɛ̧ há̧na kpay a tûl sáŋna gefal, ka a tɔ́ʼɔ hí̧ njukuri ɓá kú niŋ ɓá báŋa a mɛ̌, kú e mbí nɛ́ ɓá gun a tɛ̧́wké, a ɓil Pû a Gáŋvbôn. Dáy njuku, ka koro sáŋna, ka a niŋ pénáké ɓá báŋké, ka a retɔ́ʼɔ hí̧ njuku a fékéri ɓá kú niŋ ɓá báŋké nɔ́y, kú e mbí nɛ́ ɓá báŋa gáŋnjuku, a ɓil Pû a Gáŋvbôn.

²⁰Dáy, mi sa hí̧ wǎyri ɓá, káwa a ndáráké a wǎyri, mí zi ndé káwa a ndáráké a njuku tɔ́ʼɔ sáŋnari̧ rá̧ Fariziyɛ̧́ri̧ nyáy, i tí rí ɓil Pû a Gáŋvbôn nyá.»

²¹«Í lá kú sa hí̧ zîi a manárí̧ ɓá: “Mɔ́ í hûl yá, rá̧ njuku mí í hûl lé, ma ɓá, kú ɓá nɛ́ sé mbɛl a njuku walɓayri.”

²²Dáy mǐ, mi sa hí̧ wǎyri ɓá: Njuku too ka ɗí hɛ́rɛ ziŋ nyîn nɛ́y, ma ɓá kú ɓá nɛ́, sé mbɛl a njuku walɓayri. Njuku, mí sa hí̧ nyîn nɛ́ ɓá: Mɔ ɓá “dɔ̂ʼɔ,” lé ma ɓá kú ɓá nɛ́, sé mbɛl mára̧ a gáŋnjuku walɓayri, njuku ka ɗí nyîn nɛ́ ɓá: “tuhɛ̧ nyá” mɛ̌, ké ma ɓá kú ɓá nɛ́ vbú ɓil gáŋ hɔrɛ, ka tí hú bɔʼɔ mbêw yáy.

²³Nǎŋnɔ́, mɔ̌, mí ɓá hɛ̧púna a mɔ̌ sé nzáʼaká̧na, rá̧ a mí gé kɛrɛ ɓá nyîn nɔ́ erú ka ɓay kuu mɔ̌ lé,

²⁴mɔ́ pɔŋ hɛ̧púna nɔ́, ka̧n mbɛl nzáʼaká̧na, a mɔ́ resé vbá̧buma kú nyîn nɔ́, dalé, mɔ́ regí mbí hɛ̧púna a mɔ̌, sé hí̧ Gáŋvbôn.

²⁵Mɔ̌, mí e ka ɓay kuu njuku lé, mɔ́ sé ziŋ nɛ́, a i mɔny ɓayké kuu mɛ̌ ɓá gánáké, ka i pa̧n a ŋgboro ɓáy, ɓay a ké zi ná gé ɓá mɔ́ hí̧ njuku walɓayri, a njuku walɓayri, zi ná gé ɓá mɔ́ ka̧n ɓil ndɔ̂ʼɔ a ŋgawbéreri, a ŋgawbéreri, kú gé ɓá mɔ́ ka̧n vûn sɛl.

²⁶Mi sa hí̧ mɔ́ gbátɓay, kú ŋgbá mɔ́ lé, mɔ tí tɛ̧́ a goló táŋ pú túna lari ka e tûló too yá, zi lé ké ɓá gun mínya tɛ̧́w pé ziy.»

²⁷«Í lá, kú tí sa ɓá: “Njuku ké niŋ dala yá.”

²⁸Dáy mǐ, mi sa hí̧ wǎyri ɓá: Njuku mí kó wûny a njuku, pé a kɛrɛ nɛ́ a ɓil lawɛ́ lé, ké niŋ dala ziŋ nɛ́ dá.

²⁹Dáy, mí ɓá nûn nɔ́ a lâʼa, pé ɓá mɔ́ lé ɓil ɓékéhɛ̧ lé, mɔ́ lú nûnké vbú kpâa ɓá ɗínáké. Ɓayhí̧lé, belɓá mɔ́ ɓɔ́l hɛ̧ mbêw, ka mûn nɔ́, ndé, kú ɓá mûn nɔ́ too, vbú ɓil hɔrɛ.

³⁰Dáy, mí ɓá ndɔ̂ʼɔ a lâʼa, pé ɓá mɔ́ ri ɓil ɓékéhɛ̧ lé, mɔ́ kúŋ ndɔ̂ʼɔké vbú kpâa ɓá ɗínáké. Ɓayhí̧lé, belɓá mɔ́ ɓɔ́l hɛ̧ mbêw, ka mûn nɔ́, ndé, kú ɓá mûn nɔ́ too vbú ɓil hɔrɛ.»

³¹«Kú tí sa kɔ́ ɓá: “Njuku, mí ɗém há̧na kuu wûny a mɛ̌ lé, ké ɗé mbété ɗém há̧na hí̧ nɛ́.”

³²Dáy mǐ, mi sa hí̧ wǎyri ɓá, njuku mí ɗém há̧na kuu wûny a mɛ̌, ka mí zi tí ɓá káwa dala ɓǎŋ nyáy, ké ɓá wûnyké niŋ dala, a ké mí nyá wɔ̧rɔ̧́ a féké. A njuku, ka nyá wûny ka wɔ̧rɔ̧́ mɛ̌ ní nɛ́y, niŋ dala kɔ́.»

³³«Í tí lá, kú sa hí̧ zîi a manárí̧ kɔ́ ɓá: “Mɔ́ pɔŋ niŋ hɛ̧ ka mɔ há mûn nɔ́ ɓay a niŋáké yá, dáy, mɔ́ niŋ hɛ̧ ka, mɔ há mûn nɔ́ sé tûlké ɓay a niŋáké, a mbɛl a Gáŋmbây.”

³⁴Dáy mǐ, mi sa wǎyri ɓá: Í zi ná háhɛ̧. Í zi ná háhɛ̧ sé ŋgboro a nûnalê, ɓayhí̧lé, ɓá gelkáwa Mbây a Gáŋvbôn.

³⁵Í zi ná háhɛ̧ a tísiri, ɓayhí̧lé, ɓá gel ɓá bɔʼɔ a Gáŋvbôn kɔ̧rú̧. Í zi ná háhɛ̧ a rɛŋa a Zerúzalɛ̂m, ɓayhí̧lé, ɓá Pû Mbây a lúkí.

³⁶Mɔ́ zi ná háhɛ̧ ka tûló, ɓayhí̧lé, mɔ zi ma niŋ tâny tûló mbêw puku malé yírí yá.

³⁷Ɓay a wǎyri mí ɓá: “ɛ̧ lé, ké ɓá ɛ̧!” Malé: “háy lé, ké ɓá háy!” Hɛ̧ ka njuku sa kɔ̧ tûlké, gí a ŋgboro Sata̧n.»

³⁸«Í lá, kú tí sa: “Njuku mí gu nûn nɔ́ lé, mɔ́ gu nûn nɛ́ pí, a njuku mí haw sîló lé, mɔ́ haw sîlé pí.”

³⁹Dáy, mǐ, mi sa hí̧ wǎyri, í zi ná rerú ɓéké hí̧ njuku ka niŋ ɓéké ziŋ wǎyri. Njuku mí vbá̧ ɓil nûn nɔ́ a ŋgboro lâʼa lé, mɔ́ pɔŋ nɛ́ ké vbá̧ a ŋgboro a kporo kɔ́.

⁴⁰Njuku mí zi ɓay a ɓá mɔ́ sé mbɛl a njuku walɓayri, ɓay a naʼa gárí a mɔ̌ lé, mɔ́ pɔŋ nɛ́ ké naʼa gáŋ laa a mɔ̌ kɔ́.

⁴¹Njuku mí há mɔ́, ɓá mɔ́ séséna ínáké mbêw kuu mɛ̌ lé, mɔ́ séséna ínáké sére kuu mɛ̌.

⁴²Mɔ́ hí̧ njuku ka vbí mɔ́ hɛ̧, a mɔ́ zi ná de njuku ka zi ɓá mɔ́ hí̧ nɛ́ ɓá túna nyá.»

⁴³«Í lá, kú tí sa ɓá: “Mɔ́ zi nyîn nɔ́, a mɔ́ fɔny njuku ŋgá̧na a mɔ̌.”

⁴⁴Dáy mǐ, mi sa hí̧ wǎyri ɓá: Í zi njuku ŋgá̧na a wǎyri, a í gɔ́ŋ Gáŋvbôn ɓay a njukuri ka ɓá wǎyri tɔ́ʼɔsêe.

⁴⁵Nǎŋnɔ́ rá̧, i kaw ɓá gun a Bâa a wǎyri ka e a nûnalê. Ɓayhí̧lé, ké ɓá sêe a mɛ̌ tɛ̧́ táŋgel a tûl a njuku a bélákéri rá̧ ɓéké njukuri kɔ́. Ké ɓá mbɔ̂m tɔ́ kɔ̧ tûl a njuku a ndárákéri rá̧ ɓéké njukuri kɔ́.

⁴⁶Dáy, wǎyri, mí zi ɓá njukuri ka zi wǎyriy, a̧hí̧, i zoko mbêw ɓá Gáŋvbôn, ké hí̧ wǎyri ɓá kpáʼandɔ̂ʼɔ lé? Í tá njuku mára̧ lari lambôri ka hí̧ lé? Kuriri pí, nǎŋ pé kú kaw niŋáké!

⁴⁷Wǎyri, mí nam ɓá nyîn a wǎyriy, a̧hí̧ i niŋ ka ndé njuku a ǎ̧wrí̧ lé? Tá njukuri ka tu ɓay a Gáŋvbôn nyáy, niŋ nǎŋnɔ́ kɔ́ nyá lé?

⁴⁸Dáy, wǎyri kɔ́, í kaw ɓá táŋáké, ɓá báŋké ka Bâa a wǎyri a nûnalê kaw ɓá táŋáké.»