Read Capanahua Matiye 8 Bible Online

Matiye 8 - Capanahua bible

Matiye 8

¹Gelka Zezú ɗere a tûl kon dáy, njukuri ɓá ŋgɛ̧́náké tɔ́ŋ nɛ́.

²Nǎŋnɔ́, njuku ndɛ́ɓɛ a há̧na, ta̧m gí gbaŋa Zezú, a gí huku tísiri a mbɛlɛ́, a sa hí̧ nɛ́ ɓá: «Gáŋmbây, mɔ zi lé, mɔ e ŋgɛ́rɛ mǐ!»

³Zezú ndara ndɔ̂ʼɛ, a ɗa nɛ́ a sa: «Mi zi dá, mɔ́ ziŋ ŋgɛ́rɛ!» Núnmbɛ̧́nɛ́ nɔ́, záŋmá ndɛ́ɓɛ ɔ ka mûn nɛ́.

⁴Dáy Zezú vbara nɛ́ a sa: «Mɔ́ zi ná saɓayké hí̧ njuku a há̧na! Mɔ́ sé tɔ́ʼɔ mûn nɔ́ hí̧ gáŋnjuku nzáʼaká̧na, a mɔ́ niŋ hɛ̧púna ka sáŋna a Mɔyíze vbíy, ɓay a tɔ́ʼɔ hí̧ njukuri too ɓá, mɔ́ ziŋ ŋgɛ́rɛ dá.»

⁵Zezú kaw rí ɓil pû a Kapɛrnahûm, lé gáŋnjuku a há̧na, ka kaw tûl a ŋgawbére a Rɔmɛri̧ ísɔ́t, gí ziŋ nɛ́,

⁶a vú hí̧ nɛ́, a sa: «Gáŋmbây, njukupéna a mǐ, e ka záŋmá a gel ní ŋgɛ́rɛ mambá, mûn nɛ́ hú ŋgboro mbêw!»

⁷Zezú sa hí̧ nɛ́: «Mi e séna, a sé ŋgɛ́rɛ nɛ́.»

⁸Dáy gáŋnjuku a ŋgawbére sa: «Gáŋmbây, mi zi ma, ɓay a mɔ́ gí rí ɓil hɛlɛ a mí nyá. Mɔ́ saɓay mbêw yáŋ, lé njukupéna a mǐ e ziŋ ŋgɛ́rɛ.

⁹Mǐ, mi erú ka gáŋnjuku ka kaw tûl ní, ka mi kaw lá kuriri, mi erú ka ŋgawbéreri a bɔʼɔ ní, ka lá nzáʼa ní. Mi sa hí̧ njuku mbêw ɓá: “Mɔ́ sé! Lé ké sé.” Mi sa hí̧ njuku a féké ɓá “Mɔ́ gí! Lé ké gí!” Rá̧ a sa hí̧ njukupéna a mǐ “Mɔ́ niŋ hɛ̧ nɛ́! Lé ké niŋ!” »

¹⁰Gelka Zezú láɓay nɔ́y, ké kaw yér dáy, a sa hí̧ njukuri ka tɔ́ŋ nɛ́y: «Katína, mi sa hí̧ wǎyri gbátɓay, a ɓil a njuku a Izirayɛ́lri too, mi zi kó njuku ka e a mára̧ láɓulaw ɓá báŋa a njuku nɛ́ nyá.

¹¹Dáy, mi sa hí̧ wǎyri ɓá, njukuri ɓá ŋgɛ̧́náké e gí a ŋgboro a tɛ̧́na a sêe rá̧ a ríŋa sêe, kú e gí kaw nzáʼa lâʼa mbêw kuu Abaraham, Izák rá̧ Zakob a ɓil Pû a Gáŋvbôn.

¹²Dáy, njukuri ka Gáŋvbôn mɔny Pû mɛ̌ zoko ɓay a kuriri, kú e ní kuriri kɔ̧ kála, a ɓil tirí̧ma, a goló kú e vú ka sɔ̧́ sîl a kuriri!»

¹³A falké, Zezú sa hí̧ gáŋnjuku a ŋgawbéreri ɓá: «Mɔ́ resé pû a mɔ̌! Ké ná hí̧ mɔ́, ɓá báŋké nɔ́ ka mɔ́ láɓulaw sé tûlké!» Núnmbɛ̧́nɛ́ a goló, njukupéna a mɛ̌ ziŋ ŋgɛ́rɛ.

¹⁴A falké, Zezú sé ɓil hɛlɛ a Píyɛ́r, a gé ziŋ máfáy a mɛ̌ erú ka záŋmá pélé.

¹⁵Zezú gé ɗa ndɔ̂ʼɛ dáy, ké ziŋ ŋgɛ́rɛ, a uru a ɓá hɛ̧sɔ̧́na hí̧ nɛ́.

¹⁶Ka bɔʼɔlêw ká̧y, kú fa̧ njuku záŋmá têm ɓékéri ɓá ŋgɛ̧́náké, gí hí̧ Zezú. Ka ŋgboro a ɓay a mɛ̌, Zezú ní têm ɓékéri ɓá ŋgɛ̧́náké, a ŋgɛ́rɛ njuku záŋmári̧ too.

¹⁷Nǎŋnɔ́, niŋ ɓá báŋké nɔ́ ka ɓay a porofɛ́t Ezayí tí sáy ɓá: «Ké nyá kpɛrɛ a manárí̧, a réhol záŋmá a manárí̧ ka̧n tûlé.»

¹⁸Gelka Zezú kó njukuri mára̧ ɗɔ́ŋ nɛ́y, ké sa hí̧ gunbɛʼɛri ɓá kú he sé helkála fâ̧w, a ŋgboro sá̧.

¹⁹Dáy, njuku tɔ́ʼɔ sáŋna a há̧na gí gé lé, a sa hí̧ nɛ́ ɓá: «Gáŋnjuku, mi e tɔ́ŋ mɔ́ sé gel too ka mɔ́ e sénay.»

²⁰Dáy Zezú resa hí̧ nɛ́ ɓá: «Gáʼanri̧ erú ka lɔ̂ʼɔ nâm a kuriri, ndoyri erú ka vûn a kuriri. Dáy Gun a njuku, zi tí ka gel, ɓay a ɓá tûlé ka̧nrú̧ nyá.»

²¹Njuku a féké mbêw a bazeŋ a gunbɔʼɔ a Zezúri sa hí̧ nɛ́ ɓá: «Gáŋmbây, mi vú hí̧ mɔ́, mɔ́ pɔŋ ŋgboro hí̧ mí, a mí sé goro bâa a mǐ rá̧.»

²²Zezú resa hí̧ nɛ́ ɓá: «Mɔ́ tɔ́ŋ mi, a mɔ́ pɔŋ hûlri kú goro hûl a kuriri.»

²³Zezú rí ɓil kumbôn dáy Gunbɛʼɛri tɔ́ŋ nɛ́.

²⁴Núnmbɛ̧́nɛ́, gáŋ kúna uru, a laŋ mbii, gbélém mbii uru a zaʼa kumbôn lé, Zezú e ka nâm.

²⁵Gunbɛʼɛri ta̧m gí gbɛ́ŋɛ́, a toma nɛ́ ka vbá̧nzáʼa a sa: «Gáŋmbây, mɔ́ pɛ̧́ rú, rú e hûl!»

²⁶Dáy, Zezú toma, a sa hí̧ kuriri ɓá: «Ɓayhí̧ i ŋgú wɔ́w lé, njuku mbílaw kpú nyári̧?» Dáy, ké uru, a pom kúna rá̧ mbii lé, gel rená yím.

²⁷Kuriri too, kú kaw yér, a sa: «Njuku nɛ́, ɓá njuku a sí̧ rá̧ mbii rá̧ kúna lá nzɛ́ʼɛ lé?»

²⁸Gelka Zezú ka̧ kála mbii, ka tísiri a Gadareniyɛ̧, njukuri sére tɛ̧́ a tûlpâl, gí ziŋ nɛ́. Kú erú ka záŋmá têm ɓéké, a ŋgbɔ́rɔ mambá, njuku ka zi ɓay a tá ŋgboroké zi tí yá.

²⁹Dáy, kú vbá̧nzáʼa a sa: «Gun a Gáŋvbôn, a̧hí̧ mɔ́ zi ziŋ rúy lé? Mɔ́ gí ɓá rú tɔ́ʼɔsêe ɗambɛl rá̧ nâmké, ké ka̧ lé?»

³⁰A gbaŋa kuriri kpay, kɔsɔri ɓá ŋgɛ̧́náké kaw ɛ́ lâʼa.

³¹Têm ɓékéri gɔ́ŋ Zezú a sa: «Mɔ̌ mí zi ɓay a ní rú lé, mɔ́ pé rú kɔ̧ mûn a kɔsɔ nɔ́rí̧!»

³²Dáy Zezú sa: «I sé!» Têm ɓékéri tɛ̧́ ka mûn a njuku ráyri̧, a sé ri mûn a kɔsɔri. Núnmbɛ̧́nɛ́, kɔsɔri too ŋgú ɗere ŋgêŋ, a lé mbii a hú kɔ̧rú̧.

³³Njukuri, ka kaw koro kɔsɔri, réka ŋgúna sé pû, a gé saɓay a hɛ̧ri̧ ka ziŋ kuriri rá̧ hɛ̧ ka ziŋ njuku sére nɔ́rí̧ ka erú ka záŋmá têm ɓékéri.

³⁴Nǎŋnɔ́, njuku pûri tɛ̧́ too, a sé ziŋ Zezú. Gelka kú gé ziŋ nɛ́, kú vú hí̧ nɛ́ ɓá ké kála a ɓil kaw a kuriri.