Read Capanahua Matiye 9 Bible Online

Matiye 9 - Capanahua bible

Matiye 9

¹Zezú ri ɓil kumbôn, a he mbii, a rekála sé pû mɛ̌.

²Njukuri mbí njuku záŋmá mûn a hûlké a há̧na, ka tibôy gí gel a Zezú. Gelka Zezú kó láɓulaw a kuriri, ké sa hí̧ njuku záŋmá ɓá: «Mɔ́ kpúmûn nɔ́, gun a mǐ, mi vbá̧buma ɓékéhɛ̧ a mɔ̌ dá!»

³A tûl ɓay nɔ́, njuku tɔ́ʼɔ sáŋna há̧narí̧, ŋgɔ̧rɔ̧ a bazeŋ a kuriri a sa: «Njuku nɛ́, fára Gáŋvbôn!»

⁴Zezú tu kɛrɛ a ɓil law a kuriri, dáy a sa: «Ɓayhí̧, i erú a mára̧ kɛrɛ nǎŋnɔ́ lé?

⁵A̧hí̧ ná ɗɛ́ŋ, sa ɓá: “Mi vbá̧buma ɓékéhɛ̧ a mɔ̌ dá”, malé sa ɓá: “Mɔ́ uru a séséna lé?”

⁶Dáy, mi zi ɓá i tu ɓá: Gun a njuku erú ka kpɔ́ŋa a tísiri nɛ́, ɓay a vbá̧buma ɓékéhɛ̧ a njukuri.» A goló, ké sa hí̧ njuku záŋmá ɓá: «Mɔ́ uru, a mbí hîi a mɔ̌, a mɔ́ kála sé vûn a mɔ̌!»

⁷Dáy, ké uru a rekála sé vûn a mɛ̌.

⁸Gelka njukuri kó nǎŋnɔ́, wɔ́w ŋgbá kuriri dáy, kú hɔ̧́ Gáŋvbôn ka hí̧ njukuri, mára̧ kpɔ́ŋa nǎŋnɔ́.

⁹Falké Zezú kaw kála, a gé kó njuku a há̧na, kaw a gel mára̧ lari lambô, rɛŋɛ́ ɓá Matiye, a sa hí̧ nɛ́ ɓá: «Mɔ́ tɔ́ŋ mi!» Dáy Matiye uru a tɔ́ŋ nɛ́.

¹⁰Gelka Zezú e ka nzáʼa lâʼa, a ɓil vûn a Matiye kuu gunbɛʼɛri, njuku mára̧ lari lambôri, rá̧ njuku a fékéri ka ɓá ɓéké njukuri ɓá ŋgɛ̧́náké, gí kaw nzáʼa lâʼa kuu mɛ̌.

¹¹Fariziyɛ̧́ri̧ kó dáy, a sa hí̧ gunbɛʼɛri ɓá: «Ɓayhí̧, Gáŋnjuku a wǎyri sɔ̧́lâʼa kuu njuku mára̧ lari lambôri rá̧ ɓéké njukuri lé?»

¹²Zezú láɓayké, dáy a sa: «Tí ɓá njuku a ŋgɛ́rɛ́kéri, pé ɛ́ njuku hí̧ nzáʼagoy yá, ɓá njuku záŋmári̧.

¹³I sé ɛ́ táŋa ɓay ka ɗé ka̧n ɓil ɓay a Gáŋvbôn, ka sa ɓá: “Hɛ̧ ka mí ziy, ɓá haŋnjuku, tí ɓá hɛ̧púnari̧ nyá.” Ɓayhí̧lé, mi zi gí ɗí njuku a ndárákéri yá, mi gí ɗí njukuri ka kó mûn a kuriri ɓá kú kaw ɓá ɓéké njukuri.»

¹⁴Nǎŋnɔ́ Gunbɔʼɔ a Zâŋri̧ gí gbaŋa Zezú, a vbí nɛ́ ɓá: «Ɓayhí̧rá̧, ɓurú rá Fariziyɛ̧́ri̧, rú sáŋhɛ̧ rá̧ Gunbɔʼɔri zi sáŋhɛ̧ nyáy lé?»

¹⁵Dáy, Zezú rerú hí̧ kuriri ɓá: Njukuri ka ɓá njuku mbaŋa a njuku nyá wûny, ma sáŋhɛ̧ ka njuku nyá wûny erú kuu kuriri ɓáy yá. Sêeké e gína, ka njuku nyá wûny, zi tí kuu kuriri mbaay, a goló kú e sáŋhɛ̧.

¹⁶«Njuku a há̧na, tí mbí nzáʼa laa a fékéké, ka pól tâ̧w gári rú yá, ɓayhí̧lé nzáʼa laa a fékéké e ré sɔ̧́ tâ̧w gári dáy, gɔ́rɔ́ké e réhɔ̧́ mambá.

¹⁷Njuku, zi ma aŋa vôn a ndísɛ̌ʼɛ kɔ̧ ɓil tâ̧w kɛrɛri yá, tí yá lé, kɛrɛkéri e vbéra, vôn e kɔ̧ kpâa, kú e ɓɔ́l kɛrɛkéri kɔ́. Belɓá kú aŋa vôn a ndísɛ̌ʼɛ kɔ̧ ɓil kɛrɛ a ŋgɛŋkéri, nǎŋnɔ́ kɛrɛri rá̧ vôn too e ná ɓá béláké.»

¹⁸Gelka Zezú kaw saɓay hí̧ kuriri nǎŋnɔ́, mbây a Juyíf a há̧na gí huku mbɛlɛ́, a vú hí̧ nɛ́, a sa: «Gun lɔŋɔ́ a mǐ, hú a ŋgɛŋnɛ́, dáy mɔ́ gí, a mɔ́ gí ɓá ndɔ̂ʼɔ kɔ̧ tûlé, lé ké e toma.»

¹⁹Zezú uru a tɔ́ŋ nɛ́ kuu gunbɛʼɛri.

²⁰Nǎŋnɔ́, wûny há̧na erú ka záŋmá fihoy, mbimbɔ̂m bôo a sére dá, dáy a gí ka fal a Zezú, a gí ɗa nzáʼa gári a mɛ̌.

²¹Ɓayhí̧lé, ké sa a ɓil lawɛ́ ɓá: «Mǐ, mí ziŋ ɗa ɓá nzáʼa gári a mɛ̌, mi e ziŋ ŋgɛ́rɛ.»

²²Zezú fere, a ɛ̧rɛ̧ nɛ́ a sa: «Mɔ́ ŋgú wɔ́w yá, gun a mǐ, láɓulaw a mɔ̌ pɛ̧́ mɔ́ dá!» Nǎŋ, núnmbɛ̧́nɛ́ a goló, wûnyké ziŋ ŋgɛ́rɛ.

²³Gelka Zezú gé ka̧ ɓil vûn a mbây a Juyífké, ké gé kó njuku ul madokâ̧wri̧ rá̧ njukuri ɓá ŋgɛ̧́náké a kaw ɓála a órómûn a kuriri.

²⁴Dáy, a sa hí̧ kuriri ɓá: «I tɛ̧́ sé kála, ɓayhí̧lé gun a lɔŋɔ́ nɛ́ zi hú yá, ké ná nâm.» Dáy njukuri sáʼa nɛ́.

²⁵Gelka njukuri tɛ̧́ kálay, ké ri ɓil vûn, a gé ŋgbá ndɔ̂ʼɔ a gun a lɔŋɔ́, dáy ké uru.

²⁶Ɓayké wal ma ɓil kawké too.

²⁷Gelka Zezú tɛ̧́ ka goló, râ̧wri̧ sére tɔ́ŋ nɛ́ ka vbá̧nzáʼa a sa: «Mɔ́ kósêe hí̧ rú, Gun a Davít!»

²⁸Gelka, ké gé ka̧ ɓil vûn, râ̧wri̧ ta̧m gí gbɛ́ŋɛ́, dáy Zezú vbí kuriri: «Í láɓulaw ɓá mí ma ŋgɛ́rɛ wǎyri lé?» Kú zi a sa: «ɛ̧, Gáŋmbây!»

²⁹Dáy Zezú ɗa nûn a kuriri a sa: «Ké ná hí̧ wǎyri ɓá báŋké nɔ́ ka i láɓulaw rúy!»

³⁰Dáy nûn a kuriri gí kó gel. Zezú vbara kuriri ɓá: «Njuku a há̧na ké zi ná láɓayké.»

³¹Dáy, kú tɛ̧́ a saɓay a Zezú ma ɓil kawké too.

³²Ka râ̧wri̧ kaw tɛ̧́ kálay, kú ɓá njuku a há̧na a têm ɓéké ri nɛ́ a ké zi saɓay yáy, gí gel a Zezú.

³³Gelka Zezú ní têm ɓéké tɛ̧́ ka mûn nɛ́, ké tí saɓay. A ɓil a njukuri, kuriri too kú kaw yér, a sa: «Kú zi kó mára̧ hɛ̧ nɛ́, a Izirayɛ́l bɔʼɔ mbêw yá!»

³⁴Dáy, Fariziyɛ̧́ri̧ sa ɓá: «Ɓá mbây a têm ɓékéri pé hí̧ nɛ́ kpɔ́ŋa ní têm ɓékékéri.»

³⁵Zezú sé pû ka pû, a tɔ́ʼɔhɛ̧ a ɓil vûn mára̧ a Juyífri, a tɔ́ʼɔ Bélaɓay a káwa Mbây a Pû a Gáŋvbôn hí̧ njukuri, a ŋgɛ́rɛ záŋmári̧ too, rá̧ kpɛrɛri too.

³⁶Gelka ké kó njukuri, ké kó kuriri sé haŋ mambá, ɓayhí̧lé njukukéri ta̧ tapát, mûn a kuriri hú too, ɓá báŋa mbóléri ka zi tí ka njuku koro kuriri yáy.

³⁷Nǎŋnɔ́, Zezú sa hí̧ gunbɛʼɛri ɓá: «Hɛ̧pay, ɓay a lúna ŋgɛ̧́ mambá, njuku niŋ pénákéri ŋgɛ̧́ nyá.

³⁸Dáy, i gɔ́ŋ njuku wâʼa, a ké pé njukupénari̧, a kú gí mára̧ hɛ̧payké.»