Read Capanahua Márke 10 Bible Online

Márke 10 - Capanahua bible

Márke 10

¹Dáy, Zezú kála a gelké, a sé tísiri a Judé ka e ka helkála mbii a Jurdɛ́ŋ. Njukuri ɓá ŋgɛ̧́náké re mára̧ ɓáy, gí gbɛ́ŋɛ́, ké tí tɔ́ʼɔhɛ̧ hí̧ kuriri ɓá báŋké a ké niŋ dát.

²Fariziyɛ̧́ a há̧narí̧ gí gbaŋa Zezú, ɓay a gí lélawɛ́, dáy a vbí nɛ́ ɓá: «Sáŋna a manárí̧ hí̧ ŋgboro hí̧ wɔ̧rɔ̧́njuku ɓá ké ní wûny a mɛ̌ lé?»

³Dáy Zezú fere a vbí kuriri ɓá: «Mɔyíze hí̧nzáʼa hí̧ wǎyri ɓá hí̧ lé?»

⁴Kú fere a sa: «Mɔyíze hí̧nzáʼa hí̧ wɔ̧rɔ̧́njuku ɓá ké ɗé mbété ɗém há̧na hí̧ wûny a mɛ̌, a ké ní nɛ́.»

⁵Dáy Zezú sa hí̧ kuriri ɓá: «Ɓay tûl kpúlaw a wǎyri pé Mɔyíze hí̧nzáʼa nɔ́ hí̧ wǎyri.

⁶Dáy Mbété a Gáŋvbôn sa, ka títáʼaké a Gáŋvbôn mɔny hɛ̧ri̧, “ké mɔny wɔ̧rɔ̧́njuku rá̧ wûnynjuku.”

⁷“Ɓaykénɔ́, wɔ̧rɔ̧́njuku e pɔŋ bâa a mɛ̌ rá̧ mâa a mɛ̌ ɓay a gí kaw mbêw kuu wûny a mɛ̌,

⁸kuriri sére too, kú e kaw ɓá hay mûn mbêw.” Nǎŋnɔ́, kú tí ɓá hay mûn sére mbaa, kú kaw ɓá hay mûn mbêw.

⁹Nǎŋnɔ́ dáy, njuku ké zi ná wal hɛ̧ ka Gáŋvbôn ŋgá̧ mbêw.»

¹⁰Gelka kú resé vûn, gunbɛʼɛri vbí nɛ́ ɓay a fékéri sé tûl ɓayké nɔ́.

¹¹Zezú sa hí̧ kuriri ɓá: «Wɔ̧rɔ̧́njuku ka ní wûny a mɛ̌, ka a renyá wûny a féké, niŋ dala ɓay tûl a wûny a mbɛl.

¹²Ɓá mbêwké kɔ́, wûny wɔ̧rɔ̧́, ka pɔŋ wɔ̧rɔ̧́ a mɛ̌, ka a renyá wɔ̧rɔ̧́ a féké, niŋ dala kɔ́.»

¹³Njukuri ɓá gun a léléri gí gel a Zezú, ɓayké ɓá ndɔ̂ʼɔ kɔ̧ tûl a kuriri. Dáy Gunbɛʼɛri gí nzáʼa ziŋ kuriri.

¹⁴Gelka Zezú kó nǎŋnɔ́, ké ɗí hɛ́rɛ dáy, a sa hí̧ Gunbɛʼɛri ɓá: «Í pɔŋ gun a léléri kú gí gél ní. Í zi ná de kuriri, ɓayhí̧lé Pû a Gáŋvbôn ná ɓá ɓay a njukuri ka kaw ɓá báŋa kuriri.

¹⁵Katína, mi kaw sa hí̧ wǎyri: Njuku mí zi nyá ɓay a Pû Mbây a Gáŋvbôn ɓá báŋa a gun a léléri yáy, ké zi ma ri ɓil Pûké yá.»

¹⁶Falké, Zezú fá̧ gunri̧ a ɓá ndɔ̂ʼɔ kɔ̧ tûl a kuriri, dáy a ɗí béla hí̧ kuriri.

¹⁷A Zezú kaw kálay, njuku a há̧na gí ka ŋgúna, gí huku mbɛlɛ́, a vbí nɛ́ ɓá: «Béla njuku tɔ́ʼɔhɛ̧, a̧hí̧ mi e niŋáké, ɓay a mi ziŋ káwa ndísɛ̌ʼɛ dát lé?»

¹⁸Zezú sa hí̧ nɛ́ ɓá: «Ɓayhí̧ mɔ ɗí mí ɓá béla njuku lé? Béla njuku zi tí mbêw yá, ɓá Gáŋvbôn mbêw yáŋ.

¹⁹Mɔ tu sáŋna ka sa ɓá: Mɔ́ í hûl yá, mɔ́ niŋ dala yá, mɔ́ ríw yá, mɔ́ saɓay manyá sé tûl a njuku yá, mɔ́ nyá hɛ̧ a njuku ka ŋgboro a hɛ̧rɔ́ʼɔ yá, mɔ hɛʼɛ bâa a mɔ̌ rá̧ mâa a mɔ̌.»

²⁰Njuku ráy sa hí̧ Zezú: «Njuku tɔ́ʼɔhɛ̧, mi tɔ́ŋ hɛ̧ nɔ́rí̧ too, tí ka mi kaw ɓá kaban njuku ɓáy.»

²¹Dáy Zezú ɛ̧rɛ̧ nɛ́ ka law zína, a sa hí̧ nɛ́ ɓá: «Hɛ̧ mbêw yáŋ, pé zi hí̧ mɔ́: Mɔ́ sé, a mɔ́ sé zé hɛ̧zíŋa a mɔ̌ri̧ too, a mɔ́ wal lariké hí̧ njuku fóyári. A goló, mɔ e ziŋ hɛ̧zíŋa a fékéri a nûnalê. Falké, mɔ́ gí a tɔ́ŋ mí.»

²²Gelka njuku ráy láɓay nɔ́, ké kála ka lawyíra, ɓayhí̧lé ké erú ka hɛ̧zíŋári̧ ɓá ŋgɛ̧́náké.

²³Zezú ɛ̧rɛ̧ gel kí ɗɔ́ŋ nɛ́ a sa hí̧ gunbɛʼɛri ɓá: «Ŋgɛ́rɛ mambá ɓay a njuku hɛ̧zíŋári̧, kú ri ɓil Pû a Gáŋvbôn!»

²⁴Gunbɛʼɛri kaw yér sé tûl ɓay nɔ́, dáy, Zezú resa hí̧ kuriri ɓáy ɓá: «Gun a mǐri̧, ŋgɛ́rɛ mambá ɓay a ri ɓil Pû a Gáŋvbôn!

²⁵Ná ɗɛ́ŋ hí̧ Bandikóré ɓay a ri lɔ̂ʼɔ suká, dáy, ŋgɛ́rɛ mambá hí̧ njuku hɛ̧zíŋa ɓay a ké ri ɓil Pû a Gáŋvbôn.»

²⁶Ɓay nɔ́ ɓá gunbɔʼɔ a Zezúri kaw yér dáy, kú sa a bazeŋ kuriri ɓá: «Mí ɓá nǎŋ, njuku a sí̧ mbêw e pɛ̧́na lé?»

²⁷Zezú ɛ̧rɛ̧ kuriri dáy a sa: «A gel a njukuri ma niŋ a nyá, dáy tí ɓá a gel a Gáŋvbôn nyá, ɓayhí̧lé hɛ̧ ka ndé Gáŋvbôn zi tí yá.»

²⁸Dáy Píyɛ́r sa hí̧ nɛ́: «Mɔ́ lá! Rú pɔŋ hɛ̧ a ɓurú too, pé a tɔ́ŋ mɔ́.»

²⁹Zezú resa hí̧ nɛ́: «Katína mi sa hí̧ wǎyri, ɓá gbátɓay, njuku mí pɔŋ ɓay tûl ní rá̧ ɓay tûl Bélaɓay, vûn a mɛ̌, nyîn nɛ́rí̧, mánǎa a mɛ̌ri̧, mâa rá̧ bâa a mɛ̌ri̧, gun rá̧ wâʼa a mɛ̌ri̧,

³⁰ké e ziŋ ndé bɔʼɔké ísɔ́t, tí a ŋgɛŋnɛ́ ka tísiri nɛ́: vûnri̧, nyînrí̧, mánǎari̧, mâari̧, gunri̧ rá̧ wâʼari, a ɓil tɔ́ʼɔsêeri, rá̧ a ɓil nâm ka e gínay, káwa a ndísɛ̌ʼɛ ka kɔ́rɔ́ké zi tí yáy.

³¹Dáy njukuri ɓá ŋgɛ̧́náké ka ɗambɛl a ŋgɛŋnɛ́ e resé kɔ́rɔ́ fal, a njukuri ɓá ŋgɛ̧́náké ka e ka kɔ́rɔ́ fal a ŋgɛŋnɛ́ e reɗambɛl.»

³²Zezú rá̧ njukuri ka tɔ́ŋ nɛ́ kaw he gé ɓá Zerúzalɛ̂m. Zezú séséna ɗá mbɛl a kuriri. Gunbɔʼɔ a Zezúri mbá a law lúna rá̧ njukuri ka sé kuu kuriri kaw ka wɔ́w. Dáy, Zezú ɗá gunbɛʼɛri bôo a sére ɓáy, a tí saɓay a hɛ̧ ka e ziŋ nɛ́ hí̧ kuriri.

³³Ké sa hí̧ kuriri ɓá: «Í lá, ná kaw he gé ɓá Zerúzalɛ̂m, a sá̧ kú e zé Gun a njuku hí̧ gáŋnjuku nzáʼaká̧nari̧, rá̧ gáŋnjuku tɔ́ʼɔ sáŋnari̧. Kú e walɓay ŋgbá nɛ́ ɓay a kú í nɛ́, a ɓá nɛ́ ka̧n ɓil ndɔ̂ʼɔ a njukuri ka zi tu Gáŋvbôn nyáy.

³⁴Kú e sáʼa nɛ́, a sa̧sâ̧m kɔ̧ nɛ́, a vbá̧ nɛ́ ka ndêe, a í nɛ́. Dáy nâm sáy a falké, ké e toma a hûl.»

³⁵Falké, gun a Zebedéri ka sére Ják rá̧ Zâŋ, ta̧m gí gbaŋ a Zezú, a sa hí̧ nɛ́ ɓá: «Njuku tɔ́ʼɔhɛ̧, rú zi ɓay a hɛ̧ a há̧na, dáy rú zi ɓá, mɔ́ niŋ hɛ̧ké hí̧ rú.»

³⁶Zezú sa hí̧ kuriri ɓá: «A̧hí̧, i zi ɓá mí niŋ hí̧ wǎyri lé?»

³⁷Kú sa ɓá: Mɔ́ hí̧ ŋgboro hí̧ rú, a rú kaw gbɔ́ŋɔ njuku mbêw a ndɔ̂ʼɔ lâʼa rá̧ njuku mbêw a ndɔ̂ʼɔ kpóro a mɔ̌, gelka mɔ́ e gí kaw Mbây a ɓil hɔ̧́na a mɔ̌y.

³⁸Dáy Zezú sa hí̧ kuriri ɓá: «I zi tu hɛ̧ ka i kaw vbínáké yá. I ma nzó yoŋ tɔ́ʼɔsêe, ka mi e nzónáké, malé nyá batêm tɔ́ʼɔsêe ka mi e nyánáké lé?»

³⁹Kú zi a sa: «Rú marú̧» Dáy Zezú sa hí̧ kuriri ɓá: «Katína, i e nzó a ɓil yoŋ tɔ́ʼɔsêe ka mi e nzónákéy, ka nyá batêm tɔ́ʼɔsêe ka mi e nyánákéy.

⁴⁰Dáy, ɓay a kaw ŋgboro a lâʼa malé ŋgboro a kpóro a mǐ, zi gí ka gél ní nyá, gelkáwaké, ná zoko njukuri, ka Gáŋvbôn mɔny ɓay a kuriri.»

⁴¹Gelka gázín gunbɔʼɔ a Zezúri ka bôo láɓayké, kú ɗí hɛ́rɛ ziŋ Ják rá̧ Zâŋ.

⁴²Dáy, Zezú ɗí kuriri too, a sa hí̧ kuriri: «I tu ɓá táŋáké, njukuri, a kú kó kuriri ɓá mbây a njukuri, kú kaw tûl a njukuri ɓá báŋa bákáwa, rá̧ gáŋnjukuri, tɔ́ʼɔ kpɔ́ŋa a kuriri hí̧ njukuri.

⁴³Dáy ké ná niŋ nǎŋnɔ́ a bazeŋ a wǎyri. Njuku mbêw a bazeŋ a wǎyri mí zi ɓay kaw ɓá gáŋnjuku lé, belɓá ké kaw ɓá njukupéna a wǎyri,

⁴⁴A njuku mbêw a bazeŋ a wǎyri mí zi ɓay a kaw ɓá njuku a tûlké lé, ké kaw ɓá koy a gázínákéri too.

⁴⁵Ɓayhí̧lé Gun a njuku mɛ̌ ka mûn nɛ́, ké zi gí ɓay a kú niŋ péna hí̧ nɛ́ nyá, ké gí ɓay a niŋ péna, a hí̧ ndísɛ̌ʼɛ a mɛ̌ ɓay a zé njukuri ɓá ŋgɛ̧́náké.»

⁴⁶Zezú rá̧ gunbɛʼɛri ka̧ Jeriko. Gelka, Zezú tɛ̧́ a ɓil pûké kuu gunbɛʼɛri, rá̧ njukuri ɓá ŋgɛ̧́náké, râ̧w a há̧na rɛŋɛ́ ɓá Bartimé, gun a Timɛ́, kaw gbaŋ ŋgboro, kaw gɔ́ŋ hɛ̧.

⁴⁷Gelka, ké lá ɓá Zezú a Nazarɛ́t, ké tí vbá̧nzáʼa, a sa: «Zezú gun a Davít, mɔ́ kósêe a mǐ!»

⁴⁸Njukuri to nɛ́ ɓá ké pɔŋ nzɛ́ʼɛ, lé ké vbá̧nzáʼa gé ɓá mbɛl: «Gun a Davít, mɔ́ kósêe a mǐ!»

⁴⁹Zezú ew dáy a sa: «Í ɗí nɛ́ gí.» Kú ɗí râ̧wké a sa hí̧ nɛ́ ɓá: «Mɔ́ kpúmûn nɔ́, a mɔ́ uru, ké ɗí mɔ́!»

⁵⁰Nǎŋnɔ́, ké ɓá gáŋ gári a mɛ̌ vbú kpâa, a uru ɓat a gí gel a Zezú.

⁵¹Zezú vbí nɛ́ ɓá: Hi̧ mɔ zi ɓá mí niŋ hí̧ mɔ́ lé? Ké sa hí̧ Zezú ɓá: Gáŋnjuku, mɔ́ niŋ a mí kó gel ɓá féké.

⁵²Zezú sa hí̧ nɛ́ ɓá: «Mɔ́ sé, láɓulaw a mɔ̌ pɛ̧́ mɔ́ dá.» Núnmbɛ̧́nɛ́ nɔ́, ké kó gel, a tɔ́ŋ Zezú.