Read Capanahua Márke 11 Bible Online

Márke 11 - Capanahua bible

Márke 11

¹Gelka Zezú rá̧ gunbɛʼɛri zi ɗɛ́ŋ ka Zerúzalɛ̂m ka gbaŋ pû Bɛtfazé rá̧ Betaní, ɗɛ́ŋ kuu kon a Oliviyé, Zezú pé gunbɛʼɛri sére ɗambɛl,

²a sa hí̧ kuriri ɓá: «Í sé pû ka ná a mbɛl a wǎyri, rá̧ i mí gé ka̧ lé, i e gé kó kú ŋgá̧ gun máhóla ka njuku a há̧na zi he tûlké bɔʼɔ mbêw yá ɓáy. Í sɛl nɛ́, a í ɓá nɛ́ gí hí̧ mí.

³Rá̧ njuku a há̧na mí vbí wǎyri: “Ɓayhí̧rá̧ i niŋ nǎŋnɔ́ lé?” Í sa hí̧ nɛ́ ɓá: “Gáŋmbây pé zi ɓayké, ké e pé regírú tí ɗiɓaŋ nyá.”»

⁴Kú sé, a gé ziŋ gun máhóla a kála, a kú ŋgá̧ ka̧n tûl ŋgboro, a nzáʼaŋgboro vûn a há̧na. Kú gé sɛl nɛ́.

⁵Njuku a há̧narí̧ ka e ka gelké, vbí kuriri ɓá: «A̧hí̧ i kaw niŋáké lé? Ɓayhí̧ i sɛl gun máhóla nɔ́ lé?»

⁶Dáy kú saɓay ɓá báŋké ka Zezú sa hí̧ kuriri, dáy kú pɔŋ kuriri kála rú.

⁷Kú ɓá gun máhóla gí hí̧ Zezú; kú laɓa gáŋ gári a kuriri kɔ̧ tûl ka̧ny a gun máhólaké dáy Zezú he kaw tûlké.

⁸Njukuri ɓá ŋgɛ̧́náké fi gári a kuriri kɔ̧ tûl ŋgboro, njuku a fékéri ɓá goydiiri a kú hál a ɓil kpâa kɔ̧ tûl ŋgboro.

⁹Njukuri ka séséna ɗambɛl a Zezú rá̧ njukuri ka tɔ́ŋ nɛ́ vbá̧nzáʼa a sa: «Hɔ̧́na hí̧ Gáŋvbôn! Gáŋvbôn ké ɗí béla kɔ̧ tûl a njuku ka gí ka rɛŋ a Gáŋmbây!

¹⁰Gáŋvbôn ké ɗí béla kɔ̧ tûl káwa mbây ka kaw gína, káwa mbây a zîi manárí̧ Davít! Hɔ̧́na hí̧ Gáŋvbôn a nûnalê!»

¹¹Zezú ri ɓil pû a Zerúzalɛ̂m, a tá sé vûn a Gáŋvbôn, a kó hɛ̧ri̧ too ka kaw niŋa a ɓilké, falké, ké kála sé Betaní kuu gunbɛʼɛri bôo a sére, ɓayhí̧lé gel kaw yíra dá.

¹²Típélé a féké, a kú kaw tɛ̧́ a ɓil pû a Betaní, Zezú lá nzala.

¹³Ké kó dii njɔ̧̂ny ɓá ɗínáké ka goykéri lɔŋ, dáy a ta̧m sé gbaŋké, há̧na ké e gé ziŋ lénákéri lé. Dáy, ké gé ka̧ bɔʼɔ dii njɔ̧̂ny lé, ké kó ɓá goykéri ɓǎŋ. Ɓayhí̧lé fêw léna dii njɔ̧̂nyké pa̧n ɓáy.

¹⁴Dáy, Zezú saɓay hí̧ dii njɔ̧̂ny ɓá: «Njuku a há̧na mbêw, ké tí ná lâʼa léna dii a mɔ̌ wɔm!» Dáy gunbɛʼɛri láɓayké.

¹⁵Falké, kú gé ka̧ Zerúzalɛ̂m, dáy Zezú gé ri ɓil vûn a Gáŋvbôn, ka tí ní njuku ku̧ma hɛ̧sɔ́ʼɔri rá̧ njuku zé hɛ̧sɔ́ʼɔri a ɓil vûn a Gáŋvbôn. Ké sɔʼɔrɔ tay a njuku ku̧ma lariri lé, rá̧ hɛ̧káwa a njuku zé bûmri̧,

¹⁶ka zi pɔŋ njuku a há̧na hol hɛ̧ há̧na tɛ̧́ a ɓil vûn a Gáŋvbôn nyá.

¹⁷A falké, ké sa hí̧ njukuri too, a tɔ́ʼɔhɛ̧ hí̧ kuriri a sa: «A ɓil Mbété a Gáŋvbôn, kú ɗé ɓá: “Kú e ɗí vûn a mǐ ɓá: Vûn gɔ́ŋ Gáŋvbôn a njuku a tísiri too.” Dáy, ké sa ɓáy: a wǎyri, i niŋ vûnké tɛ̧́ lɔ̂ʼɔ pɔ̂ny a ríwari!»

¹⁸Gáŋnjuku nzáʼaká̧nari̧ rá̧ gáŋnjuku tɔ́ʼɔ sáŋnari̧ láɓayké, dáy a ɛ́ ŋgboro í Zezú. Katína lé, kú erú ka wɔ́w a mɛ̌, ɓayhí̧lé ŋgɛ̧́na a njukuri too, zi ɓay a hɛ̧tɔ́ʼɔ a mɛ̌.

¹⁹Ka bɔʼɔlêw ka̧ dáy, Zezú rá̧ gunbɛʼɛri tɛ̧́ a ɓil pû.

²⁰Típélé a féké rím a kú kaw tána ka tûl ŋgboro, kú kó dii njɔ̧̂ny ráy hɔ́ʼɔ, tí ka tûlké sé ka̧ sɛ̧wké too.

²¹Píyɛ́r kɛrɛ hɛ̧ ka táy, dáy a sa hí̧ Zezú ɓá: «Gáŋnjuku, mɔ́ kó dii njɔ̧̂ny rá̧y ka mɔ háhɛ̧ kɔ̧ tûlké, hɔ́ʼɔ too!»

²²Dáy, Zezú sa hí̧ gunbɛʼɛri ɓá: «Mi sa hí̧ wǎyri, ɓá gbátɓay: Í láɓulaw hí̧ Gáŋvbôn!

²³Katína, mí sa gbátɓay hí̧ wǎyri, njuku mí sa hí̧ kon nɛ́ ɓá: “Mɔ́ ta̧m a gelé a lé vbú ɓil mbii lúkí,” rá̧ a mí zi manyɓay a ɓil lawɛ́ yá, pé a láɓulaw, hɛ̧ké a ké sáy e niŋa, e niŋ ɓá báŋké nɔ́ hí̧ nɛ́.

²⁴Ɓaykénɔ́ pé mi kaw sa hí̧ wǎyri: Gelka i kaw gɔ́ŋ Gáŋvbôn ɓay a vbí nɛ́ hɛ̧ lé, í láɓulaw ɓá i ziŋ hɛ̧ké dá, lé i e ziŋ hɛ̧ké nɔ́.

²⁵Gelka, wǎyri mí uru ew sâa ɓay a gɔ́ŋ Gáŋvbôn rá̧ wǎyri mí erú ka ɓay kuu njuku lé, í vbá̧buma hí̧ nɛ́ rá̧ Bâa a wǎyri ka e a nûnalê, ké vbá̧buma ɓékéhɛ̧ a wǎyri kɔ́. [

²⁶Dáy, i zi vbá̧buma hí̧ njuku yá lé, Bâa a wǎyri a nûnalê, tí vbá̧buma ɓékéhɛ̧ a wǎyri hí̧ wǎyri yá kɔ́.]»

²⁷Kú regí Zerúzalɛ̂m. Gelka Zezú kaw há̧ra̧ a ɓil vûn a Gáŋvbôn, gáŋnjuku nzáʼaká̧nari̧ rá̧ gáŋnjuku tɔ́ʼɔ sáŋnari̧ rá̧ gáŋnjukuri, gí gbɛ́ŋɛ́.

²⁸Dáy a gí vbí nɛ́ ɓá: «Ka ŋgboro a sí̧ rá̧ mɔ́ niŋ hɛ̧ nɔ́rí̧ lé? A gé hí̧ mɔ́ kpɔ́ŋa niŋáké lé?»

²⁹Zezú sa hí̧ kuriri ɓá: «Mi e vbí wǎyri ɓay mbêw, rá̧ wǎyri mí zibɔʼɔké hí̧ mí, mi e sa hí̧ wǎyri njuku ka hí̧ mí ŋgboro niŋ hɛ̧kéri.

³⁰A gé pé Zâŋ, ɓá ké ɓá njukuri nyá batêm lé? Ɓá Gáŋvbôn malé ɓá njuku a tísiriri lé? Í zibɔʼɔké hí̧ mí.»

³¹Dáy, kú manyɓay a bazeŋ a há̧narí̧ a sa: «Manárí̧ mí sa ɓá: “Gáŋvbôn pé, pé nɛ́y”, ké e sa hí̧ nárí̧ ɓá: “Ɓayhí̧rá̧ i zi láɓulaw hí̧ Zâŋ nyáy lé?”

³²Dáy, manárí̧ mí sa ɓá: “ɓá njukuri?”» Kú ŋgú wɔ́w a njukuri, ɓayhí̧lé njukuri too mbí Zâŋ ɓá gbát porofɛ́t.

³³Dáy kú rerú hí̧ Zezú ɓá: «Rú zi tu yá.» Dáy Zezú resa hí̧ kuriri ɓá: «Belbéla, mǐ kɔ́, mi tí sa hí̧ wǎyri, ka ŋgboro a sí̧ rá̧, mi kaw niŋ hɛ̧ nɛ́rí̧ nyá.»