Read Capanahua Márke 12 Bible Online

Márke 12 - Capanahua bible

Márke 12

¹A falké, Zezú tí saɓay hí̧ kuriri ka galaɓay. Ké sa hí̧ kuriri ɓá: «Njuku a há̧na pá wâʼa ví̧nyɛ, a mbó gekén kí ɗɔ́ŋ rú̧. Ké ɗáŋ gel ha̧ mbii léna ví̧nyɛ, ka mbó gelkáwa a njuku koro wâʼa ví̧nyɛ. Falké, ké pɔŋ wâʼaké hí̧ njukupéna ví̧nyɛri̧ ɓá kú pá, rá̧ a hí̧ nɛ́ ɓala a mɛ̌ njuku wâʼa, dáy a kála sé gɔ́rɔ́.

²Ka fêw ɗɔrɔ léna ví̧nyɛ ka̧ dáy, njuku wâʼa pé njukupéna a mɛ̌ mbêw, ɓá ké sé nyá hɛ̧ wâʼa a mɛ̌ a gel a njukupéna wâʼa ví̧nyɛri̧ gírú.

³Dáy njukupéna wâʼakéri gé ŋgbá njukupéna, a vbá̧ nɛ́ dáy a ní nɛ́ kála ndɔ̂ʼɔ ɓǎŋ.

⁴Njuku wâʼa repé njukupéna a féké ɓáy mbêw sé, dáy, kú gé vbá̧ tûlé, a fára nɛ́.

⁵Njuku wâʼa repé njukupéna a féké ɓáy, a sáyké, dáy kú gé ŋgbá nɛ́, a í nɛ́. Falké njuku wâʼa repé njukupéna a fékéri ɓá ŋgɛ̧́náké, kú gé vbá̧ a há̧narí̧, a í a fékéri.

⁶Njuku mbêw ka zi hí̧ nɛ́y, ɓá gun a mɛ̌ a ké zi mambáy. Ké pé nɛ́ a kɔ́rɔ́ fal sé gel a kuriri, ɓayhí̧lé ké kɛrɛ ɓá: “Kú e hɛʼɛ gun a mɛ̌.”

⁷Dáy, njukupéna wâʼa ví̧nyɛri̧, sa a bazeŋ a há̧narí̧ ɓá: “I kó gun nyandal! Ná sé, a gé í nɛ́, nǎŋnɔ́ wâʼa ví̧nyɛ nɛ́, e retɛ̧ ɓá ɓala a manárí̧!”

⁸Dáy a kú gé ŋgbá gun ráy, a í nɛ́, a mbí hûlké vbú ka̧ny wâʼa ví̧nyɛ.»

⁹Zezú sa hí̧ kuriri ɓá: «A̧hí̧ njuku wâʼa nɔ́ e gé niŋáké lé? Ké e gí nduku njukupéna wâʼa ví̧nyɛri̧ too, a ɓá wâʼaké hí̧ njuku a fékéri.

¹⁰Katína, i ziŋ kɛ̧́ ɓayké nɔ́ ɓá táŋáké a ɓil Mbété a Gáŋvbôn: “Saw ka njuku mbó vûnri̧ pɔŋ vbú kpâa, retɛ̧ gáŋ saw a kudú vûn.

¹¹Ɓá Gáŋmbây pé niŋ nǎŋnɔ́. A gel a manárí̧, ná ɓá hɛ̧sáʼama!” »

¹²Gáŋnjuku a Juyífri ɛ́ ŋgboro ŋgbá Zezú, ɓayhí̧lé kú tu ɓá galaɓay nɔ́ ka Zezú sáy, sé tûl a kuriri. Dáy, kú erú ka wɔ́w ɓay a njukuri. Nǎŋnɔ́, kú pɔŋ nɛ́ a kála.

¹³Kú pé Fariziyɛ̧́ a há̧narí̧ rá̧ njuku a fal a mbây Herod Aŋtipâs sé gel a Zezú, ɓay a lélaw a Zezú a ŋgbá nɛ́ ka ɓay nzɛ́ʼɛ.

¹⁴Kú gí, a sa hí̧ Zezú ɓá: «Gáŋnjuku, rú tu ɓá mɔ́ sa gbátɓay, mɔ zi tí ka wɔ́w sé tûl kɛrɛ ɓay a njukuri yá. Mɔ zi ɛ̧rɛ̧ hɔ̧́na a njukuri yá, dáy mɔ tɔ́ʼɔ gbátɓay sé tûl bɔʼɔséna ka ri Gáŋvbôn. Mɔ́ sa hí̧ rú, sáŋna a manárí̧ hí̧ ŋgboro malé zi hí̧ ŋgboro ɓá njuku kú pú lari lambô hí̧ mbây a tísiri a Rɔm nyá lé? Rú pû malé, rú pû yá lé?»

¹⁵Zezú tu ɓá kú ɓá gbát kɛrɛ a kuriri mú, dáy a sa hí̧ kuriri ɓá: «Ɓayhí̧ i lélaw ní lé? Í ɓá mínya mbêw gí hí̧ mí, a mí kó.»

¹⁶Kú ɓá mínya mbêw gí hí̧ Zezú, dáy Zezú sa hí̧ kuriri ɓá: «Têm mûn rá̧ rɛŋ ka ɗé ka̧n tûl mínya nɛ́ ɓá ɓala gé lé?» Kú sa ɓá: «Sezar[7].»

¹⁷Dáy Zezú sa hí̧ kuriri ɓá: «Í hí̧ Sezar hɛ̧ ka ɓá a Sezar, a í hí̧ Gáŋvbôn, hɛ̧ ka ɓá a Gáŋvbôn.» Nǎŋnɔ́, rerú a ɓay a mɛ̌ ɓá kuriri kaw yér.

¹⁸Sadusiyɛ̧ a há̧narí̧ gí gbaŋa a Zezú. Ɓá kuriri pé sa ɓá toma a hûl zi tí yá. Kú gí vbí nɛ́ ɓay a sa:

¹⁹«Gáŋnjuku, Mɔyíze hí̧ rú sáŋna ɓá: “Njuku mí hú rá̧ a pɔŋ wûny táŋ gun lé, nyîn nɛ́, ké nyá wûnysêeké, a ké mbuŋ gel nûn a njuku a hûlké.”

²⁰Dáy, nyîn a há̧narí̧ zíndɔ̂ʼɔsáy erú. Gáŋnjukuké nyá wûny a hú táŋ mbuŋ gun.

²¹Njuku a séreké gí nyá wûnysêeké ráy a hú táŋ mbuŋ gun. Njuku a sáyké ná ɓá hɛ̧ a mbêwké

²²rá̧ nyînrí̧ zíndɔ̂ʼɔsáy too nyá wûnysêeké ráy, a hú táŋ mbuŋ gun. A Fal a kuriri too, wûnysêeké gí ziŋ hûl kɔ́.

²³Dáy a sêe toma a hûlri, ka hûlri e toma wá, wûnyké, e ɓá wûny a gé mbêw a bazeŋ a kuriri lé? Ɓayhí̧lé kuriri zíndɔ̂ʼɔsáy too, kú nyá wûnyké ɓá wûny.»

²⁴Zezú rerú hí̧ kuriri: «I ɓɔ́l ŋgboro a wǎyri, dáy i tu ɓá ɓayhí̧ lé? Ɓayhí̧lé, i zi tu Mbété a Gáŋvbôn bɔʼɔ mbêw yá, a zi tu kpɔ́ŋa a Gáŋvbôn nyá kɔ́.

²⁵Katína, sêe ka hûlri e toma, wɔ̧rɔ̧́njukuri rá̧ wûnynjukuri tí nyá há̧narí̧ mbaa, kú e kaw ɓá báŋa aŋnzeri a nûnalê.

²⁶Ɓay ka kó hûlri ka e tomay, i zi kɛ̧́ a ɓil mbété a Mɔyíze, ɓay a kú sa sé tûl rêm hɔrɛ ka ŋgbá rúndú bɔʼɔ mbêw yá lé? A goló pé Gáŋvbôn sa hí̧ Mɔyíze ɓá: “Mi ɓá Gáŋvbôn a Abaraham, Gáŋvbôn a Izák rá̧ Gáŋvbôn a Zakob.”

²⁷Dáy Zezú sa ɓáy ɓá: Gáŋvbôn zi tí ɓá Gáŋvbôn a hûlri yá, ké ɓá Gáŋvbôn a njuku a ndísɛ̌ʼɛri. Nǎŋnɔ́, i ɓɔ́l ŋgboro a wǎyri dá.»

²⁸Gáŋnjuku tɔ́ʼɔ sáŋna a há̧na mbêw, lá manyɓay a kuriri kuu Zezú. Ké kó ɓá Zezú zibɔʼɔ ɓay a Sadusiyɛ̧ri̧ ɓá béláké; dáy a ta̧m gí gbaŋ a Zezú, a gí vbí nɛ́ ɓá: «Sáŋna a sí̧ ndé gárákéri too ka nɛ́rɛ̧ lé?»

²⁹Zezú rerú hí̧ nɛ́ ɓá: «sáŋna ka ndé gárákéri too ɓá: “Mɔ́ lá, Izirayɛ́l! Gáŋmbây a Gáŋvbôn a manárí̧ ɓá Gáŋmbây hɛʼɛ.

³⁰Mɔ́ zi Gáŋmbây, Gáŋvbôn a mɔ̌, ka lawɔ́ too, ka têm a mɔ̌ too, ka hɛ̧túna a mɔ̌ too, rá̧ ka ŋgɛ́rɛ a mɔ̌ too.”

³¹A sáŋna a séreké ɓá: “Mɔ́ zi mbɔ́ŋnɔ́ ɓá báŋa mûn nɔ́.” Sáŋna a féké ka ndé sáŋna a séreké nɔ́rí̧ zi tí yá.»

³²Gáŋnjuku tɔ́ʼɔ sáŋna sa hí̧ Zezú ɓá: «Bel mambá, Gáŋnjuku! Ɓay ka mɔ́ sáy, ɓá gbátɓay. Gáŋmbây ɓá Gáŋvbôn hɛʼɛ, Gáŋvbôn a féké ɓá báŋa a mɛ̌, zi tí mbêw yá.

³³Zí Gáŋvbôn ka lawɔ́ too, ka hɛ̧túna a mɔ̌ too, ka têm a mɔ̌ too rá̧ ka ŋgɛ́rɛ a mɔ̌ too, rá̧ zi mbɔ́ŋnɔ́ ɓá báŋa mûn nɔ́, ndé hɛ̧hí̧nari̧ rá̧ hɛ̧púnari̧ too, ka njuku niŋ hí̧ Gáŋvbôn.»

³⁴Zezú kó ɓá njuku tɔ́ʼɔ sáŋna zibɔʼɔ ɓay ɓá béláké; Dáy a sa hí̧ nɛ́ ɓá: «Mɔ zi ɗí ka Pû a Gáŋvbôn nyá.» A falké nɔ́, njuku a há̧na zi laŋ ɓay a gí vbí nɛ́ ɓay a fékéri mbaa.

³⁵Gelka Zezú kaw tɔ́ʼɔhɛ̧ a ɓil vûn a Gáŋvbôn, ké vbí ɓay ɓá: «A̧ní rá̧ njuku tɔ́ʼɔ sáŋnari̧ e sa ɓá Kiris ɓá gun zîi a Davít lé?

³⁶Ɓayhí̧lé, Davít ka mûn nɛ́, sa ka ŋgboro a Têm Pukí ɓá: “Gáŋmbây ka ɓá Gáŋvbôn sa hí̧ Gáŋmbây a mǐ ɓá: Mɔ́ gí kaw ndɔ̂ʼɔ lâʼa a mǐ, sé ka̧ sêe ka mi e ɓá njuku ŋgá̧na a mɔ̌ri̧ tɛ̧́ gel ɓá bɔʼɔ kɔ̧rú̧y.”

³⁷Davít, mɛ̌ ka mûn nɛ́, ɗí Kiris ɓá: “Gáŋmbây.” Dáy, e niŋ a̧ní rá̧, ké rekaw ɓá gun zîi a Davít lé?» Njukuri ɓá ŋgɛ̧́náké láɓay a Zezú ka lawrína.

³⁸Zezú saɓay a ɓil hɛ̧tɔ́ʼɔ a mɛ̌ hí̧ njukuri ɓá: «Í ŋgbátûl a wǎyri ɓá béláké kuu njuku tɔ́ʼɔ sáŋnari̧ ka zi ɓay ri ɓá gáŋ gáriri a há̧ra̧ rú̧, ka zi ɓá njukuri kú nam kuriri ka hɛʼɛ kuriri a ɓil a dawá,

³⁹kú ɛ́ ɓá kaw gelkáwari a mbɛl a ɓil vûn gɔ́ŋ Gáŋvbôn rá̧ gelkáwari a mbɛl a kú ɗí kuriri sé gel sɔ̧́lâʼa a hɔ̧́nákéri.

⁴⁰Kú naʼa hɛ̧zíŋa a wûnysêeri, a gɔ́ŋ Gáŋvbôn pé mambá ɓay a tɔ́ʼɔ mûn a kuriri. Kú e walɓay ŋgɛ́rɛ mambá kɔ̧ tûl a kuriri ndé njuku a fékéri.»

⁴¹A falké Zezú kaw a mbɛl, a gel hí̧ hɛ̧hí̧na a ɓil vûn a Gáŋvbôn, dáy a kaw kó báŋké ka njukuri gí kaw ɓá lari kɔ̧rú̧. Njuku hɛ̧zíŋári̧ ɓá ŋgɛ̧́náké gí ɓá lari ɓá ŋgɛ̧́náké kɔ̧rú̧.

⁴²Wûnysêe a há̧na ka ɓá fóya gí kɔ́, a gí ɓá mínya sére ka nɛ́rɛ̧́ké zi ŋgɛ̧́ nyáy kɔ̧rú̧.

⁴³Dáy Zezú ɗí gunbɛʼɛri, a sa hí̧ kuriri ɓá: «Mi sa hí̧ wǎyri gbátɓay: Hɛ̧ ka wûnysêe nɛ́ hí̧, ndé ɓala a gárá njukuri too.

⁴⁴Ɓayhí̧lé njuku nɔ́rí̧ too hí̧ ɓá lari a kú zi tí ka péna niŋ rú̧ nyáy, dáy a wûnysêe nɛ́ ka ɓá fóya, mɛ̌, ké hí̧ hɛ̧ a ké erú too, hɛ̧ too a ké erú ɓay a káwa a mɛ̌.»