Read Capanahua Márke 13 Bible Online

Márke 13 - Capanahua bible

Márke 13

¹Falké, Zezú tɛ̧́ ka vûn a Gáŋvbôn, dáy gunbɛʼɛ a há̧na mbêw sa hí̧ nɛ́ ɓá: «Gáŋnjuku, mɔ́ kó mára̧ béla sawri yáy! Mára̧ béla a gáŋ vûn nyáy!»

²Dáy Zezú rerú hí̧ nɛ́ ɓá: «Mɔ́ kó gáŋ vûn nɛ́rí̧ ɓá béláké lé? Saw a há̧na mbêw tí ka̧n tûl mbɛ̧́nɛ́ a gelé yá, e gbɛʼɛrɛ too.»

³Falké Zezú sé kaw háŋ kon a dii Oliviyé, ka ɛ̧rɛ̧ vûn a Gáŋvbôn. Píyɛ́r, Ják, rá̧ Zâŋ kuu Anderé kaw hɛʼɛ kuu mɛ̌, dáy a vbí nɛ́ ɓá:

⁴«Mɔ́ sa hí̧ rú, sêe sí̧ rá̧ hɛ̧ké e niŋa lé? A̧hí̧ e tɔ́ʼɔ ɓá hɛ̧kéri ná ɗɛ́ŋ ɓay a niŋa dá lé?»

⁵Dáy Zezú tí sa hí̧ kuriri ɓá: «Í ŋgbátûl a wǎyri ɓá béláké, a njuku a há̧na ké zi ná rɔ́ʼɔ wǎyri!

⁶Njukuri ɓá ŋgɛ̧́náké e gí ka rɛŋ ní, a sa ɓá: “Mi ɓá Kiris!” Dáy a rɔ́ʼɔ njukuri ɓá ŋgɛ̧́náké.

⁷Gelka, wǎyri mí láɓay a béreri lá gbaŋ mûn a wǎyri, rá̧ gélri ɓá ɗínáké, í zi ná ŋgú wɔ́w! Belɓá hɛ̧ nɔ́rí̧ too ké niŋ, dáy zi tí ɓá kɔ́rɔ́ a tísiri yá ɓáy.

⁸Njuku a há̧narí̧ e uru bére ziŋ njuku a fékéri, rá̧ pû mbây a há̧na e niŋ bére ziŋ pû mbây a fékéri. Tísiri e láŋa lá gélri ɓórí ɓórí rá̧ nzala e ŋgbá pûri. Hɛ̧ nɔ́rí̧ too, e ná ɓá báŋa titíla ɓil séna mbuŋa.»

⁹«Dáy, a wǎyri, í ŋgbá tûl a wǎyri ɓá béláké. Ɓayhí̧lé, njukuri e ŋgbá wǎyri sé mbɛl a njuku walɓayri; kú e vbá̧ wǎyri a ɓil vûn gɔ́ŋ Gáŋvbôn. Kú e ɓá wǎyri sé mbɛl a mbây tûlkawri rá̧ mbɛl a mbâyri, ɓay tûl rɛŋ ní, ɓay a i saɓay a mǐ a mbɛl a kuriri.

¹⁰Dáy, belɓá, Bélaɓay a ké tí tɔ́ʼɔ ɗambɛl hí̧ njukuri ka tísiri too rá̧ ɓáy.

¹¹“Dáy gelka, kú mí ŋgbá wǎyri, ɓay a ɓá wǎyri sé ɓaraɓay lé, law a wǎyri ké zi ná ɛ́ ɓay sé tûl ɓay ka i e sanáké.” Dáy, í saɓay ri ka e gí nzáʼa a wǎyri ka sêeké nɔ́y, ɓayhí̧lé, ɓaykéri zi gí ka gel a wǎyri yá, e gí ka ŋgboro a Têm Pukí.

¹²Nyînrí̧ e zé nyîn a kuriri ɓay a kú í kuriri. Bâari kɔ́, e niŋ nǎŋnɔ́ ziŋ gun a kuriri. Gunri̧ e tɛ̧́ njuku ŋgá̧na a bâa a kuriri rá̧ mâa a kuriri, a niŋ rá̧ kú í kuriri.

¹³Njukuri too e fɔny wǎyri ɓay tûl ní. Dáy njuku ka ŋgbá kpú ka̧ kɔ́rɔ́ké, e pɛ̧́ tûlé.»

¹⁴«I e kó njuku a kú ɗí nɛ́ ɓá: “Ŋgɛ́rɛ hɛ̧ɓéké”»: kú e ɓá nɛ́ kaw gel a ké zi ma kawrú yáy. Dáy njuku ka kɛ̧́y, ké lá ɓilké ɓá táŋáké! Sêeké nɔ́, njukuri ka e ka tísiri a Judé, e ŋgú sé mú ɓil konri̧.

¹⁵Njuku ka e ka tûl vûn ka sâa, ké zi ná ɗere gí mbí hɛ̧ a há̧na a ɓil vûn a mɛ̌.

¹⁶A njuku, ka e a ɓil wâʼa mɛ̌, ké zi ná regí pû ɓay mbí gáŋ gári a mɛ̌.

¹⁷Mára̧ lelêe hí̧ e ka̧ a ɓil nâmké nɔ́rí̧, hí̧ máɓilri rá̧ mâa gunri̧, ka gunri̧ kaw â̧m pâm ɓáy!

¹⁸Í gɔ́ŋ Gáŋvbôn, ɓay hɛ̧kéri ké zi ná ka̧, a ɓil fêw lékétêl.

¹⁹Ɓayhí̧lé sêeké nɔ́rí̧, tɔ́ʼɔsêeri e ŋgɛ́rɛ mambá, ndé tɔ́ʼɔsêeri too, tí ka Gáŋvbôn mɔny tísiri gí ka̧ sénɛ́y. Mára̧ tɔ́ʼɔsêe ka e marú̧, zi niŋ bɔʼɔ mbêw yá ɓáy.

²⁰Nǎŋnɔ́, Gáŋmbây mí zi kúŋ nâmké gefal yáy, njuku a há̧na mbêw, ka e pɛ̧́na zi tí yá! Dáy Gáŋvbôn kúŋ nâmké gefal, ɓay a njukuri a ké ten kuriri, ɓay a kú kaw ɓá ɓay a mɛ̌y.

²¹Dáy njuku a há̧na mí sa hí̧ wǎyri ɓá: «Í kó, Kiris e a gelé!» Malé «Í kó, ké e a goló lé, í zi ná láɓulaw hí̧ nɛ́.

²²Ɓayhí̧lé, Kiris a manyákéri, rá̧ porofɛ́t a manyákéri e gína; kú e niŋ hɛ̧sáʼamari̧ rá̧ hɛ̧ a yérkéri, ɓay a rɔ́ʼɔ njukuri, ka ŋgboro mí erú lé, kú rɔ́ʼɔ njukuri ka Gáŋvbôn ten kuriri kɔ́.

²³Dáy a wǎyri, í kó rá̧! Mi tí vbara wǎyri too ɗambɛl dá.»

²⁴«Dáy a ɓil nâmké nɔ́rí̧, a fal tɔ́ʼɔsêe nɔ́rí̧, sêe tí táŋa nyá, fêw tí sána mbaa,

²⁵rôori e to a nûnalê, rá̧ kpɔ́ŋári̧ a nûnalê too, e láŋa.

²⁶Nǎŋnɔ́, kú e kó Gun a njuku e gí a ɓil ɗaʼam a mbɔ̂m, a ɓil kpɔ́ŋa a mɛ̌ri̧ ɓá ŋgɛ̧́náké rá̧ a ɓil hɔ̧́na a mɛ̌.

²⁷Ké e pé aŋnzeri sé mára̧ njuku a mɛ̌ri̧ a ké ten, a kɔ́rɔ́ a tísiri nɛŋ too, tí ka kɔ́rɔ́ a ǎ̧w sé ka ŋgboro a ǎ̧w.»

²⁸«Í kó hɛ̧tɔ́ʼɔ ka dii njɔ̧̂ny hí̧ nárí̧ ɓá táŋáké. Gelka, wǎyri mí kó goy dii njɔ̧̂ny do rá̧ goy a fékéri mí kaw lɔŋa lé, í tu ɓá tûl nzáʼambɔ̂m gí ɗɛ́ŋ dá.

²⁹Ɓá mbêwké kɔ́, wǎyri mí kó hɛ̧ nɔ́rí̧ mí ka̧ lé, i tu ɓá réna Gun a njuku gí ɗɛ́ŋ dá, ké e ka nzáʼaŋgboro.

³⁰Mi sa hí̧ wǎyri gbátɓay: Njuku a ŋgɛŋnɛ́ nɛ́rí̧ tí ziŋ hûl too yá, ka hɛ̧ nɔ́rí̧ e ka̧nay.

³¹Nûnalê rá̧ tísiri too e tána, dáy ɓay a mǐri̧ tí tána nyá.»

³²«Nǎŋnɔ́ dáy, njuku ka tu nâm malé sɛl a sêe a kɔ́rɔ́ké zi tí yá. Aŋnzeri a nûnalê malé Gun a njuku lé, zi tu yá, ɓá Bâa hɛʼɛ pé tuy.

³³Í ŋgbá tûl a wǎyri ɓá béláké! A í zi ná nâm, ɓayhí̧lé, i zi tu nâm gína a mɛ̌ nyá.

³⁴E ná ɓá báŋa a njuku ka sé gɔ́rɔ́: ké uru a pɔŋ vûn a mɛ̌ ka̧n ɓil ndɔ̂ʼɔ a njukupéna a mɛ̌ri̧. Ké hí̧ péna niŋa hí̧ kuriri mbêw mbêw too, ka vbara njuku koro nzáʼaŋgboro, ɓá ké ná nâm nyá.

³⁵Dáy, í ná nâm nyá, ɓayhí̧lé, i zi tu sêe ka njuku vûn e regí yá: há̧na ɓá bɔʼɔlêw, ma lélaw gel a sû̧ŋ, malé ka gbóna káʼa, malé ka gel a pélé rím.

³⁶Ké mí regí gbúr lé, ké zi ná gí ziŋ wǎyri ka nâm.

³⁷Ɓay ka mi sa hí̧ wǎyri nɛ́y, mi sa hí̧ njukuri too: Í ná nâm nyá!»