Read Capanahua Márke 14 Bible Online

Márke 14 - Capanahua bible

Márke 14

¹Zi nâm sére ɓay a nâm záya Pâk rá̧ biré táŋ haw, ké ka̧. Gáŋnjuku nzáʼaká̧nari̧, rá̧ gáŋnjuku tɔ́ʼɔ sáŋnari̧ kaw ɛ́ ŋgboro ŋgbá Zezú ɓá múnáké, ɓay a í nɛ́.

²Ɓayhí̧lé, kú sa a bazeŋ a kuriri ɓá: «Ná niŋ hɛ̧ké ka nâm záya Pâk yá, ɓay a njukuri, kú zi ná uru bére ziŋ nárí̧.»

³Zezú e ka Betaní a ɓil vûn a Simɔŋ njuku ndɛ́ɓɛ. Gelka ké kaw sɔ̧́lâʼa, wûny a há̧na, gí ri vûn, a gí ka kû albátɛrɛ, mbá ka yámbó a kú niŋ ka dii nár a béláké, ka lariké ŋgbɔ́rɔ mambáy. Ké gí ŋgburu kûké, a fere yámbó kɔ̧ tûl a Zezú.

⁴Dáy, gunbɛʼɛ a há̧narí̧ ka e a gelké, law a kuriri sé ɓayké dáy a kú sa a bazeŋ a kuriri ɓá: «Ɓayhí̧ ké ɓew yámbó nɔ́ lé?

⁵Tá kú ma zé yámbó nɔ́, ndé mínya ísɔ́t sáy a wal lariké hí̧ njuku fóyári yá lé!» A kú ɗí hɛ́rɛ ziŋ wûny ráy.

⁶Dáy Zezú sa: «Í pɔŋ wûny nɔ́ ták! Ɓayhí̧rá̧ i zi ɓay a ɓá wûny nɛ́ tɔ́ʼɔsêe lé? Hɛ̧ a ké niŋ hí̧ mí, ɓá béla hɛ̧.

⁷Ɓayhí̧lé, i e ka njuku fóyári a bazeŋ a wǎyri dát, i ma ɓay a niŋ béla hí̧ kuriri sêe too ka i ziy. Dáy, a mǐ, mi tí kaw dát kuu wǎyri yá.

⁸Wûny nɛ́, niŋ hɛ̧ a ké ma niŋáké. Ké tí fere yámbó kɔ̧ mûn ní, ɓay a mɔny mí tí ɗambɛl rá̧ kú gɔ́rɔ́ mí.

⁹Mi sa hí̧ wǎyri gbátɓay, gel too a kú e tɔ́ʼɔ Bélaɓay ka tísiri nɛ́, kú e saɓay sé tûl hɛ̧ ka wûny nɛ́ niŋ, a kɛrɛ ɓay a mɛ̌ dát.»

¹⁰Judas Ɛskariyót, ka ɓá mbêw a bazeŋ a apotereri bôo a sére, sé sa hí̧ gáŋnjuku nzáʼaká̧nari̧, ɓay a zé Zezú hí̧ kuriri.

¹¹Gáŋnjuku nzáʼaká̧nari̧ láɓayké a kaw ka lawrína, dáy a hí̧nzáʼa hí̧ Judas ɓá kú e hí̧ nɛ́ lari. Dáy, Judas ɛ́ ŋgboro a béláké, ɓay a zé Zezú hí̧ kuriri.

¹²Titíla nâm záya a biré táŋ haw, ɓá sêe ka njukuri e í gun mbóléri ɓay a lâʼa Pâk. Dáy gunbɔʼɔ a Zezúri vbí nɛ́ ɓá: «A gel a sí̧, mɔ zi ɓá rú sé kara lâʼa Pâk hí̧ mɔ́ lé?»

¹³Dáy Zezú pé gunbɛʼɛri sére ɗambɛl, a sa hí̧ kuriri ɓá: «Í sé ɓil pû, í gé ziŋ njuku a há̧na ka hol yírí mbii, í tɔ́ŋ nɛ́.

¹⁴Gelka, ké mí gé ri ɓil hɛlɛ lé, í gé sa hí̧ njuku vûnké ɓá: “Gáŋnjuku sa ɓá: A ɓil vûn a sí̧ ké e gí sɔ̧́lâʼa Pâk kuu gunbɛʼɛri lé?”

¹⁵Ké e tɔ́ʼɔ wǎyri ɓil vûn mbêw ɓá ánaké ka sâa, a kú mɔny hɛ̧ri̧ too kɔ̧ ɗɛ́ŋ dáy. A goló pé i e kara lâʼa karúy.»

¹⁶Dáy, gunbɛʼɛri sére ráy sé ka̧ ɓil pû, a gé ziŋ hɛ̧ri̧ too ɓá báŋké ka Zezú sa hí̧ kuriri, dáy a gé kara lâʼa Pâk.

¹⁷Gelka bɔʼɔlêw ka̧ dáy, Zezú gí ka̧ kuu gunbɛʼɛri bôo a sére.

¹⁸Kú e ka nzáʼa lâʼa kaw sɔ̧́lâʼay, Zezú sa: «Mi sa hí̧ wǎyri gbátɓay: njuku mbêw a bazeŋ a wǎyri, ka kaw sɔ̧́lâʼa kuu mǐ, e zé mí.»

¹⁹Gunbɛʼɛri too law a kuriri yírí, kú vbí Zezú, kuriri mbêw mbêw too ɓá: «Tá tí ɓá mǐ nyá lé?»

²⁰Dáy Zezú rerú hí̧ kuriri ɓá: «Ɓá njuku mbêw a bazeŋ a wǎyri bôo a sére nɛ́, njuku ka ɓá ndɔ̂ʼɛ sé ɓil yoŋ kuu mǐ.

²¹Katína, Gun a njuku e ziŋ hûl, ɓá báŋké ka Mbété a Gáŋvbôn sa sé tûlé. Dáy, lelêe hí̧, e ná hí̧ njuku ka e zé Gun a njuku lé! Bel ndé hí̧ njukuké ɓá kú mbuŋ nɛ́ nyá!»

²²Gelka kú kaw sɔ̧́lâʼay, Zezú mbí biré, a fal zi awá hí̧ Gáŋvbôn, ké haw ɓilké, a hí̧ gunbɛʼɛri, a sa hí̧ kuriri ɓá: «Í nyá, a nɛ́, ɓá mûn ní.»

²³A falké, ké mbí yoŋ, a zi awá hí̧ Gáŋvbôn, a hí̧ gunbɛʼɛri, dáy kú nzó too.

²⁴Zezú sa hí̧ kuriri: «A nɛ́ ɓá sêm mûn ní, sêm ŋgá̧nzáʼa a Gáŋvbôn, ka fere ɓay a tûl a njukuri ɓá ŋgɛ̧́náké.

²⁵Mi sa hí̧ wǎyri gbátɓay: Mi tí nzó mbii léna dii ví̧nyɛ nɛ́ mbaa ka̧ sêe ka, mi e nzónáké ɓá féké a ɓil Pû a Gáŋvbôn.»

²⁶Falké nɔ́, kú ɗí si̧ŋ a mbây Davít. Dáy Zezú rá̧ gunbɛʼɛri tɛ̧́ a kála sé tûl kon dii Oliviyéri.

²⁷Zezú sa hí̧ kuriri ɓá: «Wǎyri too, i e sáŋ mí, ɓayhí̧lé, kú ɗé ɓá: “Mi e í njuku koro hɛ̧hɔ́lari, dalé, mbóléri e ɓɛrɛ mbêw mbêw too.”»

²⁸Dáy, Zezú resa ɓáy ɓá: «Gelka, mi e rekaw ka ndísɛ̌ʼɛ ɓáy, mi e sé zoko wǎyri ka Galilê.»

²⁹Píyɛ́r sa hí̧ Zezú ɓá: «Njuku a ǎ̧wrí̧ too mí sáŋ mɔ́y, mǐ, mi tí sáŋ mɔ́ nyá!»

³⁰Dáy Zezú sa hí̧ nɛ́ ɓá: «Mi sa hí̧ mɔ́ gbátɓay: sénɛ́, ka sû̧ŋ nɛ́, rá̧ tôo ké gbô bɔʼɔké sére lé, mɔ e sa bɔʼɔké sáy, ɓá mɔ zi tu mǐ nyá.»

³¹Dáy Píyɛ́r fere a sa hí̧ nɛ́ ɓá gbénáké: «Mí ɓá mi hú kuu mɔ̌ rá̧ kɔ́, mi tí sa bɔʼɔ mbêw ɓá, mi zi tu mɔ́ yá nyá!» Dáy gunbɔʼɔ a ǎ̧wrí̧ too, sa ɓá ɓay a mbêwké nɔ́.

³²Falké, kú ka̧ gel a kú ɗí ɓá Gesemanɛ́, dáy Zezú sa hí̧ gunbɛʼɛri ɓá: «Í kaw gelé, mi sé gɔ́ŋ Gáŋvbôn.»

³³Dáy, a ké ɗa Píyɛ́r, Ják rá̧ Zâŋ sé kuu mɛ̌. Lawɛ́ lú nɛ́, rá̧ wɔ́w tí táʼa ŋgbá nɛ́,

³⁴dáy ké sa hí̧ kuriri ɓá: «Law ní yírí ɛ́ŋlǒo ɓay a mí hú yáŋ. I kaw gelé, a í ná nâm nyá.»

³⁵Ké sé ɓá ɗínáké kpay, a gé huku siri, dáy a gɔ́ŋ Gáŋvbôn a sa: Ŋgboro mí erú lé, sɛl a sêe tɔ́ʼɔsêe nɛ́, ké ɗí kuu mǐ.

³⁶Ké sa: «Aba, Bâa a mǐ, ŋgboro erú too hí̧ mɔ́; mɔ́ ɓá yoŋ tɔ́ʼɔsêe nɛ́ ɗí kuu mǐ. Dáy, mɔ́ zi ná niŋ hɛ̧ ka mi ziy, mɔ́ niŋ ɓá hɛ̧ ka mɔ ziy.»

³⁷Falké, Zezú regí gel a gunbɛʼɛ a sáyké rá̧yrí, a gí ziŋ kuriri e a nâm. Ké gí sa hí̧ Píyɛ́r: «Simɔŋ, mɔ́ ná nâm lé? Mɔ́ zi ma kaw sâa sɛl a sêe mbêw, a gɛ́ŋ nâm yá lé?

³⁸Í ná nâm nyá; A í gɔ́ŋ Gáŋvbôn, ɓay a í zi ná lé ɓil hɛ̧ léna. Njuku mbá ka béla law dáy, ŋgɛ́rɛ zi tí hí̧ nɛ́ nyá.»

³⁹Zezú resé ɓáy sé gɔ́ŋ Gáŋvbôn, a sa ɓá ɓay a mbêwké dát.

⁴⁰Dáy, ké regí gel a gunbɛʼɛri, a gí ziŋ kuriri ɓáy a nâm. Kú zi ma gɛ́ŋ nâm nyá, ɓayhí̧lé nûn a kuriri ná ɓá nâm. Dáy, a kú zi tu a̧hí̧, kú e sa hí̧ nɛ́ mbêw yá.

⁴¹Gelka ké regí a bɔʼɔ a sáyké, ké sa hí̧ kuriri ɓá: «I kaw ná nâm, a ɔʼɔ mûn a wǎyri lé? Ɔ dá! Sɛl a sêeké ka̧ dá. Ŋgɛŋnɛ́, Gun a njuku, kú e ɓá nɛ́ ka̧n ɓil ndɔ̂ʼɔ a ɓéké njukuri.

⁴²I uru, a ná kála! Ɓayhí̧lé, njuku ka e zé mí, ka̧ dá!»

⁴³Zezú zi ɔrɔ saɓay yá ɓáy, ka Judas mbêw a bazeŋ a gunbɛʼɛri bôo a sére, gí ka̧ kuu njukuri ɓá ŋgɛ̧́náké, ka gá̧mári̧ rá̧ kâ̧wdiiri. Ɓá gáŋnjuku nzáʼaká̧nari̧ rá̧ njuku tɔ́ʼɔ sáŋnari̧ rá̧ gáŋnjuku pû a Juyífri pé, pé kuriri.

⁴⁴Judas, njuku ka e zé Zezú, tí tɔ́ʼɔ hí̧ kuriri hɛ̧ a ké e niŋáké, a sa: «Njuku ka mi e sí̧ŋ nɛ́y, ɓá mɛ̌! I ŋgbá nɛ́, a i ɓá nɛ́ sé kuu wǎyri a i koro nɛ́ ɓá béláké!»

⁴⁵Gelka Judas gí ká̧y, ké ta̧m sé gbaŋa Zezú a sa: «Gáŋnjuku!» Dáy, a sí̧ŋ nɛ́.

⁴⁶Njukuri a ǎ̧wrí̧ gí ŋgbá Zezú, a ɗá nɛ́ kála rú.

⁴⁷Dáy, njuku mbêw a bazeŋ a gunbɛʼɛri lú gá̧má a mɛ̌, a vbá̧ njukupéna a gáŋnjuku nzáʼaká̧na, a kúŋ goy súké to vbú siri.

⁴⁸Zezú sa hí̧ kuriri ɓá: «I gí ka hɛ̧béreri rá̧ kâ̧wdiiri ɓay í gí ŋgbá mí, i mbí mí ɓá báŋa a njuku í hûl lé?

⁴⁹Sêe too, mi e kuu wǎyri, a kaw tɔ́ʼɔhɛ̧ a ɓil vûn a Gáŋvbôn dát, i zi ŋgbá mí nyá. Dáy hɛ̧ké niŋ nǎŋnɔ́ ɓay a hɛ̧ ka tí ɗé ké niŋ.»

⁵⁰Nǎŋnɔ́, gunbɛʼɛri too sáŋ nɛ́, a ŋgú.

⁵¹Kaban njuku a há̧na tɔ́ŋ Zezú, ka ɓá gári guku mûn nɛ́ ɓǎŋ. Kú lé gé ŋgbá nɛ́,

⁵²dáy ké pɔŋ gári vbú kpâa, a ŋgú mûn baa.

⁵³Kú ɗa Zezú sé mbɛl a gáŋká̧na, ka gáŋnjuku nzáʼaká̧nari̧ too, rá̧ gáŋnjuku pûri rá̧ njuku tɔ́ʼɔ sáŋnari̧, mára̧ há̧narí̧ erúy.

⁵⁴Píyɛ́r tɔ́ŋ Zezú ɓá ɗínáké, a gí ri sé laɓára a gáŋká̧na. Ké sé kaw kuu njuku korohɛ̧ri̧ a kaw nɔ́ hɔrɛ.

⁵⁵Gáŋnjuku nzáʼaká̧nari̧, rá̧ gáŋnjuku walɓayri, ɛ́ ŋgboro ɓá ɓay ŋgbá Zezú rá̧ a kú ziŋ ŋgboro í nɛ́, dáy a zi ziŋ nyá.

⁵⁶Ɓayhí̧lé, njukuri ɓá ŋgɛ̧́náké saɓay ka zi manyáy kɔ̧ tûl a Zezú, dáy a ɓil saɓay a kuriri, ɓayké zi sé mbêw yá.

⁵⁷Njuku a há̧narí̧ uru, a saɓay manyá kɔ̧ tûl a Zezú, a sa:

⁵⁸«Rú lá nɛ́ ké sa ɓá: Mi e gbuʼuru vûn a Gáŋvbôn nɛ́ ka njukuri mbóy, ka rembó a féké a ɓil nâm sáy, ka zi tí ɓá, vûn ka ndɔ̂ʼɔ a njukuri mbó yáy.»

⁵⁹Dáy, a ɓil ɓay a nɛ́ too, ɓayké zi sé mbêw yá.

⁶⁰Dáy, gáŋká̧na̧ uru a mbɛl a njukuri too, a vbí Zezú ɓá: «Mɔ tí rerú a ɓay, sé tûl ɓay nɛ́rí̧ a kú sa sé tûló yá lé?»

⁶¹Dáy Zezú kaw ták, a zi saɓay yá. Gáŋká̧na̧ revbí nɛ́ ɓáy ɓá: «Mɔ́ ɓá Kiris, Gun a Gáŋvbôn ka rú ɗél nɛ́ lé?»

⁶²Zezú fere a sa: «Katína ɓá mǐ, dáy, i kó Gun a njuku kaw ka ŋgboro a lâʼa a Gáŋvbôn ka ndé ka kpɔ́ŋa tooy. I e kó nɛ́ kɔ́ gí a ɓil hɔ̧́na a ɓil ɗaʼam a mbɔ̂m a nûnalê.»

⁶³A goló, gáŋká̧na gɔ́rɔ́ gári ka mûn nɛ́, a sa: «Ná zi láɓay a féké a gel a njukuri ɓáy mbaa!

⁶⁴I lá a ké fára Gáŋvbôn. I sa ɓá hí̧ lé?» Njukuri too sa ɓá ké niŋ ɓéké, ké ma hûl.

⁶⁵Njuku a há̧narí̧ a bazeŋ a kuriri tí sa̧sâ̧m kɔ̧ nɛ́. Kú ŋgá̧ nûn nɛ́, a vbá̧ nɛ́, a vbí nɛ́ ɓá: «A gé vbá̧ mɔ́ lé? Mɔ́ sa!» Nǎŋnɔ́, njuku korohɛ̧ri̧ ɗa nɛ́, a vbá̧ ɓil nûn nɛ́.

⁶⁶Ka sɛl a sêeké nɔ́, Píyɛ́r e ka taa, a ɓil laɓáray, gelka wûnypéna a gáŋká̧na a há̧na gí ká̧y.

⁶⁷Ké kó Píyɛ́r a kaw nɔ́ hɔrɛ, ka ɛ̧rɛ̧ nɛ́ ɓá béláké a sa: «Mɔ̌ kɔ́, mɔ e kuu Zezú a Nazarɛ́t!»

⁶⁸Dáy Píyɛ́r many a sa: «Háy! Mi zi tu ɓay nɔ́ ka mɔ zi ɓay a sanáké yá, mi zi lá ɓilké yá!» Falké, ké tá a ɓil laɓára sé ri bɔʼɔbóró, [ dáy tôo gbo.]

⁶⁹Dáy wûnypéna kó Píyɛ́r, a resa hí̧ njukuri ka e ka gbɛ́ŋɛ́ ɓá: «Njuku nɛ́ ɓá mbêw a bazeŋ a kuriri!»

⁷⁰Dáy Píyɛ́r many ɓáy, falké kpay lé, njukuri ka e a golóy, resa hí̧ Píyɛ́r ɓáy ɓá: «Katína, mɔ́ kaw ɓá mbêw a bazeŋ a kuriri! Ɓayhí̧lé mɔ̌ kɔ́, mɔ ɓá njuku a tísiri a Galilê!»

⁷¹Dáy Píyɛ́r many a sa: «Mi há mûn ní, Gáŋvbôn ké í mí, ka mǐ, mi kúŋɓay, mi zi tu njuku nɔ́ ka í saɓay a mɛ̌ nyá!»

⁷²Núnmbɛ̧́nɛ́, tôo gbo a bɔʼɔ séreké, dáy Píyɛ́r rekɛ́rɛ ɓay ka Zezú tí sa hí̧ nɛ́ ɓá: «Ɗambɛl rá tôo ké gbo bɔʼɔké sére lé, mɔ e sa bɔʼɔké sáy ɓá, mɔ́ zi tu mí nyá.» Dáy a tí vúna.