Read Capanahua Márke 15 Bible Online

Márke 15 - Capanahua bible

Márke 15

¹A típélé rím gáŋnjuku nzáʼaká̧nari̧, gáŋnjuku pûri rá̧ njuku tɔ́ʼɔ sáŋnari̧, zi ɓay a sa ɓá mára̧ a gáŋnjuku walɓayri. Kú ŋgá̧ Zezú, a ɗá nɛ́ sé hí̧ Pilát.

²Dáy Pilát gé vbí nɛ́ ɓá: «Mɔ̌, mɔ́ ɓá mbây a Juyífri lé?» Zezú rerú hí̧ nɛ́: «Mɔ sa ka mûn nɔ́!»

³Gáŋnjuku nzáʼaká̧nari̧ saɓay a manyákéri ɓá ŋgɛ̧́náké kɔ̧ tûl a Zezú.

⁴Dáy Pilát revbí Zezú ɓáy ɓá: «Mɔ́ tí rerú ka ɓayké yá lé? Mɔ zi láɓayri a kú sa sé tûló yá lé?»

⁵Zezú zi rerú ka ɓay a há̧na mbêw yá, dáy Pilát kaw yér.

⁶A ɓil nâm záymûn Pâk dát lé, Pilát ten njuku vûn sɛl mbêw, ka njukuri vbíy.

⁷Dáy njuku a há̧na erú rɛŋɛ́ ɓá Barabás e ka vûn sɛl kuu mbaŋa mɛ̌ri̧ ɓay a kú rubéreri kuu njuku a tísiri a Rɔmɛri̧, ka a í njuku.

⁸Njukuri gí gel a Pilát, a gí vbí nɛ́ hɛ̧ a ké kaw niŋáké dát hí̧ kuriri.

⁹Dáy, Pilát rerú hí̧ kuriri: «I zi ɓá mí pɔŋ mbây a Juyífri hí̧ wǎyri lé?»

¹⁰Ɓayhí̧lé, ké tu ɓá táŋáké ɓá gáŋnjuku nzáʼaká̧nari̧, ŋgbá Zezú gí hí̧ nɛ́ ka ŋgboro a sɛ́rɛ.

¹¹Dáy gáŋnjuku nzáʼaká̧nari̧ sa hí̧ njukuri too, ɓá kú sa ɓá ké pɔŋ Barabás hí̧ kuriri.

¹²Pilát vbí njukuri ɓáy ɓá: «A̧hí̧ i zi ɓá mí niŋ kuu njuku ka i ɗí nɛ́ ɓá mbây a Juyífri lé?»

¹³Kú vbá̧nzáʼa a sa: «Mɔ́ ɓara nɛ́ ka̧n tûl dii vbatay!»

¹⁴Pilát vbí kuriri ɓá: «A̧hí̧ ké niŋ ɓá hɛ̧ɓéké lé?» Dáy kú vbá̧nzáʼa ɓá gbénáké ɓáy: «Mɔ́ ɓara nɛ́ ka̧n tûl dii vbatay!»

¹⁵Pilát zi ɓay a ké ɓá sáʼa kɔ̧ law a njukuri, dáy a ten Barabás hí̧ kuriri. Falké, ké sa kú vbá̧ Zezú ka ndêe, dáy, ka ɓá nɛ́ ɓá kú sé ɓara nɛ́ ka̧n tûl dii vbatay.

¹⁶Ŋgawbéreri ɗá Zezú ri ɓil vûn a mbây tûlkaw, dáy a ɗí dáwá ŋgawbéreri too gé.

¹⁷Kú ɓá béla gáŋ gári ɓá sɛ́ŋɛ́[8] ri Zezú. A kú ra̧ma ŋgátúru ɓá báŋa mbulí a ɓá ka̧n tûlé.

¹⁸Falké, kú nam nɛ́ a sa: «Nam wǎy, mbây a Juyífri!»

¹⁹Kú vbá̧ tûlé ka kâ̧wŋgba, a sa̧sâ̧m kɔ̧ nɛ́. A kú huku siri a mbɛlɛ́, a pɔtûl a kuriri sé ka̧ tísiri a mbɛlɛ́.

²⁰Gelka kú yáw nɛ́ ma kuriri dáy, kú lú gáŋ gári a sɛ́ŋɛ́ gefal, ka ɓá gárí a mɛ̌ ri nɛ́. Falké, kú ɓá nɛ́ tɛ̧́ kála, ɓay a sé ɓara nɛ́ ka̧n tûl dii vbatay.

²¹Njuku a há̧na rɛŋɛ́ ɓá Simɔŋ, njuku a Sirɛ́n bâa a Alekzaŋndɛrɛ rá̧ Rúfús, kaw ré ka wâʼa a tálá goló. Ŋgawbéreri gé há nɛ́ hol dii vbatay a Zezú.

²²Kú ɗa Zezú sé gel a kú ɗí ɓá Golgota, zi ɓay a sa ɓá: «Gel ŋgótûl.»

²³Kú ɓá vôn a kú zuʼuru ka mîr[9] ɓá ké nzó dáy Zezú zi yá.

²⁴Falké, ŋgawbéreri ɓara nɛ́ ka̧n tûl dii vbatay, a kú ɓú ɓele, ɓay a wal gári a mɛ̌ri̧ a bazeŋ a kuriri, ɓay a kú kó hɛ̧ ka njuku a sí̧ le too e ziŋákéy.

²⁵Sɛl a sêe e ɓá zíndɔ̂ʼɔmbêw a típélé, a kú ɓara Zezú ka̧n tûl dii vbatay.

²⁶Kú ɗé hɛ̧ ka tɔ́ʼɔ ɓayhí̧ kú í nɛ́y ka̧n tûlé a sâa ɓá: «Mbây a Juyífri.»

²⁷Ŋgawbéreri ɓara njuku í hûlri sére ka̧n tûl dii vbatay a kuriri ka gbaŋa Zezú kɔ́, mbêw ka ŋgboro lâʼa mɛ̌ rá̧ mbêw ka ŋgboro a kpóró a mɛ̌. [

²⁸Nǎŋnɔ́, pé niŋ hɛ̧ ka tí ɗé ka̧n ɓil Mbété ɓá: «Kú kɛ̧́ nɛ́ ka̧n bazeŋ a njuku niŋ ɓékéhɛ̧ri̧.»]

²⁹Njukuri ka tá ŋgboroké té tûl a kuriri, a fára nɛ́ a sa: «Mɔ̌ ka zi ɓay a gbɛʼɛrɛ vûn a Gáŋvbôn, a rembó a féké ka̧n gelké a ɓil nâm sáy,

³⁰mɔ́ pɛ̧́ mûn nɔ́ ka mûn nɔ́, a mɔ́ ɗere ka tûl dii vbatay nɔ́!»

³¹Nǎŋnɔ́ kɔ́, gáŋnjuku nzáʼaká̧nari̧ rá̧ njuku tɔ́ʼɔ sáŋnari̧ sáʼa Zezú, a sa a bazeŋ a kuriri ɓá: «Ké pɛ̧́ njuku a ǎ̧wrí̧, dáy a zi ma pɛ̧́ mûn nɛ́, mɛ̌ ka mûn nɛ́ nyá!

³²Kiris, mbây a Izirayɛ́l, ké ɗere ka tûl dii vbatay nɔ́ a ŋgɛŋnɛ́! Rá̧ ɓurú mí kóy, a goló, rú e láɓulaw hí̧ nɛ́!» Njukuri a kú ɓara kuriri ka̧n tûl dii vbatay a gbɛ́ŋɛ́, fára nɛ́ kɔ́.

³³A lawgel a sêe, gel yírí ma tísiri too ka̧ sɛl a sêe sáy a bɔʼɔlêw.

³⁴A ɓil sɛl a sêe sáyké nɔ́, Zezú vbá̧nzáʼa a ŋgɛ́rɛ ɓá: «Eloyí, Eloyí, lemá Sabaktaní?» Zi ɓay a sa ɓá: «Gáŋvbôn a mǐ, Gáŋvbôn a mǐ, ɓayhí̧rá̧ mɔ́ sáŋ mí lé?»

³⁵Njuku a fékéri ka e a gelké, lá a sa: «I lá, ké ɗí Eli!»

³⁶Dáy njuku mbêw a bazeŋ a kuriri, ŋgú sé mbí nzáʼa gári, a ɓá doŋ vôn a sɔ̧́náké, a ɓá ka̧n nzáʼa kâ̧wŋgba, dáy a ɓá ndara hí̧ Zezú ɓá ké nzó, a sa: «I zoko, a ná kó, há̧na Eli e gí ɗere nɛ́ ka tûl dii vbatay nɛ́ lé!»

³⁷Dáy, Zezú vbá̧nzáʼa ɓá gbénáké, a hú.

³⁸Gáŋ laa a kúŋ ɓil vûn a Gáŋvbôn, sáʼa sére ka lawgel, tí ka sâa sé ka̧ taa.

³⁹Gáŋnjuku a ŋgawbére a Rɔmɛri̧[10] ka ew ka kó hûl a Zezú, sa: «Njuku nɛ́, kaw ɓá Gun a Gáŋvbôn katína!»

⁴⁰Wûny a há̧narí̧ e ka goló, a kaw ɓá ɗínáké kaw kónáké kɔ́. A bazeŋ a kuriri, Marí a Makdala rá̧ Marí mâa a Ják gun lélé rá̧ Jozé rá̧ Salomɛ́.

⁴¹Kú tí tɔ́ŋ Zezú a niŋ péna hí̧ nɛ́, a ké e ka Galilê ɓáy. A goló kɔ́, wûny a fékéri ɓá ŋgɛ̧́náké erú, ka he kuu Zezú gí ka Zerúzalɛ̂m.

⁴²Gelka bɔʼɔlêw gí ka̧, ɓá sêe mɔny mûn, ka ɓá ɗambɛl nâm ɔʼɔ.

⁴³Jozɛf ka ɓá njuku a tísiri a Arimaté, ka ɓá njuku mbêw a ɓil a gáŋnjuku walɓayri, a kú hɛʼɛ nɛ́ mambá, gí ka̧. Mɛ̌ kɔ́, ké ɓá njuku ka kaw zoko káwa Mbây a Pû a Gáŋvbôn. Ɓaykénɔ́, ké ziŋ ŋgɛ́rɛ uru sé gel a Pilát, ɓay a sé vbí hûl a Zezú.

⁴⁴Dáy Pilát lá ɓá Zezú hú dá, a kaw yér. Ké pé ɗí gáŋnjuku a ŋgawbére a Rɔmɛri̧, a vbí nɛ́ ɓá: «Zezú hú ɗiɓaŋ dá lé?»

⁴⁵Gáŋnjuku a ŋgawbére a Rɔmɛri̧ zi a sa hí̧ nɛ́ ɓá nǎŋ katína, dáy ké pɔŋ ŋgboro hí̧ Jozɛf ɓá ké sé mbí hûl a Zezú.

⁴⁶Jozɛf zé laa a Pukí, ka ɗere hûl a Zezú a tûl dii vbatay. Ké ku hûlké, a mbí kála sé goro ka lɔ̂ʼɔpâl a kú gu a ɓil pɔ̂ny, ka gíkra gáŋ saw gí ndi nzáʼa lɔ̂ʼɔké.

⁴⁷Marí a Makdala kuu Marí mâa a Jozé kó gel a kú goro hûl a Zezú ka̧nrú̧y.