Read Capanahua Márke 16 Bible Online

Márke 16 - Capanahua bible

Márke 16

¹Gelka nâm ɔʼɔ tá dáy, Marí a Makdala rá̧ Marí mâa a Ják rá̧ Salomɛ́, sé zé mára̧ yámbó, ɓay a sé fere kɔ̧ mûn a Zezú.

²Ɗambɛl nâm péna a kú ɗí ɓá: «Dimásí» a gel a típélé ka sêe kaw tɛ̧́nay, kú mbí ŋgboro ɓay a sé tûlpâl.

³Kú sa a bazeŋ a kuriri ɓá: «A gé e gé gíkra gáŋ saw gefal ka nzáʼa lɔ̂ʼɔ hí̧ nárí̧ lé?»

⁴Dáy, gelka kú mbí nûn a kuriri, kú kó gáŋ saw ka nzáʼa lɔ̂ʼɔ, gíkra gefal dá.

⁵Kú gí ri ɓil pɔ̂ny, a kú kó kaban njuku a há̧na, ka kaw ka ŋgboro a lâʼa, ka a ri gáŋ gári ɓá Pukí. Dáy wɔ́w ŋgbá kuriri.

⁶Kaban njuku ráy sa hí̧ kuriri ɓá: «Í ŋgú wɔ́w yá! I kaw ɛ́ Zezú a Nazarɛ́t, mɛ̌ a kú ɓara nɛ́ ka̧n tûl dii vbatay; ké toma a hûl dá, ké tí ka gelé mbaa. Í kó, gelka kú ɓá nɛ́ nárú̧y.

⁷Ŋgɛŋnɛ́, í sé sa hí̧ Píyɛ́r rá̧ gárá gunbɛʼɛri ɓá: “Zezú e zoko wǎyri ka Galilê. A goló pé i e gé kó nɛ́ ɓá báŋké a ké tí sa hí̧ wǎyri.”»

⁸Kú tɛ̧́ a lɔ̂ʼɔpâl, ka ŋgú ka wɔ́w, ka mûn tɔ́na, kú zi saɓay a há̧na mbêw hí̧ njuku yá, ɓayhí̧lé kú kaw ka wɔ́w.

⁹Típélé dimásí ka Zezú toma ka hûl, ké tí tɔ́ʼɔ mɔ nɛ́ ɗambɛl hí̧ Marí a Makdala, a ké ní têm ɓékéri zíndɔ̂ʼɔsáy ka mûn nɛ́.

¹⁰Marí a Makdala sé saɓayké hí̧ gunbɛʼɛri, ka kaw ka lawyíra a kaw vúnay.

¹¹Dáy gelka kú lá Marí sa ɓá: «Zezú erú ka nûn! Mi kó nɛ́!» Kú zi zibɔʼɔké hí̧ nɛ́ nyá.

¹²Falké Zezú tɔ́ʼɔ mûn nɛ́ ɓórí hí̧ gunbɛʼɛri sére ka e ka tûl ŋgboro ɓay a sé gun pû há̧na.

¹³Kú regí, a gí saɓayké hí̧ gunbɔʼɔ a ǎ̧wrí̧, dáy kú zi zibɔʼɔké hí̧ kuriri yá kɔ́.

¹⁴A falké kpay ɓáy, Zezú tɔ́ʼɔ mûn nɛ́ hí̧ gunbɛʼɛri bôo ka mbêw, ka kaw sɔ̧́lâʼa. Ké nzáʼa ziŋ kuriri sé tûl kpúlaw a kuriri, rá̧ zibɔʼɔ ɓay yá a kuriri hí̧ njukuri ka kó nɛ́ ka nûn.

¹⁵Falké, Zezú sa hí̧ kuriri: «Í sé tísiri too, a í tɔ́ʼɔ Bélaɓay hí̧ njukuri too.

¹⁶Njuku ka e láɓulaw, ka a nyá batêm, e pɛ̧́na, dáy a njuku ka zi láɓulaw yáy, walɓay a Gáŋvbôn e ŋgbá nɛ́.

¹⁷Í kó ŋgána, ka e tɔ́ʼɔ ɓá njukuri láɓulaw: kú e ní têm ɓékéri ka rɛŋ ní, kú e sa nzáʼaɓay a ŋgɛŋkéri.

¹⁸Kú mí ŋgbá sôy ka ndɔ̂ʼɔ a kuriri, malé kú mí nzó pom, tí niŋ kuriri ɓékéhɛ̧ a há̧na mbêw yá. Kú e ɓá ndɔ̂ʼɔ kuriri kɔ̧ tûl a njuku záŋmári̧, njuku záŋmákéri e ziŋ ŋgɛ́rɛ.»

¹⁹A falké ka Gáŋmbây Zezú ɔrɔ saɓay nɔ́ hí̧ kuriri, Gáŋvbôn lú nɛ́ sé nûnalê sé kaw ŋgboro a lâʼa a mɛ̌.

²⁰A gunbɛʼɛri, kú sé tɔ́ʼɔ Bélaɓay lágelri too. Gáŋmbây niŋ péna kuu kuriri, a hí̧ kuriri kpɔ́ŋa niŋ hɛ̧ a yérkéri, ɓay a tɔ́ʼɔ ɓá, tɔ́ʼɔɓay a kuriri ɓá gbátɓay.