Read Capanahua Márke 3 Bible Online

Márke 3 - Capanahua bible

Márke 3

¹Dáy, falké Zezú sé vûn gɔ́ŋ Gáŋvbôn. A goló njuku ndɔ̂ʼɔ a húnáké a há̧na erú.

²Dáy fariziyɛ̧́ri̧ ɓɛʼɛ Zezú ɓay a kú kó ɓá, ké e ŋgɛ́rɛ njuku záŋmá nɔ́, a sêe ɔʼɔ lé, ɓayhí̧lé kú kaw ɛ́ ŋgboro ɓay a ŋgbá nɛ́.

³Zezú sa hí̧ njuku nɔ́ ka ndɔ̂ʼɛ huhúy ɓá: «Mɔ́ uru gí ew lawgel a njukuri a gelé!»

⁴Falké, ké vbí njukuri ɓá: «A̧hí̧ sáŋna vbí ɓá kú niŋ a sêe ɔʼɔ lé? Kú niŋ béla malé ɓéké lé? Kú pɛ̧́ njuku malé, kú í nɛ́ lé?» Dáy, kú zi rerú ka ɓay a há̧na hí̧ Zezú yá.

⁵Zezú ɛ̧rɛ̧ kuriri too a law hɛ́rɛ, lawɛ́ yírí sé tûl kpúlaw a kuriri. Dáy, a sa hí̧ njuku ndɔ̂ʼɔ húnáké nɔ́ ɓá: «Mɔ́ ndara ndɔ̂ʼɔ!» Ké ndara ndɔ̂ʼɛ lé, ndɔ̂ʼɛ ŋgɛ́rɛ ɓá béláké.

⁶Núnmbɛ̧́nɛ́ nɔ́, Fariziyɛ̧́ri̧ tɛ̧́ a vûn gɔ́ŋ Gáŋvbôn, a mára̧ há̧narí̧ kuu njuku a Herod Aŋtipâsri, ɓay kú ɛ́ ŋgboro í Zezú.

⁷Falké, Zezú uru rá̧ gunbɛʼɛri a kála sé gbaŋ fâ̧w a Galilê, dáy njukuri ɓá ŋgɛ̧́náké tɔ́ŋ nɛ́. Njukukéri gí ka ŋgboro a Galilê rá̧ Judé,

⁸a fékéri gí ka Zerúzalɛ̂m, Idumɛ̧́, ɓil kaw a helkála mbii a Jurdɛ́ŋ, rá̧ ɓil kaw a Tiré rá̧ Sidɔ̂ŋ. Kú gí ɓá ŋgɛ̧́náké gí gel a Zezú, ɓayhí̧lé kú lá, njukuri saɓay a hɛ̧ri̧ too ka Zezú niŋ.

⁹Nǎŋnɔ́, Zezú sa hí̧ gunbɛʼɛri ɓá kú mɔny kumbôn mbêw hí̧ nɛ́, ɓay a njukuri kú zi ná gí lé kɔ̧ tûlé.

¹⁰Ɓayhí̧lé ké ŋgɛ́rɛ njuku záŋmári̧ ɓá ŋgɛ̧́náké, dáy njukuri ka e ka záŋmá too, ŋgú gí ɓá gé lé, ɓay a gí ɗa nɛ́.

¹¹Nǎŋnɔ́, gelka têm ɓékéri kó Zezú, kú lé mbɛlɛ́ a vbá̧nzáʼa: «Mɔ̌, mɔ́ ɓá Gun a Gáŋvbôn!»

¹²Dáy, Zezú saɓay ka ŋgɛ́rɛ hí̧ kuriri ɓá kú zi ná ten táŋa a mɛ̌.

¹³Falké, Zezú he sé tûl kon, a ɗí njukuri a ké ziy, dáy kú gí gé lé.

¹⁴Nǎŋnɔ́, ké ten njukuri bôo a sére, a hí̧ kuriri rɛŋ apotere. Ké ten kuriri ɓay a kú kaw kuu mɛ̌, a ké pé kuriri sé tɔ́ʼɔ Bélaɓay,

¹⁵a hí̧ kuriri kpɔ́ŋa ní têm ɓékéri.

¹⁶Rɛŋ a apotereri bôo a sére a ké ten ɓá: Simɔŋ, ka Zezú zi rɛŋɛ́ ɓá Píyɛ́r,

¹⁷Ják rá̧ nyîn nɛ́ Zâŋ, kuriri sére too ɓá gun a Zebedé, ka Zezú hí̧ kuriri rɛŋ ɓá Boanɛrgɛ́s, zi ɓay a sa ɓá: «Gun a mbɔ̂m»;

¹⁸Anderé, Filíp, Bartelemí, Matiye, Toma, Ják gun a Alfé, Tadé, Simɔŋ gun pû,

¹⁹rá̧ Judas Ɛskariyót, njuku ka e zé Zezú.

²⁰Falké, Zezú rekála gí pû. Njukuri ɓá ŋgɛ̧́náké mára̧ há̧narí̧ gí ɓáy, Zezú rá̧ gunbɛʼɛri zi ziŋ ŋgboro sɔ̧́lâʼa yá!

²¹Gelka njuku î̧n a mɛ̌ri̧ láɓayké, kú uru a gí ɓay a gí ɗa nɛ́, ɓayhí̧lé njukuri sa ɓá: «Tûl a Zezú laláŋa!»

²²Njuku tɔ́ʼɔ sáŋnari̧ ka gí a Zerúzalɛ̂m sa ɓá: «Bɛlzebûl, Zábolo e ka mûn nɛ́.» Kú sa ɓáy ɓá: «Ɓá gáŋnjuku a têm ɓékéri pé hí̧ nɛ́ kpɔ́ŋa ní têm ɓékéri.»

²³Dáy Zezú ɗí kuriri a sa galaɓay hí̧ kuriri ɓá: «E ná a̧ní rá̧, Sata̧n e ní Sata̧n mɛ̌ ka mûn nɛ́ lé?»

²⁴Njuku pû mbây a mbêwkéri mí rúbére ziŋ há̧narí̧, pû mbâyké tí ewá yá;

²⁵Nǎŋnɔ́ kɔ́, njuku î̧n a mbêwkéri mí rúbére ziŋ há̧narí̧, î̧nké e duʼura.

²⁶Dáy Sata̧n mi rúbére ziŋ mûn nɛ́, malé wála ná ka mûn nɛ́, tɔ́ʼɔ ɓá kpɔ́ŋa a mɛ̌ tí káwa yá, e ɔna.

²⁷«Njuku a há̧na, zi ma gí ri vûn a njuku ŋgɛ́rɛ a há̧na, a fá̧ hɛ̧zíŋa a mɛ̌, a ké mí zi gí ɗambɛl, a gí ŋgbá njuku ŋgɛ́rɛ́ké a ŋgá̧ nɛ́ nyáy, ké ma gí fá̧ hɛ̧ri̧ ka vûn a mɛ̌ nyá.

²⁸Katína mi sa hí̧ wǎyri gbátɓay: Gáŋvbôn e vbá̧buma ɓékéhɛ̧ too ka njukuri niŋ, rá̧ fárari too a kú fára Gáŋvbôn.

²⁹Dáy njuku ka e fára Têm Pukí, Gáŋvbôn tí vbá̧buma hí̧ nɛ́ bɔʼɔ mbêw yá. Ɓayhí̧lé ké niŋ ɓéké ka kɔ́rɔ́ké zi tí yáy.»

³⁰Zezú sa nǎŋnɔ́ ɓayhí̧lé kú sa ɓá: «Ké erú ka têm ɓéké ka mûn nɛ́!»

³¹Falké mâa Zezú rá̧ nyîn nɛ́rí̧ gí, a kú gí kaw ɔ kála dáy, a pé njuku a há̧na ɓá ké sé ɗí Zezú gí.

³²Njukuri ɓá ŋgɛ̧́náké kaw ɗɔ́ŋ Zezú, dáy kú gí sa hí̧ nɛ́ ɓá: «Mâa a mɔ̌, nyîn nɔ́rí̧ rá̧ mánǎa a mɔ̌ri̧ gí, ka e a kála, a kaw ɛ́ mɔ́.»

³³Zezú zi a sa: «A gé ɓá mâa a mǐ, rá̧ nyîn nírí̧ lé?»

³⁴Dáy, a ɛ̧rɛ̧ njukuri ka kaw ɗɔ́ŋ nɛ́, a sa: «Í kó mâa a mǐ rá̧ nyîn nírí̧ pé kaw nɛ́y!

³⁵Ɓayhí̧lé njuku ka niŋ hɛ̧ ka Gáŋvbôn ziy, ké ɓá nyîn ní, mánǎa a mǐ, rá̧ mâa a mǐ.»