Read Capanahua Márke 5 Bible Online

Márke 5 - Capanahua bible

Márke 5

¹Falké Zezú rá̧ Gunbɛʼɛri gé ka̧ hélkála fâ̧w a Galilê a tísiri a Zeraseniyɛ̧́ri̧.

²Zezú ɗere a ɓil kumbôn, dáy a núnmbɛ̧́nɛ́ nɔ́, njuku a há̧na tɛ̧́ a tûlpâlri gí ziŋ nɛ́. Njukuké nɔ́ erú ka têm ɓéké a mûn nɛ́,

³ké ná ɓá tûlpâlri. Njuku a há̧na ma ŋgbá nɛ́, malé ma ŋgá̧ nɛ́ ka sɛl wɛ̧̂ɛ ka̧n gel a mbêwké yá.

⁴Sêe a há̧narí̧ lé, kú ɓá wɛ̧̂ɛ kɔ̧ bɛʼɛ, a ŋgá̧ ndɔ̂ʼɛ ka sɛl wɛ̧̂ɛ, dalé ké kúŋ sɛl wɛ̧̂ɛ nɔ́rí̧, a haw wɛ̧̂ɛkéri too. Njuku a há̧na ka e ndé nɛ́ a ŋgɛ́rɛ ɓay a ŋgbá nɛ́ kaw gel a mbêwké zi tí yá.

⁵Ké há̧ra̧ lá bazeŋ pâlri rá̧ tûl konri̧, sêe too: Sû̧ŋ ɓá báŋa ɓil a sêe, ka vbá̧nzáʼa, a vbere mûn nɛ́ ka sawri.

⁶Gelka, ké kó Zezú kaw gí ɓá ɗínáké, ké ŋgú sé huku siri a mbɛlɛ́.

⁷Dáy a vbá̧nzáʼa ɓá gbénáké ɓá: «A̧hí̧ mɔ zi kuu mǐ lé Zezú, Gun a Gáŋvbôn a nûnalê? Mi vú hí̧ mɔ́ ka rɛŋ a Gáŋvbôn, mɔ́ niŋ mí tɔ́ʼɔsêe yá!»

⁸Katína lé, Zezú sa hí̧ nɛ́ ɓá: «Têm ɓéké, mɔ́ tɛ̧́ ka mûn a njuku nɔ́!»

⁹Zezú vbí nɛ́ ɓá: «Rɛŋɔ́ ɓá hí̧ lé?» Dáy ké rerú ɓá: «Rɛŋ ní ɓá: “Ŋgɛ̧́ mambá” ɓayhí̧lé rú daw mambá.»

¹⁰Dáy, têm ɓékékéri vú hí̧ Zezú ɓá ké zi ná ní kuriri tɛ̧́ a ɓil kawké!

¹¹A gelké nɔ́, kɔsɔri ɓá ŋgɛ̧́náké erú, kaw ɛ́ lâʼa a kuriri a bɔʼɔ kon.

¹²Têm ɓékékéri vú hí̧ Zezú ɓá: «Mɔ́ pé rú sé ɓil a kɔsɔ nɔ́rí̧, a rú ri mûn a kuriri!»

¹³Dáy Zezú pɔŋ ŋgboro hí̧ kuriri. Nǎŋnɔ́ pé kú tɛ̧́ ka mûn a njuku ráy, a sé ri mûn a kɔsɔri. Bon a kɔsɔkéri too e niŋ gbaŋa kumrá̧ké sére. Kú ŋgú ɗere kon a gé lé kɔ̧ mbii kuriri too, a hú kɔ̧rú̧.

¹⁴Njuku koro kɔsɔkéri ŋgú, a sé saɓayké lá ɓil pûri, rá̧ nzáʼa wâʼari too. Dáy njukuri kó nǎŋ, a mára̧ gí kó hɛ̧ ka táy.

¹⁵Gelka kú gí ka̧ gbaŋa a Zezú, ka a kó njuku ráy ka têm ɓékéri ɓá ŋgɛ̧́náké e ka mûn nɛ́, kaw siri, a ri gári, a kaw ɓá béláké ka gbaŋa Zezú. Dáy wɔ́w gí ŋgbá kuriri.

¹⁶Njukuri too ka kó hɛ̧ri̧ ka táy, sa hí̧ njukuri hɛ̧ ka ziŋ njuku ka erú ka têm ɓéké ka mûn nɛ́ rá̧ kɔsɔri.

¹⁷Dáy njukukéri tí vú hí̧ Zezú ɓá ké kála a tísiri a kuriri!

¹⁸Gelka Zezú kaw ri ɓil kumbôn, njuku nɔ́ ka ziŋ ŋgɛ́rɛ, vbí Zezú ɓá ké pɔŋ nɛ́ kaw kuu mɛ̌!

¹⁹Dáy Zezú zi zibɔʼɔké yá, a sa hí̧ nɛ́ ɓá: «Mɔ́ resé pû a mɔ̌, a ɓil î̧n a mɔ̌, a mɔ́ sa hí̧ kuriri hɛ̧ too ka Gáŋmbây niŋ hí̧ mɔ́, a ɓil béla a mɛ̌.»

²⁰Nǎŋnɔ́, njuku ráy rekála, a tí saɓay a hɛ̧ ka Zezú niŋ hí̧ nɛ́ a ɓil kaw ka pûri erú bôo. Njukuri too ka láɓaykéy kaw yér.

²¹Zezú regí a helkála fâ̧w ka kumbôn. Njukuri ɓá ŋgɛ̧́náké mára̧ gí ɗɔ́ŋ nɛ́, a ké ew ka gbaŋ mbii.

²²Gáŋnjuku vûn gɔ́ŋ Gáŋvbôn a Juyíf a há̧na, rɛŋ ɓá Zayrús gí ka̧. Gelka ké kó Zezú, ké lé mbɛlɛ́,

²³a vú hí̧ Zezú a sa: «Gun a mǐ e hûl. Mí ŋgbá bɔʼɔ, mɔ́ gí ɓá ndɔ̂ʼɔ kɔ̧ tûlé, a ké ma pɛ̧́na, a ké kaw!»

²⁴Zezú uru a sé kuu mɛ̌. Dáy njukuri ɓá ŋgɛ̧́náké ɗa nɛ́, a séséna ka sɔʼɔrɔ nɛ́.

²⁵Nǎŋnɔ́ a bazeŋ a njuku nɔ́rí̧, wûny a há̧na erú, ké erú ka záŋmá fihoy mbimbɔ̂m bôo a sére dá.

²⁶Ké tɔ́ʼɔsêe mambá a ɓil ndɔ̂ʼɔ a njuku hí̧ nzáʼagoyri ɓá ŋgɛ̧́náké. Ké ɓew lari a mɛ̌ too, a zi ziŋ ŋgɛ́rɛ yá, záŋmáké gé ɓá mbɛl.

²⁷Gelka, ké lá njukuri saɓay a Zezú, ké gí a ɓil a njukuri, a fal a Zezú, dáy, a gí ɗa nzáʼa gári a mɛ̌.

²⁸Ɓayhí̧lé, ké kɛrɛ ɓá: «Mǐ, mi ziŋ ɗa ɓá nzáʼa gári a mɛ̌y, mi e ziŋ ŋgɛ́rɛ.»

²⁹Núnmbɛ̧́nɛ́, záŋmá fihoyké gí ɔ, ké kó mûn nɛ́ ɓá ké ziŋ ŋgɛ́rɛ dá.

³⁰Ka núnmbɛ̧́nɛ́ nɔ́ kɔ́, Zezú lá ŋgɛ́rɛ a há̧na tɛ̧́ ka mûn nɛ́. Ké fere, a ɛ̧rɛ̧ njukuri, a vbí ɓá: «A gé ɗa gári a mǐ lé?»

³¹Dáy gunbɛʼɛri sa: «Mɔ́ zi kó njukuri ɓá ŋgɛ̧́náké séséna a sɔʼɔrɔ mɔ́ nyá lé, ná a̧ní rá̧ mɔ́ e vbí ɓá: “A gé ɗa gári a mǐ lé?”»

³²Dáy, Zezú ɛ̧rɛ̧ gel kí ɗɔ́ŋ nɛ́, ɓay a ké kó a gé ɗa gári a mɛ̌ lé.

³³Wûny ráy tɔ́ ka wɔ́w, ɓayhí̧lé ké tu hɛ̧ ka táy, dáy a ké sé lé bɔʼɔ a Zezú, a sa gbátɓay too hí̧ Zezú.

³⁴Nǎŋnɔ́, Zezú sa hí̧ nɛ́: «Gun a mǐ, láɓulaw a mɔ̌ pɛ̧́ mɔ́ dá. A vónáké ké sé kuu mɔ̌, a mɔ́ ŋgɛ́rɛ ka záŋmá a mɔ̌.»

³⁵Gelka Zezú kaw sa nǎŋnɔ́, njuku nzáʼapénari̧, gí ka pû a Zayrús, dáy a gí sa hí̧ nɛ́ ɓá: «Gun a mɔ̌ hú dá, mɔ́ dɔʼɔlɔ Gáŋnjuku mbaa.»

³⁶Dáy, Zezú zi kél ɓay a kuriri yá, a sa hí̧ Zayrús ɓá: «Mɔ́ ŋgú wɔ́w yá, mɔ́ láɓulaw mbêw yáŋ.»

³⁷Zezú zi pɔŋ ŋgboro hí̧ njuku a há̧na ké ɗá nɛ́ sé yá, ɓá Píyɛ́r, Ják kuu nyîn nɛ́ Zâŋ.

³⁸Kú gé ka̧ pû a Zayrús, a goló Zezú gé kó njukuri ka ɓá mûn a kuriri tɔ́ʼɔsêe, ka a vú, a vbá̧nzáʼa, a órómûn a kuriri.

³⁹Ké gé ri ɓil vûn a sa hí̧ kuriri ɓá: «Ɓayhí̧rá̧ i ɓá mûn a wǎyri tɔ́ʼɔsêe, a vú nǎŋnɔ́ lé? Gun nɛ́ zi hú yá, ké ná nâm.»

⁴⁰A goló njukuri sáʼa nɛ́. Dáy ké sa ɓá kú tɛ̧́ kála too, a pɔŋ ɓá bâa gun rá̧ mâa gun rá̧ gunbɛʼɛri sáy. Ké ri sé ɓil vûn nâm a gun,

⁴¹a gé ŋgbá ndɔ̂ʼɛ, a sa hí̧ nɛ́: «Talíta kum!» Zi ɓay a sa ɓá: «Mi sa hí̧ mɔ́, gun a lɔŋɔ́, mɔ́ uru!»

⁴²Núnmbɛ̧́nɛ́ nɔ́, gun a lɔŋɔ́ rá̧y uru a tí séséna, ké erú a mbimbɔ̂m bôo a sére. Njukuri too kó, a kaw yér.

⁴³Dáy, Zezú vbara kuriri ɓá kú zi ná saɓayké hí̧ njuku a há̧na, falké, ké sa hí̧ kuriri ɓá: «Í hí̧ nɛ́ hɛ̧lâʼa.»