Read Capanahua Márke 6 Bible Online

Márke 6 - Capanahua bible

Márke 6

¹Zezú uru a goló, a kála sé Nazarɛ́t, pû a ké hɔ̧́ karú̧y dáy gunbɛʼɛri sé kuu mɛ̌.

²Gelka nâm ɔʼɔ ká̧y, ké tí tɔ́ʼɔhɛ̧ a ɓil vûn gɔ́ŋ Gáŋvbôn a Juyífri. Njukuri ɓá ŋgɛ̧́náké ka lá tɔ́ʼɔhɛ̧ a mɛ̌, kaw yér, a sa: «A gel a sí̧, ké ziŋ hɛ̧túna nɔ́rí̧ lé? A gé hí̧ nɛ́ mára̧ rɔ̧́na nɔ́ rá̧ kpɔ́ŋa niŋ hɛ̧sáʼamari̧ nǎŋnɔ́ lé?

³Tá mɛ̌ njuku ɓara hɛ̧, gun a Marí rá̧ nyîn a Ják, nyîn Jozé, rá̧ Jude kuu Simɔŋ nyá lé? Tá mánǎa a mɛ̌ri̧ too, e kuu manárí̧ a gelé yá lé?» Hɛ̧ nɔ́rí̧ pé de njuku Nazarɛ́tri láɓulaw hí̧ Zezú.

⁴Dáy Zezú sa hí̧ kuriri ɓá: «Kú yáw porofɛ́t ɓá a ɓil pû mɛ̌, a bazeŋ a î̧n a mɛ̌ri̧, rá̧ a ɓil vûn a mɛ̌.»

⁵Dáy ɓayké nɔ́, pé Zezú zi niŋ hɛ̧sáʼama a há̧na mbêw ka Nazarɛ́t yá, ɔ ɓá ndɔ̂ʼɔ a ké ɓá kɔ̧ tûl a njuku záŋmá a há̧narí̧ ka a ŋgɛ́rɛ kuriri.

⁶Ké kaw yér, ɓay ka njuku pû mɛ̌ri̧ zi tí ka láɓulaw yáy. Falké, Zezú sé tɔ́ʼɔhɛ̧ ka pûri too a gbaŋa Nazarɛ́t.

⁷Ké ɗí gunbɛʼɛri bôo a sére, a pé kuriri sére sére, a hí̧ kuriri kpɔ́ŋa kaw tûl a têm ɓékéri.

⁸Ké sa hí̧ kuriri ɓá: «Í mbí hɛ̧ há̧na mbêw serú yá, í mbí ɓá kâ̧w mbêw yáŋ. Í ŋgbá biré malé ŋguu gári yá, a í zi ná ɓá lari ka̧n ɓil ŋguu serú.

⁹Í ndáʼa sabɔʼɔ a wǎyri, a í fá̧ gári sére yá.»

¹⁰Zezú sa hí̧ kuriri ɓáy ɓá: «Gelka wǎyri mí ka̧ gel a há̧na, rá̧ kú mí gé nyá wǎyri ka̧n vûn lé, i kaw ɔ rú ka̧ sêe kála a wǎyri.

¹¹A gel a há̧na, njukuri mí zi nyá wǎyri yá, a zi láɓay a wǎyri yá lé, i kála, a i haŋ sôm a siri bɔʼɔ a wǎyri kɔ̧ pûké, nǎŋnɔ́ e ná ɓá vbarahɛ̧ hí̧ kuriri.»

¹²Dáy, gunbɔʼɔ a Zezúri sé, a tɔ́ʼɔɓay hí̧ njukuri ɓá kú fere káwa a kuriri.

¹³Kú ní têm ɓékéri ɓá ŋgɛ̧́náké, a ɗoko mára̧ kɔ̧ tûl a njuku záŋmári̧ ɓá ŋgɛ̧́náké, a ŋgɛ́rɛ kuriri.

¹⁴Dáy mbây Herod Aŋtipâs lá kú saɓay a Zezú, ɓayhí̧lé rɛŋɛ́ ɗí magél too. Njuku a há̧narí̧ sa: «Ɓá Zâŋ Batís, pé toma a hûl! Ɓaykénɔ́ pé ké erú ka kpɔ́ŋa niŋ hɛ̧sáʼamari̧.»

¹⁵Njuku a fékéri sa ɓá: «Eli.» Njuku a fékéri ɓáy, sa ɓá: «Ké ɓá njuku mbêw a bazeŋ a porofɛ́t a í̧ŋásá̧ri̧.»

¹⁶Gelka Herod lá too ka njukuri say, ké sa a ɓil lawɛ́ ɓá: «Zâŋ Batís a mi pé njukuri sé kúŋ tûlé, dáy ɓá mɛ̌ pé toma ka hûl!»

¹⁷Ɓayhí̧lé, mbây Herod ka mûn nɛ́, tí hí̧nzáʼa ɓá kú ŋgbá Zâŋ a ŋgá̧, a ɓá nɛ́ sé vûn sɛl, ɓay tûl a Heródiyad, wûny a nyîn nɛ́ Filíp a ké nyáy.

¹⁸Ɓay ka Zâŋ sa hí̧ mbây Herod ɓá: «Sáŋna a manárí̧ zi hí̧ mɔ́ ŋgboro ɓá mɔ́ nyá wûny a nyîn nɔ́ nyá.»

¹⁹Heródiyad kɔ́, fɔny Zâŋ, a zi ɓay í nɛ́, dáy a ziŋ ŋgboro yá.

²⁰Gbátké lé, mbây Herod erú ka wɔ́w a Zâŋ, ɓayhí̧lé ké tu ɓá Zâŋ kaw ɓá njuku a ndáráké, rá̧ njuku a táŋáké, a kaw puru tûlé. Gelka mbây Herod láɓay a Zâŋ, lawɛ́ ɛ́ ɓay, a tu ɓá ké zi ɓay a láɓay a mɛ̌ mambá yá.

²¹Dáy, sêe a há̧na, Heródiyad ziŋ ŋgboro, ɓayhí̧lé sêeké ɓá sêe záymûn kɛrɛ mbuŋa a Herod. Dáy Herod kara lâʼa ɓá ŋgɛ̧́náké hí̧ gáŋnjuku a tísiri a mɛ̌ri̧, hí̧ gáŋnjuku a ŋgawbéreri, rá̧ gáŋnjuku pû a Galilêri too.

²²Gun lɔŋɔ́ a Heródiyad ri ɓil vûn, a tí ndá nday. Ndayké ri law a Herod rá̧ njukuri a ké ɗíy too. Nǎŋnɔ́ mbây sa hí̧ gun a lɔŋɔ́ ɓá: «Mɔ́ vbí mí hɛ̧ too ka mɔ ziy, mi e hí̧ mɔ́.»

²³A há mûn nɛ́ hí̧ nɛ́ a mbɛl a njukuri too a sa: «Katína, mi e hí̧ mɔ́ hɛ̧ too ka mɔ vbíy, zi lé mí ɓá wal pû mbây a mǐ ɓilké sére hí̧ mɔ́.»

²⁴Gun lɔŋɔ́ ráy, tɛ̧́ sé vbí mâa a mɛ̌: «A̧hí̧, mi e vbínáké lé?̄» Dáy mâa a mɛ̌ sa hí̧ nɛ́ ɓá: «Mɔ́ vbí tûl a Zâŋ Batís.»

²⁵Gun lɔŋɔ́ reɓá gánáké sé gel a mbây Herod, a gé sa hí̧ nɛ́ ɓá: «Mi zi tûl a Zâŋ Batís a ɓil kpáŋgbáráŋ a ŋgɛŋnɛ́.»

²⁶Law a mbây yírí, dáy ké zi kó ŋgboro manyáké yá, ɓayhí̧lé ké tí há mûn nɛ́ a mbɛl a njukuri too a ké ɗíy dá.

²⁷A goló, ké hí̧nzáʼa hí̧ ŋgawbéreri njuku koro nɛ́ mbêw ɓá ké sé kúŋ tûl a Zâŋ Batís gírú. Nǎŋnɔ́, ké sé vûn sɛl, a gé kúŋ tûl a Zâŋ.

²⁸Falké, ké regí a tûl a Zâŋ a ɓil kpáŋgbáráŋ, a gí ɓá hí̧ gun a lɔŋɔ́ ráy, dáy ké nyá, a sé ɓá hí̧ mâa a mɛ̌.

²⁹Gelka gunbɔʼɔ a Zâŋ Batísri láɓayké, kú sé mbí hûl a Zâŋ, a sé goro.

³⁰Apotereri regí gel a Zezú, a gí saɓay a hɛ̧ri̧ a kú niŋ too, rá̧ hɛ̧ri̧ a kú tɔ́ʼɔ.

³¹Nǎŋnɔ́ njukuri ka gí a réy, ŋgɛ̧́ mambá dáy Zezú rá̧ gunbɔʼɔri zi ziŋ kaw a sɔ̧́lâʼa yá. Ɓaykénɔ́ pé Zezú sa hí̧ kuriri ɓá: «Í gí kuu mǐ gí falgel ɓay a i ɔʼɔ mûn a wǎyri kpay.»

³²Dáy kú ri ɓil kumbôn kuu Zezú ɓay a sé falgel ɓá ɗínáké

³³Nǎŋnɔ́ njukuri ɓá ŋgɛ̧́náké kó kála a kuriri, a tu ɓá kuriri. Nǎŋnɔ́, kú uru a ɓil pûri ɓórí ɓórí, a ŋgú ka bɔʼɔ, a tí ka̧ ɗambɛl hí̧ Zezú rá̧ gunbɛʼɛri a gelké.

³⁴Gelka Zezú tɛ̧́ a ɓil kumbôn, ké kó njukuri ɓá ŋgɛ̧́náké, a kó kuriri sehaŋ. Ɓayhí̧lé, kú kaw ɓá báŋa hɛ̧hɔ́lari ka zi tí ka njuku koro kuriri yáy, dáy a tí tɔ́ʼɔ kuriri hɛ̧ri̧ ɓá ŋgɛ̧́náké.

³⁵Gelka, sêe fere dáy, gunbɛʼɛri gí gbɛ́ŋɛ́, a sa hí̧ nɛ́ ɓá: «Gel kaw yíra dá, gelé e ka falgel mambá.

³⁶Mɔ́ sa hí̧ njuku nɛ́rí̧, kú resé gun pû rá̧ pû a gbaŋkéri, a kú sé zé hɛ̧lâʼari!»

³⁷Zezú resa hí̧ gunbɛʼɛri ɓá: «Í hí̧ kuriri lâʼa sɔ̧́na wǎyri ka mûn a wǎyri!» Dáy kú vbí Zezú ɓá: «Mɔ zi ɓá rú sé zé lâʼa ka mínya ísɔ́t sére ɓay hí̧ kuriri lé?»

³⁸Dáy Zezú vbí kuriri ɓá: «I erú ka biré daw a̧ní lé? Í sé ɛ̧rɛ̧.» Falké kú sé vbí há̧narí̧ a regí sa hí̧ Zezú ɓá: «Rú erú ka biré ndíɓí rá̧ nzwîy sére.»

³⁹Dáy Zezú sa hí̧ Gunbɛʼɛri ɓá: «Í sa hí̧ njukuri too, kú kaw tûl kpâa ka bonké.»

⁴⁰Dáy njukuri kaw bon a kuriri ísɔ́t, a fékéri bon a kuriri bondíɓí.

⁴¹Zezú nyá biré ndíɓí rá̧ nzwîy sére ráy, a gbaŋ nûn nɛ́ sé nûnalê, a zi awá hí̧ Gáŋvbôn. Falké, ké haw biré, a hí̧ gunbɛʼɛri ɓá kú wal hí̧ njukuri too, rá̧ nzwîy sére ráy kɔ́.

⁴²Njukuri too lâʼa, ɓil a kuriri mbá.

⁴³Gunbɛʼɛri fá̧ gázín ɓuʼura biré, rá̧ nzwîy mbá tol bôo a sére!

⁴⁴Njukuri ka sɔ̧́lâʼaké, bon a wɔ̧rɔ̧́njukuri too kumrá̧ké ndíɓí.

⁴⁵Núnmbɛ̧́nɛ́ a falké, Zezú há gunbɛʼɛri he kumbôn. Ké zi ɓá kú tí sé ɗambɛl hí̧ nɛ́ sé hélkála mbii, a pû a Bɛtsayida. Dáy mɛ̌, ké rekaw ɓay a vbara njukuri kú rekála.

⁴⁶Gelka Zezú sa hí̧ njukuri ɓá kú rekála dáy, ké sé tûl kon, ɓay a sé gɔ́ŋ Gáŋvbôn.

⁴⁷Gelka gel kaw yíra, kumbôn e ka lawgel a fâ̧w, a Zezú e hɛʼɛ a gbaŋ fâ̧w a tísiri.

⁴⁸Ké kó ɓá here kumbôn lá hí̧ gunbɛʼɛri, ɓayhí̧lé kúna kú gí ka ŋgboro mbɛl a kuriri. A tûl gel a pélé rím Zezú séséna a tûl mbii sé gé ɓá gel a kuriri, dáy a niŋ ɓá báŋa ké e tá kuriri.

⁴⁹Ka gunbɛʼɛri kó nɛ́ séséna a tûl mbii, kú kɛrɛ ɓá vbôn dáy a tí vbá̧nzáʼa.

⁵⁰Ɓayhí̧lé kú kó nɛ́ kuriri too, dáy wɔ́w niŋ kuriri. Zezú sa hí̧ kuriri ɓá: «Í ŋgá̧law a wǎyri: Ɓá mǐ, í ŋgú wɔ́w yá!»

⁵¹Dáy ké gí ri a kaw kuu kuriri a ɓil kumbôn, nǎŋnɔ́ kúna regí ew. Gunbɛʼɛri kaw yér, a kó ɓay sána nyá,

⁵²ɓayhí̧lé, kú zi tu hɛ̧ ka tá a ɓil wal biré ka Zezú wal yá, law a kuriri zi ŋgburu sé tûlké yá.

⁵³Zezú rá̧ Gunbɛʼɛri ɔrɔ he mbii, dáy a ka̧ helkála a ŋgboro sá̧ a tísiri a Zenɛ̧zarɛ́t.

⁵⁴A kú ɗere a ɓil kumbôn, njukuri tí tu ɓá gánáké ɓá Zezú.

⁵⁵Dáy njukuri ŋgú a sé saɓayké ma tísiriké too, a fá̧ njuku záŋmári̧ too ka tibôy gí gel ka, kú lá ɓá Zezú erú.

⁵⁶Gelri too ka Zezú tá rúy, a ɓil gáŋ pûri rá̧ gun pûri too, njukuri ɓá njuku záŋmári̧ too gí kɔ̧ ɓara, a gɔ́ŋ Zezú ɓá: «Mɔ́ pɔŋ kuriri, kú ɗa nzáʼa gári a mɔ̌ mbêw yáŋ!» Dáy njuku záŋmári̧ too, ka ɗáy, ziŋ ŋgɛ́rɛ.