Read Capanahua Márke 7 Bible Online

Márke 7 - Capanahua bible

Márke 7

¹Fariziyɛ̧́ri̧, rá̧ gáŋnjuku tɔ́ʼɔ sáŋna a há̧narí̧, a gí ka Zerúzalɛ̂m, mára̧ há̧narí̧ gí kaw ɗɔ́ŋ Zezú.

²Kú ɛ̧rɛ̧ a kó ɓá gunbɔʼɔ Zezú a há̧narí̧, lâʼa hɛ̧ ka ndɔ̂ʼɔ ɗaʼama, zi ɓay sa ɓá táŋ turu ndɔ̂ʼɔ a kuriri ɓá báŋké ka sáŋna a zîiri say.

³Ɓayhí̧lé Fariziyɛ̧́ri̧ rá̧ Juyífri too, tɔ́ŋ sáŋna a zîi a kuriri. Kú zi sɔ̧́lâʼa táŋ turu ndɔ̂ʼɔ a kuriri ɓá béláké yá.

⁴Nǎŋnɔ́, kú mí ré a gel a dawáy, kú turu mûn a kuriri ɓá báŋké ka sáŋna a zîi a kuriri tɔ́ʼɔ rá̧ a sɔ̧́lâʼa. Kú hɛʼɛ sáŋna a fékéri ɓá ŋgɛ̧́náké ka zîi a kuriri tɔ́ʼɔ hí̧ kuriri: ɓá báŋa ŋgboro turu yoŋ rá̧ íri lari rá̧ kpáŋgbáráŋ.

⁵Ɓaykénɔ́ pé Fariziyɛ̧́ri̧ rá̧ njuku tɔ́ʼɔ sáŋnari̧ vbí Zezú ɓá: «Ɓayhí̧rá̧ gunbɔʼɔri zi tɔ́ŋ sáŋna ka zîi a manárí̧ tɔ́ʼɔ yá lé? Ɓayhí̧rá̧ kú sɔ̧́lâʼa ka ndɔ̂ʼɔ ɗaʼama lé?̄»

⁶Zezú fere a sa hí̧ kuriri ɓá: «I kaw ɓá njuku foori, Ezayí, porofɛ́t saɓay sé tûl a wǎyri ɓá táŋáké, ɓá báŋké ka ɗé: “Njuku nɛ́rí̧ ɗél mi ka nzáʼa kuriri baa, law a kuriri ɗí kuu mǐ mambá.

⁷Hɔ̧́na a kú kaw hí̧ mí, zi tí ka nɛ́rɛ̧ nyá, ɓayhí̧lé hɛ̧tɔ́ʼɔ a kú tɔ́ʼɔ, too gí ka ŋgboro a hɛ̧ kɛrɛ a njukuri.”

⁸Zezú resa, i pɔŋ sáŋna a Gáŋvbôn, ɓay a tɔ́ŋ ɓá sáŋna a njukuri ka tɔ́ʼɔ.»

⁹Falké ké resa ɓáy ɓá: «I gamûn a wǎyri a ɓil pɔŋ sáŋna a Gáŋvbôn, ɓay a koro sáŋna a wǎyri.

¹⁰Mɔyíze sa ɓá: “Mɔ́ hɛʼɛ bâa a mɔ̌ rá̧ mâa a mɔ̌”, a resa ɓáy ɓá: “Njuku mi fára bâa a mɛ̌ malé mâa a mɛ̌ lé, kú í nɛ́.”

¹¹Dáy a wǎyri, i tɔ́ʼɔ hí̧ njukuri ɓá, njuku mí sa hí̧ bâa a mɛ̌ malé mâa a mɛ̌ ɓá: “Hɛ̧ ka mi zi ɓay a mi hí̧ wǎyri ɓá Kɔrbáŋ”, zi ɓay sa ɓá: “Hɛ̧hí̧na ka i mɔny ɓay a hí̧ Gáŋvbôn.”

¹²Nǎŋnɔ́, i zi pɔŋ ŋgboro hí̧ nɛ́, ɓay a ké niŋ hɛ̧ hí̧ bâa a mɛ̌ malé mâa a mɛ̌ nyá.

¹³A ɓil niŋ nǎŋnɔ́, i lú sáŋna a Gáŋvbôn gefal, ɓay tûl sáŋna a wǎyri. Dáy, a i niŋ hɛ̧ a fékéri ɓá ŋgɛ̧́náké ɛ́ŋ a nɔ́!»

¹⁴Falké Zezú ɗí njukuri ɓáy, a sa hí̧ kuriri ɓá: «Wǎyri too, í lá ɓil ɓay nɛ́ ɓá táŋáké:

¹⁵Hɛ̧ há̧na mbêw ka uru a kála, ka a ri ɓil a njuku, ka a yírí káwa a mɛ̌y zi tí yá. Dáy, ɓá hɛ̧ ka tɛ̧́ a ɓil a njukuy, pé yírí káwa a njuku. [

¹⁶Í lá ɓá táŋáké, ka wǎyri mí erú a súkú láɓay!»]

¹⁷Gelka Zezú pɔŋ njukuri, ka a kála sé ɓil vûn dáy, gunbɛʼɛri gé vbí nɛ́ táŋa ɓay sé tûl galaɓay nɔ́.

¹⁸Dáy, Zezú sa hí̧ kuriri ɓá: «Wǎyri kɔ́, i zi tí ka hɛ̧túna nyá lé? I tu ɓá hɛ̧ há̧na mbêw ka uru a kála, ka a ri ɓil a njuku, zi ma yírí káwa a mɛ̌ nyá.

¹⁹Ɓayhí̧lé hɛ̧kéri zi ri ɓil law a njuku yá, ɔ ɓá ɓilé, falké retɛ̧ ka mûn nɛ́.» Ka ŋgboro a ɓay nɔ́, Zezú tɔ́ʼɔ ɓá njuku ma sɔ̧́ hɛ̧ri̧ too.

²⁰Dáy Zezú resa ɓáy ɓá: «Hɛ̧ ka tɛ̧́ a ɓil a njuku gí kálay, ɓá a nɔ́ pé yírí káwa a njuku.

²¹Ɓayhí̧lé, ɓá a ɓil law a njuku, pé kɛrɛ ɓay a belyákéri tɛ̧́ pé a ɓá njuku niŋ dala, ɓá njuku ríw, ɓá njuku í hûl,

²²ɓá njuku mbí dala, ɓá law ka̧n tûl hɛ̧ a njuku, law ŋgbɔ́rɔ, law rɔ́ʼɔhɛ̧, káwa táŋ ŋgboroké, niŋ sɛ́rɛ, niŋ kira, hɔ̧́tûl rá̧ law dɔ̂ʼɔ.

²³Ɓékéhɛ̧ nɔ́rí̧ too, tɛ̧́ a ɓil law a njuku, dáy a yírí káwa a mɛ̌y.»

²⁴Falké, Zezú uru a kála a gelké, sé tísiri a Tîr. Ké sé ri ɓil vûn a há̧na, a zi ɓá njuku ké zi ná tu ɓá ké e a goló. Dáy ké zi ma kaw ɓá múnáké yá.

²⁵Katína lé, wûny a há̧na, ka gun a mɛ̌ erú ka têm ɓéké, lá kú saɓay a Zezú, dáy a gí, a gí lé mbɛlɛ́.

²⁶Wûnyké nɔ́ ɓá wûny girɛ́k, kú mbuŋ nɛ́ a Fenisí ka tísiri a Sírí. Ké gí vú hí̧ Zezú, ɓá ké ní têm ɓéké ka mûn a gun a mɛ̌.

²⁷Dáy Zezú sa hí̧ nɛ́ ɓá: «Mɔ́ pɔŋ gun a léléri kú sɔ̧́lâʼa a mbá rá̧ ɓáy. Ɓayhí̧lé zi belɓá kú mbí lâʼa a gun a léléri, a ɓá vbú hí̧ gun vâari yá.»

²⁸Dáy wûny ráy resa hí̧ nɛ́: «Katína Gáŋmbây, gun vâari ná bɔʼɔ tay a sɔ̧́ ɓuʼura biré a gun a léléri ka to kɔ̧ tísiri.»

²⁹Nǎŋnɔ́ Zezú sa hí̧ nɛ́: «Ɓay tûl rerú ka ɓay nɔ́, mɔ́ resé goló: têm ɓéké tɛ̧́ ka mûn a gun a mɔ̌ dá.»

³⁰Gelka ké resé gé léy, ké gé ziŋ gun a mɛ̌ ná tûl gasáʼa, têm ɓéké tɛ̧́ ka mûn nɛ́ dá.

³¹Falké Zezú tɛ̧́ a tísiri a Tîr, a tá ka ŋgboro a tísiri a Sidɔ̂ŋ, rá̧ tísiri ka pûri erú bôo, a regí ŋgboro a fâ̧w a Galilê.

³²Kú mbí njuku a há̧na, ka súkú zi tí yá, ka zi tí ka ŋgɛ́rɛ saɓay yáy, gí gé lé, a vú hí̧ nɛ́ ɓá ké ɓá ndɔ̂ʼɔ kɔ̧ tûlé!

³³Dáy, Zezú ɗa njuku ráy hɛʼɛ tɛ̧́ ɓá ɗínáké a ɓil a njukuri; a gé ɓá gun ndɔ̂ʼɛri ri ɓil súkú a njuku ráy, a ɓá sâ̧m ndísɛlɛ́ ɗa ndísɛl a njuku ráy.

³⁴Falké, Zezú gbaŋ nûn nɛ́ sé sâa, a mára̧ nyína a nyí, a sa: «Éfata!» Zi ɓay a sa ɓá: «Mɔ́ ŋgburu!»

³⁵Núnmbɛ̧́nɛ́, súkú a njuku ráy ŋgburu, ndísɛlɛ́ sɛl, dáy ké tí saɓay ɓá béláké.

³⁶Falké, Zezú vbara kuriri too ɓá kú zi ná saɓayké hí̧ njuku a há̧na! Dáy, gelka Zezú vbara kuriri ɓá kú zi ná saɓaykéy, kú saɓayké ma gel too gé ɓá mbɛl.

³⁷Dáy njukuri kó hɛ̧ké ka tá ŋgɛ́rɛ a kuriri, a kaw yér, a sa ɓá: «Hɛ̧ too a ké niŋ bel mambá. Ké niŋ njuku súkú tí yári láɓay, rá̧ ŋgbôŋri̧ saɓay!»