Read Capanahua Márke 8 Bible Online

Márke 8 - Capanahua bible

Márke 8

¹Sêeké nɔ́, njukuri ɓá ŋgɛ̧́náké mára̧ ɓáy, dáy a zi tí ka lâʼa há̧na mbêw yá. Zezú ɗí gunbɛʼɛri a sa hí̧ kuriri ɓá:

²«Njuku nɛ́rí̧ sehaŋ hí̧ mí mambá, ɓayhí̧lé kú niŋ nâm sáy kuu mǐ, dáy a zi tí ka lâʼa sɔ̧́na a há̧na mbêw yá.

³Mǐ, mí sa hí̧ kuriri ɓá kú rekála sé pû kuriri táŋ lâʼa hɛ̧y, kú zi tí ka ŋgɛ́rɛ séséna ka ŋgboro yá, ɓayhí̧lé njuku a há̧narí̧ a bazeŋ a kuriri uru ɗí mambá.»

⁴Gunbɛʼɛri sa: «A gel a sí̧, ná e ziŋ lâʼa, ɓay kú lâʼa ɓil a kuriri ké mbá ka lawkɔ́r nɛ́ lé?»

⁵Dáy Zezú vbí kuriri ɓá: «Biré daw a̧ní, i erú lé?» Gunbɛʼɛri sa: «Zíndɔ̂ʼɔsáy.»

⁶Dáy Zezú sa hí̧ njukuri, ɓá kú kaw siri. Gelka ké fá̧ biré zíndɔ̂ʼɔsáy ráy, ké zi awá hí̧ Gáŋvbôn, a haw ɓilké, a ɓá hí̧ gunbɛʼɛri ɓá kú wal, dáy gunbɛʼɛri wal hí̧ njukuri.

⁷Kú erú ka gun nzwîy tɛ̧́w ɓáy kɔ́. Zezú zi awá hí̧ Gáŋvbôn kɔ̧ tûlké dáy, a ɓá hí̧ gunbɛʼɛri ɓá kú wal nzwîyké hí̧ kuriri kɔ́.

⁸Njukuri laʼa, ɓil a kuriri mbá. Gunbɔʼɔ a Zezúri fá̧ gázínáké mbá tol zíndɔ̂ʼɔsáy.

⁹Dáy ŋgɛ̧́na a njukukéri a goló tá kumrá̧ké nɛŋ! Falké Zezú gí pɔŋ kuriri kála.

¹⁰Ké rehe kumbôn núnmbɛ̧́nɛ́ nɔ́ kuu Gunbɛʼɛri, a kála sé tísiri a Dalmanúta.

¹¹Fariziyɛ̧́ri̧ gí, a tí manyɓay kuu Zezú. Kú zi ɓá kú hol daw hí̧ nɛ́, dáy a vbí nɛ́ ɓá: «Mɔ́ niŋ hɛ̧sáʼama a há̧na, ka tɔ́ʼɔ ɓá mɔ gí a gel a Gáŋvbôn, a rú kó!»

¹²Zezú mára̧ nyína a ɓil lawɛ́ ka nyí a sa: «Ɓayhí̧ njuku nɛ́rí̧ vbí kó hɛ̧sáʼama lé? Mi sa gbátɓay hí̧ wǎyri: Njuku a ŋgɛŋnɛ́ nɛ́rí̧, tí kó hɛ̧sáʼama a há̧na mbêw yá.»

¹³Falké, Zezú uru sé he kumbôn a kála sé ŋgboro a helkála mbii.

¹⁴Gunbɔʼɔ a Zezúri yɛʼɛrɛ fa̧ biré gírú, ɔ ɓá biré mbêw yáŋ a kú mbí ka̧n ɓil kumbôn kuu kuriri.

¹⁵Dáy Zezú sa hí̧ kuriri ɓá: «Í kó rá̧, í koro tûl a wǎyri ɓá béláké kuu haw a Fariziyɛ̧́ri̧ rá̧ a haw a mbây Herod!»

¹⁶Dáy, Gunbɛʼɛri kaw many há̧narí̧ a bazeŋ a kuriri a sa, ké sa nǎŋ ɓay hɛ̧ ka ná zi tí ka biré yá lé.

¹⁷Zezú tu kɛrɛ a kuriri dáy, a vbí kuriri ɓá: «Ɓayhí̧, i sa a bazeŋ a wǎyri ɓá í zi tí ka biré yáy lé? I zi lá ɓil ɓayké yá, a zi tu ɓilké yá ɓáy lé? Hɛ̧túna a wǎyri, zi ŋgburu yá lé?

¹⁸I erú ka nûn, dáy, a zi kó gel yá lé? I erú ka súkú, dáy, a zi láɓay yá lé? I zi kɛrɛ hɛ̧ nyá lé?

¹⁹A mi wal biré ndíɓí hí̧ njukuri kumrá̧ké ndíɓí, i mára̧ gázínákéri mbá tol daw a̧ní lé?» Kú zi a sa: «Bôo a sére.»

²⁰Zezú revbí kuriri ɓáy ɓá: «Gelka mi wal biré zíndɔ̂ʼɔsáy hí̧ njukuri kumrá̧ké nɛŋ, i fá̧ gázínáké mbá tol daw a̧ní lé?» Kú zi a sa: «Zíndɔ̂ʼɔsáy.»

²¹Dáy Zezú sa hí̧ kuriri ɓá: «A nɔ́ too, i zi lá ɓilké yá ɓáy lé?»

²²Zezú rá̧ gunbɛʼɛri ka̧ Bɛtsayida, a goló njukuri ɓá râ̧w a há̧na gí hí̧ nɛ́, a kú vú hí̧ nɛ́ ɓá ké ɗa nɛ́.

²³Zezú gí ŋgbá ndɔ̂ʼɔ a râ̧w, a ɗa nɛ́ sé fal pû. Falké, ké sa̧sâ̧m a ɓá ɗa nûn a râ̧w, dáy a ɓá ndɔ̂ʼɔ kɔ̧ tûlé, a vbí nɛ́ ɓá: «Mɔ kó hɛ̧ a há̧na lé?»

²⁴Râ̧w ɛ̧rɛ̧ gel a sa: «Mi kó njukuri, dáy mi kó kuriri ɓá báŋa dii a kaw séséna.»

²⁵Zezú reɓá ndɔ̂ʼɔ kɔ̧ nûn a râ̧w ɓá a féké ɓáy, dáy, râ̧w ɛ̧rɛ̧ gel ɓá táŋáké; Ké ziŋ ŋgɛ́rɛ, a kó hɛ̧ri̧ mbêw mbêw too ɓá táŋáké.

²⁶Dáy Zezú sa ké kála sé pû mɛ̌, a sa: «Mɔ́ zi ná ri tálá a ɓil pû.»

²⁷A falké Zezú rá̧ Gunbɛʼɛri kála sé ŋgboro a pûri ka ná dɛ́ŋ ka Sezaré a Filípí. A tûl ŋgboro, ké vbí Gunbɛʼɛri ɓá: «A̧hí̧, njukuri kaw sa sé tûl ní lé?»

²⁸Gunbɛʼɛri sa ɓá: «Njuku a há̧narí̧ sa: Mɔ ɓá Zâŋ Batís. Njuku a fékéri sa: Mɔ ɓá Eli. Njuku a fékéri ɓáy sa: Mɔ ɓá mbêw a bazeŋ a porofɛ́t.»

²⁹Zezú revbí kuriri a sa: «Dáy, a wǎyri wá, mi ɓá gé lé?̄» Píyɛ́r sa hí̧ nɛ́ ɓá: «Mɔ̌, mɔ ɓá Kiris[4].»

³⁰Dáy Zezú sa hí̧ kuriri, a vbara kuriri ɓá béláké ɓá: «Í zi ná saɓay a mǐ hí̧ njuku a há̧na mbêw!»

³¹Falké, Zezú tí tɔ́ʼɔhɛ̧ hí̧ Gunbɛʼɛri a sa: «Belɓá Gun a njuku ké tɔ́ʼɔsêe ɓá ŋgɛ̧́náké. Gáŋnjukuri, rá̧ gáŋnjuku a nzáʼaká̧nari̧, rá̧ njuku tɔ́ʼɔ sáŋnari̧ kɔ́ e sáŋ nɛ́. Kú e í nɛ́, dáy nâm sáy a falké, ké e toma a hûl.»

³²Ké saɓayké hí̧ kuriri ɓá táŋáké. Dáy Píyɛ́r ɗa Zezú sé falgel, a kaw nzáʼa kuu mɛ̌.

³³Dáy, Zezú fere a ɛ̧rɛ̧ gunbɛʼɛri, ka nzáʼa ziŋ Píyɛ́r, a sa hí̧ nɛ́ ɓá: «Mɔ́ sé ɓá ɗínáké a gbaŋ ní, Sata̧n! Ɓayhí̧lé kɛrɛ a mɔ̌, zi tí ɓá kɛrɛ a Gáŋvbôn nyá, ɓá kɛrɛ a njukuri!»

³⁴Falké, Zezú ɗí njukuri rá̧ gunbɛʼɛri, a sa hí̧ kuriri: «Njuku mí zi ɓay a tɔ́ŋ mí lé, ké pɔŋ kɛrɛ ɓay a tûlé. Ké hol dii vbatay a mɛ̌, a ké tɔ́ŋ mí.

³⁵Ɓayhí̧lé, njuku ka zi ɓay a pɛ̧́ ndísɛ̌ʼɛ a mɛ̌, e ɓɔ́l ndísɛ̌ʼɛ a mɛ̌, a njuku, ka ɓɔ́l ndísɛ̌ʼɛ a mɛ̌, ɓay a mǐ rá̧ ɓay tûl Bélaɓay, e pɛ̧́ ndísɛ̌ʼɛ a mɛ̌.

³⁶A̧hí̧ e nɛ́rɛ̧ njuku, a ké mí ziŋ hɛ̧zíŋa a tísiri too, rá̧, a mí ɓɔ́l ndísɛ̌ʼɛ a mɛ̌ lé?

³⁷A̧hí̧ njuku e púnáké ma gel a ndísɛ̌ʼɛ a mɛ̌ lé?

³⁸Njuku mí niŋ sɔ̧rɔ̧ a mǐ rá̧ a niŋ sɔ̧rɔ̧ a ɓay a mǐ a bazeŋ a njuku nɛ́rí̧, ka zi niŋ law mbêw yá, ka a kpútûl ziŋ Gáŋvbôn, mǐ, Gun a njuku, mi e niŋ sɔ̧rɔ̧ a mɛ̌ kɔ́ ka sêeké, ka mi e regí a ɓil hɔ̧́na a Bâa a mǐ, kuu aŋnze a táŋákéri.»