Read Capanahua Márke 9 Bible Online

Márke 9 - Capanahua bible

Márke 9

¹Zezú sa hí̧ kuriri ɓáy ɓá: «Mi sa hí̧ wǎyri, gbátɓay: Njuku a há̧narí̧ a bazeŋ a wǎyri a gelé, tí hûl táŋ kó káwa Mbây a Gáŋvbôn ka e gí ka kpɔ́ŋa nyá.»

²Nâm zêe a falké, Zezú ɗa Píyɛ́r kuu Ják rá̧ Zâŋ. Ké ɗa kuriri sé tûl kon ɓá gáŋáké a falgel, kuriri hɛʼɛ a kuriri. A goló, mûn a Zezú gé fere a nûn a kuriri.

³Gári a mɛ̌ fe, fénáké nɔ́ njuku a há̧na a tísiri nɛ́ ma turu hɛ̧ pukí, a fé ɓá báŋké nɔ́ nyá.

⁴Núnmbɛ̧́nɛ́ nɔ́, gunbɛʼɛri sáy ráy kó Eli rá̧ Mɔyíze kaw fɔ́ŋ sa̧a kuu Zezú.

⁵Dáy, Píyɛ́r sa hí̧ Zezú ɓá: «Gáŋnjuku, bel mambá ɓá ná kaw gelé. Rú e zá gbáʼari[5] sáy, mbêw ɓá ɓála a mɔ̌, mbêw ɓá ɓála a Mɔyíze, rá̧ mbêw ɓá a Eli.»

⁶Katína lé, Píyɛ́r sa nǎŋnɔ́, a zi tu ɓay ka ké kaw sanáké yá. Ɓayhí̧lé mɛ̌ kuu njuku séna a mɛ̌ri̧ too, wɔ́w ŋgbá kuriri.

⁷Mbúsany a há̧na ɗere, a gí guku kuriri. Kɔ́ŋ a há̧na gbé a ɓilké a sa: «Gun nɛ́, ɓá gun a mǐ ka mi zi nɛ́ mambá. Í lá nɛ́!»

⁸Núnmbɛ̧́nɛ́ nɔ́, gunbɔʼɔ a Zezúri ɛ̧rɛ̧ gel ɗɔ́ŋ kuriri, dáy, a zi kó njuku mbêw mbaa, ɔ ɓá Zezú hɛʼɛ pé e kuu kuriri.

⁹Gelka kú kaw ɗere a tûl kon, Zezú sa hí̧ kuriri a vbara kuriri ɓá: «Í zi ná sa hɛ̧ ka i kó hí̧ njuku a há̧na mbêw, sé ka̧ sêe ka Gun a njuku e toma a bazeŋ a hûlri.»

¹⁰Kú ŋgbá ɓayké ka̧n law a kuriri, dáy a revbí há̧narí̧ a sa: «A̧hí̧ zi ɓay a sa ɓá “toma a bazeŋ a hûlri lé?”»

¹¹Falké, kú vbí Zezú ɓá: «Ɓayhí̧rá̧ njuku tɔ́ʼɔ sáŋnari̧ sa ɓá: “Eli e regí rá̧ ɓáy lé?”»

¹²Dáy Zezú sa hí̧ kuriri: «Katína lé, Eli e regí rá̧ ɓáy, ɓay gí mɔny hɛ̧ri̧ ka̧n ka ŋgboroké. Dáy, ɓayhí̧rá̧ kú ɗé a ɓil Mbété kɔ́ ɓá Gun a njuku e tɔ́ʼɔsêe mambá, njukuri e yáw nɛ́ lé?

¹³A mǐ, mi sa hí̧ wǎyri: Eli gí dá, dáy njukuri niŋ nɛ́ ɓá báŋké a kú ziy, ɓá báŋké ka Mbété saɓay sé tûlé.»

¹⁴Gelka kú ka̧ gbaŋa a gárá gunbɔʼɔ a ǎ̧wrí̧, kú kó njukuri ɓá ŋgɛ̧́náké, kaw ɗɔ́ŋ kuriri, rá̧ gáŋnjuku tɔ́ʼɔ sáŋnari̧ ka kaw manyɓay kuu kuriri.

¹⁵Gelka njukuri kó Zezú dáy, kú kaw yér a kú ŋgú sé ɓay a sé nam nɛ́.

¹⁶Dáy Zezú vbí gunbɛʼɛri ɓá: «I many há̧narí̧ kuu kuriri sé tûl hí̧ lé?»

¹⁷Njuku a há̧na a bazeŋ a njukuri sa hí̧ Zezú ɓá: «Gáŋnjuku, mi ɓá gun a mǐ gí goló, ɓayhí̧lé têm ɓéké e ka mûn nɛ́ dáy, a de nɛ́ saɓay.

¹⁸Têm ɓékéké, kaw dɔʼɔlɔ nɛ́ a gel too a ké erú, dalé, mbí nɛ́ a ɓá nɛ́ vbú siri, nzɛ́ʼɛ furu, ké sɔ̧́ sîlé, mûn nɛ́ hɔʼɔ. Dáy, mi vbí gunbɔʼɔri ɓá kú ní têm ɓékéké, nǎŋnɔ́, kú zi marú̧ nyá.»

¹⁹Zezú sa hí̧ kuriri: «Njuku tí ka láɓulaw yári! Nâm daw a̧ní, mi e kaw kuu wǎyri ɓáy lé? Nâm daw a̧ní, mi ikilaw ní hí̧ wǎyri ɓáy lé? Í ɗa gun nɔ́ hí̧ mí!»

²⁰Dáy kú ɗa gun gí hí̧ nɛ́. Gelka ké kó Zezú, núnmbɛ̧́nɛ́ têm ɓéké víw gun ka ŋgɛ́rɛ vbú siri, a ɓá nɛ́ gíŋna siri, nzɛ́ʼɛ furu.

²¹Dáy Zezú vbí bâa gun ɓá: «Tí ka sêe sí̧ rá̧ hɛ̧ké tí niŋ nɛ́ lé?» Bâa gun sa: «Tí ka gun a lélé a mɛ̌.

²²Bɔʼɔké ɓá ŋgɛ̧́náké, têm ɓéké sɔʼɔrɔ nɛ́, lé hɔrɛ nyá lé, vbú mbii ɓay a í nɛ́. Dáy, mɔ̌ mí ma niŋ hɛ̧ há̧na lé, mɔ́ kósêe a ɓurú, a mɔ́ hí̧ndɔ̂ʼɔ hí̧ rú!»

²³Dáy Zezú resa hí̧ nɛ́ ɓá: «Mɔ́ sa ɓá: mɔ̌ mí marú̧. Dáy, ŋgboro erú too hí̧ njuku ka láɓulaw!»

²⁴Núnmbɛ̧́nɛ́ bâa gun vbá̧nzáʼa a sa: «Mi láɓulaw, dáy mɔ́ hí̧ndɔ̂ʼɔ hí̧ mí, ɓayhí̧lé láɓulaw a mǐ zi ŋgɛ̧́ nyá!»

²⁵Zezú kó njukuri ɓá ŋgɛ̧́náké ka mára̧ gí dáy, a pom têm ɓéké a sa hí̧ nɛ́ ɓá: «Têm ɓéké ka de njuku saɓay rá̧ láɓay: mi sa, mɔ́ tɛ̧́ ka mûn a gun nɛ́, a mɔ́ zi ná regí ɓáy!»

²⁶Dáy têm ɓéké vbá̧nzáʼa, a víw nɛ́ ka ŋgɛ́rɛ a tɛ̧́ ka mûn a gun. Gun lé vbú siri, a ná ɓá báŋa hûl, njukuri too sa ɓá: «Ké hú dá.»

²⁷Dáy, Zezú ŋgbá ndɔ̂ʼɛ, a uru nɛ́, dáy ké uru ew sâa.

²⁸Gelka Zezú resé ri vûn, ka gunbɛʼɛri sé kaw hɛʼɛ kuriri kuu mɛ̌y, kú vbí nɛ́ ɓá: «Ɓayhí̧rá̧, rú zi ma ní têm ɓéké nɔ́ nyá lé?»

²⁹Dáy Zezú resa hí̧ kuriri ɓá: «Ka ŋgboro gɔ́ŋ Gáŋvbôn mbêw yáŋ pé njuku ma ní mára̧ têm ɓéké nɔ́rí̧.»

³⁰Kú kála a goló, a tá ɓil pû Galilê. Dáy Zezú zi ɓá njukuri kú tu gel a ké erú yá.

³¹Katína, Zezú tɔ́ʼɔhɛ̧ hí̧ gunbɛʼɛri ɓá: «Gun a njuku, kú e ɓá nɛ́ ka̧n ɓil ndɔ̂ʼɔ a njukuri. Nǎŋnɔ́, kú e í nɛ́, dáy nâm sáy a falké lé, ké e toma a hûl.»

³²Dáy Gunbɛʼɛri zi lá ɓil ɓay ka ké sa hí̧ kuriri yá, a ŋgú wɔ́w vbí nɛ́ ɓayri.

³³Kú ka̧ Kapɛrnahûm. Gelka kú e a ɓil vûn, Zezú vbí Gunbɛʼɛri ɓá: «Ɓayhí̧ i kaw many há̧narí̧ ka ŋgboro lé?»

³⁴Dáy, gunbɛʼɛri kaw ták, a saɓay yá. Ɓayhí̧lé ka ŋgboro, kú kaw many há̧narí̧ ɓá, a gé ɓá gáŋnjuku a bazeŋ a kuriri lé?

³⁵Dáy Zezú kaw siri, a ɗí gunbɛʼɛri bôo a sére, a sa hí̧ kuriri ɓá: «Njuku mí zi ɓay a kaw ɓá njuku a tûlké lé, ké kaw kɔ́rɔ́fal, a ké kaw ɓá Koypéna a njukuri too.»

³⁶Ké ɗa gun a lélé, a ɓá nɛ́ ew bazeŋ a kuriri, a mbí nɛ́, a sí̧ŋ nɛ́ ka̧n lawɛ́ dáy, a sa hí̧ gunbɛʼɛri:

³⁷«Njuku, mí nyá gun a lélé ɓá báŋa gun nɛ́, ké nyá mí ka mûn ní. Ka njuku ka nyá mí, zi tí ɓá mǐ pé ké nyá mbêw yáŋ nyá, ké nyá njuku ka pé mí gíy kɔ́.»

³⁸Zâŋ sa hí̧ Zezú ɓá: «Gáŋnjuku, rú kó njuku a há̧na, kaw ní têm ɓéké a rɛŋɔ́. Rú zi ɓay a de nɛ́ niŋáké, ɓayhí̧lé, ké zi tí kuu manárí̧ nyá.»

³⁹Dáy Zezú sa hí̧ nɛ́ ɓá: «Í de nɛ́ niŋáké yá, ɓayhí̧lé, njuku a há̧na, zi ma niŋ hɛ̧ a yérké ka rɛŋ ní, a falké, a ɓew ɓay a mǐ nyá.

⁴⁰Ɓayhí̧lé, njuku ka zi tí ɓá njuku ŋgá̧na a manárí̧ nyáy, ɓá njuku a manárí̧.

⁴¹Njuku, mí hí̧ wǎyri mbii nzóna, yoŋ mbêw ɓay ka i kaw ɓá njuku a Kiris, mi sa hí̧ wǎyri gbátɓay: ké e ziŋ kpáʼandɔ̂ʼɔké.»

⁴²«Njuku a há̧na, mí ɓá gun mbêw a bazeŋ a gun láɓulaw a mǐri̧, lé ɓil ɓékéhɛ̧ lé, belɓá kú ŋgá̧ ŋgburu saw ka̧n solé, a kú sɔʼɔrɔ nɛ́ vbú mbii lúkí.

⁴³Mí ɓá ndɔ̂ʼɔ, pé ɓá mɔ lé ɓil ɓékéhɛ̧ lé, mɔ́ kúŋ ndɔ̂ʼɔké. Ɓayhí̧lé, bel ndé hí̧ mɔ́, ɓá mɔ́ ziŋ káwa a ndísɛ̌ʼɛ ka ndɔ̂ʼɔ mbêw yáŋ, ka tûl a erú ka ndɔ̂ʼɔ sére too, a kú ɓá mɔ́ vbú ɓil Zehɛ̂n,[6] hɔrɛ ka tí hú bɔʼɔ mbêw yáy,

⁴⁴[A goló, kay lâʼa hûlri zi hú bɔʼɔ mbêw yá, rá̧ hɔrɛ zi hú bɔʼɔ mbêw yáy.]

⁴⁵Mí ɓá bɔʼɔ, pé ɓá mɔ́ lé ɓil ɓékéhɛ̧ lé, mɔ́ kúŋ bɔʼɔké. Ɓayhí̧lé, bel ndé hí̧ mɔ ɓá, mɔ́ ziŋ káwa a ndísɛ̌ʼɛ ka bɔʼɔ mbêw, ka tûl a erú ka bɔʼɔ sére too, a kú ɓá mɔ́ vbú ɓil Zehɛ̂n. [

⁴⁶A goló, kay lâʼa hûlri zi hú bɔʼɔ mbêw yá rá̧ hɔrɛ zi hú bɔʼɔ mbêw yáy.]

⁴⁷Nǎŋnɔ́ kɔ́, nûn nɔ́, pé ɓá mɔ́ lé ɓil ɓékéhɛ̧ lé, mɔ́ lú nûnké vbú kpâa. Ɓayhí̧lé, bel ndé hí̧ mɔ́, ɓá mɔ́ ri ɓil Pû a Gáŋvbôn ka nûn mbêw yáŋ, ka tûl a erú ka nûn sére too, a kú ɓá mɔ́ vbú ɓil Zehɛ̂n.

⁴⁸Gelka kay lâʼa hûlri zi hú bɔʼɔ mbêw yá rá̧ hɔrɛ zi hú bɔʼɔ mbêw yáy.

⁴⁹Ɓayhí̧lé, hɔrɛ e sálá njuku a sí̧ too ɓá báŋa tom.

⁵⁰Tom ɓá béla hɛ̧ dáy, núŋáké, mí tɛ̧́ dáy, a̧hí̧ kú e niŋáké ɓay a ké renúŋ ɓá féké ɓáy lé? Í erú ka tom ka mûn a wǎyri, a i kaw káwa a vóna a bazeŋ a wǎyri.»