Read Capanahua Luk 13 Bible Online

Luk 13 - Capanahua bible

Luk 13

¹A ɓil nâmké nɔ́, njuku a há̧narí̧, gí kaw sa hí̧ Zezú, hɛ̧ ka Pilát niŋ, ka a í njuku pû Galilêri ka kaw niŋ hɛ̧púna hí̧ Gáŋvbôn.»

²Zezú lá, a vbí kuriri ɓá: «Í kɛrɛ ɓá njuku Galilê nɔ́rí̧ ka ziŋ hûl nǎŋ, kú kaw ɓá ɓéké njukuri ndé njuku a tísiri a Galilêri too lé?

³Mi sa hí̧ wǎyri tí nǎŋ nyá. Dáy i tu ɓá, í zi fere bɔʼɔséna a wǎyri nyá lé, i e ziŋ hûl too ɓá báŋa kuriri kɔ́.

⁴Dáy, i kɛrɛ njukuri bôo a zíndɔ̂ʼɔsére nɔ́rí̧, ka gáŋ vûn Silowé lé kɔ̧ tûl a kuriri, ka í kuriri, kú kaw ɓá ɓéké njukuri ndé njuku a tísiri a Zerúzalɛ̂mri̧ too lé?

⁵Mi sa hí̧ wǎyri tí nǎŋ nyá, dáy i tu ɓá í zi fere bɔʼɔséna a wǎyri nyá lé, i e ziŋ hûl ɓá báŋa kuriri kɔ́.»

⁶Falké, Zezú sa galaɓay nɛ́ hí̧ kuriri ɓá: «Njuku a há̧na rú dii njɔ̧̂ny ka̧n ɓil wâʼa ví̧nyɛ a mɛ̌. Ké gí ɓay a gí ɗɔrɔ léna njɔ̧̂nyké lé, ké ziŋ lénáké yá.

⁷Dáy, a ké sa hí̧ njukupéna a mɛ̌ ɓá: Mɔ́ kó! Mbimbɔ̂m sáy dá, pé mi gí ɓay a ɗɔrɔ léna njɔ̧̂ny nɛ́ lé, mi zi ziŋ lénáké yá. Mɔ́ kúŋ diiké gefal, ɓayhí̧lé nɛ́rɛ̧ a mɛ̌ zi tí yá, ké de gel ɓǎŋ baa!

⁸Njukupéna a mɛ̌, sa hí̧ nɛ́ ɓá: Gáŋnjuku, í pɔŋ ka mbimbɔ̂m nɛ́ ɓáy. “Mi e ɗáŋ lɔ̂ʼɔ kí ɗɔ́ŋ rú̧, a fere tom hɛ̧pay kɔ̧rú̧,

⁹há̧na mbimbɔ̂m a féké, ké e léna lé, rá̧ ké mí zi lé yáy, a goló, í kúŋ nɛ́ gefal.”»

¹⁰Sêe ɔʼɔ, Zezú kaw tɔ́ʼɔhɛ̧ a ɓil vûn gɔ́ŋ Gáŋvbôn.

¹¹Wûny záŋmá a há̧na e ka goló, niŋ mbimbɔ̂m bôo a zíndɔ̂ʼɔsére dá, pé têm ɓéké ri nɛ́ a hí̧ nɛ́ kpɛrɛ, dáy, ké séséna a ɗiɗiŋa, a zi ziŋ ŋgboro séséna ɓá ndáráké yá.

¹²Gelka, ké kó wûny nɔ́, ké ɗí nɛ́ a sa ɓá: «Mɔ ziŋ ŋgɛ́rɛ ka záŋmá a mɔ̌ dá.»

¹³Ké sa nǎŋnɔ́ a ɓá ndɔ̂ʼɛ kɔ̧ tûlé, dáy núnmbɛ̧́nɛ́ nɔ́, ké gí ziŋ ŋgɛ́rɛ a uru ew sâa ɓá ndáráké a tí hɔ̧́ Gáŋvbôn!

¹⁴Gáŋnjuku a vûn mára̧ a Juyífri kó, a ɗí hɛ́rɛ ɓay ka Zezú niŋ njuku ŋgɛ́rɛ a sêe ɔʼɔy. Dáy a sa hí̧ njukuri ɓá, i erú ka nâm zêe ka ɓá nâm niŋ péna, i ɓá záŋmá a wǎyri gí a ɓil nâmké nɔ́ ɓay a kú ŋgɛ́rɛ wǎyri, a zi tí ɓá ka sêe ɔʼɔ yá!

¹⁵Dáy Gáŋmbây sa hí̧ nɛ́: Njuku foori, a gel a wǎyri, sêe ɔʼɔ lé, i zi sɛ́l nday malé máhóla a wǎyri, a ɓá kuriri sé nzó mbii yá lé?

¹⁶Dáy a wûny nɛ́, ka ɓá sɛl î̧n a Abaraham, ka Sata̧n ŋgá̧ nɛ́ niŋ mbimbɔ̂m bôo a zíndɔ̂ʼɔsére dá, zi belɓá kú sɛl nɛ́ ka sénɛ́ ka ɓá nâm ɔʼɔ, ka tûl sɛlké nyá lé?

¹⁷Rerú ɓay a Zezú hí̧ sɔ̧rɔ̧ hí̧ njuku ŋgá̧na a mɛ̌ri̧ too, dáy dawá njukuri too, kaw ri mûn a kuriri ɓay tûl hɛ̧sáʼama ka Zezú niŋ a bazeŋ a kuriri.

¹⁸Falké Zezú sa ɓá: «A̧hí̧, ná e ɓá lé Pû Mbây a Gáŋvbôn lé? A̧hí̧, mi e ɓá lé rúy lé?

¹⁹Ké ná ɓá báŋa tɛ̧́rɛ̧́ dii mutárde, ka njuku mbí mbêw, ka sé rú ka̧n ɓil wâʼa a mɛ̌y. Ké tɛ̧́, a hɔ̧́, a tɛ̧́ gáŋ dii, ndoyri gí, a gí zá vûn a kuriri ka̧n tûl pâmndɔ̂ʼɔké.»

²⁰Zezú resa ɓáy ɓá: A̧hí̧, mi e ɓá lé Pû Mbây a Gáŋvbôn ɓáy lé?

²¹Ké ɛ́ŋ sôm haw ka wûny a há̧na, fá̧ ka zuʼura ka sôm ɓá ŋgɛ̧́náké, ka sômké uru ka héw mbá hɛ̧!

²²Zezú uru ɓáy a mbí ŋgboro, ɓay a sé Zerúzalɛ̂m, a tá lá gun pûri rá̧ gáŋ pûri, a kaw tɔ́ʼɔhɛ̧ hí̧ njukuri.

²³Ka̧ gel a há̧na lé, njuku a há̧na, gí vbí Zezú ɓá: Gáŋmbây, lé ɓá njukuri tɛ̧́w yáŋ, pé Gáŋvbôn e pɛ̧́ kuriri lé? Zezú resa hí̧ kuriri ɓá:

²⁴Í ɛ́ ŋgboro ri ɓá ka nzáʼaŋgboro a ayáké, mi sa hí̧ wǎyri, njukuri ɓá ŋgɛ̧́náké, e ɛ́ ŋgboro ri lá rú, dáy a tí ziŋ ŋgboroké yá.

²⁵Sêe ka njuku vûn e uru ka tu nzáʼaŋgboro ka̧nrú̧y, wǎyri ka e a kála, i tí haŋ nzáʼaŋgboro a sa: Gáŋmbây, mɔ́ ŋgburu nzáʼaŋgboro hí̧ rú! Dáy, ké e sa hí̧ wǎyri ɓá: Gína a wǎyri a sí̧ lé? Mi zi tu wǎyri yá!

²⁶Dáy, i sa hí̧ nɛ́ ɓá: Rú lâʼa, a nzó kuu mɔ̌ mbêw, mɔ há̧ra̧ ŋgboro a ɓil pû a ɓurú, a tɔ́ʼɔhɛ̧ hí̧ njukuri dát.

²⁷Dáy, ké e resa hí̧ wǎyri ɓá: Gína wǎyri a sí̧ lé? Mi zi tu wǎyri yá! I tá ɓá ɗínáké ka nzáʼaŋgboro a mǐ, wǎyri too ka kaw ɓá njuku niŋ ɓékéhɛ̧ri̧!

²⁸A goló, pé vúna, rá̧ sɔ̧́ sîl erúy, gelka i e kó Abaraham rá̧ Izák rá̧ Zakob kuu porofɛ́tri too, a ɓil Pû a Gáŋvbôn, ka wǎyri, kú pɔŋ wǎyri kɔ̧ kálay!

²⁹A sêeké, njukuri e uru a ŋgboro a tɛ̧́na sêe rá̧ ríŋa sêe, rá̧ ŋgboro a mbóra rá̧ ŋgboro a zabaw. Kú e mára̧ gí kaw nzáʼa lâʼa, a ɓil Pû a Gáŋvbôn.

³⁰A goló, i tu ɓá, njuku a há̧narí̧ ka ɗambɛl a ŋgɛŋnɛ́y, retɛ̧ njuku a kɔ́rɔ́kéri, a njuku a há̧narí̧, ka kaw ɓá njuku a kɔ́rɔ́kéri a ŋgɛŋnɛ́y, retɛ̧ njuku ɗambɛlri.

³¹Zezú kaw saɓay ɓáy, lé Fariziyɛ̧́ a há̧narí̧, gí sa hí̧ nɛ́ ɓá: Mɔ́ kála ɓá ɗínáké a gelé! Ɓayhí̧lé mbây Herod, kaw ɛ́ ŋgboro í mɔ́.

³²Zezú fere a sa hí̧ kuriri ɓá: Í sé sa hí̧ gáʼan nɔ́ ɓá, mi kaw ní têm ɓéké a ŋgɛ́rɛ njukuri, ka sénɛ́, tí pélé, a nâm a sáyké rá̧ mi e ɔrɔ péna a mǐ.

³³Dáy, belɓá mi uru ka séséna ka sénɛ́, ka sé a tí pélé rá̧ pélé a sá̧. Ɓayhí̧lé zi belɓá porofɛ́t ké ziŋ hûl ka falgel, ka zi tí ɓá pû a Zerúzalɛ̂m nyáy yá.

³⁴A falké Zezú sa: Njuku Zerúzalɛ̂mri̧! Njuku Zerúzalɛ̂mri̧! Wǎyri ka í ɓá porofɛ́tri, ka vbú njukuri ka Gáŋvbôn pé kuriri gí goló ka saw, ka í kuriri! Bɔʼɔké daw a̧ní rá̧ mi ɛ́ ŋgboro mára̧ gun a mɔ̌ri̧, ɓá báŋa mákáʼa, ka mára̧ gun a mɛ̌ri̧ kɔ̧ bɔʼɔ pɔ́rɔ nɛ́, dáy, i zi yá.

³⁵Nǎŋnɔ́ í lá! Gáŋvbôn e sáŋ vûn a wǎyri. Mi sa hí̧ wǎyri, i tí kó mí mbaa, ka̧ sêe ka i e sanakéri ɓá: Gáŋvbôn ké ɗí béla kɔ̧ tûl a njuku ka gí ka rɛŋ a Gáŋmbây!