Read Capanahua Luk 14 Bible Online

Luk 14 - Capanahua bible

Luk 14

¹Sêe a há̧na, ɓá sêe ɔʼɔ a Juyífri, dáy Zezú sé pû a mbây a Fariziyɛ̧́ a há̧na, ɓay sé lâʼa hɛ̧. Njukuri ka e a gelké, kaw ka ɓɛʼɛ nɛ́.

²Njuku záŋmá mûn mbára a há̧na ew a mbɛlɛ́.

³Zezú mbí ɓay a vbí njuku tɔ́ʼɔ sáŋnari̧ rá̧ Fariziyɛ̧́ri̧ ɓá: Sáŋna a manárí̧ zi ɓá kú ŋgɛ́rɛ njuku záŋmá ka sêe ɔʼɔ malé, tí nǎŋ nyá lé?

⁴Dáy, kú kaw yím a zi saɓay yá. Nǎŋnɔ́, Zezú ndara ndɔ̂ʼɛ, a ɗa njuku záŋmá ráy, dáy a lú záŋmá ka mûn nɛ́, a sa hí̧ nɛ́ ɓá ké kála.

⁵Falké, ké vbí kuriri a sa: Njuku a sí̧ a bazeŋ a wǎyri, gun a mɛ̌, malé nday a mɛ̌ lé lɔ̂ʼɔ lé, ké zi sé tenáké ka sêe ɔʼɔ yáy lé?

⁶Dáy kú zi rerú ka vbí ɓayké yá.

⁷Falké, Zezú kó njukuri a kú ɗí kuriri gí a kaw ŋgbá gelkáwa a bélákéri, dáy a sa galaɓay ɓá:

⁸«Sêe a há̧na, njuku mí ɗí mɔ́, sé gel nyá wûny, ɓay sé sɔ̧́lâʼa lé, mɔ́ zi ná sé kaw tûl gelkáwa a mbɛl. Ɓayhí̧lé njuku a há̧na ka ndé mɔ́ ka hɔ̧́na, ké zi ná gí ka fal,

⁹ka njuku ka ɗí wǎyri, ké zi ná gí sa hí̧ mɔ́ ɓá: Mɔ́ uru a pɔŋ gelkáwa hí̧ gáŋnjuku nɛ́. A goló e ná ɓá sɔ̧rɔ̧ hí̧ mɔ́, ɓay a mɔ́ uru a resé kaw gelkáwa ka fal.

¹⁰Dáy belɓá kú mí ɗí mɔ́ sé gel sɔ̧́lâʼa a há̧na lé, mɔ́ sé kaw tûl gelkáwa ka fal rá̧ njuku ka ɗí mɔ́y, mí gí sa hí̧ mɔ́ ɓá: Mbáŋa a mǐ, mɔ́ uru gí kaw tûl gelkáwa a mbɛl, e ná ɓá hɛ̧ hɛʼɛ mambá hí̧ mɔ́ ka nûn a njukuri too, a kú ɗí wǎyri gí sɔ̧́lâʼa mbêw.

¹¹Ɓaykénɔ́, njuku ka hɔ̧́tûlé, Gáŋvbôn e ɗere nɛ́, a njuku ka pɔ tûlé, Gáŋvbôn e gbaŋ nɛ́ sé sâa.»

¹²Falké, Zezú resa hí̧ njuku ka ɗí kuriri gí ɓá: Sêe a há̧na, mɔ̌ mí zi ɓay ɗí njukuri ɓay a kú gí goló gí sɔ̧́lâʼa, ka tí pélé malé ka bɔʼɔlêw lé, mɔ́ ɗí mbáŋa a mɔ̌ri̧ nyá, malé nyîn nɔ́rí̧ malé njuku a ɓil a î̧n a mɔ̌ri̧ malé njuku hɛ̧zíŋári̧ ka gbaŋ vûn a mɔ̌ri̧ nyá, ɓayhí̧lé, kú zi ná ɗí mɔ́ ka sêe a há̧na kuriri kɔ́, a kú reniŋ hí̧ mɔ̌ ɓá báŋké nɔ́ ka mɔ niŋ hí̧ kuriri.

¹³Dáy, mɔ̌ mí zi ɓay a ɗí njukuri ɓay a kú gí sɔ̧́lâʼa a sêe záymûn a há̧na a goló lé, mɔ́ ɗí njuku fóyári, njuku kpɛrɛri, njuku bɔʼɔ belyári rá̧ râ̧wri̧.

¹⁴Nǎŋnɔ́, mɔ e ka law sáʼa, ɓay a kú zi ma rerú ka hɛ̧ ka mɔ niŋ hí̧ kuriri nyá, ɓayhí̧lé béláké, Gáŋvbôn e rerú hí̧ mɔ́ ka sêe a ké e toma njuku a ndárákéri ka hûl.

¹⁵Fal láɓay nɔ́, njuku mbêw a bazeŋ a njukuri ka e a nzáʼa lâʼa kuu Zezú, sa hí̧ nɛ́ ɓá: Béla hí̧ njuku ka e ziŋ sɔ̧́lâʼa a ɓil Pû a Gáŋvbôn.

¹⁶Zezú rerú ka galaɓay hí̧ nɛ́ ɓá: «Njuku a há̧na kara lâʼa ɓá ŋgɛ̧́náké, dáy a ɗí njukuri ɓá ŋgɛ̧́náké ɓá kú gí sɔ̧́lâʼa a gé lé.

¹⁷Gelka lâʼari ná ɗɛ́ŋ dáy, ké pé njukupéna a mɛ̌, ɓá kú sé ɗí njuku rá̧yrí̧ ɓá lâʼa ná ɗɛ́ŋ dá.

¹⁸Dáy kuriri mbêw mbêw too, kú tí ŋgú há̧ra̧ hí̧ njukupéna, ɓayhí̧lé kú zi ɓay a gína nyá. Dáy titíla njuku sa ɓá: Mi zé wâʼa dáy, a zi ɓay a sé kónáké, mɔ́ sa hí̧ nɛ́ ɓá, mi tí ziŋ ŋgboro géna nyá:

¹⁹Njuku a séreké sa ɓáy ɓá: Mi zé nday pay ndíɓí dáy, a zi ɓay a sé lé kuriri, mɔ gé sa hí̧ nɛ́ ɓá, kɔʼɔrɔyá mi tí ziŋ ŋgboro géna nyá:

²⁰Njuku a sáyké ɓáy, resa ɓá: Mi nyá wûny a ŋgɛŋnɛ́, kɔʼɔrɔyá mi tí ziŋ ŋgboro géna nyá.

²¹Njukupéna ráy rekála, a sé sa nzáʼa péna too hí̧ bákáwa a mɛ̌, gelka bákáwa a mɛ̌ láɓayké, ké ɗí hɛ́rɛ, a sa hí̧ nɛ́ ɓá: Mɔ́ sé ɓá gánáké sé laɓára rá̧ tûl ŋgborori a ɓil pû, a mɔ́ ɗí njuku fóyári, njuku kpɛrɛri, râ̧wri̧, rá̧ njuku bɔʼɔ belyári, kú gí kuu mɔ̌.

²²Falké kpay lé, ké regí a sa: Bákáwa, mi sé ɗí njuku nɔ́rí̧ too gí dáy, gelkáwa rézi erú ɓáy:

²³Bákáwa resa hí̧ nɛ́ ɓá: Mɔ́ sé ŋgboro wâʼari rá̧ ɓil kâ̧wpûri, njukuri too ka mɔ ziŋ, mɔ́ ɗá kuriri gí ɓá gánáké, gí mbá ɓil vûn a mǐ.

²⁴Nǎŋnɔ́, mi sa hí̧ mɔ́ katína, njuku a há̧na mbêw a ɓil a njukuri ka mi tí ɗí kuriri, zi ma gí sɔ̧́lâʼa a mǐ nɛ́ nyá!»

²⁵Sêe a há̧na, Zezú kaw séséna, dáy njukuri ɓá ŋgɛ̧́náké tɔ́ŋ nɛ́, ké kí a sa hí̧ kuriri ɓá:

²⁶«Njuku mí zi ɓay a tɔ́ŋ mí lé, ké zi mí tá bâa a mɛ̌, rá̧ mâa a mɛ̌, tá wûny mɛ̌ rá̧ gun a mɛ̌ri̧, ké zi mi tá nyîn nɛ́rí̧, a ké zi mi tá hay mûn nɛ́. Tí nǎŋ nyá lé, ké zi ma kaw ɓá gunbɔʼɔ ní nyá.

²⁷A njuku, mí zi hol dii vbatay a mɛ̌ ka mûn nɛ́, a mí zi tɔ́ŋ mí nyáy, zi ma kaw ɓá gunbɔʼɔ ní nyá.

²⁸Njuku a sí̧ a bazeŋ a wǎyri, ka zi ɓay a mbó gáŋ vûn, a zi kaw, a kɛrɛ hɛ̧ a ké e zénáké rá̧ lari a ké erú, a kó lariké ma mbó vûnké, malé tí maná nyá léy?

²⁹Ɓay ké zi ná mbó ɓá ndal vûnké, a zi tí ka lari ka ma ɔrɔ mbó gáŋ vûnké yá, dáy njukuri too ka e kónáké, kú zi ná sáʼa nɛ́,

³⁰a sa ɓá: “Í kó, njuku nɛ́ tí mbó vûn, a zi ɔrɔ vûnké yá!”

³¹Malé mbây pû a sí̧, ka zi ɓay a sé rúbére kuu mbây pû a féké, tí kaw a kɛrɛ ɓá, ka ŋgawbére a mɛ̌ri̧ kumrá̧ké bôo, ma sé rúbére kuu mbây pû a féké, ka e gí rúbére kuu mɛ̌ ka ŋgawbéreri kumrá̧ké bôo a sére lé?

³²Ké mí kó zi manyáy, ké tí pé njuku nzáʼapéna ɓá gánáké sé ziŋ mbây pû a ǎ̧w, ka e a ŋgboro ɓá ɗínáké ɓáy, ɓay a ŋgú há̧ra̧ hí̧ nɛ́, a ké tɔ́ʼɔ hɛ̧ volawɛ́, a kú láhá̧narí̧ yá lé.

³³Nǎŋ dáy, njuku a sí̧ lé too a bazeŋ a wǎyri, mí zi pɔŋ hɛ̧zíŋa a mɛ̌ri̧ too yáy, zi ma kaw ɓá gunbɔʼɔ ní nyá.»

³⁴«Tom ɓá béla hɛ̧, dáy núŋáké mí tɛ̧́ dáy, A̧hí̧ kú e niŋáké rú ɓáy, a ké renúŋ lé?

³⁵Ké zi tí ka nɛ́rɛ̧ ɓay a tísiri malé ɓay tom hɛ̧pay mbaa, ɓá kú fere nɛ́ kɔ̧ kpâa. Í lá, a njuku mí erú a súkú lánáké lé, ké lá!»