Read Capanahua Luk 15 Bible Online

Luk 15 - Capanahua bible

Luk 15

¹Njuku mára̧ lari lambô a Rɔmɛri̧ rá̧ ɓéké njukuri kɔ́, mára̧ gí gbaŋa a Zezú gí lá nɛ́.

²Dáy Fariziyɛ̧́ri̧ kuu njuku tɔ́ʼɔ sáŋnari̧ kaw ŋgɔ̧rɔ̧ a bazeŋ a kuriri a sa: «Njuku nɛ́, kaw ɓá kuu njukuri ka bɔʼɔséna a kuriri zi belyá, a sɔ̧́lâʼa kuu kuriri mbêw!»

³Dáy, Zezú sa galaɓay hí̧ kuriri ɓá:

⁴«Njuku a há̧na mbêw a bazeŋ a wǎyri erú ka mbólé ísɔ́t, dáy mbêw ɓɔ́l a ɓilké, a̧hí̧ ké e niŋáké lé, ké tí pɔŋ mbólé a bonzíndɔ̂ʼɔmbêw a zíndɔ̂ʼɔmbêwkéri kɔ̧ ɓil kpâa, ɓay a sé ɛ́ mbólé a mbêwké nɔ́ a ziŋ nyá lé?»

⁵Gelka ké mí gé ziŋ mbólékéy, ké e mbá ka mûnrína, a gé mbí mbóléké vbú tûl báŋsólé,

⁶a rekála sé pû mɛ̌, a gé ɗí mbáŋa a mɛ̌ri̧ rá̧ njuku gbaŋ vûn a mɛ̌ri̧, a sa hí̧ kuriri ɓá: Í gí rí mûn a wǎyri kuu mǐ, ɓayhí̧lé mbólé a mǐ rá̧y ka ɓɔ́l, mí ziŋ nɛ́ dá!

⁷Ɓá báŋa nɔ́, mi sa hí̧ wǎyri, mûnrína e ná mambá a nûnalê, ɓay tûl a njuku ɓéké mbêw, ka fere káwa a mɛ̌, tá njuku a fékéri ka bonzíndɔ̂ʼɔmbêw a zíndɔ̂ʼɔmbêw ka kó ɓá kú kaw ɓá njuku a ndárákéri, ka zi ɓay a ɛ́ ŋgboro fere káwa a kuriri yáy.

⁸«Malé, wûnynjuku a há̧na erú ka mínya bôo, rá̧ mínya mbêw a ɓilké mí ɓɔ́l, ké tí ɓá hɔrɛ ka̧n lámbe, ka táʼa ɓil vûn, ka ɛ́ záŋ záŋ, ka ziŋ rá̧ ka ɔʼɔ mûn nɛ́ nyá lé?

⁹Rá̧ gelka ké mí gé ziŋ dáy, ké e ɗí wûny mbáŋa a mɛ̌ri̧ rá̧ wûny gbaŋ vûn a mɛ̌ri̧, a sa hí̧ kuriri ɓá: Í gí rí mûn a wǎyri kuu mǐ, ɓayhí̧lé mi ziŋ mínya a mǐ rá̧y ka ɓɔ́l dá!

¹⁰Nǎŋnɔ́, mi sa hí̧ wǎyri, aŋnze a Gáŋvbônri̧ e kaw ka mûnrína, ɓay tûl a njuku ɓéké mbêw, ka fere káwa a mɛ̌.»

¹¹Zezú sa galaɓay a féké ɓáy a sa: Njuku a há̧na e ka gun wɔ̧rɔ̧́njukuri sére.

¹²Gun a lelké sa hí̧ bâa a mɛ̌: «Bâa, mɔ́ sé lú a ɓil hɛ̧zíŋa a manárí̧, ɓala a mǐ hí̧ mí.» Nǎŋnɔ́ dáy, bâa a mɛ̌ sé wal hɛ̧zíŋáké hí̧ kuriri sére.

¹³Nâm kpay a falké, gun a lelké ráy fa̧ hɛ̧zíŋa a mɛ̌ri̧ too, a zé, a fá̧ lariké a kála sé ŋgboro a tísiri a féké ɓá ɗínáké. A sá̧, ké gé rí ɓil niŋ dala rá̧ nzó vôn, a ɓew lari a mɛ̌ too.

¹⁴Falké a ké ɓew lari ráy too dáy, nzala gí ŋgbá tísiriké, hɛ̧lâʼa mbêw zi tí hí̧ nɛ́ mbaa.

¹⁵Ké zi tu hɛ̧ niŋa mbaa, dáy a uru a sé ɛ́ péna a gel a njuku a há̧na ka tísiriké nɔ́. Njukuké, gé pé nɛ́ sé koro kɔsɔri a ɓil wâʼa a mɛ̌.

¹⁶Ké zi ɓay a ké ziŋ lâʼa a kɔsɔri[6]a ké lâʼa, dáy njuku hí̧ nɛ́ zi tí nyá.

¹⁷Nǎŋnɔ́, ké kaw a kɛrɛ káwa a mɛ̌ a sa: Njukupéna a bâa a mǐri̧, kaw sɔ̧́lâʼa ɓá báŋké a kú ziy, lé mǐ, mi kaw hú ka nzala a gelé!

¹⁸Mi uru a rekála sé gel a bâa a mǐ, a gé sa hí̧ nɛ́ ɓá: Bâa, mi niŋ ɓéké ziŋ Gáŋvbôn, a niŋ ɓéké ziŋ mɔ́,

¹⁹nǎŋnɔ́, mi zi ma ɓay a mɔ́ kó mí ɓá báŋa gun a mɔ̌ mbaa. Mɔ́ mbí mí ɓá báŋa njukupéna a mɔ̌ mbêw.

²⁰Dáy a uru, a rekála sé gel a bâa a mɛ̌. Gelka ké pa̧n ɓá ɗínáké ka pû a bâa a mɛ̌ ɓáy, lé bâa a mɛ̌ mbí nûn a kó nɛ́ sehaŋ, a uru, a ŋgú sé sí̧ŋ nɛ́ ka̧n lawɛ́.

²¹Dáy ké sa hí̧ bâa a mɛ̌ ɓá: Bâa, mi niŋ ɓéké ziŋ Gáŋvbôn, a niŋ ɓéké ziŋ mɔ́, mí zi ma ɓay a mɔ́ kó mí ɓá báŋa gun a mɔ̌ mbaa:

²²Dáy, bâa a mɛ̌ sa hí̧ njukupéna a mɛ̌ri̧: Í sé ɓá gánáké sé ɛ́ béla gári gí ri nɛ́, a í ɓá ndɛrɛ gí ka̧n ndɔ̂ʼɛ, a í ɓá sabɔʼɔ kɔ̧ bɛʼɛ.

²³Í sé ŋgbá gun nday ka mbára ɓá béláké gí, a í vbé, ka ná lâʼa, a ná záy,

²⁴ɓayhí̧lé gun nɛ́ mǐ hú, pé a toma, ké ɓɔ́l, pé mi rezíŋ nɛ́. A goló kú tí rí mûn a kuriri.

²⁵«Sêeké nɔ́, gáŋnjuku gun sé wâʼa, gelka ké regí ka̧ gbaŋ pûy, ké lá si̧ŋ rá̧ nday ka lɔŋ.

²⁶Ké ɗí njukupéna a bâa a mɛ̌ mbêw, a vbí nɛ́, a̧hí̧ tá ka pû lé?

²⁷Dáy, ké sa hí̧ nɛ́ ɓá: Nyîn nɔ́ pé regí, dáy bâa a mɔ̌, í nday a nɔ́ ka mbara bel mambáy, ɓay ka ké rezíŋ gun a mɛ̌ a ŋgɛ́rɛ ɓá bélákéy.

²⁸Dáy gáŋnjuku gun gí ɗí hɛ́rɛ, a zi ri ɓil pû yá. Bâa a mɛ̌ tɛ̧́ gí ɔl nɛ́, ɓá ké ri ɓil pû.

²⁹Dáy ké sa hí̧ bâa a mɛ̌ ɓá: Bâa, mbimbɔ̂m daw a̧ní rá̧ mi kaw niŋ péna hí̧ mɔ́, a zi many nzáʼa bɔʼɔké mbêw yá, mɔ zi hí̧ mí gun hwálá a há̧na mbêw ɓay a mí í, a rí mûn ní kuu gun mbáŋa a mǐri̧ yá.

³⁰Dáy ɓay tûl a gun a mɔ̌, ka fá̧ hɛ̧zíŋa a mɔ̌, ka a sé ɓew kuu wûnynjukuri, ɓay a mɛ̌ lé, mɔ́ sé í gun nday ka ná mbé ɓá béláké hí̧ nɛ́!

³¹Bâa a mɛ̌ sa hí̧ nɛ́: Gun a mǐ, mɔ e dát kuu mǐ, hɛ̧zíŋa ka mi erú tooy, ɓá ɓála a mɔ̌.

³²Dáy, belɓá ná lâʼa a ná záy, ɓayhí̧lé nyîn nɔ́ nɛ́, ké hú pé a toma, ké ɓɔ́l, pé mi rezíŋ nɛ́!»