Read Capanahua Luk 16 Bible Online

Luk 16 - Capanahua bible

Luk 16

¹Zezú sa hí̧ gunbɛʼɛri: Njuku hɛ̧zíŋa a há̧na erú ka njukupéna a mɛ̌, ka kaw koro hɛ̧zíŋa a mɛ̌ri̧ tooy. Sêe a há̧na lé, kú gí sa hí̧ nɛ́ ɓá njukupéna a mɔ̌ nɔ́, kaw ɓew hɛ̧zíŋa a mɔ̌.

²Dáy bákáwa a mɛ̌ ɗí nɛ́, a vbí nɛ́ ɓá: A̧hí̧ mi lá kú sa sé tóló lé? Mɔ́ fá̧ hɛ̧zíŋa a mǐ too a mi ɓá kɔ̧ ɓil ndɔ̂ʼɔ gí tɔ́ʼɔ mí, ɓayhí̧lé ŋgɛŋnɛ́, mɔ́ tí kaw ɓá njuku koro hɛ̧zíŋa a mǐ mbaa.

³Njukupéna ŋgbá tûlé a sa: Bákáwa a mǐ e ten mí ka péna a ŋgɛŋnɛ́ dá, a̧hí̧, mi e niŋáké lé? Mi zi tí ka ŋgɛ́rɛ ɓay a niŋ péna wâʼa nyá, gɔ́ŋ hɛ̧ a gel a njuku, ná ɓá sɔ̧rɔ̧ hí̧ mí.

⁴Dáy a sa: Aa! Mi tu hɛ̧ ka mi e niŋáké dá! Mǐ, mi ɓɔ́l gelkáwa a mǐ rá̧ kɔ́, njukuri tí de mi sé gel a kuriri yá!

⁵Ké ɗí njukuri mbêw mbêw too ka bákáwa a mɛ̌ kaw tɔ́ŋ kuriri hɛ̧, a sa hí̧ titíla njuku ɓá: bákáwa a mǐ tɔ́ŋ mɔ́ hɛ̧ daw a̧ní lé?

⁶Ké sa: íri mára̧ ísɔ́t mbêw, njukupéna rá̧y sa hí̧ nɛ́ ɓá: Mɔ́ nyá mbété ka mɔ́ ɗéy, a mɔ́ reɗé ɓá gánáké ɓá íri mára̧ bondíɓí.

⁷Ké resa hí̧ njuku a séreké: A mɔ̌ hɛ̧ daw a̧ní, bákáwa a mǐ kaw tɔ́ŋ mɔ́ lé? Ké sa: Ŋgú náŋ ísɔ́t mbêw. Mɔ́ nyá mbété ka mɔ́ ɗéy, a mɔ́ reɗé ɓá gánáké ɓá, ŋguu náŋ bonzíndɔ̂ʼɔsére.

⁸Falké, bákáwa a mɛ̌, ɗél njukupéna a manyáké sé tûl law ána a mɛ̌. Katína, njuku a tísiri erú ka law ána, a ɓil mɔny hɛ̧ a bazeŋ a kuriri ndé njukuri ka ɓá law a kuriri hí̧ Gáŋvbôn.

⁹Zezú ɔrɔ ɓay a mɛ̌ a sa: I ŋgbá mbáŋa ka ɓéké hɛ̧zíŋa a tísiri nɛ́, rá̧ sé ka hɛ̧zíŋáké mi zi tí mbaa lé, Gáŋvbôn, ké nyá wǎyri a ɓil Pû mɛ̌, ɓay a i ziŋ káwa a mɛ̌ dát.

¹⁰Njuku ka koro gunhɛ̧ ɓá béláké, e koro hɛ̧ a hɔ̧́náké kɔ́, ɓá béláké. A njuku ka ma koro gunhɛ̧ ɓá béláké yáy, ma koro hɛ̧ a hɔ̧́náké kɔ́ ɓá béláké yá.

¹¹Rá̧ wǎyri, mí zi ma koro ɓéké hɛ̧zíŋa a tísiri nɛ́ nyáy, a gé e hí̧ wǎyri hɛ̧zíŋa a béláké ɓay a í koro lé?

¹²Gelka wǎyri mí zi tí ka wɔ́w koro hɛ̧zíŋa a njuku yáy, a gé e hí̧ wǎyri hɛ̧zíŋa ka ɓá ɓala a wǎyri lé?

¹³Njukupéna a há̧na, zi ma niŋ péna hí̧ bákáwari sére yá: Ké e fɔny njuku mbêw a zi njuku mbêw, malé ké e hɛʼɛ njuku mbêw, a yáw njuku mbêw. I zi ma tɔ́ŋ Gáŋvbôn, ka tɔ́ŋ lari kɔ́ yá.

¹⁴Njuku Fariziyɛ̧́ri̧ láɓay ka Zezú sáy, a sáʼa nɛ́, ɓayhí̧lé kú zi ɓay a lari mambá.

¹⁵Dáy Zezú sa hí̧ kuriri ɓá: «I kaw ɓá njukuri ka zi ɓay a tɔ́ʼɔ mûn a kuriri ka nûn a njukuri ɓá kú kaw ɓá njuku a ndárákéri. Dáy Gáŋvbôn tu ɓil law a wǎyri too, hɛ̧ ka njukuri kó ɓá hɛ̧ a hɔ̧́náké ka nûn kuriri, a mbɛl a Gáŋvbôn, ná ɓá hɛ̧ sɔ̧rɔ̧.

¹⁶Gelka Zâŋ pa̧n gí yá ɓáy, njukuri kaw tɔ́ŋ sáŋna a Mɔyíze rá̧ ɓay a porofɛ́tri, sé ka̧ sêe ka Zâŋ Batís gíy. Tí a sêeké nɔ́, kú tí tɔ́ʼɔ Bélaɓay a káwa Mbây a Pû a Gáŋvbôn hí̧ njukuri. Dáy njuku a sí̧ lé too, ɛ́ ŋgboro ka ŋgɛ́rɛ ɓay a ri ɓil pûké.

¹⁷Dáy ná ɗɛ́ŋ ɓay a nûnalê rá̧ tísiri ké tá, a zi ná ɗɛ́ŋ ɓay a gun tɛ̧́rɛ̧́ɓay a sáŋna mbêw, ké lú gefal yá.

¹⁸Njuku too ka ní wûny a mɛ̌, ka renyá wûny a féké niŋ dala. A njuku, ka nyá wûny a njuku a ké níy, niŋ dala kɔ́.»

¹⁹Falké, Zezú sa galaɓay ɓá: «Njuku hɛ̧zíŋa a há̧na erú, ké ri ɓá béla gári ka ɓá gári lari, sêe too, ké e a ɓil béla, ka sɔ̧́ ɓá béla lâʼa.

²⁰Njukusêe a há̧na rɛŋɛ́ ɓá Lazár erú, mûn nɛ́ too ná ɓá nɔʼɔ, ké gí ná nzáʼaŋgboro a njuku hɛ̧zíŋa nɔ́.

²¹Ké kaw zoko, há̧na njuku hɛ̧zíŋa mí laʼa hɛ̧ a pɔŋ rá̧ kú mí fere gázínáké lé, ké ma fá̧, a lâʼa, dáy vâari gí, a sálá nûn nɔʼɔ a mɛ̌.

²²Lazár njukusêe ráy gí ziŋ hûl, aŋnzeri gí mbí nɛ́, a ɓá nɛ́ sé gbaŋa a Abaraham. Njuku hɛ̧zíŋa kɔ́ gí ziŋ hûl, kú mbí nɛ́, a goro nɛ́.

²³Njuku hɛ̧zíŋa gé tɔ́ʼɔsêe mambá a pû a hûlri, ké mbí nûn nɛ́, a kó Abaraham rá̧ Lazár a kaw ka gbɛ́ŋɛ́, ɓá ɗínáké.

²⁴Dáy a vbá̧nzáʼa a sa: “Abaraham bâa a mǐ, mɔ́ kósêe a mǐ, a mɔ́ pé Lazár ké ɓá gun ndɔ̂ʼɛ doŋ mbii, a gí ɗoko ka̧n nzáʼa ní, ɓayhí̧lé mi tɔ́ʼɔsêe mambá a ɓil hɔrɛ a gelé.”

²⁵Dáy, Abaraham resa hí̧ nɛ́: “Gun a mǐ, mɔ́ kɛrɛ. Mɔ̌, mɔ́ ziŋ béla mambá a ɓil káwa a mɔ̌ ka tísiri, a Lazár, mɛ̌, ké e a ɓil tɔ́ʼɔsêe. Dáy a ŋgɛŋnɛ́, Lazár e a ɓil béla káwa, a mɔ̌, mɔ e a ɓil tɔ́ʼɔsêe.

²⁶A féké ɓáy, mɔ́ kó, gáŋ ŋgêŋ e a bazeŋ a manárí̧, njuku ma uru a gelé, a sé sá̧ malé uru a sá̧, a gí gelé yá.”

²⁷Njuku hɛ̧zíŋa sa hí̧ nɛ́: “Bâa a mǐ, mi vú hí̧ mɔ́, mí ɓá nǎŋ lé, mɔ́ pé Lazár, ké sé pû a bâa a ɓurú,

²⁸ɓayhí̧lé, mi erú ka nyîn nírí̧ ndíɓí, mi zi ɓá Lazár, ké sé vbara kuriri, ɓay a kú zi ná gí gel tɔ́ʼɔsêe nɛ́ kɔ́.”

²⁹Abaraham resa hí̧ nɛ́ ɓá: “Nyîn nɔ́rí̧ erú ka sáŋna a Mɔyíze rá̧ mbété a porofɛ́tri, ɓay a nzɛ́rɛ kuriri, kú lá kuriri!”

³⁰Njuku hɛ̧zíŋa sa ɓá: “Zi ma nyá bâa a mǐ Abaraham, dáy njuku zi toma a bazeŋ a hûlri, a sé saɓay hí̧ kuriri yá lé, kú zi ma fere káwa kuriri yá.”

³¹Dáy Abaraham sa hí̧ nɛ́: “Kú mí tɔ́ŋ sáŋna a Mɔyíze rá̧ mbété a porofɛ́tri yáy, njuku toma a bazeŋ a hûlri a gé saɓay hí̧ kuriri rá̧ kɔ́, kú zi ma lá nɛ́ bɔʼɔ mbêw yá.”»