Read Capanahua Luk 18 Bible Online

Luk 18 - Capanahua bible

Luk 18

¹Zezú sa galaɓay hí̧ gunbɛʼɛri, ɓay a tɔ́ʼɔ hí̧ kuriri ɓá, belɓá kú gɔ́ŋ Gáŋvbôn dát, a kú zi ná ta̧.

²Ké sa: «Njuku walɓay a há̧na erú a ɓil pû a há̧na, ka zi tí ka wɔ́w a Gáŋvbôn ka nûn nɛ́ nyá, ké kó njukuri too ka nûn nɛ́ ɓá hɛ̧ a baaké.

³Dáy wûnysêe a há̧na erú a ɓil pûké nɔ́ kɔ́, ké gí dát gí gé lé, a sa hí̧ nɛ́ ɓá: Mɔ́ walɓay ka e a bazeŋ a mǐ kuu njuku ŋgá̧na a mǐ!

⁴Dad lé, wûny rá̧y gí dɔʼɔlɔ nɛ́, dáy ké zi yá, a rékaw a kɛrɛ a sa: Katína, mi zi tí ka wɔ́w a Gáŋvbôn ka nûn ní nyá, ka kó njukuri too ka nûn ní ɓá hɛ̧ baaké,

⁵dáy wûny nɛ́ dɔʼɔlɔ mí mambá dá, mi e walɓay a mɛ̌ hí̧ nɛ́, a ké ma pɔŋ gí kí tûl ní dát.»

⁶Falké, Gáŋmbây fere a sa hí̧ kuriri ɓá: «Í láɓay nɔ́ ka njuku walɓay a manyáké nɔ́ say ɓá béláké!

⁷E niŋ a̧ní rá̧ Gáŋvbôn tí niŋ béla ɓá gánáké hí̧ gun a mɛ̌ri̧, ka vú hí̧ nɛ́ sû̧ŋ ka sêe yá lé?

⁸Mi sa hí̧ wǎyri: ké e walɓayké ɓá ndáráké ɓá gánáké hí̧ kuriri. Dáy, a sêe ka Gun a njuku e regíy, ké e gí ziŋ láɓulaw ka tísiri nɛ́ lé?»

⁹Zezú sa galaɓay sé tûl a njukuri, ka kó mûn a kuriri ɓá kú kaw ɓá njuku a ndárákéri ka nûn a Gáŋvbôn, ka a yáw njuku a fékéri:

¹⁰Dáy a sa: «Njukuri sére, sé ɓil vûn a Gáŋvbôn ɓay a sé gɔ́ŋ Gáŋvbôn, titíla njuku ɓá Fariziyɛ̧́, a séreké, ɓá njuku mára̧ lari lambôri.

¹¹Fariziyɛ̧́ uru ew sâa a gɔ́ŋ Gáŋvbôn a ɓil lawɛ́, a sa: Bâa, Gáŋvbôn, mi zi awá hí̧ mɔ́, ɓay hɛ̧ ka mi zi kaw ɓá báŋa gárá njukuri ka ɓá ríwari, njuku a belyákéri, njuku niŋ dalari yá. Mi zi awá hí̧ mɔ́ kɔ́, ɓay hɛ̧ ka mi zi kaw ɓá báŋa njuku mára̧ lari lambô nɛ́ nyáy.

¹²Mi kaw sáŋhɛ̧ nâm sére a ɓil nâm zíndɔ̂ʼɔsáy too, mi kaw lú tûl hɛ̧zíŋa a mǐ too hí̧ mɔ́.

¹³A njuku mára̧ lari lambô, mɛ̌, ké sé kaw kát ɓá ɗínáké, a ɗíŋ nûn nɛ́, a ɓá ndɔ̂ʼɛ kɔ̧ lawɛ́, a sa: Bâa, Gáŋvbôn, mɔ́ kósêe a mǐ, ɓayhí̧lé mi kaw ɓá njuku niŋ ɓékéhɛ̧.

¹⁴Zezú ɔrɔ ɓay a sa: Mi sa hí̧ wǎyri, njuku mára̧ lari lambô nɔ́, ké e rekála sé pû mɛ̌, ka law a táŋáké kuu Gáŋvbôn. Dáy a tí ɓá Fariziyɛ̧́. Ɓayhí̧lé, njuku ka hɔ̧́tûlé, Gáŋvbôn e ɗere nɛ́ sé taa, a njuku ka pɔ tûlé, Gáŋvbôn e gbaŋ nɛ́ sé sâa.»

¹⁵Njuku a há̧narí̧ ɓá gun a léléri kɔ́ gí gel a Zezú ɓay a ké ɓá ndɔ̂ʼɔ kɔ̧ tûl a kuriri, dáy gunbɛʼɛri kó nǎŋnɔ́ a ní kuriri.

¹⁶Dáy, Zezú ɗí kuriri a sa: «Í pɔŋ gun a léléri kú gí gel ní, a í zi ná de kuriri. Ɓayhí̧lé Pû Mbây a Gáŋvbôn, ɓá ɓála njukuri ka kaw ɓá báŋa kuriri.

¹⁷Mi sa hí̧ wǎyri gbátɓay: Njuku too ka zi nyá ɓay a Pû Mbây a Gáŋvbôn, ɓá báŋa a gun a léléri yáy, zi ma ri ɓil pûké yá.»

¹⁸Mbây a Juyíf a há̧na gí vbí Zezú ɓá: «Gáŋnjuku a béláké, A̧hí̧ mi e niŋáké, ɓay a mí ziŋ ndísɛ̌ʼɛ dát lé?»

¹⁹Dáy Zezú sa hí̧ nɛ́: «Ɓayhí̧ mɔ́ ɗí mí ɓá njuku a béláké lé? Njuku a béláké zi tí mbêw yá, ɓá Gáŋvbôn mbêw yáŋ.

²⁰Mɔ tu sáŋna a sa: Mɔ́ niŋ dala yá, mɔ́ í hûl yá, mɔ́ ríw yá, mɔ́ kúŋɓay ka̧n tûl a njuku yá, mɔ́ hɛʼɛ bâa a mɔ̌ rá̧ mâa a mɔ̌y lé.»

²¹Ké fere a sa hí̧ Zezú ɓá: «Mi tɔ́ŋ sáŋna a nɔ́rí̧ too, tí ka mi kaw ɓá kaban njuku ɓáy.»

²²Fal láɓay nɔ́, Zezú sa hí̧ nɛ́ ɓá: «Zi hí̧ mɔ́ hɛ̧ mbêw ɓáy: Mɔ́ sé kuma hɛ̧zíŋa a mɔ̌ too, a mɔ́ wal lariké hí̧ njuku fóyári, lé mɔ e ziŋ hɛ̧zíŋa a nûnalê, dalé mɔ́ gí, a mɔ́ tɔ́ŋ mí.»

²³Nǎŋnɔ́, gelka njuku ráy láɓay nɔ́, ké ɗí hɛ́rɛ, ɓayhí̧lé ké erú ka hɛ̧zíŋa ŋgɛ̧́ mambá.

²⁴Zezú kó a ké ɗí hɛ́rɛ, dáy a sa: «Ŋgɛ́rɛ mambá hí̧ njuku hɛ̧zíŋa, ɓay a ké ri ɓil Pû a Gáŋvbôn.

²⁵Ná ɗɛ́ŋ hí̧ bandikoré ɓay a ké tá ɓil lɔ̂ʼɔ súká, dáy ŋgɛ́rɛ mambá hí̧ njuku hɛ̧zíŋa, ɓay a ké ri ɓil Pû a Gáŋvbôn.»

²⁶Njukuri ka láɓayké sa: «Dáy mí ɓá nǎŋ, a gé ma ɓay a pɛ̧́na lé?»

²⁷Zezú rerú a sa: «Hɛ̧ ka njuku ma niŋáké yáy, Gáŋvbôn ma niŋáké.

²⁸Dáy Píyɛ́r sa hí̧ Zezú ɓá: Mɔ́ kó, rú pɔŋ hɛ̧ ka rú erúy too, pé a tɔ́ŋ mɔ́.»

²⁹Zezú sa hí̧ kuriri ɓá: «Mi sa hí̧ wǎyri gbátɓay, njuku ka uru a pɔŋ, vûn a mɛ̌ malé wûny a mɛ̌, nyîn nɛ́rí̧, bâa a mɛ̌ rá̧ mâa a mɛ̌, gun a mɛ̌ri̧, ɓay tûl a Pû a Gáŋvbôn,

³⁰ké e rezíŋ ka tísiri nɛ́ a ŋgɛŋnɛ́, hɛ̧ri̧ ɓá ŋgɛ̧́náké, rá̧ a rezíŋ a ɓil pû ka e gínay, káwa ndísɛ̌ʼɛ ka ma ɔna bɔʼɔ mbêw yáy.»

³¹Zezú ɗí gunbɛʼɛri bôo a sére gí falgel, dáy a sa hí̧ kuriri: «Í lá, a ŋgɛŋnɛ́ ná kaw sé gé ɓá Zerúzalɛ̂m, a sá̧, hɛ̧ri̧ ka porofɛ́t tí ɗé sé tûl a Gun a njuku too e niŋa.

³²Gelka ná ka̧ sá̧y, kú e gé zé nɛ́ hí̧ njukuri ka zi tu Gáŋvbôn nyáy, kú e sáʼa nɛ́, a fára nɛ́, a sa̧sâ̧m kɔ̧ nɛ́.

³³Kú e vbá̧ nɛ́ ka ndêe, ka hí̧nzáʼa ɓá kú í nɛ́. Nâm a sáyké lé, ké e toma ka hûl.»

³⁴Dáy, gunbɛʼɛri zi lá ɓil ɓayké yá, táŋa ɓayké zi tɛ̧́ hí̧ kuriri yá, kú zi tu ɓay ka Zezú zi ɓay a sanáké yá.

³⁵Zezú sé a kaw ri ɓil pû Jeriko lé, râ̧w a há̧na kaw ka gbaŋ ŋgboro, a kaw gɔ́ŋ hɛ̧.

³⁶Ké lá njukuri ka kaw tána dáy a vbí ɓá a̧hí̧ tá lé?

³⁷Lé kú sa hí̧ nɛ́ ɓá: Zezú a Nazarɛ́t pé kaw tána.

³⁸Dáy ké vbá̧nzáʼa: «Zezú, gun zîi a Davít, mɔ́ kósêe a mǐ!»

³⁹Njukuri ka sé ɗambɛl, há nɛ́ ɓá ké tu nzɛ́ʼɛ, dáy ké ré vbá̧nzáʼa ɓá gbénáké ɓáy: «Zezú, gun zîi a Davít, mɔ́ kósêe a mǐ!»

⁴⁰Zezú gí ew a sa ɓá, kú ɗá nɛ́ gí. Gelka kú ɗá nɛ́ gí ká̧y, Zezú vbí nɛ́:

⁴¹«A̧hí̧ mɔ zi ɓá mí niŋ hí̧ mɔ́ lé?» Ké sa: Gáŋmbây, mi zi ɓay a mí kó gel ɓá féké:

⁴²Zezú sa hí̧ nɛ́: «Láɓulaw a mɔ̌ pɛ̧́ mɔ́ dá, mɔ́ kó gel!»

⁴³A goló nûn nɛ́ kó gel, ké uru a tɔ́ŋ Zezú, a séséna a ɗél Gáŋvbôn, nǎŋnɔ́ njukuri too ka kóy, ɗél Gáŋvbôn kɔ́.