Read Capanahua Luk 2 Bible Online

Luk 2 - Capanahua bible

Luk 2

¹A ɓil nâmké nɔ́, Ogiste mbây a lúkí, hí̧nzáʼa ɓá kú kɛ̧́ bon a njukuri ka tísiri a Rɔmɛri̧ too.

²Dáy titíla kɛ̧́ bon a njukuriké, tí a ɓil nâm ka Kírínís kaw ɓá mbây a tûlkaw a ɓil kaw a Siri.

³Njukuri too, e sé ɗé rɛŋ a kuriri, njuku a sí̧ lé too ka sɛ̧w dii pû mɛ̌.

⁴Nǎŋnɔ́ Jozɛf kɔ́, uru ka Nazarɛ́t gáŋ pû a tísiri a Galilê ɓay a sé ɗé rɛŋɛ́ ka Bɛtɛlɛyɛ̂m, a tísiri a Judé, gel a kú mbuŋ zîi a mɛ̌, mbây Davít. Ɓayhí̧lé, ké ɓá gun sɛl î̧n a Davít.

⁵Ké sé, ɓay a sé ɗé rɛŋɛ́ kuu Marí wûny dala a mɛ̌, ka erú a ɓil.

⁶Gelka kú e ka Bɛtɛlɛyɛ̂m, nâm ka Marí e mbuŋay, gí ka̧ dá.

⁷Ké mbuŋ gun a mbɔŋɔ a mɛ̌ ɓá wɔ̧rɔ̧́njuku, ké ku gunké ka gári a ɓá nɛ́ ná ɓil kumbôn lâʼa a ndayri, ɓayhí̧lé gel nâm nyá gɔ́rɔ́ri ɔ dá.

⁸A ɓil kaw a mbêwké nɔ́, njuku koro hɛ̧hɔ́lari erú, kú ná ɓil kpâa, ɓay a koro hɛ̧hɔ́la a kuriri.

⁹Dáy aŋnze a Gáŋmbây tɔ́ʼɔ mûn nɛ́ hí̧ kuriri, hɔ̧́na a Gáŋmbây táŋgel ɗɔ́ŋ kuriri, dáy wɔ́w ŋgbá kuriri.

¹⁰Nǎŋnɔ́, aŋnze sa hí̧ kuriri: «Í ŋgú wɔ́w yá, ɓayhí̧lé mi gí sa Bélaɓay ka ná ɓá hɛ̧ rí mûn a njukuri too hí̧ wǎyri.

¹¹Sû̧ŋ nɛ́, a ɓil gáŋ pû a Davít, kú mbuŋ njuku pɛ̧́hɛ̧ hí̧ wǎyri, ké ɓá Kiris, Gáŋmbây.

¹²Nǎŋnɔ́, í kó ŋgána ka e tɔ́ʼɔ ɓá mɛ̌: Í gé ziŋ gun a pɛ̂ŋ a kú ku nɛ́ ka laa ná ɓil kumbôn lâʼa a ndayri.»

¹³Núnmbɛ̧́nɛ́, aŋnze a fékéri ɓá ŋgɛ̧́náké a nûnalê ɗere gí ziŋ aŋnze ráy, a ɗél Gáŋvbôn a sa:

¹⁴«Hɔ̧́na ké hí̧ Gáŋvbôn a nûnalê, a vónáké ké hí̧ njukuri ka Gáŋvbôn zi a tísiri!»

¹⁵Gelka aŋnzeri pɔŋ kuriri ka a rekála sé nûnalê, njuku koro hɛ̧hɔ́lari sa a bazeŋ a kuriri ɓá: «Ná sé Bɛtɛlɛyɛ̂m, a ná sé kó hɛ̧ ka tá ka Gáŋmbây sa hí̧ nárí̧ ka ŋgboro a aŋnze a mɛ̌ri̧.»

¹⁶Kú uru, a sé ɓá gánáké a gé ziŋ Marí kuu Jozɛf rá̧ gun ka ná a ɓil kumbôn lâʼa a ndayri.

¹⁷Gelka kú gé kó nɛ́ dáy, kú saɓay ka aŋnze sa hí̧ kuriri sé tûl a gunké.

¹⁸Njukuri too, ka láɓay ka njuku koro hɛ̧hɔ́lari sáy, kaw yér.

¹⁹Dáy Marí ŋgbá ɓay nɔ́rí̧ too kɔ̧ lawɛ́, ka ɛ́ ɓilké.

²⁰Falké, njuku koro hɛ̧hɔ́lari rekála a ɗél hɔ̧́na a Gáŋvbôn. Kú ɗél nɛ́, ɓay tûl hɛ̧ a kú lá, ka a kóy, ɓayhí̧lé hɛ̧ri̧ too tá ɓá báŋké nɔ́, ka aŋnze sa hí̧ kuriri.

²¹Nâm zíndɔ̂ʼɔséreké a fal mbuŋa, ɓá nâm a kú e ɓá gun ndá ganzáy. Nǎŋnɔ́, kú zi rɛŋɛ́ ɓá Zezú, rɛŋ ka aŋnze tí sa hí̧ Marí ɗambɛl rá̧ a ké ka̧ ɓil.

²²Dáy nâm ka Marí rá̧ Jozɛf e mɔny mûn a kuriri ɓá báŋké ka sáŋna a Mɔyíze tɔ́ʼɔy, gí ka̧. Nǎŋnɔ́, Jozɛf kuu Marí, mbí gun a sé vûn a Gáŋvbôn ka Zerúzalɛ̂m, sé ɓá nɛ́ tɔ́ʼɔ Gáŋmbây.

²³Ɓayhí̧lé kú ɗé ka̧n ɓil mbété a sáŋna a Gáŋmbây ɓá: «Mbɔŋɔ gunri̧ too a ɓil î̧n, ka ɓá gun wɔ̧rɔ̧́njukuy, kú ɓá nɛ́ kaw ɓórí, ɓay a Gáŋmbây.»

²⁴Kú sé niŋ hɛ̧púna kɔ́, ka sáŋna a Gáŋmbây vbíy: «Ŋgôl sére, malé gun bûm sére.»

²⁵Dáy, njuku a há̧na erú ka Zerúzalɛ̂m, rɛŋɛ́ ɓá Simɛ̧yɔ́ŋ. Ké ɓá njuku a ndáráké, a ɓá njuku lá nzáʼa a Gáŋvbôn. Ké kaw zoko njuku pɛ̧́ gun Izirayɛ́lri. Têm Pukí e kuu mɛ̌,

²⁶a tí tɔ́ʼɔ hí̧ nɛ́ ɓá, ké tí hûl táŋ kó Kiris ka Gáŋmbây e pé gí yá.

²⁷Dáy, ka ŋgboro a Têm Pukí, Simɛ̧yɔ́ŋ uru, a sé vûn a Gáŋvbôn, a goló, Jozɛf kuu Marí kɔ́, ɓá Zezú gí ɓay a niŋ hɛ̧ ka sáŋna vbíy hí̧ nɛ́.

²⁸Simɛ̧yɔ́ŋ gé mbí gun ka̧n ndɔ̂ʼɛ, a zi awá hí̧ Gáŋvbôn a sa:

²⁹«Ŋgɛŋnɛ́, Gáŋmbây, mɔ niŋ hɛ̧ ka mɔ hí̧nzáʼa ɓayké dá. Mɔ́ pɔŋ njukupéna a mɔ̌, ké ziŋ hûl a ɓil a vónáké.

³⁰Ɓayhí̧lé, mi kó ka nûn ní njuku pɛ̧́hɛ̧, ka mɔ hí̧ rú dá.

³¹Pɛ̧́na, ka mɔ mɔny ɓay a njukuri too kú kóy.

³²Ké ɓá geltáŋa, ka e niŋ rá̧ njukuri too ka tísiri kú tu mɔ́, a rená ɓá hɔ̧́na hí̧ gun Izirayɛ́l, njuku a mɔ̌ri̧.»

³³Jozɛf kuu Marí, láɓay ka Simɛ̧yɔ́ŋ sa sé tûl a Zezú, a kaw yér.

³⁴Simɛ̧yɔ́ŋ ɗí béla kɔ̧ tûl a kuriri a sa hí̧ Marí, mâa Zezú: «Gáŋvbôn ten gun nɛ́ ɓay a ɓá gun Izirayɛ́lri ɓá ŋgɛ̧́náké lé, a ɓay a ɓá a fékéri ɓá a ŋgɛ̧́náké uru sâa. Ké e kaw ɓá ŋgána a Gáŋvbôn, dáy njukuri e sáŋ nɛ́.

³⁵Nǎŋnɔ́, ké e ten kɛrɛ a múnáké a ɓil law a njukuri ɓá ŋgɛ̧́náké kɔ̧ kála. Dáy a mɔ̌, Marí, mɔ́ e lá séna law, ɓá báŋa gá̧má ka túŋ mɔ́y.»

³⁶Wûny a há̧na ɓá kpɔʼɔrɔ erú kɔ́ a Zerúzalɛ̂m, ké ɓá porofɛ́t, rɛŋɛ́ ɓá A̧na Ké ɓá gun a Fanuwɛ̂l, a ɓil sɛl î̧n a Asɛr. Ké kaw kú wɔ̧rɔ̧́ a mɛ̌ mbimbɔ̂m zíndɔ̂ʼɔsáy yáŋ.

³⁷Dáy, wɔ̧rɔ̧́ a mɛ̌ gí hú, ké rekaw ɓá wûnysêe mbimbɔ̂m bon zíndɔ̂ʼɔsére a nɛŋ. A̧na zi pɔŋ gí ɓil vûn a Gáŋvbôn nyá, ké niŋ péna hí̧ nɛ́ sû̧ŋ ka sêe too, ka e a ɓil sáŋhɛ̧ rá̧ gɔ́ŋ Gáŋvbôn dát.

³⁸Nǎŋnɔ́, A̧na gí ka̧ pí, ka tí zi awá hí̧ Gáŋvbôn, a saɓay a gunké hí̧ njukuri too, ka kaw zoko ɓá Gáŋvbôn ké pɛ̧́ Zerúzalɛ̂m.

³⁹Gelka Jozɛf kuu Marí ɔrɔ hɛ̧ri̧ too ka sáŋna a Gáŋmbây vbíy, kú ré kuu gun sé Nazarɛ́t pû a kuriri ka tísiri a Galilê.

⁴⁰Gun hɔ̧́, a kpáʼa, ka mbá ka hɛ̧túna, béla a Gáŋvbôn e kuu mɛ̌.

⁴¹Mbimbɔ̂m dát lé, bâa Zezú kuu mâa a mɛ̌ sé Zerúzalɛ̂m ɓay a mára̧ Pâk[1].

⁴²Gelka Zezú erú ka mbimbɔ̂m bôo a sére dáy, kú ɗá nɛ́ sé Zerúzalɛ̂m kuu kuriri, ɓayhí̧lé ná ɓá hɛ̧ niŋa a kuriri dát dá.

⁴³A mára̧ Pâk ɔ dáy, kú rekála, a zi tu ɓá Zezú ɔ Zerúzalɛ̂m nyá.

⁴⁴Kú kɛrɛ ɓá ké e kuu mbáŋa séna a kuriri. Dáy a séséna nâm mbêw a zi kó nɛ́ nyá, a tí ɛ́ nɛ́ a ɓil a î̧n a kuriri rá̧ mbáŋa séna a kuriri,

⁴⁵dáy a zi ziŋ nɛ́ nyá, a re ɛ́ nɛ́ sé ka̧ Zerúzalɛ̂m.

⁴⁶Nâm a sáyké, kú gé ziŋ nɛ́ a ɓil vûn a Gáŋvbôn kaw a bazeŋ a gáŋnjuku tɔ́ʼɔ sáŋnari̧, a kaw lá kuriri, a vbí kuriri ɓay.

⁴⁷Njukuri too, ka lá nɛ́, kaw yér sé tûl hɛ̧túna a mɛ̌, rá̧ zibɔʼɔ ɓay a mɛ̌.

⁴⁸Gelka bâa a mɛ̌ kuu mâa a mɛ̌, gé kó nɛ́, kú kaw yér. Dáy mâa a mɛ̌ sa hí̧ nɛ́: «Gun ní, ɓayhí̧rá̧ mɔ́ niŋ nǎŋnɔ́ ziŋ rú lé? Mɔ́ kó! Bâa a mɔ̌ kuu mǐ, law a ɓurú lú too, a gel ɛ́ mɔ́.»

⁴⁹Dáy Zezú sa hí̧ kuriri ɓá: «Ɓayhí̧, í ɛ́ mí lé? I zi tu ɓá mi kaw niŋ nzáʼapéna a mǐ a ɓil vûn a Bâa a mǐ nyá lé?»

⁵⁰Dáy kú zi lá ɓil ɓay a ké sa hí̧ kuriri yá.

⁵¹Falké, Zezú lá nzáʼa a kuriri, a rekála kuu kuriri sé Nazarɛ́t. Mâa a mɛ̌ koro hɛ̧ nɔ́rí̧ too ka tay kɔ̧ lawɛ́.

⁵²Zezú hɔ̧́ gé ɓá mbɛl a ɓil rɔ̧́na rá̧ béla káwa a mbɛl a Gáŋvbôn rá̧ njukuri.