Read Capanahua Luk 20 Bible Online

Luk 20 - Capanahua bible

Luk 20

¹Sêe a há̧na Zezú kaw tɔ́ʼɔhɛ̧ a kaw sa Bélaɓay hí̧ njukuri a ɓil vûn a Gáŋvbôn. Dáy gáŋnjuku nzáʼaká̧nari̧, njuku tɔ́ʼɔ sáŋnari̧ rá̧ gáŋnjuku pûri mára̧ gí,

²a gí vbí nɛ́ ɓá: «Mɔ́ sa hí̧ rú, a gé hí̧ mɔ́ ŋgboro rá̧ kpɔ́ŋa niŋ péna nɛ́rí̧ lé?»

³Zezú resa hí̧ a kuriri ɓá: «Mǐ kɔ́, mi e vbí wǎyri ɓay mbêw. Í sa hí̧ mí:

⁴A gé pé Zâŋ Batís gí lé? Ɓá Gáŋvbôn malé njuku a tísiri lé?»

⁵Dáy kú sa a bazeŋ a kuriri ɓá: Ná sa ɓá Gáŋvbôn pé, pé nɛ́ gí lé, ké e vbí manárí̧, ɓayhí̧rá̧ ná zi nyá ɓay a Zâŋ yáy lé?

⁶Dáy, manárí̧ mí sa ɓá: Njukuri pé, pé Zâŋ gíy, njukuri e í nárí̧ ka saw, ɓayhí̧lé njukuri tu ɓá Zâŋ Batís ɓá porofɛ́t.

⁷Dáy kú kɛrɛ nǎŋnɔ́ a sa hí̧ Zezú ɓá: «Rú zi tu a gé pé nɛ́ gí yá.»

⁸Dáy, Zezú resa hí̧ kuriri ɓá: «Mǐ kɔ́, mi tí sa hí̧ wǎyri njuku ka hí̧ mí kpɔ́ŋa niŋ hɛ̧ nɛ́rí̧ nyá.»

⁹Falké, Zezú sa galaɓay hí̧ njukuri ɓá: Njuku a há̧na pá wâʼa ví̧nyɛ,[7] dáy a pɔŋ hí̧ njuku koro wâʼa a mɛ̌ri̧ a kála sé gɔ́rɔ́, a gé ɗiɓaŋ a sá̧.

¹⁰Fêw lú hɛ̧pay, ké pé njukupéna a mɛ̌ a há̧na mbêw, ɓá ké sé nyá hɛ̧pay ɓala mɛ̌ ka gel a njuku wâʼari gírú. Njuku koro wâʼa mɛ̌ri̧ gé ŋgbá nɛ́, a vbá̧ nɛ́, a pɔŋ nɛ́ ré ndɔ̂ʼɔ ɓǎŋ.

¹¹Njuku wâʼa repé njuku a féké, kú gé vbá̧ nɛ́, a fára nɛ́, a ní nɛ́ kála ndɔ̂ʼɔ ɓǎŋ.

¹²Njuku wâʼa repé njuku a sáyké sé ɓáy, kú gé hí̧ nɛ́ nɔʼɔ, a ní nɛ́ rekála ɓǎŋ.

¹³Njuku wâʼa kɛrɛ a sa: «Ŋgɛŋnɛ́ mi e niŋ a̧ní lé? Mi pé gun zína a mǐ, há̧na kú e gé hɛʼɛ nɛ́ lé!»

¹⁴Gun a mɛ̌ uru ka sé, gelka kú gé kó nɛ́y, kú sa a bazeŋ a kuriri ɓá: Gun nɛ́, pé ɓá gun nyandal, ná í nɛ́, lé wâʼa e retɛ̧ ɓá ɓála a manárí̧.

¹⁵Dáy a kú gé ŋgbá nɛ́, a kú kɔʼɔ nɛ́ tɛ̧́ ɓil wâʼa, a gé í nɛ́. Zezú vbí, ɓá: «Dáy a ŋgɛŋnɛ́, a̧hí̧ njuku wâʼa e gé niŋáké lé?

¹⁶Ké e sé, a gé nduku kuriri too, a ɓá wâʼaké hí̧ njuku a fékéri: Gelka njukuri lá nǎŋnɔ́, kú sa hí̧ Zezú ɓá: Háy, bɔʼɔ mbêw yá!

¹⁷Dáy Zezú ɛ̧rɛ̧ kuriri a sa: Ɓay nɛ́ ka ɗé ka̧n ɓil Mbété, zi ɓay a sa ɓá hí̧ lé: Saw, ka njuku mbó vûnri̧ pɔŋ vbú kpâa sawké nɔ́ retɛ̧ gáŋ saw[8] kudú vûn?»

¹⁸Dáy njuku ka e lé vbú tûl sawké, e haw mûn nɛ́. A njuku ka sawké e to ka̧n tûlé, e ndɛʼɛrɛ nɛ́.

¹⁹Njuku tɔ́ʼɔ sáŋnari̧ rá̧ gáŋnjuku nzáʼaká̧nari̧ ɛ́ ŋgboro ɓay a ŋgbá Zezú a goló nɔ́. Ɓayhí̧lé kú tu ɓá Zezú sa galaɓay nɔ́ sé tûl a kuriri, dáy a kú kaw ŋgú wɔ́w a nûn a njukuri.

²⁰Nǎŋnɔ́, kú tí koro Zezú, a pé njukuri ɓá kú tɔ́ŋ nɛ́, a kú niŋ mûn a kuriri ɓá báŋa kú kaw ɓá njuku a ndárákéri. Kú vbí nɛ́ ɓayri, rá̧ kú ma ziŋ ŋgboro ŋgbá nɛ́ ka ɓay a nzɛ́ʼɛ, hí̧ mbây tûlkaw ka e ka kpɔ́ŋa a tísirikéy.

²¹Kú gí a vbí nɛ́ ɓá: «Gáŋnjuku, rú tu ɓá hɛ̧ ka mɔ kaw sanáké, a kaw tɔ́ʼɔké ná ɓá ndáráké. Mɔ kó njukuri too mambɛ̧́nɛ́ a nûn nɔ́, a tɔ́ʼɔ gbátɓay sé tûl bɔʼɔséna ka Gáŋvbôn ziy.

²²Dáy mɔ sa hí̧ rú, sáŋna a ɓurú hí̧ ŋgboro ɓá, njuku ké pú lari lambô hí̧ mbây a tísiri a Rɔmɛri̧ malé kú pú nyá lé?»

²³Zezú tu ɓá, kú kaw lélawɛ́ dáy a sa hí̧ kuriri ɓá:

²⁴«Í tɔ́ʼɔ mí mínya a há̧na mbêw. Têm mûn rá̧ rɛŋ a gé e ka tûlké lé?» Kú zi a sa: «Têm mûn rá̧ rɛŋ a Sezar, mbây a tísiri a Rɔmɛri̧.»

²⁵A goló, Zezú sa hí̧ kuriri ɓá: «Í hí̧ hɛ̧ ka ɓá a Sezar, hí̧ Sezar, a í hí̧ hɛ̧ ka ɓá a Gáŋvbôn, hí̧ Gáŋvbôn.»

²⁶Kú láɓay ka Zezú rerúy, a kaw yér, a zi kó ɓéké ɓay a kú e ŋgbá nɛ́ a nûn a njukuri yá, dáy a regí kaw ták.

²⁷Sadusiyɛ̧ a há̧narí̧ gí gel a Zezú. Ɓá kuriri Sadusiyɛ̧ nɔ́rí̧, pé sa ɓá toma a hûlri zi tí yá, dáy a kú gí vbí Zezú,

²⁸a sa: «Gáŋnjuku, Mɔyíze ɗé a ɓil mbété a sáŋna a ɓurú ɓá: “Njuku, mí nyá wûny, pé a ziŋ hûl táŋ mbuŋ gun kuu wûny a mɛ̌ lé, nyîn a njukuké, ké renyá wûnysêeké, a ma mbuŋ gel nûn a njuku hûl.”

²⁹Dáy nyîn a há̧narí̧ tûl a kuriri zíndɔ̂ʼɔsáy erú. Gáŋnjukuké, nyá wûny a zi mbuŋ gun nyá, a hú.

³⁰Tɔ́ŋ tûlké, gí nyá wûnyké, a zi mbuŋ nyá, a hú.

³¹Tɔ́ŋ tûl a sáyké, gí nyá wûnyké, a hú táŋ mbuŋ gun. Nǎŋnɔ́ tûl a kuriri zíndɔ̂ʼɔsáy too, kú nyá wûnyké nɔ́, a hú too táŋ mbuŋ gun.

³²Kɔ́rɔ́ké lé, wûny ráy kɔ́, gí ziŋ hûl.

³³Dáy, a sêe ka hûlri e tomay, wûnyké e kaw ɓá wûny a gé a bazeŋ a kuriri zíndɔ̂ʼɔsáy nɔ́ tooy lé? Ɓayhí̧lé kuriri too kú nyá wûnyké.»

³⁴Zezú fere a sa hí̧ kuriri ɓá: Ka tísiri nɛ́, wɔ̧rɔ̧́njukuri kuu wûnynjukuri kaw nyá há̧narí̧,

³⁵dáy, wɔ̧rɔ̧́njukuri rá̧ wûnynjukuri, ka e ziŋ toma a bazeŋ a hûlri, ɓay a ri ɓil pû a ŋgɛŋké, nyá wɔ̧rɔ̧́ malé nyá wûny lé zi tína mbaa.

³⁶Kú zi ma hûl mbaa, kú e kaw ɓá báŋa aŋnzeri, kú e kaw ɓá gun a Gáŋvbôn, ɓayhí̧lé Gáŋvbôn toma kuriri a bazeŋ a hûlri dá.

³⁷Mɔyíze tɔ́ʼɔ ɓá táŋáké ɓá hûlri e toma. A ɓil mbété, a saɓay sé tûl rúndú ka hɔrɛ ŋgbá rú ka zi rɛ́ŋ nyáy, ké ɗí Gáŋmbây ɓá: «Gáŋvbôn a Abaraham, Gáŋvbôn a Izák, Gáŋvbôn a Zakob!»

³⁸Zezú resa ɓáy ɓá: Gáŋvbôn zi tí ɓá Gáŋvbôn a hûlri yá, Gáŋvbôn, ɓá Gáŋvbôn a ndísɛ̌ʼɛ. Ɓayhí̧lé njuku too erú ka ndísɛ̌ʼɛ ɓay a mɛ̌.

³⁹Njuku tɔ́ʼɔ sáŋna a há̧narí̧ ka e a goló sa hí̧ Zezú ɓá: «Gáŋnjuku, mɔ tu rerú ka ɓay.»

⁴⁰Falké, kú ziŋ laŋ, ɓay a vbí Zezú ɓay a féké ɓáy mbaa.

⁴¹Falké Zezú sa hí̧ kuriri ɓá: «Ná a̧ní rá̧ njukuri e sa ɓá Kiris ɓá gun sɛl î̧n a mbây Davít lé?

⁴²Mbây Davít ka mûn nɛ́, sa a ɓil mbété si̧ŋ ɓá: Gáŋmbây sa hí̧ Gáŋmbây a mǐ ɓá: Mɔ́ gí kaw ndɔ̂ʼɔ lâʼa a mǐ,

⁴³ka̧ sêe ka, mi e ɓá njuku ŋgá̧na a mɔ̌ri̧ tɛ̧́ gel ɓá bɔʼɔ kɔ̧rú̧y.

⁴⁴Mbây Davít ɗí nɛ́ ɓá Gáŋmbây, a ná a̧ní rá̧ Kiris e kaw ɓá gun sɛl î̧n a mbây Davít lé?»

⁴⁵Gelka njukuri kaw lá nɛ́, Zezú mbí ɓay, a sa hí̧ gunbɛʼɛri ɓá:

⁴⁶I koro tûl a wǎyri kuu njuku tɔ́ʼɔ sáŋnari̧, kú zi ɓay a ri gáŋ laa a pénákéri, a há̧ra̧ lá gélri, a zi ɓá njukuri kú huku siri a nam kuriri a ɓil a dawá. Kú ri ɓil vûn mára̧ lé, kú ɛ́ ɓá gelkáwa a béláké a mbɛl. Kú ɗí kuriri sé gel lâʼa dawá lé, kú ɛ́ ɓá gelkáwa a gáŋnjuku rá̧ a kawrú.

⁴⁷Kuriri, pé ɓá njuku naʼa hɛ̧ a wûnysêeri too, a kaw gɔ́ŋ Gáŋvbôn lé, kú gɔ́ŋ pé mambá, ɓay a tɔ́ʼɔ mûn a kuriri a mbɛl a njukuri. Gáŋvbôn e walɓay kɔ̧ tûl a kuriri ŋgbɔ́rɔ mambá.