Read Capanahua Luk 21 Bible Online

Luk 21 - Capanahua bible

Luk 21

¹Zezú e a ɓil vûn a Gáŋvbôn, a mbí nûn nɛ́ lé, ké kó njuku hɛ̧zíŋári̧ kaw ɓá lari kɔ̧ gel hɛ̧hí̧na a ɓil vûn a Gáŋvbôn.

²Ké kó wûnysêe a há̧na ka ɓá fóya, gí ɓá mínya sére ka nɛ́rɛ̧́ké ŋgɛ̧́ nyá kɔ̧ gelké kɔ́.

³Dáy Zezú sa: Mi sa hí̧ wǎyri gbátɓay, wûnysêe nɛ́, ka ɓá fóya hí̧ lari tá gárá njukuri too.

⁴Ɓayhí̧lé njuku hɛ̧zíŋa nɔ́rí̧, lari a kú ɓá kɔ̧ gel hɛ̧hí̧na, ɓá lari a kú zi tí ka péna niŋ rú̧y nyáy. A wûnysêe nɛ́ ka ɓá fóya, ké hí̧ lari too a ké erú ɓay a zé hɛ̧lâʼa a mɛ̌.

⁵Njuku a há̧narí̧ kaw saɓay a vûn a Gáŋvbôn, a kaw ɗéláké a sa: Vûnké belkóna mambá, í kó mára̧ béla saw a kú zá vûnké rúy rá̧ béla hɛ̧ri̧ a kú mɔny vûnké rúy! Dáy Zezú sa hí̧ kuriri ɓá:

⁶Sêeké e gína, ɓá báŋké nɔ́ ka í kó nɛ́y, saw a há̧na mbêw tí ka̧n tûl a mbɛ́ŋnɛ́ nyá, kú e gbɛʼɛrɛ too.

⁷Dáy kú vbí nɛ́ ɓá: «Gáŋnjuku, sé sí̧ rá̧ hɛ̧kéri e niŋa lé? A̧hí̧ e tɔ́ʼɔ ɓá sêeké ka̧ dáy lé?»

⁸Zezú zi a sa: «Í koro tûl a wǎyri ɓá béláké, a njuku a há̧na mbêw, ké zi ná gí rɔ́ʼɔ wǎyri. Ɓayhí̧lé, njukuri ɓá ŋgɛ̧́náké e gí ka rɛŋ ní, a gí sa ɓá: Mǐ, mi kaw ɓá Kiris, dáy sêeké ka̧ dá! Í zi ná tɔ́ŋ kuriri.

⁹Gelka wǎyri mí láɓay a béreri rá̧ uru hɛ́rɛri lá gélri, í zi ná ŋgú wɔ́w. Ɓayhí̧lé belɓá hɛ̧ nɔ́rí̧ ké tí ka̧ ɗambɛl rá̧, dáy zi tí ɓá kɔ́rɔ́ a tísiri yá ɓáy.»

¹⁰Ké resa ɓáy ɓá: «Njuku pû a há̧narí̧ e uru a rúbére ziŋ njuku pû a fékéri, pû mbây a há̧na e uru a rúbére ziŋ pû mbây a féké.

¹¹Tísiri e laŋ magélri too, záŋmári̧ rá̧ nzalari e ŋgbá pûri ɓórí ɓórí. Hɛ̧ a yérkéri e niŋa, njukuri e kó mára̧ hɛ̧ wɔ́w a fékéri ka e tɛ̧́ a nûnalê.

¹²Dáy tí ɗambɛl rá̧ hɛ̧ nɔ́rí̧ ké niŋ lé, kú e ŋgbá wǎyri, a ɓá wǎyri tɔ́ʼɔsêe, kú e ŋgbá wǎyri, ɓay kú walɓay kɔ̧ tûl a wǎyri a ɓil vûn gɔ́ŋ Gáŋvbôn a Juyífri, kú e ɓá wǎyri kɔ̧ vûn sɛl. Kú e ŋgbá wǎyri sé mbɛl a mbâyri rá̧ mbɛl a mbây tûlkawri ɓay a mǐ.

¹³Hɛ̧ nɔ́rí̧ too e tána, ɓay a hí̧ wǎyri ŋgboro saɓay a mǐ.

¹⁴Í zi ná ɛ́ law a wǎyri, sé tûl ɓay ka i e sanáké ka ɓaraɓay ɓay a pɛ̧́ tûl a wǎyri.

¹⁵Ɓayhí̧lé mi e ɓá ɓay ka̧n nzáʼa a wǎyri rá̧ hɛ̧túna, njuku ŋgá̧na a wǎyri mbêw, ka ma ew mbɛl a wǎyri, malé e kí tûl ɓayké mbêw, zi tí ná nyá.

¹⁶Bâa wǎyri rá̧ mâa a wǎyri e zé wǎyri, nyîn a wǎyri rá̧ njuku gbaŋ vûn a wǎyri rá̧ mbáŋa a wǎyri e zé wǎyri, dáy kú walɓay ŋgbá njuku a fékéri a í kuriri ɓá ŋgɛ̧́náké a bazeŋ a wǎyri.

¹⁷Njukuri too e fɔny wǎyri ɓay a mǐ.

¹⁸Dáy, tâny tûl a wǎyri mbêw zi too ka̧n tísiri yá.

¹⁹I ŋgbá ɓá kpúnáké, nǎŋnɔ́ pé i e pɛ̧́ ndísɛ̌ʼɛ a wǎyri.»

²⁰«Gelka wǎyri mí kó ŋgawbéreri mára̧ ɗɔ́ŋ Zerúzalɛ̂m, i tu ɓá sêe gbɛʼɛrɛ pû a Zerúzalɛ̂m gí ɗɛ́ŋ dá.

²¹Nǎŋnɔ́, njukuri ka e ka tísiri a Judé, kú ŋgú sé mú ɓil konri̧, a njukuri ka e a ɓil pû a Zerúzalɛ̂m kú tɛ̧́, a njukuri ka e ka wâʼa, kú zi ná regí ɓil pû ɓáy.

²²Ɓayhí̧lé sêeké e ná ɓá sé walɓay a Gáŋvbôn, ɓá báŋké ka ɗé ka̧n ɓil Mbété a Gáŋvbôn.

²³Lelêe hí̧ e ná hí̧ máɓilri rá̧ mâa gunri̧, ka gunri̧ kaw â̧m pâm ɓáy lé. Ɓayhí̧lé tɔ́ʼɔsêe e erú mambá a ɓil pûké, Gáŋvbôn e ɗere hɛ́rɛ a mɛ̌ kɔ̧ tûl a njukuri a sêeké nɔ́.

²⁴Kú e í kuriri ka gá̧má, a ŋgbá njuku a fékéri ɓá koy lá tûl pûri ɓórí ɓórí. Njukuri ka zi tu Gáŋvbôn nyáy, e gbɛʼɛrɛ Zerúzalɛ̂m ka̧ nâm ka Gáŋvbôn tí ŋgá̧y.»

²⁵A ɓil nâmké nɔ́, kú e kó hɛ̧ há̧narí̧ ka e tɛ̧́ ka nûn sêe, nûn fêw rá̧ rôo. A tísiri, gáŋ nyɛw mbii e uru ka ŋgɛ́rɛ a gbé a ɓá wɔ́w ŋgbá njukuri too, kú zi tu hɛ̧ niŋa nyá.

²⁶Njukuri e hú ka wɔ́w, a ɓil kɛrɛ hɛ̧ri̧ ka e ka̧ tísiri too. Ɓayhí̧lé kpɔ́ŋa hɛ̧ri̧ too e láŋa.

²⁷A goló, njukuri e kó Gun a njuku tɛ̧́ gí a ɓil ɗaʼama a mbɔ̂m, ka kpɔ́ŋa rá̧ hɔ̧́na a mɛ̌ too.

²⁸Gelka hɛ̧ nɔ́rí̧ tí táʼa niŋa, í ew ɓá kpúnáké, a í gbaŋ tûl a wǎyri, ɓayhí̧lé nâm ka Gáŋvbôn mɔny ɓay a ten wǎyri a ɓil koy gí ɗɛ́ŋ dá.

²⁹Dáy, Zezú sa galaɓay hí̧ kuriri ɓá: «Í kó dii njɔ̧̂ny rá̧ dii a fékéri too!

³⁰Gelka, í kó goykéri tí táʼa lɔŋa, í tu ɓá tûl nzáʼambɔ̂m kaw ka̧na dá.

³¹Nǎŋnɔ́ kɔ́, gelka wǎyri mí kó mára̧ hɛ̧ nɔ́rí̧ kaw tánay, í tu ɓá, kaw a Mbây a Gáŋvbôn gí ɗɛ́ŋ dá.

³²Mi sa hí̧ wǎyri gbátɓay, njukuri, ka e ka tísiri nɛ́ a ŋgɛŋnɛ́, tí ziŋ hûl too yá ka hɛ̧ nɔ́rí̧ e ka̧nay.

³³Nûnalê rá̧ tísiri too e ɔ ná, dáy Ɓay a mǐ, ma ɔ bɔʼɔ mbêw nyá.

³⁴I koro káwa a wǎyri ɓá béláké, a í pɔŋ ɓá law a wǎyri ka̧n ɓá, tûl hɛ̧lâʼa, tûl távôn, tûl hɛ̧ a tísiriri, rá̧ sé gína Gun a njuku ké zi ná gí nduʼuru wǎyri,

³⁵ɓá báŋa rii nzwîy. Ɓayhí̧lé, ké e ɗere gí guku tûl a njukuri ka tísiri too.

³⁶Nǎŋnɔ́ í zi ná nâm, a í gɔ́ŋ Gáŋvbôn sêe too, ɓay a ké hí̧ wǎyri kpɔ́ŋa ew ɓá kpúnáké a ɓil tɔ́ʼɔsêeri too ka e ka̧nay, rá̧ í ziŋ ew sâa a mbɛl a Gun a njuku ka e regí.»

³⁷A ɓil a sêe lé, Zezú tɔ́ʼɔhɛ̧ hí̧ njukuri a ɓil vûn a Gáŋvbôn, dáy gel kaw yíra lé, ké he sé ná tûl kon, a kú ɗí ɓá kon dii Oliviyé.

³⁸Dáy a gel a pélé dát lé, njukuri kaw gí ɓil vûn a Gáŋvbôn, ɓay a gí láɓay a Zezú.