Read Capanahua Luk 24 Bible Online

Luk 24 - Capanahua bible

Luk 24

¹A fal nâm ɔʼɔ, a gel a pélé rím, wûny rá̧yrí̧ tɛ̧́ sé tûlpâl ka mára̧ yámbóri a kú mɔny.

²Kú gé ka̧, a gé kó ɓá gáŋ saw a kú ɓá ndi nzáʼa lɔ̂ʼɔpâl gíkra ka̧n gbaŋké.

³Kú tá a gé ri ɓil lɔ̂ʼɔ dáy, a zi gé ziŋ hûl a Gáŋmbây Zezú yá.

⁴Kú zi tu ɓay a kú e sanáké yá, falké, kú kó njukuri sére rí gári ɓá pukí fe ndéeré ndéeré tɛ̧́ gí ziŋ kuriri.

⁵Dáy wɔ́w ŋgbá kuriri, kú ɗíŋ nûn a kuriri, lé njuku rá̧yrí vbí kuriri ɓá: «Ɓayhí̧ i kaw ɛ́ njuku ka e ka ndísɛ̌ʼɛ a bazeŋ a hûlri lé?

⁶Ké zi tí gelé mbaa, ké toma a hûl dá. Í kɛrɛ ɓay ka ké tí sa hí̧ wǎyri ka Galilê ɓá:

⁷Belɓá Gun a njuku, kú zé nɛ́ hí̧ ɓéké njukuri, a kú ɓara nɛ́ ka̧n tûl dii vbatay, a nâm a sáyké a falké lé, ké toma a hûl.»

⁸Gelka kú láɓay ráy nǎŋnɔ́, kú rekɛ́rɛ ɓay ka Zezú tí sa hí̧ kuriri.

⁹Kú uru ka tûlpâl, a rekála sé sa hí̧ gunbɔʼɔ a Zezúri ka bôo a mbêw rá̧ gárá njuku a fékéri.

¹⁰Wûny nɔ́rí̧ ka sé saɓay hí̧ apotere a Zezúri ɓá: Marí a pû Makdala, Zâ̧n rá̧ Marí mâa a Ják rá̧ wûny a fékéri ɓáy, ka e kuu kuriri.

¹¹Dáy apotereri kɛrɛ ɓá ɓayké zi tí ɓá gbátɓay yá, a zi, zibɔʼɔké yá.

¹²Dáy Píyɛ́r kó nǎŋnɔ́ a uru, a ŋgú sé ka̧ tûlpâl, a gé pɔ a ɛ̧rɛ̧ ɓil lɔ̂ʼɔ lé, ké kó ɓá laa a kú ku hûl a Zezú rúy. Dáy a uru a rekála, a kaw yér sé tûl hɛ̧ ka táy.

¹³Sêeké nɔ́, gunbɔʼɔ a Zezú sére, uru a Zerúzalɛ̂m, a mbí ŋgboro ɓay a sé pû a há̧na, ka rɛŋké ɓá Emayûs. Ɗína ŋgboroké, ɓá séna a bɔʼɔ lé, e mbí sɛl a sêe sére.

¹⁴Kú kaw fɔ́ŋ sa̧a a bazeŋ a kuriri sé tûl hɛ̧ri̧ too ka táy.

¹⁵Gelka kú kaw séséna, a many há̧narí̧, Zezú kɔ́ gí ziŋ kuriri, a sé mbêw kuu kuriri.

¹⁶Dáy hɛ̧ há̧na de nûn a kuriri, kó nɛ́ a ŋgá̧ nɛ́.

¹⁷Lé Zezú vbí kuriri: «A̧hí̧ tá rá̧ i séséna a many há̧narí̧ nǎŋnɔ́ lé?» Dáy kú láɓay ráy nǎŋ, a gí ew ka teʼere tûl a kuriri.

¹⁸Njuku mbêw a bazeŋ a kuriri ka rɛŋɛ́ ɓá Keleyopás sa hí̧ nɛ́ ɓá: «Njukuri too ka tísiri Zerúzalɛ̂m, tu hɛ̧ ka tá ka Zerúzalɛ̂m ka sénɛ́, a mɔ̌, mɔ e a gel a sí̧ rá̧ a zi tu ɓayké yá lé?»

¹⁹Dáy ké vbí kuriri ɓá: A̧hí̧ tá lé? Kú fere a sa: «Hɛ̧ ka tá ka tûl a Zezú a Nazarɛ́t, ka kaw ɓá kpɔ́ŋa porofɛ́t, ké tɔ́ʼɔ ka ŋgboro a péna niŋa a mɛ̌ rá̧ a ŋgboro a ɓay sána a mɛ̌ a mbɛl a Gáŋvbôn rá̧ a mbɛl a njukuri.

²⁰Dáy gáŋnjuku a njuku nzáʼaká̧nari̧ rá̧ gáŋnjuku pû ɓurú ŋgbá nɛ́ hí̧ Pilát, ɓá kú walɓay ŋgbá nɛ́, a kú í nɛ́, nǎŋnɔ́, kú sé ɓara nɛ́ ka̧n tûl dii vbatay.

²¹Dáy rú kɛrɛ ɓá mɛ̌ pé ɓá njuku ka e ten gun Izirayɛ́lri. A ɓilké nɔ́ too, sénɛ́ niŋ nâm sáy ka hɛ̧ nɔ́rí̧ táy.

²²Wûny a há̧narí̧ a bazeŋ a ɓurú, niŋ rú kaw yér, ɓayhí̧lé tí pélí nɛ́ rím, kú uru a sé tûlpâl

²³dáy a gé ziŋ hûl a Zezú yá, a regí sa hí̧ rú ɓá kú gé ka̧, a gé ziŋ aŋnze a Gáŋvbônri̧, dáy kú sa hí̧ kuriri ɓá Zezú kaw ka ndísɛ̌ʼɛ.

²⁴Njuku a há̧narí̧ a bazeŋ a ɓurú, uru ka ŋgú sé tûlpâl, a regí sa hí̧ rú ɓá báŋké ka wûnynjukuri gí sáy, ɓá kú ziŋ Zezú yá.»

²⁵Dáy Zezú sa hí̧ kuriri ɓá: «Njuku táŋ hɛ̧túnari̧, law a wǎyri kpú mambá a ɓil láɓulaw sé tûl hɛ̧ri̧ too ka porofɛ́tri tí tɔ́ʼɔy!

²⁶I zi tu ɓá Kiris e tɔ́ʼɔsêe nǎŋnɔ́ rá̧ Gáŋvbôn ké ɓá nɛ́ ri ɓil hɔ̧́na a mɛ̌ nyá lé?»

²⁷Dáy Zezú tí sa táŋa hɛ̧ri̧ ka Mbété a Gáŋvbôn sa sé tûlé, a tí a ɓil a mbété a Mɔyíze, rá̧ ɓil mbété a porofɛ́tri too.

²⁸Gelka kú zi ɗɛ́ŋ ka pû ka gunbɔʼɔ a Zezúri zi ɓay a serúy, Zezú niŋ ɓá báŋa, ké e sé ɓá ɗínáké.

²⁹Dáy kú sa hí̧ nɛ́ ɓá: «Mɔ́ gí ná kuu ɓurú ɓá sêe riŋ dá, zaa lé gel e yíra.» Nǎŋnɔ́, ké zibɔʼɔké a sé vûn kuu kuriri.

³⁰Gelka hɛ̧lâʼa gí ká̧y, kú gé kaw nzáʼaké lé, ké mbí biré a zi awá hí̧ Gáŋvbôn, a haw, a hí̧ kuriri.

³¹A goló, nûn a kuriri gí ŋgburu dáy kú gí tu ɓá Zezú pɛ̧́nɛ́, núnmbɛ̧́nɛ́ a goló, ké ɓɔ́l a mbɛl a kuriri.

³²Dáy kú sa a bazeŋ a kuriri ɓá: «Katína, ná zi lá law a manárí̧ zaŋ ɓá báŋa hɔrɛ, a ké kaw sa táŋa ɓay a Mbété a Gáŋvbôn hí̧ nárí̧ ka ŋgboro nyá lé?»

³³Dáy, a kú uru núnmbɛ̧́nɛ́ a goló, a mbí ŋgboro, a rekála sé Zerúzalɛ̂m. Kú gé ziŋ gunbɔʼɔ a Zezúri bôo a mbêw rá̧ mbáŋa a kuriri ka mára̧ kaw,

³⁴a sa ɓá: «Ɓá gbátɓay! Gáŋmbây toma a hûl dá! Simɔŋ kó nɛ́.»

³⁵Nǎŋnɔ́, kuriri kɔ́, kú gé sa hɛ̧ ka ziŋ kuriri ka ŋgboro, rá̧ hɛ̧ ka niŋ rá̧ a kú tu ɓá Zezú, ɓá a gel ka, ké kaw haw biré.

³⁶Gunbɛʼɛri kaw saɓayké ɓáy, ka Zezú tɛ̧́ gí ew lawgel a kuriri a sa: A vónáké ké kaw kuu wǎyri!

³⁷Kuriri too, wɔ́w ŋgbá kuriri, ɓayhí̧lé kú kɛrɛ ɓá kú kó vbôn a há̧na.

³⁸Dáy Zezú sa hí̧ kuriri: «Ɓayhí̧ i erú ka wɔ́w lé? A ɓayhí̧ mára̧ kɛrɛ nǎŋnɔ́ gí law a wǎyri lé?

³⁹I kó ndɔ̂ʼɔ ní, a i kó bɔʼɔ ní, ɓá mǐ, í ɗá mûn ní, a i kó, vbôn zi tí ka hay mûn, malé húrú yá, ɓá báŋké nɔ́ ka i kó nɛ́y.»

⁴⁰Ké kaw sa nǎŋnɔ́, a tɔ́ʼɔ kuriri ndɔ̂ʼɛ rá̧ bɛʼɛ.

⁴¹A ɓil mûnrína a kuriri, kú zi nyá ɓayké ɓá gbátɓay yá ɓáy, ná yér hí̧ kuriri, dáy Zezú vbí kuriri ɓá: I erú ka hɛ̧lâʼa a gelé lé?

⁴²Dáy kú mbí kúŋá nzwîy a ɛʼɛké hí̧ nɛ́.

⁴³Ké nyá a sɔ̧́ a mbɛl a kuriri a goló.

⁴⁴A falké, ké sa hí̧ kuriri: Ka mi e kuu wǎyri ɓáy, mi saɓay hí̧ wǎyri sé tûl hɛ̧ri̧ too ka ɗé ka̧n ɓil mbété sáŋna a Mɔyíze, ɓil mbété a porofɛ́tri rá̧ ɓil mbété si̧ŋ, hɛ̧ri̧ too ka e niŋa sé tûl ní.

⁴⁵A goló, ké ŋgburu hɛ̧túna a kuriri, ɓay a kú lá ɓil ɓay ka ɗé ka̧n ɓil Mbété a Gáŋvbôn.

⁴⁶A sa hí̧ kuriri: Í kó hɛ̧ a kú ɗéy: Kiris e tɔ́ʼɔsêe, a ziŋ hûl, nâm sáy a falké lé, ké e uru a hûl.

⁴⁷Nǎŋnɔ́, belɓá kú tɔ́ʼɔɓay ka rɛŋɛ́ magél too a tísiri, tí ka Zerúzalɛ̂m, kú sa hí̧ njukuri ɓá kú fere káwa a kuriri, a Gáŋvbôn ké vbá̧buma hí̧ kuriri.

⁴⁸Wǎyri, i kaw ɓá njukuri ka kó, ka a lá hɛ̧ri̧ too ka táy.

⁴⁹Dáy mǐ, mi e pé hɛ̧ ka Bâa a mǐ ŋgá̧nzáʼa ɓay a pé gí hí̧ wǎyri. Í zi ná tɛ̧́ a ɓil pû nɛ́, ka̧ sêe ka kpɔ́ŋa a nûnalê e ɗere gí kɔ̧ tûl a wǎyri.

⁵⁰Dáy Zezú ɗá kuriri tɛ̧́ sé falgel ka ŋgboro sé pû Betaní, a gé gbaŋ ndɔ̂ʼɛ sé sâa, a ɗí béla kɔ̧ tûl a kuriri.

⁵¹Gelka, ké kaw ɗí béla kɔ̧ tûl a kuriri, ké ɗém há̧na kuu kuriri, a he kála sé nûnalê.

⁵²Dáy kú ew ka hɔ̧́ nɛ́, a falké, kú rekála sé Zerúzalɛ̂m mbá ka mûnrína.

⁵³Nâm too, kú e a ɓil vûn a Gáŋvbôn, a kaw ɗél Gáŋvbôn dát.