Read Capanahua Luk 6 Bible Online

Luk 6 - Capanahua bible

Luk 6

¹Sêe a há̧na ka ɓá sêe ɔʼɔ a Juyífri, Zezú kaw tá a ɓil wâʼa bulé, nǎŋnɔ́ gunbɛʼɛri kúŋ tûl bulé ka ɔʼɔrɔ a ɓil ndɔ̂ʼɔ a kuriri a sɔ̧́.

²Dáy Fariziyɛ̧́ a há̧narí̧ ka kóy, sa hí̧ kuriri ɓá: «Ɓayhí̧, i niŋ hɛ̧ ka sáŋna a manárí̧ de ɓá kú niŋ ka sêe ɔʼɔ lé?»

³Dáy Zezú fere a sa hí̧ kuriri ɓá: «Í zi kɛ̧́ a ɓil Mbété a Gáŋvbôn, hɛ̧ ka Davít niŋ ka sé há̧na ka nzala í nɛ́, mɛ̌ rá̧ njuku séna a mɛ̌ri̧ nyá lé?

⁴Ké ri ɓil vûn a Gáŋvbôn, a fa̧ biré a kú hí̧ ɓá hɛ̧púna hí̧ Gáŋvbôn, a sɔ̧́ a wal hí̧ njuku séna a mɛ̌ri̧, a tu ɓá, ka ŋgboro a sáŋna a manárí̧ lé, kú zi ma sɔ̧́náké yá, ɓá njuku nzáʼaká̧nari̧ mbɛ́ŋ, pé ma sɔ̧́náké.»

⁵Zezú resa hí̧ kuriri ɓáy ɓá: «Gun a njuku, kaw ɓá gáŋnjuku a nâm ɔʼɔ.»

⁶Sêe ɔʼɔ a féké ɓáy, Zezú ri vûn gɔ́ŋ Gáŋvbôn a kaw tɔ́ʼɔhɛ̧, dáy njuku a há̧na ka ndɔ̂ʼɛ a lâʼa huhúy, e ka gelké.

⁷Njuku tɔ́ʼɔ sáŋnari̧ rá̧ Fariziyɛ̧́ri̧ kaw ka ɓɛʼɛ nɛ́ ɓay kú kó há̧na Zezú e ŋgɛ́rɛ njuku záŋmá nɔ́ a sêe ɔʼɔ lé. Ɓayhí̧lé, kú kaw ɛ́ ŋgboro ɓay ɓá ɓay ŋgbá nɛ́.

⁸Dáy Zezú tu kɛrɛ a kuriri too, a sa hí̧ njuku ndɔ̂ʼɔ hûlké ɓá: «Mɔ́ uru! A mɔ gí ew gelé a mbɛl a njukuri too!» Dáy ké uru a gí ew mbɛl a njukuri.

⁹Zezú sa hí̧ njuku tɔ́ʼɔ sáŋnari̧ rá̧ Fariziyɛ̧́ri̧: «Mi vbí wǎyri hɛ̧ mbêw: Sêe ɔʼɔ, a̧hí̧ sáŋna a manárí̧ tɔ́ʼɔ ɓá ná niŋ lé? Niŋ béla malé niŋ ɓéké lé? Pɛ̧́ ndísɛ̌ʼɛ a njuku malé í nɛ́ lé?»

¹⁰Zezú ɛ̧rɛ̧ kuriri mbêw mbêw too, falké ké sa hí̧ njuku ráy ɓá: «Mɔ́ ndara ndɔ̂ʼɔ!» Dáy ké ndara ndɔ̂ʼɛ, lé ndɔ̂ʼɛ ŋgɛ́rɛ!

¹¹Dáy njuku tɔ́ʼɔ sáŋnari̧ rá̧ Fariziyɛ̧́ri̧ mbá ka hɛ́rɛ, a tí mɔny ɓay a bazeŋ a kuriri, ɓay a tu hɛ̧ a kú e niŋáké ziŋ Zezú.

¹²Sêe a há̧na, Zezú he sé tûl kon, sé gɔ́ŋ Gáŋvbôn dáy, a gé gɔ́ŋ Gáŋvbôn sû̧ŋ sû̧ŋ.

¹³Gelka gel táŋ dáy, ké ɗí gunbɛʼɛri a ten a bazeŋ kuriri njukuri bôo a sére, a ɗí kuriri ɓá apotere.

¹⁴Dáy rɛŋ a kuriri ɓá: Simɔŋ a kú zi rɛŋɛ́ ɓá Píyɛ́r kɔ́y, Anderé nyîn nɛ́, Ják rá̧ Zâŋ, Filíp kuu Bartelemí,

¹⁵Matiye rá̧ Toma, Ják gun a Alfé rá̧ Simɔŋ a kú ɗí ɓá Zélot[2],

¹⁶Jude gun a Ják rá̧ Judas Ɛskariyót, njuku ka e zé Zezú.

¹⁷Zezú ɗere ka tûl kon kuu apotere a mɛ̌ri̧ gí ew ɓil mbuku, gel ka gunbɛʼɛri ɓá ŋgɛ̧́náké erúy. A gelké nɔ́, njukuri ɓá ŋgɛ̧́náké erú kɔ́, njukuri, a gí ka tísiri a Judé, Zerúzalɛ̂m, rá̧ ɓil gáŋ pûri ka e a gbaŋ mbii a Tîr rá̧ Sidɔ̂ŋ,

¹⁸kú gí ɓay a lá tɔ́ʼɔɓay a Zezú, a zi ɓá Zezú ké ŋgɛ́rɛ záŋmá a kuriri kɔ́. Dáy njukuri too ka têm ɓéké kaw dɔʼɔlɔ kuriri ziŋ ŋgɛ́rɛ.

¹⁹Njuku too ɛ́ ŋgboro ɗá nɛ́, ɓayhí̧lé kpɔ́ŋa a há̧na kaw tɛ̧́ ka mûn nɛ́ a ŋgɛ́rɛ njukuri.

²⁰A falké, Zezú ɛ̧rɛ̧ gunbɛʼɛri a sa: «Béla a Gáŋvbôn ké hí̧ wǎyri, wǎyri njuku fóyári, ɓayhí̧lé Pû Mbây a Gáŋvbôn ɓá ɓala a wǎyri!»

²¹Béla a Gáŋvbôn ké hí̧ wǎyri, wǎyri ka e a ɓil nzala a ŋgɛŋnɛ́y, ɓayhí̧lé i e ziŋ hɛ̧lâʼari ɓá ŋgɛ̧́náké! Béla a Gáŋvbôn ké hí̧ wǎyri, wǎyri ka e a ɓil vúna a ŋgɛŋnɛ́y, ɓayhí̧lé i e a ɓil sáʼa!

²²«Béla a Gáŋvbôn ké hí̧ wǎyri, wǎyri ka njukuri fɔny wǎyri, ka a sáŋ wǎyri, ka a fára wǎyri, a saɓay belyáké sé tûl a wǎyri, ɓay ka i láɓulaw hí̧ Gun a njukuy.

²³Dáy, í záymûn a wǎyri ka sêe ka hɛ̧ké e niŋáy, a í rí mûn a wǎyri, ɓayhí̧lé kpáʼandɔ̂ʼɔ péna a wǎyri e hɔ̧́ mambá a nûnalê. Ɓayhí̧lé ɓá nǎŋnɔ́ pé zîi a kuriri ɓá porofɛ́tri tɔ́ʼɔsêe.

²⁴Lelêe hí̧ wǎyri njuku hɛ̧zíŋári̧, ɓayhí̧lé, i ziŋ béla a wǎyri dá!

²⁵Lelêe hí̧ wǎyri, njukuri ka erú ka hɛ̧ri̧ ɓá ŋgɛ̧́náké a ŋgɛŋnɛ́y, ɓayhí̧lé nzala e ŋgbá wǎyri! Lelêe hí̧ wǎyri, wǎyri ka e a ɓil sáʼa a ŋgɛŋnɛ́y, ɓayhí̧lé, i e a ɓil tɔ́ʼɔsêe rá̧ vúna!

²⁶Lelêe hí̧ wǎyri, ka njukuri too mí saɓay a wǎyri ɓá béláké, ɓayhí̧lé nǎŋnɔ́ pé zîi a kuriri niŋ hí̧ porofɛ́t a manyákéri!»

²⁷«Dáy, mi sa hí̧ wǎyri, wǎyri ka kaw lá mí, ɓá í zi njuku ŋgá̧na a wǎyri, a í niŋ béla hí̧ njukuri ka fɔny wǎyri.

²⁸Í ɗí ɓay a béláké kɔ̧ tûl a njukuri ka kaw ɗí ɓéké ɓay kɔ̧ tûl a wǎyri, a í gɔ́ŋ Gáŋvbôn kɔ̧ tûl a njukuri ka kaw ɓál rɛŋ a wǎyri.

²⁹Njuku mí vbá̧ ɓil nûn nɔ́ a ŋgboro a mbêw lé, mɔ́ pɔŋ ké vbá̧ ɓil nûn nɔ́ a ŋgboro a ǎ̧w kɔ́. A njuku mí zi ɓay naʼa gáŋ laa a mɔ̌ lé, mɔ́ pɔŋ nɛ́ ké naʼa gárí a mɔ̌ kɔ́.

³⁰Mɔ́ hí̧ njuku too, ka gɔ́ŋ mɔ́ hɛ̧, a njuku mí mbí hɛ̧ a mɔ̌ ka ŋgɛ́rɛ lé, mɔ́ vbí nɛ́ nyá.

³¹Hɛ̧ ka i zi ɓá njukuri kú niŋ hí̧ wǎyri, wǎyri kɔ́, í niŋ ɓá báŋké nɔ́ hí̧ kuriri.

³²Dáy, wǎyri mí zi ɓá njukuri ka zi wǎyriy, ɓayhí̧ í zoko ɓá kú zi awá hí̧ wǎyri mbɛ́ŋ lé? Nǎŋnɔ́ kɔ́ ɓéké njukuri, zi ɓá njukuri ka zi kuririy!

³³Nǎŋnɔ́ kɔ́, wǎyri mí niŋ béla hí̧ ɓá njukuri ka niŋ béla hí̧ wǎyriy, ɓayhí̧ rá̧ í zoko, ɓá kú zi awá hí̧ wǎyri mbɛ́ŋ lé? Ɓéké njukuri kɔ́ niŋ ɓá báŋké nɔ́!

³⁴Dáy wǎyri mi hí̧ túna lari, hí̧ ɓá njukuri ka i tuy, ɓay kú ma rerú hí̧ wǎyri ɓá báŋké nɔ́y, ɓayhí̧rá̧, i zoko ɓá kú zi awá hí̧ wǎyri mbɛ́ŋ lé? Ɓá báŋké nɔ́, njuku ɓékéhɛ̧ri̧, hí̧ túna lari hí̧ njuku ɓékéhɛ̧ri̧ ɓá báŋa kuriri kɔ́, a kaw zoko, ɓá kú rerú hí̧ kuriri, ɓá báŋké nɔ́ kɔ́!

³⁵Hɛ̧ ka belɓá í niŋ, ɓá í zi njuku ŋgá̧na a wǎyri, a í niŋ béla hí̧ kuriri. Í hí̧ túna lari hí̧ njukuri too, táŋ zoko ɓá kú rerú hí̧ wǎyri. Wǎyri mí niŋ nǎŋnɔ́, i e ziŋ kpáʼandɔ̂ʼɔ péna a wǎyri ɓá ŋgɛ̧́náké a gel a Gáŋvbôn, nǎŋnɔ́ kɔ́, i e kaw ɓá gun a Gáŋvbôn a nûnalê. Ɓayhí̧lé, ké kaw ɓá Gáŋvbôn ka niŋ béla hí̧ njukuri ka zi tu béla yáy rá̧ njuku a ŋgbɔ́rɔkéri kɔ́.

³⁶Dáy, í mbá ka béla law ɓá báŋké ka Bâa a wǎyri kɔ́, mbá ka bélalaw.»

³⁷«Í walɓay kɔ̧ tûl a mbáŋa a wǎyri yá, ɓá Gáŋvbôn, ké tí ná walɓay kɔ̧ tûl a wǎyri kɔ́. Í ɓá ɓay ŋgbá mbáŋa a wǎyri yá, ɓá Gáŋvbôn, ké tí ná ɓá ɓay ŋgbá wǎyri kɔ́. Í vbá̧buma hí̧ njukuri, a Gáŋvbôn ké vbá̧buma hí̧ wǎyri kɔ́.

³⁸Í hí̧ndɔ̂ʼɔ hí̧ njukuri, a Gáŋvbôn ké hí̧ndɔ̂ʼɔ hí̧ wǎyri kɔ́. Kú e fere hɛ̧hí̧na a wǎyri kɔ̧ ɓil ŋguu a wǎyri, ŋguuké e mbána, kú e mbaʼaké, ka sɔ̧ŋɔ̧, ké e rembá a kɔ̧ kpâa! Ɓayhí̧lé, Gáŋvbôn e lé hɛ̧ hí̧ wǎyri ka hɛ̧ lé hɛ̧ a mbêwké nɔ́, ka i lé ɓála njukuri rúy!»

³⁹Zezú, resa galaɓay hí̧ kuriri ɓá: «Râ̧w ma kɔʼɔ kaw a mbɛ́ŋnɛ́ râ̧w lé? Kú tí lé sére too kɔ̧ ɓil lɔ̂ʼɔ a mbêwké yá lé?

⁴⁰Ké sa ɓáy ɓá: Gun mbɛl péna, zi ndé bákáwa a mɛ̌ ka tu péna nyá, dáy gun mbɛl péna too, a mbɛl péna ɓá béláké, e niŋ péna ɓá báŋa bákáwa a mɛ̌.

⁴¹Ɓayhí̧rá̧, mɔ́ kó ɓá râw kpâa a nûn a nyîn nɔ́, dáy a zi kó ŋgburu dii a nûn nɔ́ nyáy lé?

⁴²Ná a̧ní rá̧ mɔ́ e sa hí̧ nyîn nɔ́ ɓá: Nyîn ní, mɔ́ pɔŋ mi ten râw a nûn nɔ́? A zi kó ŋgburu dii a nûn nɔ́ nyáy lé? Njuku foo, mɔ́ tí ten ŋgburu dii a nûn nɔ́ rá̧, a mɔ́ kó gel ɓá táŋáké ɓay a ten râw kpâa a nûn a nyîn nɔ́!»

⁴³Zezú resa ɓáy ɓá: «Dii a béláké, zi ma hí̧ léna a belyáké yá, malé, dii ka ɓá ɓéké dii, ma hí̧ léna a béláké yá.

⁴⁴Kú tu dii a bélákéri ka léna kuriri. Kú zi ma ɗɔ́rɔ́ léna njɔ̧̂ny ka tûl dii ŋgátúru yá, ɓá báŋké nɔ́, kú tí ɗɔ́rɔ́ léna duní ka tûl dii mbaʼaw yá.

⁴⁵I tu ɓá njuku a béláké ten béla hɛ̧ a mɛ̌ ka mbá a ɓil lawɛ́. Ka ɓéké njuku ten ɓéké hɛ̧ a mɛ̌ ka mbá a ɓil ɓéké lawɛ́. Ɓayhí̧lé ɓá hɛ̧ri̧ ka mbá law a njuku, pé tɛ̧́ a nzɛ́ʼɛ.»

⁴⁶Zezú saɓay ɓá: «Ɓayhí̧ i kaw ɗí mi Gáŋmbây, Gáŋmbây, a zi niŋ hɛ̧ ka mi sa hí̧ wǎyri yáy lé?

⁴⁷Mi e tɔ́ʼɔ hí̧ wǎyri njuku ka gí gel ní, ka a láɓay a mǐ, ka a ŋgbá ɓayké, ka a niŋ pénákéy:

⁴⁸Ké ɛ́ŋ njuku ka zi ɓay a zá vûn a mɛ̌, ka a tí ɗáŋ lɔ̂ʼɔ ndálvûnké ɓá ɗínáké, ka̧ tûl lárá, dáy a laɓa ndálvûn a mɛ̌. Gáŋ mbɔ̂m tɔ́, mbii kporo mbá a gí zaʼa vûnké, dáy zi laŋ nyá, ɓayhí̧lé kú mbó vûnké ɓá béláké.

⁴⁹A njuku ka láɓay a mǐ, ka a zi niŋ pénáké yáy, ɛ́ŋ njuku a há̧na, ka zá vûn a mɛ̌, táŋ ɗáŋ lɔ̂ʼɔ ndálvûnké. Gelka mbɔ̂m tɔ́, mbii kporo mbá a gí zaʼa vûnkéy, vûnké lé a gbuʼuru too kɔ̧ siri!»