Read Capanahua Luk 7 Bible Online

Luk 7 - Capanahua bible

Luk 7

¹Fal ka Zezú ɔrɔ saɓay hí̧ njukuri dáy, ké kála sé ɓil pû Kapɛrnahûm.

²Gáŋnjuku a há̧na ka kaw tûl a ŋgawbére a Rɔmɛri̧ ísɔ́t, erú a ɓil pûké nɔ́. Ké erú ka njukupéna a mɛ̌, a ké zi mambáy, ná záŋmá a zi ɗɛ́ŋ ɓay a hûl.

³Gelka, gáŋnjuku a ŋgawbéreké lá kú saɓay a Zezú, ké pé gáŋnjuku a Juyíf a há̧narí̧, ɓá kú sé vú hí̧ Zezú ɓá: «Ké gí pɛ̧́ njukupéna a mɛ̌ hí̧ nɛ́!»

⁴Dáy, kú sé a gé ka̧ gel a Zezú, a lé mbɛlɛ́ a vú hí̧ nɛ́ a sa: «Njuku ka pé rú gí, ma ɓá mɔ́ lá vúna a mɛ̌!

⁵Ɓayhí̧lé, ké zi njuku a manárí̧ mambá, a mbó vûn mára̧ hí̧ rú»

⁶Gelka, Zezú láɓay ráy, ké uru a sé kuu kuriri. Ka kú zi dɛ́ŋ ɓay a ri ɓil hɛlɛ a gáŋnjuku a ŋgawbéreké, kú gé ziŋ njuku a fékéri, ka gáŋnjuku a ŋgawbére pé kuriri, ɓá kú gí sa hí̧ Zezú ɓá: «Gáŋmbây, mɔ́ dɔʼɔlɔ mûn nɛ́ nyá, ɓayhí̧lé mí zi ma ɓay a mɔ́ gí rí ɓil hɛlɛ a mǐ nyá.

⁷Ɓaykénɔ́ pé niŋ rá̧, pé mi zi gé goló ka mûn ní nyá. Dáy, mɔ́ saɓay mbêw, lé njukupéna a mǐ e ziŋ ŋgɛ́rɛ.

⁸Ɓayhí̧lé, mǐ, mi erú ka gáŋnjuku ka kaw tûl ní ka mi kaw lá kuriri, mi erú ka ŋgawbéreri a bɔʼɔ ní, ka kaw lá nzáʼa ní. Mi sa hí̧ njuku mbêw: “Mɔ́ sé! Lé ké sé.” Mi sa hí̧ njuku a féké ɓá: “Mɔ́ gí! Lé ké gí!” Rá̧ a sa hí̧ njukupéna a mǐ: “Mɔ́ niŋ hɛ̧ nɛ́! Lé ké niŋ!” »

⁹Gelka Zezú láɓay nɔ́, ké zibɔʼɔ ɓay a gáŋnjuku a ŋgawbére, a kí, a sa hí̧ njukuri ka tɔ́ŋ nɛ́y: «Mi sa hí̧ wǎyri, a ɓil a njuku a Izirayɛ́lri too, mi zi kó njuku ka e a mára̧ láɓulaw ɓá báŋa a njuku nɛ́ nyá.»

¹⁰Njukuri ka gáŋnjuku a ŋgawbére pé kuriri, rekála a sé ziŋ njukupéna a gáŋnjuku a ŋgawbére, ziŋ ŋgɛ́rɛ dá.

¹¹A fal hɛ̧ nɔ́rí̧, Zezú mbí ŋgboro ɓay a sé ɓil pû a há̧na, a kú ɗí ɓá Nayîn. Mɛ̌ kuu gunbɛʼɛri, rá̧ njukuri ɓá ŋgɛ̧́náké a sé kuu mɛ̌.

¹²Kú sé a gé zi ɗɛ́ŋ ka pû dá, lé kú kó, kú mbí hûl a gun wɔ̧rɔ̧́njuku a há̧na, ɓay serú tûlpâl, gunké nɔ́ ɓá gun a wûnysêe a há̧na, mâa a mɛ̌ mbuŋ nɛ́ hɛʼɛ. Njuku pûkéri ɓá ŋgɛ̧́náké, tɔ́ŋ wûnysêeké.

¹³Gelka Gáŋmbây gé ka̧, ké gé kó nɛ́ sehaŋ, a sa hí̧ nɛ́: «Mɔ́ pɔŋ vúna!»

¹⁴Dáy, ké ta̧m a gé ɗa sandúku hûl, njukuri ka mbí hûl, gé ew, dáy Zezú sa: «Kaban njuku, mi sa, mɔ́ uru!»

¹⁵Núnmbɛ̧́nɛ́ nɔ́, ké uru a kaw sâa, a tí saɓay, dáy Zezú ŋgbá ndɔ̂ʼɛ a ɓá nɛ́ hí̧ mâa a mɛ̌.

¹⁶Njukuri too, ka e a gelké, wɔ́w ŋgbá kuriri, dáy kú ɗél Gáŋvbôn a sa: «Gáŋ porofɛ́t tɛ̧́ gí bazeŋ a manárí̧! Nǎŋnɔ́ Gáŋvbôn gí hí̧ndɔ̂ʼɔ hí̧ njuku a mɛ̌ri̧!»

¹⁷Ka tísiri a Judé rá̧ pû a gbaŋkéri too, kú saɓay a hɛ̧ ka Zezú niŋ magél too.

¹⁸Gunbɔʼɔ a Zâŋ Batísri kɔ́, láɓay a hɛ̧ ka Zezú niŋ, a gí sa hí̧ Zâŋ. Dáy Zâŋ ɗí njuku sére a bazeŋ a kuriri,

¹⁹a pé kuriri, ɓá kú sé vbí Zezú ɓá: «Mɔ ɓá Kiris, ka e gína, malé, rú zoko njuku a féké lé?»

²⁰Kú gí ka̧ gél a Zezú, a sa hí̧ nɛ́ ɓá: «Zâŋ Batís pé rú gí goló ɓay a rú gí vbí mɔ́ ɓá: Mɔ ɓá Kiris ka rú kaw zoko nɛ́, malé rú zoko njuku a féké lé?»

²¹Gelka kú gé ká̧y, kú gé ziŋ Zezú kaw ŋgɛ́rɛ njuku záŋmári̧ ɓá ŋgɛ̧́náké, njuku kpɛrɛri ɓórí ɓórí, rá̧ njukuri ka têm ɓéké kaw dɔʼɔlɔ kuriri, ka ŋgburu nûn a râ̧wri̧.

²²Falké, ké zi a sa hí̧ kuriri ɓá: «Í sé sa hí̧ Zâŋ, hɛ̧ ka i kó, rá̧ hɛ̧ ka i láy. A í sa hí̧ nɛ́ ɓá: râ̧wri̧ kó gel, njuku bɔʼɔ belyári séséna ɓá béláké, njuku ndɛ́ɓɛri ziŋ ŋgɛ́rɛ, njuku súkú tí yári, láɓay, hûlri toma, kú tɔ́ʼɔ Bélaɓay hí̧ njuku fóyári.

²³Béla hí̧ njuku ka tí sáŋ láɓulaw hí̧ mí nyáy!»

²⁴Gelka, gunbɔʼɔ a Zâŋ Batísri rekála dáy, Zezú mbí ɓay, a sa sé tûl a Zâŋ hí̧ njukuri ka e a gelké ɓá: «A̧hí̧ rá̧ i sé kónáké a ɓil lawkɔ́r lé? Kâ̧wŋgbá a kúna kaw láŋáké lé?

²⁵Dáy, a̧hí̧ i sé kónáké? Njuku a há̧na, ka ri gári a béláké lé? Njukuri ka ri gári a bélákéri, ka a kaw ɓil bélay, kú ziŋ kuriri ɓá, a ɓil pû a mbâyri!

²⁶Dáy a̧hí̧, i sé kónáké lé? Porofɛ́t a há̧na lé? Katína, mi sa hí̧ wǎyri, ké ɓá njuku ka ndé porofɛ́tri ɓáy!

²⁷Ɓayhí̧lé, Zâŋ ɓá njuku ka Mbété a Gáŋvbôn sa ɓá: Mɔ́ lá, mi e pé njuku nzáʼapéna a mǐ tí ɗambɛl hí̧ mɔ́, ɓay a ké gé mɔny ŋgboro ɓay a mɔ̌.»

²⁸Zezú sa ɓáy ɓá: «Katína, njuku a há̧na ka ndé Zâŋ Batís zi tí yá, dáy gun a lélé a ɓil Pû a Gáŋvbôn, ndé nɛ́ ka hɔ̧́na.

²⁹Njukuri too, rá̧ njuku mára̧ lari lambô a Rɔmɛri̧, ka lá nɛ́y, tu ɓá Gáŋvbôn kaw ɓá njuku a ndáráké, a zibɔʼɔké, dáy Zâŋ Batís ɓá kuriri nyá batêm.»

³⁰Dáy Fariziyɛ̧́ri̧ rá̧ njuku tɔ́ʼɔ sáŋnari̧, sáŋ hɛ̧ ka Gáŋvbôn mɔny ɓay a kuriri, nǎŋnɔ́, kú zi zibɔʼɔké ɓá Zâŋ Batís, ké ɓá kuriri nyá batêm nyá.

³¹Zezú sa ɓáy ɓá: «A gé, mi e ɓá lé njuku a ŋgɛŋnɛ́ nɛ́rí̧ lé? Kú ɛ́ŋ geriy lé?

³²Kú ɛ́ŋ gun a léléri, a kaw ɓil ɓara ka lawgel a pû, a saɓay hí̧ há̧narí̧ ɓá: Rú haŋ nzáŋá, i zi ndá nday yá! Rú ɗí si̧ŋ hûl, I zi vú yá!

³³Nǎŋnɔ́ pé Zâŋ Batís gí, a sɔ̧́lâʼa nyá, a nzó vôn nyá, i sa ɓá: Ké ɓá njuku záŋmá têm ɓéké!

³⁴Gun a njuku gí, mɛ̌ ké lâʼa, a nzó, i sa ɓá: Í kó, njuku nɛ́, péna a mɛ̌, ɓá lâʼa rá̧ nzó vôn, ké mbáŋ ɓá njuku mára̧ lari lambô a Rɔmɛri̧ rá̧ njuku a fékéri ka ɓá ɓéké njukuri!

³⁵Dáy njukuri ka nyá Gáŋvbôn, tu ɓá rɔ̧́na a mɛ̌, ná ɓá ndáráké.»

³⁶A falké, Fariziyɛ̧́ a há̧na ɗí Zezú ɓá ké gí sɔ̧́lâʼa kuu mɛ̌. Dáy, Zezú gí ka̧ pû mɛ̌, a gí kaw nzáʼa lâʼa.

³⁷Wûny a há̧na e a ɓil pûké, a kaw ɓá wûny niŋ dala. Gelka, ké lá ɓá Zezú e ka pû a Fariziyɛ̧́ nɔ́ ɓay a sɔ̧́lâʼay, ké uru, a gí ka gun kû a kú mɔny ka saw a kú ɗí ɓá albatɛrɛ, mbá ka mára̧ yámbó.

³⁸Ké gí ri, a kaw fal a Zezú, ka gbaŋ bɛʼɛ, a tí vúna, ka vú, mbii nûn nɛ́ too kɔ̧ tûl bɔʼɔ a Zezú, ké retáʼa tûl bɔʼɔké, ka tâny tûlé, a fere yámbó nɔ́ ru̧.

³⁹Fariziyɛ̧́, ka ɗí Zezú gíy, kó a kɛrɛ a ɓil lawɛ́ ɓá njuku nɛ́, mí ɓá gbát porofɛ́t, ké e tu káwa a wûny nɛ́ ka ɗa nɛ́y, a tu ɓá wûny nɛ́, ɓá wûny niŋ ɓékéhɛ̧.

⁴⁰Dáy Zezú mbí ɓay a sa hí̧ nɛ́: «Simɔŋ, mi erú ka ɓay, ɓay a sa hí̧ mɔ́.» Simɔŋ sa: «Mɔ́ sa gé Gáŋnjuku.»

⁴¹Dáy Zezú sa: «Njuku a há̧na kaw tɔ́ŋ njukuri sére ka nyá túna lari a gé lé, dáy titíla njuku e rerú lariké sáki ísɔ́t ndíɓí, a njuku a séreké, e rerú sáki bondíɓí yáŋ.

⁴²Ké vbí kpú̧y, kuriri sére too, kú zi tí ka ŋgɛ́rɛ rerú yá, dáy ké sa ɓá ké e pɔŋ lariké hí̧ kuriri, a tí vbínáké mbaa. A kó ná mɔ̌, njuku a sí̧ a bazeŋ a kuriri sére nɔ́, e zi njuku lari nɔ́ ndé lé?»

⁴³Simɔŋ rerú a sa: «Ɓá njuku a nɔ́, ka nyá lari ŋgɛ̧́ mambáy.» Zezú sa hí̧ nɛ́ ɓá: «Mɔ sa gbátɓay.»

⁴⁴Nǎŋnɔ́, ké fere a ɛ̧rɛ̧ wûny ráy, a sa hí̧ Simɔŋ ɓá: Mɔ kó wûny nɛ́ lé? Mi gí rí ɓil vûn a mɔ̌, mɔ zi hí̧ mí mbii, ɓay a mí turu bɔʼɔ ní nyá, dáy, wûny nɛ́, ké turu bɔʼɔ ní ka mbii nûn nɛ́, ka táʼa ka tâny tûlé.

⁴⁵Ka mi gí nɛ́y, mɔ zi nam mí, a zi sí̧ŋ mí nyá. Dáy, wûny nɛ́ ɗiɓaŋ dá, a ké ri vûn nɛ́, ké zi ta̧ ka sí̧ŋ bɔʼɔ ní nyá.

⁴⁶Mɔ zi ɓá mára̧ há̧na tɛ̧́w nɔ́ tûl ní nyá, dáy mɛ̌, ké ɓá mára̧ yámbó nɔ́ bɔʼɔ ní.

⁴⁷Ɓaykénɔ́, mi sa hí̧ mɔ́: wûny nɛ́, mára̧ zína nɔ́ a ké tɔ́ʼɔy, tɔ́ʼɔ ɓá ɓékéhɛ̧ a mɛ̌ ɓá ŋgɛ̧́náké lú dá. Njuku a kú lú ɓékéhɛ̧ a mɛ̌ kpay yáŋ, zína a mɛ̌ pí ná kpay.

⁴⁸Dáy, Zezú sa hí̧ wûny ráy ɓá: «Ɓékéhɛ̧ a mɔ̌ lú dá.»

⁴⁹Njukuri ka kaw kuu mɛ̌ a ɓil vûn a nzáʼa lâʼa, tí ŋgɔ̧rɔ̧ a bazeŋ a kuriri ɓá: «Njuku nɛ́, ɓá gé rá̧, a sa ɓá ɓékéhɛ̧ a njuku lú dáy lé?»

⁵⁰Zezú resa hí̧ wûny ráy ɓá: «Láɓulaw a mɔ̌ pɛ̧́ mɔ dá. A vónáké, ké sé kuu mɔ̌.»