Read Capanahua Luk 8 Bible Online

Luk 8 - Capanahua bible

Luk 8

¹Falké, Zezú uru a há̧ra̧ lá gáŋ pû rá̧ gun pûri too, a tɔ́ʼɔ Bélaɓay sé tûl káwa Mbây a Gáŋvbôn. Gunbɛʼɛri bôo a sére e kuu mɛ̌,

²rá̧ wûnynjuku a há̧narí̧, ka Zezú ŋgɛ́rɛ záŋmá a kuriri, a ní têm ɓéké ka mûn a kuriri: Marí a Makdala ɓá wûny ka têm ɓéké zíndɔ̂ʼɔsáy tɛ̧́ ka mûn nɛ́,

³rá̧ Zâ̧n, wûny a Suza kɔ́, njukupéna a mbây Herod; Sizâ̧n rá̧ wûnynjuku a fékéri, ka tɔ́ŋ Zezú, ka a hí̧ndɔ̂ʼɔ hí̧ nɛ́ kuu gunbɛʼɛri.

⁴Zezú kaw séséna, njukuri mára̧ gí ka pûri ɓórí ɓórí too gí gé lé, dáy, Zezú mbí ɓay a sa ka galaɓay hí̧ kuriri ɓá:

⁵«Njuku a há̧na, sé mí mɛ̧rɛ̧ a ɓil wâʼa a mɛ̌, a ké kaw mínákéy, mɛ̧rɛ̧ a fékéri to kɔ̧ gbaŋ ŋgboro, njukuri tá ka ndáʼa, ndoyri gí a lâʼa.

⁶Mɛ̧rɛ̧ a há̧narí̧ to kɔ̧ tûl lárá, gelka mɛ̧rɛ̧ ké tí tɛ̧́nay, ké hɔ́ʼɔ, ɓayhí̧lé siri zi ŋgɛ̧́ a gelké yá.

⁷Mɛ̧rɛ̧ a fékéri to kɔ̧ ɓil ŋgátúru, a uru mbêw kuu ŋgátúru, dáy têm ŋgátúruké zi, a de kuriri hɔ̧́na.

⁸Mɛ̧rɛ̧ a fékéri ɓáy, to kɔ̧ siri a béláké, a tɛ̧́, ka hɔ̧́, a lé, dii mbêw ka hí̧ lénáké ísɔ́t: Zezú ɔrɔ ɓay a sa: Njuku mí erú a súkú lánáké lé, ké lá.»

⁹A falké gunbɛʼɛri vbí nɛ́ ɓá galaɓay nɔ́, zi ɓay a sa ɓá hí̧ lé?

¹⁰Zezú sa hí̧ kuriri ɓá: «Gáŋvbôn, hí̧ wǎyri ŋgboro tu gbát hɛ̧ ka kó káwa mbây a mɛ̌, a ná ɓá múnáké. Dáy, a njuku a fékéri, ka ŋgboro a galaɓay pé kú e saɓay hí̧ kuriri, rá̧ ké niŋ ɓá báŋké ka Mbété a Gáŋvbôn tí sáy: Kú e ɛ̧rɛ̧ gel, a tí kó gel yá, kú e láɓay, a tí lá ɓilké yá.»

¹¹Zezú ten táŋa a galaɓayké hí̧ kuriri a sa: Mɛ̧rɛ̧ hɛ̧pay ɓá ɓay a Gáŋvbôn.

¹²Gbaŋ ŋgboro ka mɛ̧rɛ̧ a há̧narí̧ to kɔ̧rú̧y, ɓá njukuri ka láɓay a Gáŋvbôn dát, dáy Sata̧n gí, a lú ɓayké a law a kuriri, ɓay kú zi ná nyá ɓayké, a Gáŋvbôn ké pɛ̧́ kuriri.

¹³A tûl lárá, ɓá njuku a fékéri ka láɓay a Gáŋvbôn, ka a nyá ɓayké ka sáʼa, dáy ɓayké zi ɓara sɛ̧w a law kuriri yá, láɓulaw a kuriri ɔ ɓá gelké nɔ́, gelka hɛ̧ ŋgɛ́rɛ́ké gí ka̧ lé, kú sáŋ láɓulaw a kuriri.

¹⁴Mɛ̧rɛ̧ a féké ka to kɔ̧ ɓil ŋgátúru, ɓá njukuri ka láɓay a Gáŋvbôn, dáy hɛ̧ kɛrɛ a tísiri, hɛ̧zíŋa rá̧ ɛ̧ béla káwa a tísiri tá tûl a kuriri, a tɛwrɛ ɓay a Gáŋvbôn a law a kuriri, nǎŋnɔ́, léna a kuriri zi kpáʼa yá.

¹⁵Mɛ̧rɛ̧ a ǎ̧w, ka to kɔ̧ ɓil siri a béláké, ɓá njukuri ka láɓay a Gáŋvbôn, ka a nyá ɓayké a law mbêw, ka a koro ɓayké, ka a niŋ pénáké ɓá báŋké nɔ́y, dáy a hí̧ léna.

¹⁶«Njuku a há̧na tí ɓá hɔrɛ ka̧n lámbe ɓay a ɓá hɛ̧ guku rú malé ɓay a ɓá si bɔʼɔ gasáʼa yá. Kú ɓá hɔrɛ ka̧n lámbe lé, ɓay a ɓá si tûl tay rá̧ njuku mí kaw ri ɓil vûn lé, ké kó gel ɓá táŋáké.

¹⁷I tu ɓá, hɛ̧ too, ka e gel a múnáké a sénɛ́y, e tɛ̧́ ka̧n gel a dawá a sêeké. Hɛ̧ há̧na mbêw ka e ná ɓá hɛ̧ a múnáké, ka njuku zi túnáké, a saɓayké ka gel a dawá yáy, zi tí ná nyá.

¹⁸Mi kaw sa hí̧ wǎyri, í kó báŋ láɓay a Gáŋvbôn a wǎyri ɓá táŋáké! Ɓayhí̧lé njuku ka erú ka hɛ̧y, kú e hí̧ nɛ́ hɛ̧ ɓá ŋgɛ̧́náké, dáy a njuku ka zi tí rú yáy, kú e relú a kpayké nɔ́ a ké kɛrɛ ɓá ké erúy.»

¹⁹Gelka Zezú kaw tɔ́ʼɔɓay a Gáŋvbôn hí̧ njukuri, lé mâa a mɛ̌ rá̧ nyîn nɛ́rí̧ gí ka̧, ɓay a kó nɛ́, dáy a zi ziŋ ŋgboro ka̧ gel a ké erú yá, ɓayhí̧lé njukuri daw mambá.

²⁰Kú gí sa hí̧ Zezú ɓá: «Mâa a mɔ̌ kuu nyîn nɔ́rí̧, gí a e a kála, kú zi ɓay a kó mɔ́.»

²¹Zezú fere a sa hí̧ njukuri ɓá: «Mâa a mǐ rá̧ nyîn a mǐri̧, ɓá njukuri ka kaw láɓay a Gáŋvbôn, ka a niŋ hɛ̧ a ké vbíy.»

²²Sêe a há̧na Zezú rá̧ gunbɛʼɛri ri ɓil kumbôn, dáy Zezú sa kú he sé helkála mbii a ŋgboro sá̧. Dáy, kú he ɓay a séna.

²³Ka, kú kaw sénay, Zezú tá nâm. Zaa kpay kú kó lé, gáŋ kúna uru a tûl mbii, ka tí fá̧ mbii kɔ̧ ɓil kumbôn, mbii tí mbá ɓil kumbôn, dáy kú ŋgú wɔ́w ɓá kumbôn ké zi ná riŋ ka kuriri.

²⁴Nǎŋnɔ́, kú toma nɛ́ a sa: «Gáŋnjuku, Gáŋnjuku, ná e hûl!» Zezú toma, a pom kúna rá̧ gbélém mbii, lé kúna rá̧ mbii ew, gel ná yím.

²⁵Falké, Zezú sa hí̧ kuriri: «Ɓayhí̧, i zi ɓá láɓulaw a wǎyri dát ka̧n tûl ní nyá lé?» Wɔ́w ŋgbá kuriri kú kaw yér, a vbí há̧narí̧: «Mára̧ njuku nɛ́ ɓá njuku a sí̧ rá̧ saɓay rá̧ kúna kuu mbii lá nzɛ́ʼɛ lé?»

²⁶Zezú rá̧ gunbɛʼɛri sé ka̧ helkála a mbii a tísiri a Zeraseniyɛ̧, ka ɛ̧rɛ̧ há̧na kuu Galilê.

²⁷Gelka Zezú ɗere a ɓil kumbôn, njuku a há̧na a ɓil pûké gí ziŋ nɛ́. Njukuké, têm ɓéké ri nɛ́ ɗiɓaŋ dá, ka ɓá nɛ́ há̧ra̧ táŋ gári, ké zi ná vûn nyá, ka ná ɓá tûlpâlri.

²⁸Gelka ké mbí nûn nɛ́, ka a kó Zezú, ké gí lé siri a bɛʼɛ, a vbá̧nzáʼa ɓá gbénáké, a sa: «Zezú Gun a Gáŋvbôn a nûnalê, a̧hí̧ mɔ zi kuu mǐ lé? Mi vú hí̧ mɔ́, mɔ́ zi ná ɓá mi tɔ́ʼɔsêe.»

²⁹Ké sa nǎŋnɔ́, ɓayhí̧lé Zezú sa hí̧ têm ɓéké ɓá ké tɛ̧́ ka mûn nɛ́. Têm ɓékéké ɗiɓaŋ ka mûn nɛ́ dá, bɔʼɔké ŋgɛ̧́ mambá, ké kaw gí dɔʼɔlɔ nɛ́. Nâm too, ké kaw niŋ nɛ́ lé, ké uru a ŋgú, kú ní nɛ́, a ŋgbá nɛ́, a ŋgá̧ bɛʼɛ a sɛl wɛ̧̂ɛ vbú dii. Ké e kúŋ sɛl wɛ̧̂ɛ, a haw diiké. Nǎŋnɔ́, têm ɓékéké, ɓá nɛ́ há̧ra̧ ɓá ɓil kpâa rá̧ falgel.

³⁰Dáy, Zezú vbí nɛ́ ɓá: «Rɛŋɔ́ ɓá hí̧ lé?» Ké sa hí̧ Zezú ɓá, rɛŋ ní ɓá: «Daw mambá.» Ké sa nǎŋnɔ́, ɓayhí̧lé têm ɓéké ka e ka mûn nɛ́ ɗiɓaŋ, a daw mambá.

³¹Nǎŋnɔ́, têm ɓékéri vú hí̧ Zezú, ɓá ké zi ná ɓá kuriri sé ɓil gáŋ lɔ̂ʼɔ a kɔ́rɔ́ké zi tí yáy.

³²Ka kú kaw sa nǎŋnɔ́, kɔsɔri e ka gelké, a kaw há̧ra̧, a ɛ́ lâʼa ka haŋ kon. Dáy, têm ɓékéri vbí Zezú ɓá, ké pɔŋ kuriri a kú sé ri mûn a kɔsɔkéri. Dáy ké zibɔʼɔké.

³³Núnmbɛ̧́nɛ́, kú tɛ̧́ ka mûn a njuku ráy, a sé ri mûn a kɔsɔri. Kɔsɔri ŋgú ɗere kon, a gé lé kɔ̧ ɓil fâ̧w, a hú kɔ̧rú̧.

³⁴Gelka njuku koro kɔsɔri, kó nǎŋnɔ́ dáy, kú ɓɛrɛ há̧narí̧ a ŋgú kála sé saɓayké hí̧ njukuri lá ɓil pûri, rá̧ ɓil kaw too.

³⁵Njukuri lá, a tɛ̧́ gí kónáké. Kú gí ka̧ gelka Zezú erú lé, kú gé kó njuku ráy ka têm ɓéké tɛ̧́ ka mûn nɛ́, kaw ka gbaŋa Zezú, ɓá béláké, a ri gári. Kú kó nǎŋnɔ́, wɔ́w ŋgbá kuriri.

³⁶Njukuri ka e a gelké, ka a kó títáʼa hɛ̧ké, sa báŋké ka njuku têm ɓéké nɔ́ ziŋ ŋgɛ́rɛ.

³⁷Dáy, njuku Zeraseniyɛ̧ri̧ vú hí̧ Zezú, a sa hí̧ nɛ́ ɓá ké tɛ̧́ a ɓil kaw a kuriri, ɓayhí̧lé wɔ́w ŋgbá kuriri mambá. Núnmbɛ̧́nɛ́, Zezú ri ɓil kumbôn a kála.

³⁸Nǎŋnɔ́, njuku ka têm ɓéké tɛ̧́ ka mûn nɛ́, vú hí̧ Zezú ɓá, ké zi ɓay a sé kuu mɛ̌. Dáy Zezú zi yá a sa hí̧ nɛ́ ɓá:

³⁹«Mɔ́ resé pû mɔ̌, a sé sa hí̧ njukuri, béla hɛ̧ too ka Gáŋvbôn niŋ hí̧ mɔ́y.» Dáy njuku ráy rekála, a sé sa ma ɓil pûri too, hɛ̧ ka Zezú niŋ hí̧ nɛ́.

⁴⁰Gelka Zezú regí helkála mbii a kíní, njukuri kaw zoko nɛ́, a nyá nɛ́ ka mûnrína.

⁴¹Gáŋnjuku a há̧na, kaw ɓá mbây a vûn mára̧ a Juyífri, rɛŋɛ́ ɓá Zayrús. Ké gí ŋgbá bɔʼɔ a Zezú, a vú hí̧ nɛ́ ɓá, ké zi ɓá Zezú, ké gí ɓil vûn a mɛ̌,

⁴²ɓayhí̧lé gun a lɔŋɔ́ a mɛ̌ mbêw yáŋ, a erú ka mbimbɔ̂m bôo a sére, ná záŋmá, a zi ɗɛ́ŋ ɓay a hûl. Gelka Zezú uru kaw sénay, njukuri sé ɗɔ́ŋ nɛ́ a sɔʼɔrɔ há̧narí̧.

⁴³Wûny há̧na e a ɓil a njuku nɔ́rí̧. Ké erú ka záŋmá fihoy. Ké há̧ra̧, a ɛ́ nda̧m mbimbɔ̂m bôo a sére, ka ɓew lari a mɛ̌ too ka gel a njuku hí̧ nzáʼagoyri.[3] A ɓil a njuku nɔ́rí̧ too, njuku ŋgɛ́rɛ nɛ́, mbêw zi tí yá.

⁴⁴Nǎŋnɔ́, ké gí a fal, a gí ɗa nzáʼa gári a Zezú, núnmbɛ̧́nɛ́, ké gí ziŋ ŋgɛ́rɛ.

⁴⁵Dáy, Zezú vbí ɓá: «A gé ɗa mi lé?» Njukuri too sa háy, kú zi tu yá, dáy Píyɛ́r sa: «Gáŋnjuku, njukuri sé ɗɔ́ŋ mɔ́, a sɔʼɔrɔ há̧narí̧, mɔ́ vbí a gé ɗa mɔ́ lé? Ná e sa ɓá gé lé?»

⁴⁶Zezú sa ɓáy ɓá: «Njuku a há̧na mbêw ɗa mí. Ɓayhí̧lé mi lá, ŋgɛ́rɛ a há̧na tɛ̧́ ka mûn ní.»

⁴⁷Wûny ráy kó ɓá Zezú tu dá, a tí tɔ́ mûn nɛ́, a gí ŋgbá bɔʼɔ a Zezú. A tí táʼa sa a mbɛl a njukuri too, hɛ̧ ka niŋ rá̧, a ké gí ɗa nzáʼa gári a Zezú, ka a ziŋ ŋgɛ́rɛ a núnmbɛ̧́nɛ́ nɔ́y.

⁴⁸Dáy, Zezú sa hí̧ nɛ́: «Gun a mǐ, láɓulaw a mɔ̌ pɛ̧́ mɔ́ dá, a vónáké, ké sé kuu mɔ̌.»

⁴⁹Gelka Zezú kaw sa nǎŋnɔ́, njuku a há̧na gí ka pû a mbây a vûn mára̧ a Juyífri nɔ́, a gí sa hí̧ nɛ́ ɓá: «Mɔ́ dɔʼɔlɔ Gáŋmbây mbaa, ɓá gun a mɔ̌ hú dá.»

⁵⁰Zezú láɓay ráy, a sa hí̧ Zayrús ɓá: «Mɔ́ ŋgú wɔ́w yá, mɔ́ láɓulaw hí̧ mí, gun a mɔ́ e pɛ̧́na.»

⁵¹Gelka Zezú sé ka̧ pû a Zayrús, ké gé de njuku a fékéri, ɓá kú zi ná ri ɓil vûn, pɔŋ ɓá Píyɛ́r, Zâŋ, Ják rá̧ bâa a gun rá̧ mâa a gun.

⁵²Njukuri too, kaw vúna, ka órómûn a Kuriri, ɓay tûl a gun nɔ́. Dáy Zezú sa: «Í pɔŋ vúna, ké zi hú yá, ké ná nâm.»

⁵³Njukuri lá, a sáʼa nɛ́, ɓayhí̧lé kú tu ɓá gunké hú dá.

⁵⁴Dáy Zezú sé, a gé ka̧ gel a kú ɓá gun nárú̧y, a gé ŋgbá ndɔ̂ʼɛ, a sa ɓá gbénáké: «Gun, mɔ́ uru!»

⁵⁵Têm mûn nɛ́ regí, dáy núnmbɛ̧́nɛ́ nɔ́ ké toma, a uru, a kaw sâa. Zezú sa, kú hí̧ nɛ́ hɛ̧lâʼa.

⁵⁶Bâa a mɛ̌ rá̧ mâa a mɛ̌ kó, a kaw yér, dáy Zezú sa hí̧ kuriri ɓá, kú zi ná saɓayké, hí̧ njuku a há̧na.