Read Capanahua Zâŋ 12 Bible Online

Zâŋ 12 - Capanahua bible

Zâŋ 12

¹Pâk a Juyífri zi nâm zêe ɓáy, dáy Zezú uru sé Betaní pû Lazár; njuku ka Zezú toma nɛ́ a hûl.

²A goló kú niŋ lâʼa hí̧ Zezú, Márta kaw wal lâʼaké kɔ́, Lazár erú kɔ́ a bazeŋ a njukuri ka kaw nzáʼa lâʼaké kuu Zezú.

³Marí kó nǎŋ, a mbí kuu mára̧ yámbó a kú niŋ ka dii nár a béláké ka lariké ŋgbɔ́rɔ mambáy, ŋgɛ̧́náké mambɛ̧́nɛ́ kuu lawgel a litɛrɛ mbêw, a gí fere kɔ̧ bɔʼɔ a Zezú. Falké, ké táʼa tûl bɔʼɔ a Zezú ka tâny tûlé, dáy ba̧ny yámbóké fɔ̧ nyá ɓil vûn too.

⁴Lé Judas Ɛskariyót ka ɓá mbêw a bazeŋ a gunbɔʼɔ a Zezúri, mɛ̌ nɔ́ pé e zé Zezú, mbí ɓay a sa:

⁵«Ɓayhí̧rá̧ kú pɔŋ mára̧ yámbó nɔ́, kú zé lariké kumrá̧ké ísɔ́t sáy,[6] a wal hí̧ njuku fóyári yáy lé?»

⁶Ké saɓayké nɔ́, tí ɓá ɓay a sa ɓá ké kósêe a njuku fóyári yá, ɓá ɓáy hɛ̧ a ké kaw ɓá ríwa. Mɛ̌ pé koro ŋgú lari dáy sêe a féké lé, ké kaw ríw lari a ɓilké.

⁷Dáy Zezú sa: «Mɔ́ pɔŋ wûny nɛ́ ták! Ké mɔny mára̧ yámbó nɔ́ zoko nâm goro mí.

⁸Njuku tɔ́ʼɔsêeri e kuu wǎyri dát, dáy a mǐ, mi tí kaw dát kuu wǎyri yá.»

⁹Njukuri ɓá ŋgɛ̧́náké lá ɓá Zezú e ka Betaní. Kú sé Betaní tí ɓá ɓay a kó Zezú mbêw yáŋ nyá, dáy ɓá ɓay a kó Lazár kɔ́, ka Zezú toma nɛ́ ka hûl.

¹⁰Ɓaykénɔ́ pé gáŋnjuku nzáʼaká̧nari̧ ŋgá̧nzáʼa ɓá kú í Lazár kɔ́,

¹¹ɓayhí̧lé, ɓay tûl a Lazár pé njukuri ɓá ŋgɛ̧́náké sáŋ kuriri pé a láɓulaw hí̧ Zezúy.

¹²Típélé a féké, njukuri ɓá ŋgɛ̧́náké, ka gí ɓay a Pâk, lá ɓá Zezú kaw gí ɓá Zerúzalɛ̂m,

¹³a kú fɛrɛ pâmndɔ̂ʼɔ dii mára̧ mburu, a sé nyá Zezú. Kú vbá̧nzáʼa a sa: «Hɔ̧́na ké hí̧ Gáŋvbôn! Gáŋvbôn ké ɗí béla kɔ̧ tûl a njuku ka gí ka rɛŋ a Gáŋmbây, Mbây a Izirayɛ́l!»

¹⁴Zezú ziŋ gun máhóla dáy a hɛ̧ kaw tûlké, ɓá báŋké ka ɗé ka̧n ɓil Mbété a Gáŋvbôn ɓá:

¹⁵«Ŋgú wɔ́w yá, pû Siyɔŋ! Mɔ́ kó! Mbây a mɔ̌ kaw gína! Ké he kaw tûl gun máhóla.»

¹⁶A ɓil nâmké nɔ́, gunbɔʼɔ a Zezúri zi lá ɓil hɛ̧ ka kaw tána nyá, dáy gelka Gáŋvbôn mbí Zezú sé nûnalê, ka hí̧ hɔ̧́na hí̧ nɛ́y, kú rekɛ́rɛ ɓay ka ɗé ka̧n ɓil Mbété sé tûl a Zezú, a goló pé kú tu ɓá, njukuri niŋ hɛ̧ ka Mbété a Gáŋvbôn tí sáy.

¹⁷Njukuri too ka e kuu Zezú, a sêe a ké ɗí Lazár a lɔ̂ʼɔpâl, ka a toma nɛ́ ka hûl, saɓay a hɛ̧ a kú kóy.

¹⁸Ɓaykénɔ́ pé, njukuri ɓá ŋgɛ̧́náké gí ziŋ Zezú, ɓayhí̧lé kú láɓay a hɛ̧sáʼamari̧ a ké niŋ.

¹⁹A goló, Fariziyɛ̧́ri̧ sa a bazeŋ kuriri ɓá: «I kó, ná ma niŋ hɛ̧ a há̧na mbêw yá: Njukuri too tɔ́ŋ nɛ́!»

²⁰Njuku Girɛ́k a há̧narí̧ e a bazeŋ a njukuri ka gí Zerúzalɛ̂m ɓay hɔ̧́ Gáŋvbôn ka nâm Pâk.

²¹Kú sé gbaŋa Filíp ka (ɓá gun pû a Bɛtsayidá ka tísiri a Galilê), dáy a vbí nɛ́ ɓá: «Gáŋnjuku, rú zi ɓay a kó Zezú.»

²²Filíp ta̧m sé sa hí̧ Anderé dáy kú sé sére too sé sa hí̧ Zezú.

²³Zezú resa hí̧ kuriri ɓá: «Sêeké ka̧ dá, ka Gun a njuku e ziŋ hɔ̧́nay.

²⁴Katína, mi sa hí̧ wǎyri: Mɛ̧rɛ̧ hɛ̧pay kaw mbêw yáŋ, a ké mí zi vbú tísiri ka hú yáy. Dáy ké mi húy, ké e hí̧ léna ɓá a ŋgɛ̧́náké.

²⁵Njuku ka zi ndísɛ̌ʼɛ a mɛ̌, ké e pɛ̧ra̧ké. Dáy a njuku ka kó ndísɛ̌ʼɛ a mɛ̌ ɓá hɛ̧ a ɓǎŋké ka tísiri nɛ́, ké e ziŋ ndísɛ̌ʼɛ a nûnalê ka ma ɔna bɔʼɔ mbêw yáy.

²⁶Njuku mí zi ɓay a niŋ péna a mǐ lé, ké tɔ́ŋ mí, rá̧ gelka mi e kawrúy, ké e kawrú kɔ́ kuu mǐ. Nǎŋnɔ́ Bâa a mǐ e hí̧ ɗéla hí̧ njuku ka kaw ɓá njuku péna a mǐ.»

²⁷Zezú sa ɓáy: «Ŋgɛŋnɛ́, law ní e a ɓil kɛrɛ ɓay ɓórí ɓórí. Dáy a̧hí̧ mi e sanáké lé? Mí sa ɓá: Bâa, mɔ́ pɛ̧́ mí a ɓil tɔ́ʼɔsêe ka e ka̧ mí a ŋgɛŋnɛ́ lé? Dáy, ɓá ɓay a tɔ́ʼɔsêe nɔ́ pé mi gíy.

²⁸Bâa, mɔ́ hí̧ hɔ̧́ná hí̧ rɛŋɔ́!» A goló, kɔŋá há̧na gbé a nûnalê a sa: «Mi hɔ̧́ rɛŋké dá, dáy mi e réhɔ̧́ nɛ́ ɓáy ɓá a féké.»

²⁹Njukuri ka e a gelké ka a láɓay nɔ́, sa ɓá: «Mbɔ̂m pé pom!» Njuku a fékéri sa ɓá: «Aŋnze a há̧na pé saɓay hí̧ nɛ́y!»

³⁰Dáy Zezú sa: «Zi tí ɓá ɓay a mǐ, pé kɔŋ nɔ́ gbéy yá, ɓá ɓay a wǎyri.

³¹Ɓá ŋgɛŋnɛ́ pé, Gáŋvbôn e walɓay kɔ̧ tûl a njuku a tísiriri. Ŋgɛŋnɛ́ mbây a tísiri nɛ́, kú e ní nɛ́ gefal.

³²Dáy a mǐ, gelka kú e gbaŋ mí sé sâay, mi e kɔʼɔ njukuri too gí gel ní.»

³³(Ké sa nǎŋ, ɓay a tɔ́ʼɔ báŋké a ké e ziŋ hûl.)

³⁴Dáy njukuri sa hí̧ nɛ́: «A ɓil Mbété a sáŋna a Gáŋvbôn a ɓurú, sa ɓá Kiris e kaw ka ndísɛ̌ʼɛ dát. Dáy ná a̧ní rá̧, mɔ̌, mɔ sa ɓá: Kú e gbaŋ Gun a njuku sé sâa lé? Gun a njukuké ɓá gé lé?»

³⁵Zezú sa hí̧ kuriri ɓá: «Geltáŋa erú a bazeŋ a wǎyri sɛl sêe kpay ɓáy. I séséna ka geltáŋa pa̧n kuu wǎyri ɓáy, rá̧ tirí̧ma ké gí nduʼuru wǎyri yá. Njuku ka séséna a ɓil tirí̧ma, zi tu gel a ké kaw sérúy yá.

³⁶Gelka i erú ka geltáŋa ɓáy, í láɓulaw hí̧ geltáŋa, rá̧ i ma kaw ɓá gun a geltáŋari̧.» A fal saɓay nɔ́, Zezú kála a sé mú ɓá ɗínáké ka njukuri.

³⁷A ɓil a nɔ́ ka Zezú niŋ hɛ̧sáʼamari̧ ɓá a ŋgɛ̧́náké a bazeŋ a njuku nɔ́rí̧, kú zi láɓulaw hí̧ nɛ́ nyá.

³⁸Nǎŋnɔ́ rá̧ ké niŋ ɓá báŋké ka porofɛ́t Ezayí sáy: «Gáŋmbây, a gé láɓulaw sé tûl ɓay ka rú sáy lé? A gé, Gáŋmbây tɔ́ʼɔ kpɔ́ŋa a mɛ̌ hí̧ nɛ́ lé?»

³⁹Nǎŋnɔ́, kú ma láɓulaw yá, ɓayhí̧lé Ezayí sa kɔ́:

⁴⁰«Gáŋvbôn râ̧w nûn a kuriri, a kpúlaw a kuriri, rá̧ kú ziŋ kó gel ka nûn a kuriri yá, rá̧ kú ma tu hɛ̧ nyá. Rá̧ kú fere káwa a kuriri, a mí ŋgɛ́rɛ kuriri yá!»

⁴¹Ezayí saɓay nɔ́, ɓayhí̧lé ké kó hɔ́ná a Zezú dáy a saɓay a mɛ̌.

⁴²Nǎŋnɔ́, a bazeŋ a gáŋnjuku a Juyífri ɓá ŋgɛ̧́náké, kú láɓulaw hí̧ Zezú. Dáy ɓay tûl wɔ́w a Fariziyɛ̧́ri̧, kú zi saɓayké tɛ̧́ kála yá, ɓáy kú zi ná ní kuriri a vûn gɔ́ŋ Gáŋvbôn.

⁴³Ɓayhí̧lé kú zi ɗéla a njukuri ndé ɗéla ka gí a gel a Gáŋvbôn.

⁴⁴Zezú sa ɓá gbénáké ɓá: «Njuku ka láɓulaw hí̧ mí, zi láɓulaw hí̧ mí mbêw yáŋ nyá, ké láɓulaw hí̧ njuku ka pé mí gíy kɔ́.

⁴⁵A njuku ka kó míy, ké kó njuku ka pé mí gíy kɔ́.

⁴⁶Mi gí ɓá báŋa geltáŋa gí tísiri, rá̧ njuku too ka láɓulaw hí̧ mí, ké kaw ɓil tirí̧ma nyá.

⁴⁷Njuku mí láɓay a mǐ rá̧ a mí zi koro yáy, zi tí ɓá mǐ pé e walɓay kɔ̧ tûlé yá, ɓayhí̧lé mi zi gí walɓay kɔ̧ tûl a njuku ka tísiri yá, mi gí ɓay a pɛ̧́ njuku a tísiriri.

⁴⁸Njuku ka sáŋ mí, ka zi nyá ɓay a mǐ nyáy, ziŋ hɛ̧ ka e walɓay kɔ̧ tûléy dá, ɓá ɓay ka mi tɔ́ʼɔy, pé e walɓay kɔ̧ tûléy a sêe a kɔ́rɔ́ké.

⁴⁹Ɓayhí̧lé ɓay ka mi sáy, zi gí ka gel ní nyá, ɓá Bâa a mǐ ka pé mí gíy, mɛ̌ pé tɔ́ʼɔ mí ŋgboro ɓay too ka mi e sanáké, ka tɔ́ʼɔy.

⁵⁰Dáy mi tu ɓá, ɓay ka Gáŋvbôn sáy, pé hí̧ ndísɛ̌ʼɛ ka zi ɔ nyáy. Nǎŋnɔ́, ɓayri too ka mi sáy, mi sa ɓá báŋké nɔ́ ka Bâa a mǐ sa hí̧ mí.»