Read Capanahua Zâŋ 13 Bible Online

Zâŋ 13 - Capanahua bible

Zâŋ 13

¹A Pâk zi nâm mbêw, Zezú tu ɓá nâm a mɛ̌ gí ɗɛ́ŋ dá, ɓay ké pɔŋ tísiri nɛ́ a ké he sé gel a Bâa a mɛ̌. Zezú zi njuku a mɛ̌ri̧ ka e ka tísiri, nǎŋnɔ́ ké tɔ́ʼɔ zína a mɛ̌ hí̧ kuriri ka kɔ́rɔ́ké.

²Zezú kaw sɔ̧́lâʼa bɔʼɔlêw kuu gunbɛʼɛri, Sata̧n tí ɓá kɔ̧ law a Judas, gun a Ɛskariyót, kɛra zé Zezú.

³Dáy, Zezú tu ka mûn nɛ́ ɓá ké gí ka gel a Gáŋvbôn, nǎŋnɔ́ ké e resé gel a Gáŋvbôn. Ké tu kɔ́, ɓá Bâa a mɛ̌ ɓá hɛ̧ri̧ too ka̧n ɓil ndɔ̂ʼɛ.

⁴A kú kaw sɔ̧́lâʼay, Zezú uru ka nzáʼa lâʼa, a lú gáŋ laa a mɛ̌ ka̧n, a mbí nzáʼa laa a ŋgá̧ ka̧n sâ̧ny nɛ́.

⁵Falké, ké fere mbii kɔ̧ ɓil yoŋ, a tí turu bɔʼɔ a gunbɛʼɛri, a taʼa ka nzáʼa laa a ké ŋgá̧ ka̧n sâ̧ny nɛ́.

⁶Ké turu ka̧ tûl a Simɔŋ Píyɛ́r, lé Simɔŋ Píyɛ́r sa hí̧ nɛ́ ɓá: «Gáŋmbây, mɔ̌ pé e turu bɔʼɔ ní lé?»

⁷Zezú fere a sa hí̧ nɛ́ ɓá: «Mɔ zi lá ɓil hɛ̧ ka mi kaw niŋáké a ŋgɛŋnɛ́ nyá ɓáy, dáy falké lé, mɔ e lá ɓilké ɓáy.»

⁸Píyɛ́r fere a sa hí̧ nɛ́: «Háy! Mɔ tí turu bɔʼɔ ní bɔʼɔ mbêw yá!» Zezú sa hí̧ nɛ́: «Mi zi turu bɔʼɔ nyá lé, mɔ tí ziŋ hɛ̧ há̧na ka ŋgboro gel ní nyá.»

⁹Simɔŋ Píyɛ́r sa hí̧ nɛ́: «Nǎŋnɔ́ lé Gáŋmbây, mɔ́ ná turu ɓá bɔʼɔ ní mbɛ́ŋ, mɔ turu ndɔ̂ʼɔ ní rá̧ tûl ní kɔ́!»

¹⁰Zezú fere a sa hí̧ nɛ́: «Njuku ka sómbii dáy, zi tí ka nzala sómbii ɓáy mbaa, zi ɓá turu bɛʼɛ mbɛ́ŋ. Ɓayhí̧lé mûn nɛ́ too ná ɓá táŋáké. Wǎyri, i kaw ɓá táŋáké dá, dáy zi tí ɓá wǎyri too yá.»

¹¹(Zezú tí tu ɓá táŋáké njuku ka e zé nɛ́, ɓaykénɔ́ pé ké sa ɓá: «Zi tí ɓá wǎyri too pé kaw ɓá táŋáké yá.»)

¹²Fal a ké ɔrɔ turu bɔʼɔ a gunbɛʼɛri, ka a rembí laa a mɛ̌, ka a ri dáy, ké rekaw nzáʼa lâʼa, a sa hí̧ kuriri ɓá: «I lá ɓil hɛ̧ nɛ́ ka mi niŋ hí̧ wǎyri lé?

¹³I ɗí mí ɓá “Gáŋnjuku,” rá̧ “Gáŋmbây.” I sa ma gelké, mi ɓá Gáŋnjuku, a ɓá Gáŋmbây.

¹⁴Nǎŋnɔ́, mí ɓá mǐ, Gáŋmbây rá̧ Gáŋnjuku, pé turu bɔʼɔ a wǎyri lé, zi ɓay a sa ɓá, wǎyri kɔ́, i turu bɔʼɔ a há̧narí̧ mbêw mbêw kɔ́.

¹⁵Mi tɔ́ʼɔ hí̧ wǎyri ɓá í niŋ ɓá báŋké ka mi niŋ hí̧ wǎyri kɔ́y.

¹⁶Katína, mi sa hí̧ wǎyri, ɓá gbátɓay: Njukupéna zi ndé bákáwa a mɛ̌ ka hɔ̧́na nyá, nǎŋnɔ́ kɔ́, njuku nzáʼapéna zi ndé njuku ka pé nɛ́ ka hɔ̧́na nyá.

¹⁷A ŋgɛŋnɛ́, ka i tu hɛ̧kéri too dáy, wǎyri mí niŋ, i erú ka sáʼa.

¹⁸Mí zi saɓay a wǎyri too yá, mi tu njukuri ka mi lú kuriri. Dáy, belɓá hɛ̧ a kú ɗé ka̧n ɓil Mbété a Gáŋvbôn, ké niŋ ɓá báŋké nɔ́: “Njuku ka mi kaw sɔ̧́lâʼa kuu mɛ̌y, retɛ̧ njuku ŋgá̧na a mǐ.”

¹⁹Mí sa hí̧ wǎyri a ŋgɛŋnɛ́, rá̧ hɛ̧ké ké niŋ, rá̧ hɛ̧ké mí niŋ lé, í ma láɓulaw ɓá: “Mi erú.”[7]

²⁰Katína, mi sa hí̧ wǎyri ɓá gbátɓay: Njuku ka nyá njukupéna a mǐ, nyá mí. Nǎŋnɔ́, njuku ka nyá mí, ké nyá njuku ka pé mí gíy kɔ́.»

²¹Fal ka Zezú saɓay nɔ́rí̧, lawɛ́ yírí, kɛrɛ ɓáy gí lawɛ́, ké kaw yér, dáy a sa: «Katína, mi sa hí̧ wǎyri, njuku mbêw a bazeŋ a wǎyri e zé mí.»

²²Gunbɛʼɛri ɛ̧rɛ̧ há̧narí̧ mbêw mbêw a zi tu ɓá a gé pé Zezú saɓay nɔ́ sé tûlé yá.

²³Gunbɛʼɛ a há̧na mbêw, mɛ̌ ka Zezú zi nɛ́ mambáy,[8] kaw ɗɛ́ŋ a gbaŋa Zezú.

²⁴Dáy Simɔŋ Píyɛ́r niŋ ndɔ̂ʼɔ hí̧ nɛ́ ɓá ké vbí Zezú, ké saɓay nɔ́ sé tûl a gé lé.

²⁵A goló, gunbɛʼɛ ráy yɛrɛ sé gel a Zezú, dáy a vbí nɛ́ ɓá: «Gáŋmbây, ɓá a gé gbát lé?»

²⁶Zezú fere a sa: «Njuku ka mí e ɓá biré doŋ ɓil mbii hay, ka a ɓá ndara nɛ́, ɓá mɛ̌ nɔ́ pé e zé mí.» Nǎŋnɔ́ Zezú mbí kuŋá biré a ɓá doŋ mbii hay, a ɓá ndara Judas, gun a Simɔŋ Ɛskariyót.

²⁷Gelka Judas nyáy, Sata̧n ri lawɛ́ núnmbɛ̧́nɛ́ nɔ́. Dáy Zezú sa hí̧ nɛ́ ɓá: «Hɛ̧ ka mɔ zi ɓáy niŋáké, mɔ́ niŋ ga!»

²⁸Njukuri ka e ka nzáʼa lâʼa kuu mɛ̌y, zi tu ɓayhí̧ ké saɓay nɔ́ nyá.

²⁹Njuku a fékéri kɛrɛ ɓá, ka Judas kaw ɓá njuku koro lariy, Zezú kaw sa hí̧ nɛ́ ɓá: Mɔ́ sé zé hɛ̧lâʼari ɓay a Pâk malé mɔ́ sé hí̧ hɛ̧ a há̧na hí̧ njuku fóyári lé.

³⁰Dáy Judas nyá kuŋá biré ráy, a tɛ̧́ a kála núnmbɛ̧́nɛ́ nɔ́. Gel yírí dá.

³¹Gelka Judas tɛ̧́ kála dáy, Zezú sa: «Ŋgɛŋnɛ́, Gun a njuku e ziŋ hɔ̧́na, nǎŋnɔ́ hɔ̧́na a Gáŋvbôn e tɔ́ʼɔ mûn nɛ́ ka ŋgboro a mɛ̌.

³²[ Dáy hɔ̧́na a Gáŋvbôn mí tɔ́ʼɔ mûn nɛ́ ka ŋgboro a mɛ̌y], Gáŋvbôn ka mûn nɛ́ kɔ́, e retɔ́ʼɔ hɔ̧́na a gun mɛ̌, dáy zaa a gelé, ké e niŋáké.

³³Gun a mǐri̧, mi e kuu wǎyri sɛl a sêe kpay, i e ɛ́ mǐ, ɓá báŋké nɔ́ ka mi sa hí̧ gáŋnjuku a Juyífri: I zi ma sé gel ka mi e serú yá, mi sa hí̧ wǎyri a ŋgɛŋnɛ́ wǎyri kɔ́.

³⁴Mi hí̧ wǎyri sáŋna a ŋgɛŋké: Í zi há̧narí̧ a bazeŋ a wǎyri, ɓá báŋké nɔ́ ka mi zi wǎyri, wǎyri kɔ́, í zi há̧narí̧ a bazeŋ a wǎyri.

³⁵Nǎŋnɔ́, njukuri too e tu ɓá í kaw ɓá gunbɔʼɔ níri̧, ka wǎyri mí e ka zína a bazeŋ a wǎyri.»

³⁶Simɔŋ Píyɛ́r vbí Zezú ɓá: «Gáŋmbây, mɔ e gé ɓá sí̧ lé?» Zezú fere a sa hí̧ nɛ́ ɓá: «Mɔ zi marú̧ ɓay a tɔ́ŋ mí a ŋgɛŋnɛ́ sé gel ka mi e serú yá, dáy mɔ́ e tɔ́ŋ mí ka fal.»

³⁷Píyɛ́r sa hí̧ nɛ́ ɓá: «Gáŋmbây, ɓayhí̧ mi zi ma tɔ́ŋ mɔ́ a ŋgɛŋnɛ́ nyáy lé? Mi kaw ɗɛ́ŋ ɓay a mí hí̧ ndísɛ̌ʼɛ a mǐ ɓay a mɔ̌!»

³⁸Zezú sa hí̧ nɛ́: «Mɔ kaw ɗɛ́ŋ ɓay a hí̧ ndísɛ̌ʼɛ a mɔ̌ ɓay a mǐ? Katína, mi sa hí̧ mɔ́ gbátɓay, ɗambɛl rá̧ tôo ké gbô lé, mɔ e sa bɔʼɔké sáy ɓá mɔ zi tu mí nyá.»