Read Capanahua Zâŋ 15 Bible Online

Zâŋ 15 - Capanahua bible

Zâŋ 15

¹«Mi kaw ɓá dii ví̧nyɛ[9] a gbátké, Bâa a mǐ ɓá njuku wâʼa ví̧nyɛ.

²Pâmndɔ̂ʼɔ dii too, ka mbɔl mí, ka zi lé yáy, ké kúŋ gefal. Ka pâmndɔ̂ʼɔ dii a ǎ̧yrí̧ ka erú ka lénákéri, ké mɔny ɓay a kú ma lé ɓá ŋgɛ̧́náké.

³Wǎyri, i kaw ɓá táŋáké dá, ɓay tûl ɓayri ka mi sa hí̧ wǎyri.

⁴Í kaw mbêw kuu mǐ, ɓá báŋké ka mǐ, mi kaw mbêw kuu wǎyri. Pâmndɔ̂ʼɔ dii too, ka zi mbɔl mûn dii yáy, ma léna nyá. Nǎŋnɔ́ kɔ́, wǎyri mí zi kaw mbɔl mí nyáy, i zi ma léna nyá.

⁵Mǐ, mi ɓá dii ví̧nyɛ, wǎyri, i ɓá pâmndɔ̂ʼɔké. Njuku mí kaw mbêw kuu mǐ rá̧ mǐ, mí kaw mbêw kuu mɛ̌y, ké e hí̧ léna ɓá ŋgɛ̧́náké, ɓayhí̧lé i zi ma niŋ hɛ̧ a há̧na mbêw táŋ mí nyá.

⁶Njuku ka zi kaw mbêw kuu mǐ nyáy, kú e ɓá nɛ́ vbú kpâa, ɓá báŋa pâmndɔ̂ʼɔ dii a hɔ́ʼɔké, kú e fá̧náké, ka ɓá kɔ̧ hɔrɛ, ké e rɛ́ŋa.

⁷Nǎŋnɔ́, wǎyri mí kaw mbêw kuu mǐ, rá̧ a mí ŋgbá ɓay a mǐ ka̧n law a wǎyri, í vbí hɛ̧ ka i ziy, i e ziŋáké.

⁸Wǎyri mí hí̧ léna ɓá a ŋgɛ̧́náké, nǎŋnɔ́ pé Bâa a mǐ e ziŋ hɔ̧́na, a goló, i e kaw ɓá gbát gunbɔʼɔ níri̧.

⁹Ɓá báŋké nɔ́ ka Bâa a mǐ zi mí, mǐ kɔ́ mi zi wǎyri. Í kaw ɓil zína a mǐ.

¹⁰Wǎyri mí koro sáŋna a mǐ, i e kaw a ɓil zína a mǐ, ɓá báŋké ka mǐ, mi koro sáŋna a Bâa a mǐ, ka a kaw a ɓil zína a mɛ̌y.»

¹¹«Mi saɓay nɛ́ hí̧ wǎyri, ɓay a mûnrína a mǐ, ké kaw kuu wǎyri, rá̧ í mbá a lawrína.

¹²Sáŋna mǐ ɓá: Í zi há̧narí̧ a bazeŋ a wǎyri ɓá báŋké ka mi zi wǎyri.

¹³Zína ka ndé zína hí̧ ndísɛ̌ʼɛ a mɛ̌ ɓay a mbáŋa mɛ̌ri̧, zi tí yá.

¹⁴I kaw ɓá mbáŋa a mǐri̧, ka wǎyri mí niŋ hɛ̧ ka mi vbíy wǎyri.

¹⁵Mi tí ɗí wǎyri ɓá njukupéna mbaa, ɓayhí̧lé njukupéna zi tu hɛ̧ ka bákáwa a mɛ̌ kaw niŋáké yá. Dáy, mi ɗí wǎyri ɓá mbáŋa a mǐri̧, ɓayhí̧lé, mi sa hí̧ wǎyri hɛ̧ too, ka mi lá ka gel a Bâa a mǐ.

¹⁶Zi tí ɓá wǎyri pé ten mí nyá, ɓá mǐ pé ten wǎyri, mi hí̧ wǎyri nzáʼapéna, ɓá í sé, a í hí̧ léna, léna ka e ɗiɓaŋ, nǎŋnɔ́ hɛ̧ too ka i e vbí Bâa a mǐ ka rɛŋ ní, ké e hí̧ wǎyri.

¹⁷Hɛ̧ ka mi vbí wǎyri ɓá i niŋ ɓá, í zi há̧narí̧ a bazeŋ a wǎyri.»

¹⁸«Njuku a tísiri mí fɔny wǎyri lé, i tu ɓá, kú tí fɔny mí ɗambɛl hí̧ wǎyri.

¹⁹Wǎyri mí kaw ɓá njuku a tísiriri, njuku a tísiriri e zi wǎyri, ɓayhí̧lé njuku a tísiriri zi ɓá njuku a mɛ̌ri̧. Dáy ka i zi tí ɓá njuku a tísiriri yá, ka mi ten wǎyri a bazeŋ a njuku a tísiriri dáy, ɓaykénɔ́, njuku a tísiriri e fɔny wǎyri.

²⁰Í kɛrɛ hɛ̧ ka mí tí sa hí̧ wǎyri: “Njuku nzáʼapéna zi ndé bákáwa a mɛ̌ ka hɔ̧́na nyá.[10]” Njukuri mí ɓá mí tɔ́ʼɔsêey, kú e ɓá wǎyri tɔ́ʼɔsêe kɔ́, a kú mí lá mí, kú e lá wǎyri kɔ́.

²¹Dáy kú e niŋ hɛ̧ nɔ́rí̧ too hí̧ wǎyri, ɓay tûl ní, ɓayhí̧lé kú zi tu njuku ka pé mí gí yá.

²²Dáy mǐ, mí zi gí, a saɓay hí̧ kuriri yáy, kú zi tí ka ɓéké yá, dáy ŋgɛŋnɛ́, kú zi tí ka ŋgboro many ɓéké a kuriri yá.

²³Njuku ka fɔny mí, fɔny Bâa a mǐ kɔ́.

²⁴Mǐ, mí zi niŋ hɛ̧ri̧ ka bazeŋ a kuriri, hɛ̧ri̧ ka njukuri ma niŋáké bɔʼɔ mbêw yáy, kú zi tí ka ɓéké yá. Dáy a ŋgɛŋnɛ́, kú kó hɛ̧ri̧ ka mi niŋ, a fɔny mí rá̧ Bâa a mǐ.

²⁵Dáy hɛ̧ké niŋ ɓá báŋké ka ɗé ka̧n ɓil mbété a sáŋna a kuriri ɓá: “Kú fɔny mǐ táŋ ɓayké.”»

²⁶Zezú sa ɓáy ɓá: «Njuku ka e hí̧ndɔ̂ʼɔ hí̧ wǎyri e gína, ɓá Têm a gbátɓay, ka e gí a gel a Bâa a mǐ. Mi e pé nɛ́ ka rɛŋa Bâa a mǐ, ké e gí saɓay too ka kó mí.

²⁷Dáy wǎyri kɔ́, i e saɓay a mǐ kɔ́, ɓayhí̧lé i e kuu mǐ tí ka títáʼa péna a mǐ.»