Read Capanahua Zâŋ 16 Bible Online

Zâŋ 16 - Capanahua bible

Zâŋ 16

¹Zezú sa: «Mi saɓay nɔ́ hí̧ wǎyri, ɓay a í zi ná pɔŋ láɓulaw a wǎyri.

²Kú e ní wǎyri ka vûn gɔ́ŋ Gáŋvbônri̧; nǎŋnɔ́ sêeké e gína, njukuri e í wǎyri, a kɛrɛ ɓá kú kaw niŋ hɛ̧ ka Gáŋvbôn ziy.

³Kú e niŋ nǎŋnɔ́, ɓayhí̧lé kú zi tu Bâa a mǐ malé mǐ nyá.

⁴Mi sa hí̧ wǎyri ɗambɛl, rá̧ sêeké mí ka̧ lé, í ma rekɛ́rɛ ɓá mi tí sa hí̧ wǎyri dá.» «Mi zi saɓay nɔ́rí̧ hí̧ wǎyri ka títáʼa péna a mǐ nyá, ɓayhí̧lé mi e kuu wǎyri ɓáy.

⁵Dáy a ŋgɛŋnɛ́, mi e resé gel a njuku a pé mí gíy. Dáy njuku a há̧na mbêw a bazeŋ a wǎyri zi vbí mí ɓá: “Mɔ́ e gé ɓá sí̧ lé yá?”

⁶Ɓayhí̧lé, i mbá ka lawyíra, ɓay hɛ̧ ka mi saɓay nɔ́ hí̧ wǎyri.

⁷Dáy, mi sa gbátɓay hí̧ wǎyri: Bel ndé ɓá mi kála ɓay a wǎyri, ɓayhí̧lé mǐ, mí zi kála yáy, njuku ka e gí hí̧ndɔ̂ʼɔ hí̧ wǎyri, tí gína yá, dáy mǐ, mí kálay, mi e pé nɛ́ gí hí̧ wǎyri.

⁸Gelka, ké mí gíy, ké e ŋgburu hɛ̧túna a njuku a tísiriri sé tûl ɓékéhɛ̧, péna a ndáráké rá̧ walɓay a Gáŋvbôn.

⁹Ké e ŋgburu hɛ̧túna a kuriri sé tûl ɓékéhɛ̧, ɓayhí̧lé kú zi láɓulaw hí̧ mí nyá.

¹⁰Ké e ŋgburu hɛ̧túna a kuriri sé tûl péna a ndáráké, ɓayhí̧lé mi e kála sé gbaŋa Bâa a mǐ, dáy i tí kó mí mbaa,

¹¹Ké e ŋgburu hɛ̧túna a kuriri sé tûl walɓay a Gáŋvbôn, ɓayhí̧lé kú walɓay kɔ̧ tûl a mbây a tísiri nɛ́ dá.»

¹²«Mi erú ka hɛ̧ri̧ ɓá a ŋgɛ̧́náké ɓay a sa hí̧ wǎyri, dáy i zi tí ka ŋgɛ́rɛ ɓay a ŋgbá ɓayké too a ŋgɛŋnɛ́ nyá.

¹³Gelka Têm a gbátɓay mí gíy, ké e tɔ́ʼɔ ŋgboro gbátɓay a Gáŋvbôn too hí̧ wǎyri. Ɓayhí̧lé ké tí saɓay a tûlé hí̧ wǎyri yá, ké e saɓay a hɛ̧ri̧ too a ké láy, a saɓay a hɛ̧ri̧ ka e gínay hí̧ wǎyri.

¹⁴Têm a gbátɓay e tɔ́ʼɔ hɔ̧́na a mǐ, ɓayhí̧lé ké e saɓay a ké lá a gel ní hí̧ wǎyri.

¹⁵Hɛ̧ri̧ too, ka ɓá ɓala a Bâa a mǐ, ɓá ɓala mǐ kɔ́. Ɓaykénɔ́ pé mi sa hí̧ wǎyri ɓá: Têm a gbátɓay e láɓay ka gel ní, a gí sa hí̧ wǎyri.»

¹⁶«Zaa kpay lé, i zi kó mí mbaa, falké kpay ɓáy lé, i rekó mí.»

¹⁷Nǎŋnɔ́, gunbɔʼɔ a Zezú a há̧narí̧ sa a bazeŋ kuriri: A̧hí̧ zi ɓay a sa ɓá: «Zaa kpay lé, i zi kó mí mbaa, rá̧ falké kpay lé, i rekó mí, a ké sa hí̧ nárí̧ lé?» Rá̧: «Ɓay ka mi e kála sé gel a Bâa a mǐ lé?»

¹⁸Dáy kú sa, ké sa: «zaa kpay nɔ́!» A̧hí̧ zi ɓay a sanáké lé? Ná zi tu ɓil ɓayké yá.

¹⁹Zezú tu ɓá kú e vbí nɛ́ ɓay dáy, a sa hí̧ kuriri ɓá: I kaw vbí ɓay a bazeŋ a wǎyri, ɓay hɛ̧ ka mi sa: «Zaa kpay lé, i tí kó mí mbaa dáy falké kpay lé, i rekó mí»

²⁰Katína, mi kaw sa hí̧ wǎyri: I e vúna, a oromûn a wǎyri, dáy njuku a tísiriri e kaw ka mûnrína. A wǎyri, i e kaw ka lawyíra, nǎŋnɔ́ lawyíra a wǎyri e refére tɛ̧́ mûnrína.

²¹Sé mbuŋa a wûnynjuku, ɓá sé tɔ́ʼɔsêe a mɛ̌. Dáy ké mí mbuŋ dáy, ké yɛʼɛrɛ mûn séna too, ké e ɓil mûnrína ɓayhí̧lé, ké mbuŋ gun njuku gí tísiri.

²²Wǎyri kɔ́, ŋgɛŋnɛ́ i e ɓil lawyíra, dáy mi e regí, a goló law a wǎyri e mbá ka sáʼa, njuku a há̧na mbêw, ma lú lawrínaké yá.

²³Sêeké nɔ́, í tí vbí mí ɓay a há̧na mbêw mbaa. Katína, mi kaw sa hí̧ wǎyri, hɛ̧ ka i vbí Bâa a mǐ ka rɛŋ ní, ké e hí̧ wǎyri.

²⁴Ka̧ ŋgɛŋnɛ́ i zi vbí hɛ̧ a há̧na mbêw ka rɛŋ ní nyá ɓáy. Í vbí, i e ziŋáké, ɓay a law a wǎyri ké mbá a lawrína.

²⁵«Mi saɓay nɔ́ too hí̧ wǎyri ka galaɓay. Dáy sêeké e ka̧na, mi tí saɓay hí̧ wǎyri ka galaɓay mbaa, mi e saɓay a Bâa a mǐ hí̧ wǎyri ɓá a táŋáké.

²⁶Sêeké nɔ́, i e gɔ́ŋ Gáŋvbôn ka rɛŋ ní, dáy mi tí sa hí̧ wǎyri ɓá, mi e gɔ́ŋ Bâa a mǐ ɓay a wǎyri yá,

²⁷ɓayhí̧lé, i zi mí, ka láɓulaw ɓá mi gí a gel a Gáŋvbôn, ɓaykénɔ́ pé Bâa a mǐ ka mûn nɛ́, zi wǎyri.

²⁸Mi ɗere a gel a Bâa a mǐ gí tísiri, ŋgɛŋnɛ́ mi e uru ka tísiri ɓay a he sé gel a Bâa a mǐ.»

²⁹Gunbɛʼɛri sa hí̧ nɛ́ ɓá: «Mɔ́ kó, ŋgɛŋnɛ́, mɔ saɓay ɓá táŋáké táŋ galaɓay.

³⁰Ŋgɛŋnɛ́, rú tu ɓá mɔ̌, mɔ tu hɛ̧ri̧ too, dáy a zi ɓá njuku a há̧na mbêw ké vbí mɔ́ ɓay yá. Ɓaykénɔ́ pé rú láɓulaw ɓá mɔ gí a gel a Gáŋvbôn.»

³¹Zezú resa hí̧ kuriri: «I láɓulaw a ŋgɛŋnɛ́ katína dá lé?

³²Nǎŋnɔ́ sêeké e ka̧na, e sêeké ka̧ dá, dáy a gé lé too, e ŋgú mbêw mbêw rekála sé gelkáwa a mɛ̌, a pɔŋ mí kaw hɛʼɛ ní. Dáy katína mi zi kaw hɛʼɛ ní nyá, ɓayhí̧lé Bâa a mǐ e kuu mǐ.

³³Mi saɓay nɔ́ hí̧ wǎyri too, ɓay i ziŋ a vónáké ka ŋgboro a mǐ. I e tɔ́ʼɔsêe ka tísiri, dáy í ŋgbá ɓá kpúnáké, ɓayhí̧lé mǐ, mí ndé tísiri ka ŋgɛ́rɛ.»