Read Capanahua Zâŋ 18 Bible Online

Zâŋ 18 - Capanahua bible

Zâŋ 18

¹Fal ɓay nɔ́ ka Zezú sáy, ké kála kuu gunbɛʼɛri sé helkála mbii a Sederɔŋ. Ndûu a há̧na e ka gelké, dáy ké ri ɓilké kuu gunbɛʼɛri.

²Judas, ka e zé Zezú, tu gelké kɔ́, ɓayhí̧lé sé fékéri, Zezú kaw sé mára̧ a gelké kuu gunbɛʼɛri.

³Judas, mɛ̌ pé ɗambɛl a ŋgawbére a Rɔmɛri̧ kuu njuku koro vûn a Gáŋvbônri̧, ka gáŋnjuku nzáʼaká̧nari̧ rá̧ Fariziyɛ̧́ri̧ pé kuriri. Dáy kú gé ri ɓil ndûuké ka Lamberi rá̧ ka̧n rá̧ hɛ̧béreri.

⁴Zezú ka tu hɛ̧ ka e ziŋ nɛ́, uru a sé ziŋ kuriri, dáy a vbí kuriri ɓá: « A gé i kaw ɛ́náké lé?»

⁵Kú sa: «Zezú a Nazarɛ́t.» Dáy ké sa hí̧ kuriri: «Ɓá mǐ» Judas ka e zé Zezú, e a bazeŋ a kuriri kɔ́.

⁶Gelka Zezú sa hí̧ kuriri: «Ɓá mǐ», kú ré sé fal, a gé lé kɔ̧ tísiri too.

⁷Zezú vbí kuriri ɓáy ɓá: « A gé i kaw ɛ́náké lé?» Kú zi a sa: «Zezú a Nazarɛ́t.»

⁸Zezú fere a sa hí̧ kuriri: «Mi sa hí̧ wǎyri ɓá mǐ! Dáy, mí ɓá mǐ pé i kaw ɛ́náké lé, í pɔŋ njuku a ǎ̧wrí̧ kú kála.»

⁹(Nǎŋnɔ́ pé e niŋa ɓá báŋké ka Zezú tí sa ɓá: «Mi zi ɓá njuku mbêw ɓɔ́l a ɓil a njukuri ka mɔ̌, Bâa a mǐ, mɔ́ hí̧ mí nyá.»)

¹⁰Dáy Simɔŋ Píyɛ́r ka erú ka gá̧má, lú gá̧má a kúŋ goy súkú a koy a gáŋnjuku nzáʼaká̧na ŋgboro lâʼa to vbú siri. Koyké rɛŋ ɓá Malkus.

¹¹Dáy Zezú sa hí̧ Píyɛ́r: «Mɔ́ rerú a gá̧má a mɔ̌ ka̧n ɓil ŋgoroké. Mɔ́ kɛrɛ ɓá yoŋ tɔ́ʼɔsêe ka Bâa hí̧ mí, mi tí nzónáké yá lé?»

¹²Falké, mára̧ a ŋgawbére a Rɔmɛri̧, gáŋnjuku a kuriri rá̧ njuku koro mbây a Juyífri ŋgbá Zezú, a ŋgá̧ nɛ́ a sɛl.

¹³Kú tí ɓá Zezú sé gel a A̧na rá̧ ɓáy. A̧na ɓá baa fáy a Kayíf, ka ɓá gáŋnjuku nzáʼaká̧na a ɓil mbimbɔ̂mké nɔ́y.

¹⁴Ɓá Kayíf nɔ́ pé, hí̧ nzáʼa nzɛ́rɛ hí̧ mbây a Juyífri ɓá: «Belɓá njuku mbêw ké ziŋ hûl a gel a njukuri too.»[11]

¹⁵Simɔŋ Píyɛ́r rá̧ gunbɔʼɔ a Zezú a féké mbêw tɔ́ŋ fal a Zezú. Gáŋnjuku nzáʼaká̧na tu gunbɔʼɔ a Zezú a féké nɔ́ kɔ́, ɓaykénɔ́, pé gunbɔʼɔké nɔ́ ri tɔ́ŋ Zezú sé ɓil hɛlɛ a gáŋnjuku a nzáʼaká̧na.

¹⁶Dáy Píyɛ́r kaw kála ka gbaŋ nzáʼaŋgboro. Gunbɔʼɔ a mbêwké nɔ́ ka gáŋnjuku nzáʼaká̧na tu nɛ́ kɔ́y, tɛ̧́ a ɓil hɛlɛ, a sé saɓay hí̧ wûnypéna ka kaw koro nzáʼaŋgboro, dáy ké ɓá Píyɛ́r ri ɓil hɛlɛ.

¹⁷Wûnypénáké sa hí̧ Píyɛ́r ɓá: «Tá mɔ̌ kɔ́, mɔ́ ɓá mbêw a bazeŋ a gunbɔʼɔ a njuku nɛ́ nyá lé?» Píyɛ́r fere a sa: «Háy, mi zi tí ɓil a kuriri yá!»

¹⁸Gel vo mambá, dáy njukupénari̧ rá̧ njuku koro vûn gɔ́ŋ Gáŋvbônri̧ ndéré hɔrɛ a hɛʼɛrɛ a kaw nɔ́náké. Píyɛ́r pí sé kaw kuu kuriri a kaw nɔ́ hɔrɛké kɔ́.

¹⁹Gáŋnjuku nzáʼaká̧na vbí Zezú ɓay sé tûl a gunbɛʼɛri, rá̧ hɛ̧ a ké kaw tɔ́ʼɔké.

²⁰Zezú fere a sa: «Mi saɓay hí̧ njukuri too a ɓil a dawá. Mi tɔ́ʼɔɓay dát a ɓil vûn gɔ́ŋ Gáŋvbôn, rá̧ ɓil vûn a Gáŋvbôn rá̧ gel ka njukuri tɛ̧́ ɓá mára̧ há̧narí̧ kawrúy. Ɓay a há̧na ka mi tɔ́ʼɔ ɓá múnáké zi tí yá.

²¹Ɓayhí̧ mɔ vbí mí ɓay lé? Mɔ́ vbí njukuri ka láɓay ka mi sa hí̧ kuririy: Kú tu ɓá a táŋáké ɓay ka mi sa hí̧ kuriri.»

²²Falké ka Zezú saɓay nɔ́, njuku mbêw a bazeŋ a njuku koro vûn a Gáŋvbôn, vbá̧ ɓil nûn nɛ́ a sa: «Nǎŋnɔ́ pé mɔ e zi nzáʼa a gáŋnjuku nzáʼaká̧na lé?»

²³Dáy Zezú sa hí̧ nɛ́: «Mǐ, mí saɓay ka belyáy, mɔ́ tɔ́ʼɔ rú ɓay ka mi sa belyá a ɓilké. Dáy, ɓay ka mi sa, mí ná ɓá ndárákéy, ɓayhí̧rá̧ mɔ vbá̧ mí lé?»

²⁴Dáy, A̧na pé Zezú sé gel a Kayíf gáŋnjuku nzáʼaká̧na. Zezú e ka tûl sɛl dát.

²⁵A ɓil a nɔ́ too, Simɔŋ Píyɛ́r kaw ɓil hɛlɛ, a kaw nɔ́ hɔrɛ dát. Kú sa hí̧ nɛ́ ɓá: «Mɔ̌ nɛ́ kɔ́, mɔ zi tí ɓá gunbɔʼɔ a njuku nɛ́ nyá lé?» Dáy Píyɛ́r fere a sa: «Háy, mi zi tí ɓá gunbɛʼɛ yá!»

²⁶Njukupéna a gáŋnjuku nzáʼaká̧na mbêw e ka gelké kɔ́, ɓá î̧n a njuku nɔ́ ka Píyɛ́r kúŋ goy súké, sa hí̧ Píyɛ́r ɓá: «Tí ɓá mɔ̌ nɛ́ ka mi kó mɔ́ a ɓil ndûu kuu Zezú yá lé?»

²⁷Dáy Píyɛ́r many ɓáy, a sa: «Háy, zi tí ɓá mǐ nyá!» A Núnmbɛ̧́nɛ́ nɔ́ tôo gbô.

²⁸A típélé rím, ŋgawbéreri ɗa Zezú a gel a Kayíf sé gel a mbây tûlkaw a Rɔm. Dáy mbây a Juyífri zi gé ri ɓil vûn a mbây tûlkawké yá, ɓay a kú zi ná ɓew mûn[12] a kuriri, a kú zi ná ziŋ sɔ̧́lâʼa Pâk yá.

²⁹Ɓaykénɔ́ pé, mbây Pilát tɛ̧́ a ɓil vûn gí ziŋ kuriri a kála, dáy a vbí kuriri ɓá: «I ŋgbá njuku nɛ́ ɓayhí̧ lé?»

³⁰Kú fere a sa: «Ké mí zi niŋ ɓékéhɛ̧ nyáy, rú tí ɓá nɛ́ gí goló yá.»

³¹Dáy, Pilát sa hí̧ kuriri: «Í ɗa nɛ́ ka mûn a wǎyri, a í wal ɓil ɓayké ɓá báŋké ka sáŋna a wǎyri vbíy.» Dáy kú sa: «Rú zi tí ka ŋgboro ɓá ɓay ŋgbá njuku, ka í nɛ́ nyá.»

³²Ɓá nǎŋnɔ́ pé ɓay ka Zezú sáy, e niŋ ɓá báŋké nɔ́, ɓay a tɔ́ʼɔ mára̧ hûl ka e ziŋ nɛ́y.[13]

³³A goló, Pilát ri sé vûn, a sa kú ɗá Zezú gí, dáy a vbí nɛ́ ɓá: «Mɔ̌, pé ɓá mbây a Juyífri lé?»

³⁴Zezú fere a sa hí̧ nɛ́ ɓá: «Mɔ́ kɛrɛ ka tûló malé, ɓá njukuri pé saɓay a mǐ hí̧ mɔ́ lé?»

³⁵Pilát sa hí̧ nɛ́: «Mǐ, mi ɓá Juyíf lé? Njuku nzáʼaɓay a mɔ̌ rá̧ gáŋnjuku nzáʼaká̧nari̧, pé ŋgbá mɔ́ gí hí̧ mí, a̧hí̧ mɔ niŋ lé?»

³⁶Zezú fere hí̧ nɛ́: «Pû mbây a mǐ, zi tí ka tísiri nɛ́ nyá. Pû mbây a mǐ, mi e ka tísiri nɛ́y, njukupéna a mǐri̧, e rúbére ɓay a kú zi ná ŋgbá mí hí̧ mbây a Juyífri. Dáy, hay, pû mbây a mǐ, zi tí ka tísiri nɛ́ nyá.»

³⁷Pilát vbí nɛ́: «Dáy, mɔ ɓá mbây lé?» Zezú fere a sa: «Mɔ̌ pé mɔ sá ɓá mi ɓá mbây. Kú mbuŋ mí, mi gí tísiri nɛ́ ɓay a mi gí tɔ́ʼɔ gbátɓay. Njukuri too ka zi gbátɓay, e láɓay a mǐ.»

³⁸Dáy Pilát vbí nɛ́: «Gbátɓayké ɓá hí̧ lé?» Fal saɓay nɔ́rí̧, Pilát tɛ̧́ ɓáy sé kála sé ziŋ njukuri, a sa hí̧ kuriri: «Mǐ, mi zi kó ɓékéhɛ̧ a há̧na mbêw, ka e ɓá njuku nɛ́ ziŋ hûl yá.

³⁹A ɓil hɛ̧ niŋa a wǎyri a ɓil nâm mára̧ záymûn Pâk dát lé, zi ɓá, mí pɔŋ njuku mbêw ka vûn sɛl hí̧ wǎyri. Dáy, í zi ɓá mí pɔŋ mbây a Juyífri hí̧ wǎyri lé?»

⁴⁰Kú vbá̧nzáʼa a sa: «Háy, tí ɓá mɛ̌ nyá, ɓá Barabás pé rú ziy!» A tu ɓá Barabás, ɓá njuku í hûl.