Read Capanahua Zâŋ 2 Bible Online

Zâŋ 2 - Capanahua bible

Zâŋ 2

¹Nâm sére a falké, kú nyá wûny a ɓil pû a Kanaa ka tísiri a Galilê. Mâa a Zezú e a gelké,

²dáy kú ɗí Zezú rá̧ gunbɛʼɛri sé kɔ́.

³Gelka vôn ɔ́y, mâa a Zezú sa hí̧ nɛ́: «Njukuri tí ka vôn mbaa.»

⁴Zezú fere a sa: «Mâa, ɓá mɔ̌ pé e tɔ́ʼɔ mí hɛ̧ ka mi e niŋáké lé? Sɛl a sêe niŋ péna a mǐ pa̧n ka̧ nyá ɓáy.»

⁵Dáy Mâa a Zezú sa hí̧ njukupénari̧ ɓá: «Í niŋ hɛ̧ too a ké e vbí wǎyri.»

⁶Kɛrɛ zêe erú, ka Juyífri ɓá mbii kɔ̧rú̧ ɓay a mɔny mûn ɓá báŋké ka sáŋna a kuriri vbíy. Hɔ̧́na a kɛrɛké mbêw too, ma mbí litɛrɛ mbii gbaŋa ísɔ́t.

⁷Zezú sa hí̧ njukupénari̧: «Í ɗú mbii mbá kɛrɛ nɔ́rí̧ too.» Kú ɗú mbii mbárú too.

⁸Dáy Zezú sa hí̧ kuriri ɓá: «Ŋgɛŋnɛ́, í ɗú mbii nɔ́ kpay sé hí̧ gáŋnjuku mára̧» Dáy kú niŋ ɓá báŋké nɔ́ a ké sa hí̧ kuriri.

⁹Gelka gáŋnjuku mára̧ ráy gé léy, mbiiké refére tɛ̧́ vôn, ké zi tu gel a sí̧ vônké tɛ̧́ karú yá, dáy njukupénari̧ ka ɗú mbiiké, kuriri kú tu. Ké ɗí njuku nyá wûny,

¹⁰a sa hí̧ nɛ́ ɓá: «Njuku too tí wal vôn a béláké rá̧ a rewal vôn a belyáké a fal ka njukuri mí távôn dáy; dáy a mɔ̌, mɔ pɔŋ vôn a béláké ka̧ ŋgɛŋnɛ́.»

¹¹Nǎŋnɔ́ pé ɓá titíla hɛ̧sáʼama a Zezú ka niŋ a ɓil pû a Kanaa ka tísiri a Galilê, ké tɔ́ʼɔ hɔ̧́na a mɛ̌ dáy gunbɛʼɛri láɓulaw hí̧ nɛ́.

¹²Falké, ké tá sé Kapɛrnahûm kuu mâa a mɛ̌, nyîn nɛ́rí̧ rá̧ gunbɛʼɛri, a gé kawrú nâm kpay.

¹³Nâm Pâk a Juyífri gí ɗɛ́ŋ, dáy Zezú sé Zerúzalɛ̂m.

¹⁴Ké gé ziŋ njukuri kaw a ɓil vûn a Gáŋvbôn kaw zé ndayri, mbóléri rá̧ bûmri̧. Ké ziŋ njuku ku̧ma lariri a kaw ka nzáʼa tay a kuriri kɔ́.

¹⁵Dáy, Zezú gé mbí sɛl a ka ɓá báŋa ndêe, ka ní njuku zé sɔ́ʼɔri tɛ̧́ a ɓil vûn a Gáŋvbôn, ka ndayri, rá̧ mbólé a kuriri. Ké fere mínya a njuku ku̧ma lariri kɔ̧ tísiri a sɔʼɔrɔ tayri lé kɔ̧ tísiri too,

¹⁶a sa hí̧ njuku zé bûmri̧: «Í fá̧ hɛ̧ nɛ́rí̧ tá a gelé too! Í zi ná mbí vûn a Bâa a mǐ, ɓá vûn zé sɔʼɔ!»

¹⁷Gunbɛʼɛri kɛrɛ hɛ̧ ka ɗé ka̧n ɓil Mbété a Gáŋvbôn ɓá: «Gáŋvbôn, zína ɓay a vûn a mɔ̌, rɛ́ŋ a law ní ɓá báŋa hɔrɛ.»

¹⁸Dáy Juyífri vbí nɛ́: «Hɛ̧sáʼama hí̧, mɔ́ e niŋáké ɓay a ké tɔ́ʼɔ rú ɓá mɔ́ erú ka ŋgboro niŋ hɛ̧ nǎŋnɔ́ lé?»

¹⁹Zezú fere a sa hí̧ kuriri: «Í gbɛʼɛrɛ vûn a Gáŋvbôn nɛ́, nâm sáy a falké, mi e rembó ka̧n gelké»

²⁰Dáy kú sa hí̧ nɛ́: «Rú mbó vûn mbimbɔ̂m bonɛŋ a zêe, lé mɔ̌, mɔ́ e gbɛʼɛrɛ ka rembó nâm sáy yáŋ?»

²¹Vûn ka Zezú saɓayké ɓá mûn nɛ́.

²²Ɓaykénɔ́ dáy, sêe ka Zezú toma a hûl, gunbɛʼɛri kɛrɛ ɓay a ké sáy, dáy a láɓulaw sé tûl hɛ̧ ka ɗé ka̧n ɓil Mbété a Gáŋvbôn rá̧ ɓay ka Zezú sáy.

²³A Zezú e ka Zerúzalɛ̂m, ka sêe Pâk a Juyífri, njukuri ɓá ŋgɛ̧́náké kó hɛ̧sáʼama a ké niŋ, a láɓulaw hí̧ nɛ́.

²⁴Dáy Zezú zi zibɔʼɔké yá, ɓayhí̧lé ké tu law a kuriri ɓá táŋáké.

²⁵Njuku ma saɓay a njuku a há̧na hí̧ nɛ́ nyá, ɓayhí̧lé ké tu ka mûn nɛ́, hɛ̧ too ka e a ɓil law a njukuy.