Read Capanahua Zâŋ 20 Bible Online

Zâŋ 20 - Capanahua bible

Zâŋ 20

¹Típélé zaa a gel ná ŋgbem ɓáy, ka ɓá Dímasi[14], Marí a Makdala uru a sé tûlpâl. Ké gé kó ɓá gáŋ saw a kú ɓá ndi nzáʼa lɔ̂ʼɔpâl, lú gefal.

²Dáy, ké ré ka ŋgúna, sé ziŋ Simɔŋ Píyɛ́r rá̧ gunbɔʼɔ a ǎ̧w ka Zezú zi nɛ́ mambáy, a sa hí̧ kuriri: «Kú mbí hûl a Gáŋmbây ka lɔ̂ʼɔpâl, dáy rú zi tu gel a kú ɓá nɛ́ serúy yá!»

³Píyɛ́r rá̧ gunbɔʼɔ a mbêw ráy uru a sé tûlpâl.

⁴Kú sé sére too ka ŋgúna, dáy gunbɔʼɔ a mbêwké nɔ́ ŋgú ga tá Píyɛ́r, a tí gé ka̧ tûlpâl ɗambɛl hí̧ nɛ́.

⁵Ké pɔ a ɛ̧rɛ̧ ɓil lɔ̂ʼɔpâl, a kó ɓá laari ka kɔ̧ tísiri, dáy a zi ri ɓilké yá.

⁶Simɔŋ Píyɛ́r ka̧ tɔ́ŋ nɛ́, tá a gé ri ɓil lɔ̂ʼɔpâl, a gé kó ɓá laari a kú ku Zezú rúy ka kɔ̧ tísiri,

⁷ké kó laa ku tûl a Zezú kɔ́, laaké mára̧ kɔ̧ ɓórí a gel a féké, zi kɔ̧ mbêw kuu laa a ǎ̧wrí̧ nyá.

⁸Dáy gunbɔʼɔ a mbêwké nɔ́, ka tí ka̧ tûlpâl ɗambɛl, ri sé ɓilké mɛ̌ kɔ́, a gé kó, a zibɔʼɔké.

⁹Ɓayhí̧lé, ka̧ sêeké nɔ́, gunbɛʼɛri zi lá ɓil ɓay ka ɗé ka̧n ɓil Mbété a Gáŋvbôn ɓá Zezú e uru ka hûl yá ɓáy.

¹⁰Falké, kú rekála sére too, sé gel a kuriri.

¹¹Marí ew kála, a gbaŋ lɔ̂ʼɔpâl dɛ́ŋ, a kaw vúna. Ka ké kaw vúna, ké pɔ ɓay ɛ̧rɛ̧ ɓil lɔ̂ʼɔpâl;

¹²lé ké kó aŋnze sére ri laa a Pukí, kaw gel a kú ɓá hûl a Zezú ka̧nrú̧y, mbêw a ŋgboro a tûl rá̧ mbêw a ŋgboro a bɔʼɔ.

¹³Aŋnzekéri vbí Marí: «Ɓayhí̧rá̧ mɔ vú lé?» Ké fere a sa hí̧ kuriri: «Kú lú Gáŋmbây a mǐ, dáy mi zi tu gel a kú ɓá nɛ́ ka̧nrú̧ nyá.»

¹⁴A fal saɓay nɔ́, ké kí a kó Zezú ka ew, dáy a zi tu ɓá mɛ̌ nyá.

¹⁵Zezú vbí nɛ́: «wûny, ɓayhí̧ mɔ vú lé? Gé mɔ́ ɛ́ lé?» Marí kɛrɛ ɓá njuku koro ndûu, dáy a sa hí̧ nɛ́ ɓá: «Gáŋnjuku, mí ɓá mɔ̌, pé mbí hûl a Zezú lé, mɔ́ tɔ́ʼɔ mí gel ka mɔ ɓá nɛ́ ka̧nrú̧y, a mí sé mbí nɛ́.»

¹⁶Dáy Zezú ɗí nɛ́: «Marí!» Ké kí a sa hí̧ nɛ́ ka nzáʼa Hebiré: «Rabúni» (Zi ɓay a sa ɓá: «Njuku tɔ́ʼɔhɛ̧!»)

¹⁷Zezú sa hí̧ nɛ́: «Mɔ́ ŋgbá mí nyá, ɓayhí̧lé mi zi he sé gel a Bâa a mǐ nyá ɓáy. Dáy, mɔ́ sé ziŋ nyîn nírí̧, a mɔ́ sa hí̧ kuriri ɓá mi e he sé gel a bâa a mǐ, ka ɓá Bâa a wǎyri kɔ́y. Mi e he sé gel a Gáŋvbôn a mǐ, ka ɓá Gáŋvbôn a wǎyri kɔ́y.»

¹⁸A goló, Marí a Makdala, sé sa hí̧ gunbɛʼɛri ɓá: «Mi kó Gáŋmbây!» Dáy, a sa hí̧ kuriri hɛ̧ ka Zezú sa hí̧ nɛ́y.

¹⁹Sêeké nɔ́, a gel a bɔʼɔlêw, gunbɛʼɛri mára̧ kaw ɓil vûn a há̧na. Kú dara nzáʼaŋgboro ka kílé, ɓayhí̧lé kú ŋgú wɔ́w a mbây a Juyífri. Zezú gí tɛ̧́ a bazeŋ a kuriri, a sa hí̧ kuriri: «A vónáké ké kaw kuu wǎyri!»

²⁰Fal saɓay nɔ́, ké tɔ́ʼɔ kuriri ndɔ̂ʼɛ rá̧ kazere nɛ́. Gelka gunbɛʼɛri kó Gáŋmbây, kú mbá a lawrína.

²¹Zezú resa hí̧ kuriri ɓáy: «A vónáké ké kaw kuu wǎyri! Ɓá báŋké ka Bâa a mǐ pé mí, mǐ kɔ́ mi pé wǎyri.»

²²A fal ɓay nɔ́rí̧, Zezú ul kúna kɔ̧ tûl a kuriri, a sa hí̧ kuriri: «Í nyá Têm Pukí!

²³Njukuri ka i vbá̧buma ɓéké a kuriri, Gáŋvbôn e vbá̧buma hí̧ kuriri, a njukuri ka i zi vbá̧buma ɓéké a kuriri nyáy, Gáŋvbôn tí vbá̧buma hí̧ kuriri yá.»

²⁴Toma a kú ɗí ɓá horó, ka ɓá mbêw a bazeŋ a gunbɛʼɛri, zi tí kuu kuriri, a sêeké nɔ́ ka Zezú gí tɔ́ʼɔ mûn nɛ́ hí̧ gunbɛʼɛri a ɓil vûn nyá.

²⁵Gárá gunbɛʼɛri sa hí̧ Toma: «Rú kó Gáŋmbây!» Dáy Toma sa hí̧ kuriri: Mǐ, mi zi kó pélé nɔʼɔ pɔ́nde a ɓil ndɔ̂ʼɛ, a mí zi ɗá ka ndɔ̂ʼɔ ní nyá, a mi zi ɓá ndɔ̂ʼɔ ní ɗa pélé nɔʼɔ a kazere nɛ́ nyáy, mi zi ma láɓulaw rú yá.

²⁶Nâm zíndɔ̂ʼɔsére a falké, gunbɛʼɛri mára̧ há̧narí̧ ɓáy kaw ɓil vûn, Toma e kuu kuriri kɔ́. Kú dara nzáʼaŋgboro ka̧nrú̧ ka kílé. Zezú tɛ̧́ a gí ew a bazeŋ a kuriri, a sa hí̧ kuriri: «A vónáké ké kaw kuu wǎyri!»

²⁷Falké, ké sa hí̧ Toma: «Mɔ́ ɓá ndɔ̂ʼɔ ɗá gelé, a mɔ́ ɛ̧rɛ̧ ndɔ̂ʼɔ ní, mɔ́ ndara ndɔ̂ʼɔ a mɔ́ ɗá kazere ní. A mɔ́ pɔŋ manyɓay, a mɔ́ láɓulaw!»

²⁸Toma fere a sa: «Gáŋmbây a mǐ rá̧ Gáŋvbôn a mǐ!»

²⁹Zezú sa hí̧ nɛ́: «Mɔ́ láɓulaw ɓay hɛ̧ ka mɔ kó mí. Béla erú hí̧ njukuri ka zi kó mí nyá, ka a láɓulaw hí̧ mí!»

³⁰Zezú niŋ hɛ̧sáʼama a fékéri ɓáy ɓá ŋgɛ̧́náké ka nûn a gunbɛʼɛri, a kú zi ɗé ka̧n ɓil mbété nɛ́ nyáy.

³¹Dáy hɛ̧ nɔ́rí̧ ziŋ ɗéna rá̧lǒo í láɓulaw ɓá Zezú kaw ɓá Kiris, Gun a Gáŋvbôn, rá̧ a ɓil láɓulaw hí̧ nɛ́y, i ziŋ káwa a ndísɛ̌ʼɛ, ka ŋgboro a rɛŋɛ́.