Read Capanahua Zâŋ 21 Bible Online

Zâŋ 21 - Capanahua bible

Zâŋ 21

¹A falké nɔ́, Zezú tɔ́ʼɔ mûn nɛ́ ɓáy hí̧ gunbɛʼɛri a gbaŋ fâ̧w a Tiberiyád[15]. Í kó báŋké ka Zezú tɔ́ʼɔ mûn nɛ́ hí̧ kuriri.

²Simɔŋ Píyɛ́r rá̧ Toma a kú ɗí nɛ́ ɓá horó, rá̧ Natanayɛl a Kanaa a tísiri a Galilê, gun a Zebedéri rá̧ gunbɔʼɔ a fékéri sére, kú e mbêw.

³Dáy Simɔŋ Píyɛ́r sa hí̧ kuriri: «Mí sé ŋgbá nzwîy.» Dáy kú sa hí̧ nɛ́: «Rú e sé kuu mɔ̌.» Kú tɛ̧́ a kála sé he kumbôn, dáy sû̧ŋké nɔ́ kú zi ŋgbá nzwîy mbêw yá.

⁴A gel kaw táŋay, Zezú ew ka gbaŋ fâ̧w, dáy gunbɛʼɛri zi tu ɓá Zezú pɔ̧́nɔ́ nyá.

⁵Zezú sa hí̧ kuriri: «Gun a mǐri̧, i zi ŋgbá nzwîy yá lé?» Kú sa: «Háy!»

⁶Zezú sa hí̧ kuriri: «Í vbú rii sé ŋgboro a lâʼa a kumbôn dalé i e ziŋ nzwîy.» Kú vbú rii, a ŋgbá nzwîy ɓá ŋgɛ̧́náké dáy, kɔʼɔké tɛ̧́ kála ndé kuriri.

⁷A goló, gunbɔʼɔ a ǎ̧w ka Zezú zi nɛ́ mambáy sa hí̧ Píyɛ́r: «Gáŋmbây pɛ̧́nɛ́!» Gelka Simɔŋ Píyɛ́r lá ɓá: «Gáŋmbây pɛ̧́nɛ́», ké mbí laa a sâa a mɛ̌, a ri, ɓayhí̧lé mûn nɛ́ ná ɓǎŋ, dáy a zɔ vbú mbii.

⁸Gunbɛʼɛ a fékéri regí a kumbôn, a kɔʼɔ rii nzwîy mbá ɓilké. Kú zi ɗí ka helkála mbii yá, ɗínáké zaa ké niŋ bɔʼɔséna ísɔ́t mbêw.

⁹Gelka, kú ɗere kɔ̧ tísiri, kú kó hɛʼɛrɛ hɔrɛ ka nzwîy rá̧ biré kɔ̧ tûlké.

¹⁰Zezú sa hí̧ kuriri: «Í ɓá nzwîy ka i ŋgbá kpay gírú.»

¹¹Dáy Simɔŋ Píyɛ́r he ɓil kumbôn, a kɔʼɔ rii ka nzwîy ísɔ́t mbêw ka bondíɓí a sáy ɓá hɔ̧́náké kɔ̧ tísiri. Ka nzwîyri mbá ɓil riiké nɔ́y too, riiké zi gɔ́rɔ́ yá.

¹²Zezú sa hí̧ gunbɛʼɛri: «I gí sɔ̧́lâʼa.» Dáy njuku a há̧na mbêw a bazeŋ a kuriri zi vbí nɛ́ ɓay ɓá: «Mɔ ɓá gé lé yá?» Ɓayhí̧lé kú tu ɓá a béláké ɓá Gáŋmbây pɔ̧́nɔ́.

¹³Dáy Zezú ta̧m gí mbí biré a hí̧ gunbɛʼɛri, a mbí nzwîy a wal hí̧ kuriri kɔ́.

¹⁴Ɓá tɔ́ʼɔ mûn a bɔʼɔ sáyké pɔ̧́nɔ́, ka Zezú tɔ́ʼɔ mûn nɛ́ hí̧ gunbɛʼɛri, ka fal toma a mɛ̌ ka hûl.

¹⁵A fal sɔ̧́lâʼa, Zezú vbí Simɔŋ Píyɛ́r: «Simɔŋ gun a Zâŋ, mɔ zi mí tá njuku nɛ́rí̧ too lé?» Píyɛ́r fere a sa: «Katína Gáŋmbây, mɔ tu ɓá mí zi mɔ́.» Zezú sa hí̧ nɛ́: «Mɔ́ koro gun mbólé a mǐri̧[16].»

¹⁶Zezú vbí nɛ́ a bɔʼɔ sére ɓáy: «Simɔŋ gun a Zâŋ, mɔ zi mí lé?» Píyɛ́r fere a sa: «Katína, Gáŋmbây, mɔ tu ɓá mi zi mɔ́» Zezú sa hí̧ nɛ́: «Mɔ́ koro mbólé a mǐri̧.»

¹⁷A bɔʼɔ sáyké, Zezú sa: «Simɔŋ gun a Zâŋ, mɔ zi mí lé?» Law a Píyɛ́r yírí, ɓayhí̧lé Zezú vbí nɛ́ ɓay bɔʼɔké sáy ɓá: «Mɔ zi mí lé?» Dáy a ké sa hí̧ Zezú: «Gáŋmbây, mɔ tu hɛ̧ too, dáy mɔ tu ɓá a béláké ɓá mi zi mɔ́.» Zezú sa hí̧ nɛ́ ɓáy: «Mɔ́ koro mbólé a mǐri̧.

¹⁸Katína mi sa gbátɓay hí̧ mɔ́: Gelka mɔ pa̧n ɓá kaban njuku ɓáy, mɔ ŋgá̧ hɔ́ʼɔ tûl gárí a mɔ̌ ka mûn nɔ́, a sé gelka mɔ ziy. Dáy mɔ kpɔʼɔrɔ dá lé, mɔ e gbaŋ ndɔ̂ʼɔ rá njuku a féké e ŋgá̧ hɔ́ʼɔ tûl gárí a mɔ̌, dalé, ké e ɓá mɔ́ sé gelka mɔ zi yáy.»

¹⁹(Zezú saɓay nɔ́rí̧ nǎŋ, ɓay tɔ́ʼɔ a̧ní Píyɛ́r e ziŋ hûl ɓay a hí̧ hɔ̧́na hí̧ Gáŋvbôn.) Falké Zezú sa hí̧ Píyɛ́r: «Mɔ́ tɔ́ŋ mí!»

²⁰Píyɛ́r kí nûn nɛ́ dáy, a kó gunbɔʼɔ a ǎ̧w ka Zezú zi nɛ́ mambáy ka fal a kuriri, ɓá mɛ̌ nɔ́ a kú kaw sɔ̧́lâʼa, a ké yɛrɛ sé gel a Zezú, ka a vbí nɛ́ ɓá: «Gáŋmbây, a gé ɓá njuku ka e zé mɔ́ lé?»

²¹Píyɛ́r kó nɛ́ dáy a vbí Zezú: «Gáŋmbây, ka mɛ̌, a̧hí̧ e ziŋ nɛ́ lé?»

²²Zezú fere a sa: «Mǐ, mi zi ɓá ké kaw ka ndísɛ̌ʼɛ ka̧ réna a mǐ, a̧hí̧ kó mɔ́ a ɓilké lé? Mɔ̌, mɔ́ tɔ́ŋ mí!»

²³Nǎŋnɔ́ ɓayké ma gelri too a bazeŋ a njukuri ɓá gunbɔʼɔké nɔ́ tí hûl yá. A tu ɓá Zezú zi sa hí̧ Píyɛ́r ɓá: «Ké tí hûl yá yá.» Ké sa ɓá: «Mǐ, mí zi ɓá ké kaw ka ndísɛ̌ʼɛ ka̧ réna a mǐ, a̧hí̧ kó mɔ́ a ɓilké lé?»

²⁴Ɓá mɛ̌ gunbɔʼɔké nɔ́, pé ɓá njuku ka kó, ka tu hɛ̧ kéri too, ka a ɗé Mbété nɛ́. Nǎŋnɔ́ ná tu ɓá ɓayri a ké sáy ɓá gbátɓay.

²⁵Zezú niŋ hɛ̧ a fékéri ɓá a ŋgɛ̧́náké ɓáy. Ɓá njuku ké ɗé hɛ̧kéri mbêw mbêw too lé, a kɛrɛ a mǐ, tísiri nɛ́ too, zi ma hol Mbétékéri a kú e ɗénáké yá.