Read Capanahua Zâŋ 3 Bible Online

Zâŋ 3 - Capanahua bible

Zâŋ 3

¹Fariziyɛ̧́ a há̧na rɛŋɛ́ ɓá Nikodɛm, ké kaw ɓá mbêw a ɓil a mbây a Juyífri.

²Ké gí ziŋ Zezú a sû̧ŋ, a sa hí̧ nɛ́ ɓá: «Gáŋnjuku, rú tu ɓá Gáŋvbôn pé, pé mɔ́ ɓay a mɔ́ gí tɔ́ʼɔhɛ̧ hí̧ rú, ɓayhí̧lé njuku a há̧na zi ma niŋ hɛ̧sáʼama ɓá báŋké ka mɔ kaw niŋáké, ka Gáŋvbôn mí zi tí kuu mɛ̌ nyáy.»

³Zezú fere a sa hí̧ nɛ́: «Katína mi sa hí̧ mɔ́: Kú mí zi mbuŋ njuku ɓá a féké yáy, ké tí kó Pû a Gáŋvbôn nyá.»

⁴Nikodɛm vbí nɛ́: «A̧ní rá̧ kú e rembuŋ njuku ka hɔ̧́ dáy ɓá mbuŋa a féké ɓáy lé? Ké zi ma ri ɓil a mâa a mɛ̌ ɓá a féké, a kú rembuŋ nɛ́ ɓáy mbaa?»

⁵Zezú fere a sa: «Katína mi sa hí̧ mɔ́, njuku a há̧na zi ma ri Pû a Gáŋvbôn, a kú mí zi mbuŋ nɛ́ ka ŋgboro a mbii rá̧ Têm Pukí yáy.

⁶Njuku a kú mbuŋ ka ŋgboro a hay mûn, ɓá njuku, a njuku a kú mbuŋ ka ŋgboro a Têm a Gáŋvbôn, ɓá Têm.

⁷Dáy, mɔ́ ná kaw yér ɓay hɛ̧ ka mi sa hí̧ mɔ́ ɓá: “Belɓá kú mbuŋ wǎyri too ɓá mbuŋa a féké ɓáy.”

⁸Kúna ku ɓá báŋké a ké ziy, mɔ́ lá garaké, a zi tu gel a ké gírú malé kaw serú yá. Nǎŋnɔ́ pé e niŋ ziŋ njuku ka ziŋ mbuŋa ka ŋgboro a Têm a Gáŋvbôn.»

⁹Dáy Nikodɛm sa hí̧ nɛ́: «Nǎŋ dáy hɛ̧ké e niŋ a̧ní lé?»

¹⁰Zezú fere a sa: «Mɔ̌, ka ɓá gáŋnjuku tɔ́ʼɔhɛ̧ ka tísiri a Izirayɛ́l, mɔ zi tu hɛ̧ nɔ́rí̧ nyá lé?

¹¹Katína mi sa hí̧ mɔ́ gbátɓay: Rú kaw saɓay a hɛ̧ ka ná tuy, rá̧ hɛ̧ ka ná kóy, dáy i zi zibɔʼɔ ɓay a ɓurú yá.

¹²I zi láɓulaw hí̧ mí nyá, gelka mi saɓay a hɛ̧ a tísiriri hí̧ wǎyri. Dáy, i niŋ a̧ní rá̧ a láɓulaw hí̧ mí, ka mǐ, mí saɓay a hɛ̧ a nûnalêri hí̧ wǎyri lé?

¹³Njuku a há̧na mbêw ka he sé nûnalê zi tí yá, ɔ ɓá Gun a njuku hɛʼɛ ka ɗere gí tísiri.

¹⁴Ɓá báŋké ka Mɔyíze gbaŋ sôy sé sâa ka lawkɔ́r, nǎŋnɔ́ kɔ́, belɓá kú gbaŋ Gun a njuku sé sâa,[1]

¹⁵ɓay a njuku ka láɓulaw hí̧ nɛ́y, ké ziŋ ndísɛ̌ʼɛ dát.

¹⁶Ɓayhí̧lé, Gáŋvbôn zi njuku a tísiriri mambá, dáy a hí̧ Gun mbêw a mɛ̌, rá̧lǒo njuku mí láɓulaw hí̧ nɛ́ lé, ké ɓɔ́l yá, ké ziŋ káwa ndísɛ̌ʼɛ dát.

¹⁷Gáŋvbôn katína, zi pé Gun a mɛ̌ gí tísiri ɓay a ké gí walɓay kɔ̧ tûl njukuri yá, dáy ɓay a njukuri kú ziŋ pɛ̧́na ka ŋgboro a mɛ̌.

¹⁸Njuku ka láɓulaw hí̧ Gun a Gáŋvbôn, kú tí walɓay kɔ̧ tûlé yá, a njuku, ka zi láɓulaw hí̧ nɛ́ nyáy, kú walɓay kɔ̧ tûlé dá, ɓayhí̧lé, ké zi láɓulaw hí̧ Gun mbêw a Gáŋvbôn nyá.

¹⁹Nǎŋnɔ́, í kó báŋké ka walɓayké e niŋáy: Geltáŋa gí tísiri, dáy njukuri zi tirí̧ma ndé geltáŋa, ɓayhí̧lé péna niŋa a kuriri zi belyá.

²⁰Njuku ka niŋ hɛ̧ belyáy, ŋgú geltáŋa, ɓayhí̧lé, ké erú ka wɔ́w, ɓay a ɓékéhɛ̧ a mɛ̌ri̧, ké zi ná tɛ̧́ kɔ̧ kála.

²¹Dáy a njuku ka tɔ́ŋ gbátɓay, gí ɓil geltáŋa, rá̧lǒo kú kó péna niŋa a mɛ̌, a ké niŋ ɓá táŋáké ka ŋgboro a Gáŋvbôn.»

²²A falké, Zezú kuu gunbɛʼɛri sé ɓil kaw a Judé. Ké gé kaw kuu kuriri nâm kpay, a ɓá njukuri nyá batêm.

²³Zâŋ kɔ́ ɓá njukuri nyá batêm ka Enɔŋ a gbaŋa Salîm, ɓayhí̧lé mbii ŋgɛ̧́ a gelké mambá. Njukuri gí gé lé dáy, ké ɓá kuriri nyá batêm.

²⁴(Katína lé, kú pa̧n ŋgbá Zâŋ ka̧n vûn sɛl yá ɓáy.)

²⁵Dáy gunbɔʼɔ a Zâŋ a fékéri tí táhá̧narí̧ kuu Juyíf a há̧na, sé tûl sáŋna mɔny mûn.

²⁶Kú sé ziŋ Zâŋ a sa hí̧ nɛ́ ɓá: «Gáŋnjuku, mɔ yɛʼɛrɛ njuku a há̧na nɔ́, a kaw kuu mɔ̌ a helkála mbii a Jurdɛ́ŋ, njuku nɔ́ ka mɔ saɓay a mɛ̌y? Ké kaw ɓá njukuri nyá batêm, dáy njukuri ɓá ŋgɛ̧́náké gé ɓá gé lé!»

²⁷Zâŋ sa hí̧ kuriri ɓá: Gáŋvbôn mí zi hí̧ njuku hɛ̧ há̧na nyáy, njuku zi ma ziŋ hɛ̧ a há̧na mbêw yá.

²⁸Wǎyri, i tu ka mûn a wǎyri kɔ́, a mi sa ɓá: «Mǐ, mi zi tí ɓá Kiris yá, dáy kú pé mí ɗambɛlɛ.»

²⁹Njuku ka wûny ɓá a mɛ̌y, ɓá njuku nyá wûny, dáy mbáŋa a njuku nyá wûny, ew gbɛ́ŋɛ́ ɗɛ́ŋ a láɓay a mɛ̌, ké mbá a lawrína, ɓay a ké lá kɔŋ a njuku nyá wûny. Ɓá lawrínaké nɔ́ pé e ka gel ní, nǎŋnɔ́ mi mbá a lawrína.

³⁰Belɓá ké hɔ̧́ sé mbɛl, a mǐ, mí resé fal.

³¹«Njuku ka gí a sâay, e ka tûl hɛ̧ri̧ too. Njuku ka e a tísiri kaw ɓá njuku a tísiri, a sa ɓá ɓay a hɛ̧ a tísiri. A njuku ka gí a nûnalê (e ka tûl a njukuri too.)

³²Ké saɓay a hɛ̧ri̧, a ké kó ka a láy, dáy njuku a há̧na mbêw zi nyá ɓayké yá.

³³Dáy njuku ka nyá ɓay a mɛ̌, sa ɓá táŋáké ɓá Gáŋvbôn sa gbátɓay.

³⁴Njuku ka Gáŋvbôn pé nɛ́y, saɓay a Gáŋvbônri̧, ɓayhí̧lé Gáŋvbôn hí̧ nɛ́ Têm Pukí a mɛ̌ ɓá ŋgɛ̧́náké.

³⁵Bâa zi Gun dáy a ɓá hɛ̧ri̧ too kɔ̧ ɓil ndɔ̂ʼɛ.

³⁶Njuku ka láɓulaw hí̧ Gun e ziŋ ndísɛ̌ʼɛ dát, a njuku ka zi láɓulaw hí̧ Gun nyáy, tí ziŋ ndísɛ̌ʼɛké nɔ́ dát nyá, dáy ɓá hɛ́rɛ a Gáŋvbôn pé e ɗere kɔ̧ tûlé.»